منتدى أنا سوداني

مرسل: **السبت 2009.5.30 12:37 pm**

بسم الله الرحمن الرحيم

المسلسل تأليف و اخراج : محمد نعيم _ بكور

الحلقه الاولى (ابو نعيم عريس)

فى اليوم ده لقيت كم مكالمه فائته من الاخت هنو كنت نائم طبعا ، المهم رجعت ليها قالت لى اجهز عشان نمشى عقد محمد نعيم .

بعد ما وصلنا وسلامات والف مبروك جانا الغداء ، انتهيت بدرى وقلت الحمدلله فاجئنى ابونعيم بكلمتين ( حررررم تاكل) اتخيلو زول عريس ليه ساعه بس ( العقد الساعه 2 و الغداء الساعه 3) قلت الزول عريس ما فى داعى جازفت حته لى لقمتين وقمت براحه .

انتهينا من الغداء جاء وقت الجرتق و ما ادراك ما الجرتق قعدت فى ركن مع هنو ( قلت احنك شويه:D ) القى العريس جنبى زى العمل الردى

وزوجتو فى الكوشه قلت ليه يا ابونعيم امشى اقعد مع مرتك حركتك شينه (داير افكفكو طبعا) قال لا انا مشتاق ليكم قلت ليه خلاص يا سيدى براحتك خليك قاعد دقيناها ونسه لحد قبل المغرب و اتخارجنا.

النهايه

الحلقه القادمه (محمد نعيم فى المنسقيه)

مرسل: **السبت 2009.5.30 12:43 pm**

الحلقه التانيه (ابونعيم فى المنسقيه)

صاحبنا طلع من البيت زى الساعه 6صباحا الى منسقيه الخدمه الوطنيه عشان يجدد البطاقه ، قعد استنى ناس الارشيف عشان يكمل اجراءاتو ليتفاجأ انو الارشيف شبكتو خربانه من 28\3 (انتظرو بوست فى النقطه دى) انتهى المنسقيه مشى على المغتربين عشان بعض الاجراءات بسأل وين الظباط الجواب فى الفطور لحدى الساعه 11:30 دق لى تلفون عشان نمشى الخطوط الحجز و كده .
حصل شنو فى الخطوط ..........

فى الحلقه التالته

مرسل: **السبت 2009.5.30 12:55 pm**

الحلقه التالته ( محمد نعيم فى الصومال)

سر اسم هذه الحلقه بعد الاعلان:D

اتحركنا من المغتربين لى مبنى الخطوط السعوديه لتأكيد الحجز .
وصلنا الساعه 12 بعد بدأ الاجراءات مشى الخزينه عشان يورد الكاش رجع عشان يأكد الحجز وبالفعل اكد تذكره زوجتو لما جاء يأكدو الحجز حقو فاذا بالموظفه تخطئ وتحجز له تذكره فى طائره ذاهبه الى الصومال :D .
بدأ ابو نعيم يجوط و يكورك وانا مستنى فى الكرسى بتكلم فى التلفون بعد انتهيت من التلفون مشيت اشوف الحاصل شنو فحكى لى الحاصل بصراحه ضحكت بدون ما يشوفنى وفرحت عشان حيقعد معانا شويه . جى واحد كده انا ما ارتحت لييه وفعلا وللاسف صلح الخطأ وقال ليه تستلم التذكره بعد يومين . الوقت ده الساعه عملت 4 قلنا نفطر:D مشينا المكتب لى هنو اللى اكرمتنا .

انتهينا ورجعنا بيوتنا الساعه 5 . الساعه 6 اتصل على ابونعيم من الجزيره عشان اجيب لييه الجواز اللى نساه فى الخطوط .

استلمت ليه وانا ماشى الجامعه فى اليوم التانى.

النهايه

الحلقه القادمه ( لقاء حافظ)

تخريمه

انفع مؤلف ولا لأ:D

مرسل: **السبت 2009.5.30 1:03 pm**

الحلقه الرابعه (لقاء حافظ)

فى اليوم اتوجهناعلى الخطوط عشان نستلم التذكره .

استلمناها ومشينا كم مشوار خاص به (محمدنعيم) انتهينا الساعه 2 على ما اعتقد .

اتصلت بى حافظ وطلبت نقابله وبالفعل اتقابلنا الساعه 3 وجعانين طبعا (عريس جدييييد يفطر الساعه 3) المهم عزمنا حافظ على فطور لينا و( انا ومحمد نعيم ) وغداء ليه . محمد نعيم الغتيت جاب الاكل كلو لحمه وهو عارف انو انا ما باكل لحمه (نباتى) انا اللحظه ديك جعااااااااان جازفت لى لقمتييين رجاله وقمت استنيت العصير الحمدلله كان جامبو وشبعنى . اتونسنه شويه مع حافظ و اتخارجنا على بيوتنا .

