منتدى أنا سوداني

مرسل: **الاثنين 2009.11.16 1:54 pm**

كنت طالبا في جامعة القاهرة فرع الخرطوم
وكنت طالب مشاغب لدرجة انه الفرع (كما كان يسمونه في السابق جبته بعد تلتلة ) يمكن 3 سنين دي عوادة لدرجة سموني اصحابي ( الولوف)
وكنت بجاوبهم وانا بضحك (أصلو الولف كتال )
غايتو بي جاي بي جاي وصلت تالتة جامعة وماعارف وصلت تالتة دي بعد كم سنة
المهم وصلتها شي بالبخرات وشي نقل من الكتاب وشي اكب الزوقة مع الامتحانات متعلل بالمرض
عموما مشيت لغاية الداهي الاسمو (السمي فاينال ) دا
اصحابي المعاي زمااااااااااااااااااااااااااااااااااان بقو يدعموني من عرق جبينهم بعد ما اتخرجو واشتغلوا.
وكان في العادة بيجوا يشوفو الحنان الجديد في الفرع خصوصا بنات تجارة والباقي خسارة
- يا كلينكو ( دا لقبي طبعا ) شنو مانويت تتخرج
- لو اتخرجت انا تلقوا ليكم موضوع وين
- انت بس اتخرج والموضوع ساااااااااااهل (دا طبعا حوار مع صاحبي مصطفي درش ) كان من الشباب الدخلوا الجامعة معاي هسي بسوي في المعادلة وطبعا لما يجي الجامعة كا بيبسطني جدا بمداعباته وجيبه
- شوف يادرش انت طبعا بتعمل فيها جاييني انا لكن انا عارفك جاي للبرلومات رابط كرفتتك الواحدة دي
- دي حسنتي طيب تاني النجيك
يمش ويزعل وبعد يومين راسه يتقطع تاني يجي راجع
على العموم انا كسبان حتى لو ماجاييني انا لكن المهم بديني اقل شي 5 جنيه ويمش........
الدفعة الجديدة تجارة جات

انا خلاص وصلت تالتة وعامل فيها سنير
دكتور يسري المصري بتاع المحاسبة قال مداعبا (ايه ياقدع انت مش خلاص حاتودعنا ولا ذي كل سنة)
- يادكتور انا عاوز اودعكم بس انتو مابتقدرو على فراقي
فيضحك دكتور يسري ويواصل ( برضو حاسأطك في المحاسبة )
- عادي يعني حاتسقط جنين من بطني .
- والله انت مش بشر الله ياخدك ويريحنا من خلأتك دي
-ثم نضحك سويا
يلا بجيكم راجع

مرسل: **الاثنين 2009.11.16 2:16 pm**

ههههههههههههههه والله دي قصص لكن يخوي شد حيلك وابقى مارق الناس فاتووووووووووك

مرسل: **الاثنين 2009.11.16 2:21 pm**

sf77rm كتب:ههههههههههههههه والله دي قصص لكن يخوي شد حيلك وابقى مارق الناس فاتووووووووووك

ياعمك بيقولو العتبة على الراوي وصاحبنا البقص في القصة دي لو سمع ضحكتك دي مابتم لينا الشمار
تشكرات ملايين ملايين على المرور يازوق

مرسل: **الاثنين 2009.11.16 2:59 pm**

خلاص سحبنا الضحكة بس بلييييز خليه يكملها

مرسل: **الثلاثاء 2009.11.17 6:55 am**

الدفعة الجديدة تجارة جات
وجاء الخير كلو معاها
ياخ مامعقول ديل عزلوهم ولا ياتري دي صدفة
كل بنات الدفعة تقريبا حلوين حلاوة
يازول اتخرج شنو والله الاتخرجو دقسو
ياكلنكو ياود تنشن على واحدة من دول وتقضي معاها السنتين دول في تبات ونبات
وبعدين نخلف صبيان وبنات
بس ياها ذاتها دي مانجمة الدفعة
كل الناس دايرين ودها وللاسف كلينكو منهم
انا اكيد هالك هالك مكتول في ضل بيتهم
يلا بس بديت اخطط
اول الخطط تصاحب صاحبتها وتهمشها هي دي قالها لي واحد عنده خبرة في الجكس
يلا أجربها وأشوف
هسي اخليكم وبجيكم راجع

