منتدى أنا سوداني

نهر المحبه كتب:تسلم ود الدويحي على مقولتك الراقيه
ماذا يعني لك قلب المراه

رءوف كتب:نهر مع احترامى الشديد ليك وتقديرى الزائد لشخصك الذى طالما اتى لنا بمواضيع شيقة وجميلة واستفدنا منها كثيرا وان شاء الله سوف يكون صداها مسموعا لامد طويل
اها بعد المقدمة دى عاوز اقول ليك مالك بقيتى تلخبطى كدة لم الواحد اقول الكاتب البوست دة مانهر
المراة شنو الانتى عاوزانا نتكلم عنها وعن مشاعرها وعن احاسيسها وعن قلبها ؟؟
وين قلب المراة واحاسيسها والدنيا مليانة عزابة ؟؟ كدى حدسينى ؟قولى اى حاجة دافعى عن قلبها الحنين دة وعن كتلة المشاعر المتراكمة ومتدفقة من المراة دى ... ورينا امكن نحنا غلطانين وماعارفين حاجة يعنى ....هسع المنتدى دة فيهو كم واحد قاعد اليوم كلو يمص فى اللالوب ويشخط فى الارض ويحسب فوق حساباتو لم مخو اتلحس وكلو بى سبب المراة الانتى جاية الليلة من صباح الرحمن دة عاوزانا نذكر محاسنها وشهامتها ووقفتها وكمان مشاعرها ..تصدقى يانهر لم تقولى المراة عندها المشاعر الانتى بتقولى عليها دى بصراحة انا لو كنتى جمبى ماعارف كنت ح اعمل فيك شنو اذا جاملتك ممكن اضربك ضربة تغير ليك ملامحك .. تقولى للبنات اتنازلو شوية وسيبو البوبار الانتو عاملنو دة ولا تقعدى تشكرى فيهم ساكت بلا سبب والبنات اخر من يتشكر

مهاجر في البلد كتب:الاخت نهر المحبة

المثل بقول المرة كان فاس ما بتشق الراس
وطبعا المثل دا قاصدين بيهو انو المرة لا بتجدع ولا بتجيب الحجار او انها ليس لها في العير ولا في النفير بمعنى انها قاعدة ساي

اما رأيي الشخصي ان المرأة هي الام التي حملت ووضعت ورضعت وربت وسهرت الليالي والمرأة هي الاخت الطيبة الخلوقة والمرأة هي الزوجة التي اجد عندها الحنان والاحاسيس الجياشة واجد عندها نصفي الآخر ... والرسول الكريم صلى الله عليه وسلم في خطبة حجة الوداع قال يوصي المسلمين على النساء
( إستوصو بالنساء خيرا) ... ورفقا بالقوارير
وهنالك ايضا مقولة او حديث الله اعلم تقول( إنما النساء شقائق الرجال، ما أكرمهن إلا كريم، وما أهانهن إلا لئيم )
ولكنها عندما تجتاحها غريزة الغيرة تتحول الى كائن آخر غريب عن هذا الكوكب فعند تلك اللحظة يمكن ان تقتل وتنتقم غير آبهة بما يحدث بعد ذلك
وقلب المرأة هو جوهر مكوناته المحبة والطيبة والعطف والحنان
ولكن كل الكلام اعلاه عن المرأة او الانثة التي تفهم معنى كونها امراة وتحفظ نفسها من كل سوء ولا تتشبه بالرجال في اللبس والسلوك
وقيل ان حسنة الحياة الدنيا - المرأة الصالحة (الزوجة)
والكلام عن حواء يطول ... فهي نصف الحياة بل نصفها الحلو ...

والله اعلم (معليش بريتك بري شديد )
شكرا جزيلا نهر المحبة على هذه الفرصة الجميلة ( طيب ادونا رايكم انتو عن آدم )

نهر المحبه كتب:ادم قلبه طيب عندما يكون شخص عاقل
ولان حواء قد تصيبها احيانا بعض الغيره والتي في اغلبها غيره حميده
يحتويها بكل عقلانيه ويهدىء من شخص حواء
ربما احيانا يكون عباره عن مخباء لبعض مساوىء حواء