مرسل: **السبت 2009.5.30 1:10 pm**

الحلقه الاخيره ( الوداع)

فى اليوم ده صحيت الساعه 10 تقريبا و اتصلت على محمد عشان نرجع العربيه لى محل الليموزين .

من هناك مشينا المطار انتظرنا وصول زوجتو و الاخ باسر و الغالى المايسترو بعد وصولهم اتونسنا الى ميعاد دخوله .

لما جاء وقت الوداع ودعناه انا طبعا ودعته بى بسمه ووجه بشوش و انتظرت لغايه ما رجعت البيت وبصراحه كده بكييييتوفقده بشددددده .

دى كانت حكايه محمد نعيم فى السودان

مع تحياتى فى الاخراج بكور

المسلسل بطوله (محمد نعيم - بكور)

تمثيل ( هنو - حافظ - باسر - المايسترو)

الى اللقاء فى الجزء التانى ( السودانى الاصيل فى السودان )

مرسل: **السبت 2009.5.30 4:57 pm**

اشكرك على المسلسل

مرسل: **السبت 2009.5.30 9:40 pm**

[list]
تشكر محمد على المرور

ده يا شباب كل الحصل مع محمد نعيم فى السودان من يوم الجمعه لى يوم الجمعه يعنى حقيقه وليس تأليف:D
[/list]

مرسل: **الثلاثاء 2009.6.9 11:59 pm**

طبعا في بعض التفاصيل التي تنفع فلم عديييييييل كدي حصلت معي انا و ود عمي لما جينا المطار بكور لا يعرفها هع هع هع,,,,
معليش السلام عليكم معاكم باسر لمن لا يعرفني و لمن يعرفني ,,, الشووووووووووق بحر و محيطات و ارض و سماء ,,,,,,

المهم انا و بكور و محمد نعيم كنا في الصالة في المطار ود عمي كان برا ,,,
بعد شوية ضربت ليهو ,,, وين يا زول , قال لي تعال لي تحت شوية ,,,, في شنو يا زول , قال لي بس انت تعال ,,,,
مشيت تحت لقيت ليك الشاب دا و جمبو شرطي بتاع حركة ,,,
قال لي يا زول حصل كدا وكدا و خدشت لي عربية خدشة بسيطة و طبعا ما عندو رخصة ,,,,فقام بتاع الحركة شال منو المفتاح بتاع العربية و انتظرنا لحدي ما جا صاحب العربية التانية ,,,,,,, هع هع هع ,,,,,,,,
جا بتاع العربية التانية و الخدشة لا تذكر ,,, بتاع العربية التانية وقف في صفنا ,,,
لكن باقي الايصال لانو ود عمي ما عندو رخصة ,,,,
انا طبعا الشرطيين عامة بكرهن ليك مووووووت ,,, جطا فيهم جوطة خلوها ساي ,,,,,,و نحن ما كنا شاتيلين قروش عشان ندفع قيمة الايصال ( المخالفة ) ,,, فقام دقس واحد من الشرطيين و ركب معاي عشان يحجزوا العربية في مكان في المطار وريتو الويييييييل هع هع هع ,,, لحدي ما وصلنا و لاقينا واحد تانيي شال مننا المفتاح و ,, اححححححححح تعبت من الكتابة و انتو تعبتو من القراية موش ,,,,
المهم ضربنا لي اصحابنا جابو لينا القروش و نحن قاعدين نتونس مع الملازم الجوة ,,,, اديناو القروش و شلنا مفتاحنا ,,, العربية كانت مقرشة في حوش و لما جينا نديهو القروش كان المخرج من الحوش سالك ,,,, ما مرت دقيقة لحدي ما اديناهو القروش و مشينا للعربية , جا واحد وقف عربتو قدام مدخل اتلحوش و مشى , شفتو الحظ الحلو دا ,,,,, انتظرنا قريب الساعة ما جا ,,,, ما لقا مكان يوقف عربتو الا هنا , و في الوقت اللمارقين فيهو بي دقيقة بس تخيلو دقيقة ,,,,, حظ باسر الحلو,,,,,,,
المهم مللنا الانتظار و الانسان ملول بطبعه ,,, فخطرت لي فكرة جهنمية ,,,,,,,,,,الفكرة كالآتي يا شباب دفرة ,,,,,هع هع هع , ارح يا احمد احمد دا كان ما شاء الله ,,,,,
قمنا دفرنا العربية من الجمبة و تسمع صوت الاحتكاك ذكرني حصة الفيزياء ايام الثانوي , كانت مرض كيف ,
المهم بحرفنة منقطعة النظير مرقت العربية و اتخارجنا ,,,,,,, طبعا و الناس تعاين ساي و نحن ندفر العربية حقت الزول و خروج العربية من الحبس ,,,,,,
غايتو اتعلمت الخلف في طليع العربية ديك ,,,,,,