مرسل: **الثلاثاء 2009.11.17 12:32 pm**

دخلت شمال تووووووووووووش طوالي في صاحبة أريج واسمها هويدا
البت لاحول الله
لقيتها بس شغالة (ممكن تعزمني سندوتش بيرقر ياكلينكو ) (انا محتاجة عصير ياكلينكو)
قلت يارب يمكن واحد غشاها قال ليها الود دا عنده قروش ولا مفتكرة انه انا فعلا اتدشدشت فيها
المهم الحكاية دي لما كترت لقيت نفسي خسران كل مصاريفي والمصاريف البخنصرها من اصحابي قلت خلاص اشوف خطة تانية للوصول لقلب أريج ووصلت لقراري النهائي بعد يوم كدا في الكافتريا فاجأتني هويدا بسؤال ( كلينكو عاوزاك في موضوع مهم )
- خير
- كدي اول اعزمنا كبايتين شاي بعدين نتكلم
- مامشكلة عادي انا اصلا شغال مشروع كفالة المفلسين الزيك دا
بعد ماشربنا الشاي وفي اخر رشفة كانت الرشفة تحرق حلقي لما قالت لي
- كلينكو أنا عايزاك تحدد شكل العلاقة البينا دي وتختها في اطاراتها الرسمية
كانت دي اخر كلمات سمعتها منها بعدها انا قلت ليها شنو مامتزكر
كل المتزكروا انه قلت ليها (تكون علاقتنا في اطار الخوة وبس ) والبت انفقعت بكاء
دي اللحظة الحاسمة الخلتني اغير خطتي عشان اصل لقلب أريج طلعت الكرت الأحمر لهويدا
واليوم داك نمت بدون فتة عمك عبد الله
يلا نشوف الخطة نمرة 2

مرسل: **الثلاثاء 2009.11.17 12:50 pm**

كانت الخطة الجديدة هي معرفة هوايات أريج بتحب شنو عشان ابقى زيها
ولسواد حظي لقيت ليك البت عازفة ماهرة على الأورغن وانا العمري ماشفت لي اورغن الا في التلفزيون .
وعارفين هوايتها التانية شنو رعاية الزهور والرسم.
وانا والله مابعرف ولا شي - حتى في الكورة دي مشاتر يارب الحل كيف
ايوااااااااااااااااااا لقيتها
طالما هي بتحب العزف أكيد بتعرف كل أنواع الموسيقي
وطالما انها بتعرف كل انواع الموسيقى اقوم انا اشتري لي كاسيت موسيقى واهديه ليها
شاورت لي واحد صاحبي كدا عامل فيها رومانسي قال لي اشتري ليها الكاسيت بتاع (مونا مور)
انا في البداية افتكرتها أغنية لنور الجيلاني لكن قالوا لي دي موسيقى كلاسيكية
المهم بعد بحث مضني لقيته عند مكان واحد بتاع موسيقي غربية في السوق العربي
اشتريته والتكلفة خلوها في سركم.
شلت الشريط وانا فرحان بشكل جنوني ماهو دا أقصر طريق لقلب أرج
وبعد شلت الكاسيت بقيت أفتش للمناسبة
بس استغليت الفرصة بتاعت وجودنا يوم ومعانا هويدا في الكافتريا مشيت لبتاع الكافتريا وهو فردتي
- حسن عليك الله شغل معاك الشريط دا وادينا تلاتة بارد
شغل حسن شريط الموسيقى حاولت القى لي مدخل عشان اخش في أريج
- عارفة يا أريج الموسيقى الكلاسيكية دي مريحة للاعصاب بشكل
- والله انا شخصيا بحب الموسيقى السودانية (اجابت هويدا بالنيابة عنها)
- وانت يا أريج
- انا بحب البوب أند رول وبصورة خاصة ليون ريتشي.وأحيانا بحب بوب مارلي
-ليون ريتشي دا مش فنان نرويجي
ضحكت أريج - نرويجي ياكلينكو (وضحكت تاني )
- ماقلت ليك ماتتشوبر ( قالتها هويدا في بصوت هامس)
أقتنعت أنه الدرب بتاع الهوايات دا طويل
لعنت الكاسيت وأشكال الكاسيت
وقلت أشوف طريقة تالتة

نواصل

مرسل: **الثلاثاء 2009.11.17 3:27 pm**

والله تعبان يا عمك اها كمل كمل,,,

مرسل: **الثلاثاء 2009.11.17 3:57 pm**

قصتك جميلة وشدتني بس وين الباقي

مرسل: **الثلاثاء 2009.11.17 8:25 pm**

هوميي الحقنا بالباقي ما معقول تعلقنا كده

مرسل: **الأربعاء 2009.11.18 11:09 am**

sf77rm كتب:والله تعبان يا عمك اها كمل كمل,,,

حااااااااااااااااضر ولا يهمك اها جيتك نكمل ليكم شكرا للمتابعة ياراقي احساسك

مرسل: **الأربعاء 2009.11.18 11:11 am**

moonlight كتب:قصتك جميلة وشدتني بس وين الباقي

هلا بضو القمر
طبعا الباقي حاكملوا ليكم بس خليك قريبة وماتبعدي
بس اوع تكوني من صاحبات اريج
تقومي تفك ليها الشمار