الكلام دا طبعا عمنا بكور ما عارف الحاصل و لو كان عرف كان دفر مكعنا هع هع هع هع ,,,,,

اها دايرين مخرج ,,,,,,,,,

مشتاقيييين يا جماعة

مرسل: **الأربعاء 2009.6.10 2:32 am**

يديك العافية يا بكور...مسلسل جميل وإنت كنت مخرج متألق... ...

الممثلين كانوا رائعين في أدوارهم... ...

لكن ده كلو كوم...ونـبـاتـي دي كوم تاني...من متين يا أخوي...؟؟...

ولا داير تعمل فيها الود خفيف ولفيف قدام الجكس...ويااااااي أنتو اللحمة دي بتاكلوها كيف...

غايتو دي ما بسألك فيها...دايرة ليها مسلسل براها...

وتحياتي ليك ولي الممثلين المعاك ويديكم العافية...

تحياتي.....ود أزهري..

مرسل: **الأربعاء 2009.6.10 12:48 pm**

ود أزهري كتب:يديك العافية يا بكور...مسلسل جميل وإنت كنت مخرج متألق... ...

الممثلين كانوا رائعين في أدوارهم... ...

لكن ده كلو كوم...ونـبـاتـي دي كوم تاني...من متين يا أخوي...؟؟...

ولا داير تعمل فيها الود خفيف ولفيف قدام الجكس...ويااااااي أنتو اللحمة دي بتاكلوها كيف...

غايتو دي ما بسألك فيها...دايرة ليها مسلسل براها...

وتحياتي ليك ولي الممثلين المعاك ويديكم العافية...

تحياتي.....ود أزهري..

اخى العزيزوالرائع ودازهرى ياخى المسلسل طوييييل انتى غير دى ما لقيت حاجه
خلاصيا سيدى اوريك قصه نباتى دى شنو....

طبعا زواج اختى كان قريب و الفائض كان كميييية من اللحمه يعنى شاى الصباح بى لحمه الفطور و الغدا و العشاء لحمه الوجبات الفى النص لحمه السنده لحمه لمده اسبوعين لحمه بس لمن بقيت ما بحب اكلها او اكتفيت من اللحمه دى كل القصه

ثم ثانيا ما تخاف بخلى ليك ماحجكس المنتدى كلو:D

مرسل: **الأربعاء 2009.6.10 12:54 pm**

basr كتب:طبعا في بعض التفاصيل التي تنفع فلم عديييييييل كدي حصلت معي انا و ود عمي لما جينا المطار بكور لا يعرفها هع هع هع,,,,
معليش السلام عليكم معاكم باسر لمن لا يعرفني و لمن يعرفني ,,, الشووووووووووق بحر و محيطات و ارض و سماء ,,,,,,