مرسل: **الأربعاء 2009.11.18 11:12 am**

بسمة الحياة كتب:هوميي الحقنا بالباقي ما معقول تعلقنا كده

ما انا ذاتي معلق لانه أريج أختفت في ظروف غامضة
قصدت المداعبة لدوام المحبة
انشا الله نكملها
ولا يهمك ياعسل

مرسل: **الأربعاء 2009.11.18 11:18 am**

ابدااااع يا رااااقي

ف انتظار سطورك ,,,,

مرسل: **الأربعاء 2009.11.18 11:27 am**

لغاية السنة الرابعة والأخيرة لم أتمكن من لفت انتباه أريج
بل كانت تعتبرني زي وزي اي زميل ليها
بالرغم من الخسائر المادية والمعنوية الفادحة من عزومات كفتريا وغيره
يوم من الأيام
يوم شكله غريب جدا
قلت يازول بطل الحاجات البتسوي فيهادي
أحسن حاجة تقوم تصارحها عديل
لكن الطريقة كيف
بديت افكر والدنيا ماشة على امتحانات نص السنة
اي قبل التخريج بفترة
بدون مقدمات شفتها جاية وعاها صاحباتها
- أريج
- نعم ياكلنكو اها في شنو شمار جديد
- لا والله بس كنت دايرك في موضوع كدا
- خير
- بس براك
- الساعة واحدة كويس
- كويس جدا انا امش البيت واجي وانت تكوني خلصت من التزاماتك
- اتفقنا

الساعة واحدة جات كنت بحسب كل ثانية من نهاية المحاضرة لغاية ماقابلتها
- خير يازول مالك قالتها اريج بعد ماقعدنا في النجيلة
- أريج أنا .................
بواصل ليكم

مرسل: **الأربعاء 2009.11.18 11:38 am**

ألحقنا ياهومي ابدعت لاكن شكلها البت اريج مفتحه
طيب مادام هي بتحب الموسيقي انتي ماكنت تتعلم الرقص
يعني النطيط هي تعزف وانت تنطط
يلا كمل سريع
والله الواحد في الدوام قعد يفكر
ياربي هومي عمل شنو
القصه وصلت وين

مرسل: **الأربعاء 2009.11.18 12:21 pm**

هوبة كتب:
ابدااااع يا رااااقي

ف انتظار سطورك ,,,,

هلا هوبة والله نورتي البوست وينك مشتاقين
يلا تابعي معاي خلينا نكمل.
شكرا ياراقية

مرسل: **الأربعاء 2009.11.18 12:27 pm**

الضراع كتب:
ألحقنا ياهومي ابدعت لاكن شكلها البت اريج مفتحه
طيب مادام هي بتحب الموسيقي انتي ماكنت تتعلم الرقص
يعني النطيط هي تعزف وانت تنطط
يلا كمل سريع
والله الواحد في الدوام قعد يفكر
ياربي هومي عمل شنو
القصه وصلت وين

الضراع ياخوي دا ما انا
انا ماحاضر زمن الفرع
لكن ثبتوها فيني
اها القوا ليكم زول يتمها ليكم

ولا اقول ليك
شمارات بس كدا بتمها

مرسل: **الأربعاء 2009.11.18 12:48 pm**

- انت شنو مالك خير
ردت اريج
- انا .......... انت طبعا عارفة
- عارفة شنو
- باختصار ياخي طبعا انا على وشك التخريج.
- عارفة القدرك هسي بأولاده (ردت ضاحكة)
- ايوااااااااااااااااا جبت المفيد
- مافهمت
- والله يابت الناس انا عندي نية بعد التخريج مباشرة اتزوج
- والله
- جد والله
- واحوالك المادية كيف
- والله نحمد الله عندنا المكفينا (دي طبعا نظام قشرة وكدا )
- اها ولقيت سعيدة الحظ دي (قالتها ذي العايزة تتخلص مني)
- ايوة
- منو
- انت يا اريج (رميتها بردلوووووووووووووووب كدا)
نص ساعة البت ساكتة التقول جابو ليها خبر وفاة
- رايك شنو
- راي شنو انت فاجأتني
- يعني ماكنت حاسة
- أبدا والله زيك وزي اي سنير
- طيب انا أسف
شوية ودميعات نزلن منها انا شفت الدمعات دي بس وخفت بقيت اعتزر
من اليوم داك قررت ازاكر - اتخرج
وبعدين ارجع ليها والله ما اخليها بت الـ ....................)
اها لغاية ما اتخرج بجيكم
نواصل

مرسل: **الأربعاء 2009.11.18 1:15 pm**

اها ياهومي لما دميعاتها هي نزلن صاحبك
دمعاتو نزلن ولالا
واصل يازول شوقتنا

منتدى أنا سوداني

دا كلو عشان أريج

دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج

رد: دا كلو عشان أريج