المهم انا و بكور و محمد نعيم كنا في الصالة في المطار ود عمي كان برا ,,,
بعد شوية ضربت ليهو ,,, وين يا زول , قال لي تعال لي تحت شوية ,,,, في شنو يا زول , قال لي بس انت تعال ,,,,
مشيت تحت لقيت ليك الشاب دا و جمبو شرطي بتاع حركة ,,,
قال لي يا زول حصل كدا وكدا و خدشت لي عربية خدشة بسيطة و طبعا ما عندو رخصة ,,,,فقام بتاع الحركة شال منو المفتاح بتاع العربية و انتظرنا لحدي ما جا صاحب العربية التانية ,,,,,,, هع هع هع ,,,,,,,,
جا بتاع العربية التانية و الخدشة لا تذكر ,,, بتاع العربية التانية وقف في صفنا ,,,
لكن باقي الايصال لانو ود عمي ما عندو رخصة ,,,,
انا طبعا الشرطيين عامة بكرهن ليك مووووووت ,,, جطا فيهم جوطة خلوها ساي ,,,,,,و نحن ما كنا شاتيلين قروش عشان ندفع قيمة الايصال ( المخالفة ) ,,, فقام دقس واحد من الشرطيين و ركب معاي عشان يحجزوا العربية في مكان في المطار وريتو الويييييييل هع هع هع ,,, لحدي ما وصلنا و لاقينا واحد تانيي شال مننا المفتاح و ,, اححححححححح تعبت من الكتابة و انتو تعبتو من القراية موش ,,,,
المهم ضربنا لي اصحابنا جابو لينا القروش و نحن قاعدين نتونس مع الملازم الجوة ,,,, اديناو القروش و شلنا مفتاحنا ,,, العربية كانت مقرشة في حوش و لما جينا نديهو القروش كان المخرج من الحوش سالك ,,,, ما مرت دقيقة لحدي ما اديناهو القروش و مشينا للعربية , جا واحد وقف عربتو قدام مدخل اتلحوش و مشى , شفتو الحظ الحلو دا ,,,,, انتظرنا قريب الساعة ما جا ,,,, ما لقا مكان يوقف عربتو الا هنا , و في الوقت اللمارقين فيهو بي دقيقة بس تخيلو دقيقة ,,,,, حظ باسر الحلو,,,,,,,
المهم مللنا الانتظار و الانسان ملول بطبعه ,,, فخطرت لي فكرة جهنمية ,,,,,,,,,,الفكرة كالآتي يا شباب دفرة ,,,,,هع هع هع , ارح يا احمد احمد دا كان ما شاء الله ,,,,,
قمنا دفرنا العربية من الجمبة و تسمع صوت الاحتكاك ذكرني حصة الفيزياء ايام الثانوي , كانت مرض كيف ,
المهم بحرفنة منقطعة النظير مرقت العربية و اتخارجنا ,,,,,,, طبعا و الناس تعاين ساي و نحن ندفر العربية حقت الزول و خروج العربية من الحبس ,,,,,,
غايتو اتعلمت الخلف في طليع العربية ديك ,,,,,,

الكلام دا طبعا عمنا بكور ما عارف الحاصل و لو كان عرف كان دفر مكعنا هع هع هع هع ,,,,,

اها دايرين مخرج ,,,,,,,,,

مشتاقيييين يا جماعة

حبيى باسر شنو يا عمك من ديك وعييييييك وين طوالى اختفيت

كان تكلمنى بالحنك ده ياخ ده كان موضوع من امو لكن شكلو كده ال30 حارقاك :D

كويس كده المسلسل عملت حلقه زياده رايك شنو نعرضها فى رمضان:D

مرسل: **الأحد 2009.8.2 8:27 pm**

الاخ بكور راجع ليك بس ارتاح شوية وحاكمل ليك باقي المسلسل

مرسل: **الأحد 2009.8.2 9:16 pm**

القصة حلوة شديد لو في جزء تاني احكي لينا منتظراك

مرسل: **الاثنين 2009.8.3 5:10 am**

محمد نعيم كتب:
الاخ بكور راجع ليك بس ارتاح شوية وحاكمل ليك باقي المسلسل

مستنيك يا قلب بس ما تتأخر

مرسل: **الاثنين 2009.8.3 5:12 am**

عاشقة القمر كتب:القصة حلوة شديد لو في جزء تاني احكي لينا منتظراك

عاشقة القمر الجزء التانى ان شاء الله حيتصور فى رمضان :D و بزياده ان شاء الله وكل يوم فى حلقة انتظرونا

مرسل: **الأربعاء 2010.5.19 12:37 pm**

محمد نعيم كتب:
الاخ بكور راجع ليك بس ارتاح شوية وحاكمل ليك باقي المسلسل

ابو نعيم مستنيك تكمل وينك زغت

و الله جيب ف بالى و قلت اشغلها ليك حبه ... يلا ارح كمل

مرسل: **الأربعاء 2010.5.19 5:59 pm**

حمدلله ع سلامه الموضوع مشكووووور كنترول 3

مرسل: **الأربعاء 2010.5.19 6:04 pm**

بكور كتب:
حمدلله ع سلامه الموضوع مشكووووور كنترول 3

كان غاطس وين ؟

مرسل: **الخميس 2010.5.20 12:14 am**

محمد نعيم كتب:
كان غاطس وين ؟

يغطس محل يغطس خلينا ف ونستنا و تعال تم بطل هرووب

مرسل: **الخميس 2010.5.20 12:20 am**

المسلسل ده كم حلقة

عشان لو طويل ما ابدا اقرا :d

منتدى أنا سوداني

مسلسل محمد نعيم فى السودان

مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان

رد: مسلسل محمد نعيم فى السودان