منتدى أنا سوداني

مرسل: **السبت 2007.3.31 10:24 am**

دي الجرادة القاعدة بترضع في ولد الكديسة
صاحبة الديك والجدادة الحايمة بتكوس في المريسة
والضبانة الزغردت فرحانة بي جيت عريسها
والضب الخاتي سفة يشكي من الظروف العويصة
احييييييييييييييييييييييي انا
دا البمبر قال مصدع من قعاد طول النهار
و فردتو المفراكة تبكي وتشكي من طول الدوار
و الملاح حارقاهو شطة صاري قال ما عاوز هزار
والرغيف فقران وناشف من صف النتظار
و جكسويتي قالت انا ما بغازلها ركبت وش حمار
عاوزاني تحت البلوكنة ليل ونهار
على بالها روميو قالت سيد الرجال
ابيت زعلت تاني ركبت وش حمار
فكيتها الزيها راقدين كتار
*******
تقولي لي سليتك
تقولي لي جفيتك
تقولي لي عفصتك
بعفصك وبعفص حنانك
دبايب وعقارب تداعب بنانك
بتسال عن حالك
وكيفن هو حالك
سالت تمرجي البطاطس ببعادي
تجاهل وقبل لغادي
بحبك لمن بغادي
وبعاتبك بلغة سواقين التكاسي
حبيب مال انا ليش هذا عذاب
حبيب انت في كذاب
انت قول في حب واجد بعدين سوي غير نمونا
انت كنسل حب مالي
انت خرب كل حالي
شنو؟؟؟؟؟
ما عاجبك
ياخيييي ديشك
وديش الحب الخلاني سجينك
وديش الشوق البربط بيني وبينك
===============
شكيتي وبكيتي وقلتي عاوزة موبايل
مشيت وجريت وجبت ليك ستاير
ستاير ومرايل ودواير على قافية موبايل
اوع يا ولية اسمع منك قوايل
حردتي واعترضتي وقلتي ابوكي شيخ قبايل
طيب طالق بالتلاتة ولو في رابعة انا كنت قايل
بس ما عاوزين نعقد المسائل
شوفي احسن الموبايل ولا الستاير

مع تحياتى
نور الاسلام

مرسل: **السبت 2007.3.31 5:26 pm**

[align=center]ود بانقا.. أسمع بقى

يقول شاعر هذه القصيدة أنه في أحد الأيام في مكتبة المين
بجامعة الخرطوم وجد نوت صغيرة عليها رسالة تقول:

"
بت الأمين
حضرت في الموعد المحدد و لم نجدكم
و أنتظرت كثيرا و لم تأتي.. و كانت تلك
مفاجأة الموسم.
التوقيع
ود بانقا
"

فكتب قصيدة يقول فيها

ود بانقا
أسمع بقى
أصلو الحريم ديل دربهن درب الشقى
و إنت مش أول بطل
تطلع قضيتو مطرشقة
و القمرة كان تشابى كان تطلع جبل
ما بتلحقها
---
بت الأمين
يا نجمة الليل الحزين
الفي سماها معلقة
ما ليك حق
تتسدي في ود بانقا
ولدا ظريف
حافظ العلم
حل المسائل و فرتقها[/align][/b][/size]

مرسل: **السبت 2007.3.31 5:28 pm**

[align=center]عبدو

كتبت هذه القصيدة في طالب في جامعة الخرطوم اسمه "عبدو" وكان بحب واحدة لدرجة الجنون
وكان خجولاً فلمّا حكى لزميله في الداخلية عن قصة هذه البنت نصحه زميله بأن يفاتحها في الأمر ،
فرد عبدو :-
"حفضل أكهربها ليك لو جا ملاك يخطبها حترفض وأحسن أكون تقيل أنا زول جميل وقيافة " ...
وفضل صاحبنا "عبدو" يكهرب لحدي ما بطاريتو نزلت وفي النهاية جا مغترب وخطب البت ..
وصار عبدو يكيل وهنالك مصطلح في جامعة الخرطوم متعارف عليه "إذا أحب طالب زميلته
وتزوّجت من غيرو" شاكوش بمعنى آخر ".. بقولوا "أدتو شريط"..
لأنه بيكون مشغل شريط أغاني حزينة.. ينتهي يقلبه بالجانب الآخر.. و هكذا..
و كأن البنت أعطته له..
على أي حال نرجع لي عبدو الذي وقّعه الله مع صاحب بشّع بيهو وألّف فيهو القصيدة دي ..
يمكن نضحك إحنا على الكلام ده ، لكن الكهربجي بتعانا داك يكون حاسي بي شنو!!

في الليلة ديك
القصة ذاتها بقت عليك
يا عبدو وأدوك الشريط
يوم قولنا ليك
أنضم معاها وكلّمها
لكن أبيت تسمع كلامنا
بقيت لميض
وقلتَ.. أحسن أكون تقيل
أنا ما جميل
باكر بعد باكر
بكهربها ليك بي نظرة كتيل
وبقيت تقيل
لامن سقوك موية الغسيل
يوم جيت تنطط زي زمان
وتباري بقعور الشجر
كايس كراسي الخيزران ..
وقعدتَ يا زينة الرجال
كهربجي قال
رفعوا الستار
والبت تجي و تمشي و تلف
مرات تقيف
ومعاها كان زولاً حريف
والوقفة كان وقفة ولف
صاحبنا بالاحساس عرف
وسألتَ والناس كلّموك
ملعون أبوك دنيا أم قدد
بقت البقت
ووقعتَ في شارع الزلط
تبكي وتجعّر
والعيون اتورّمت
يد القميص.. ضهر القميص.. كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت داير ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال
والجهل وسوء الإختيار
قال شينة قال ...!
قال شينة قلنا كلام صحيح
وخطيبها زاتو ولد قبيح
بس ياخي قوم
الواطة ليل.. دايرين ننوم
قام تاني جاب سيرة البحر
وقام تااااااااااااااااااني جاب سيرة البحر[/align][/b][/size]

مرسل: **السبت 2007.3.31 5:32 pm**

[align=center]ياسيده لا

هذه القصيده كتبت فى سيده والتى كانت جميله نالت اعجاب
زميلاتها قبل زملائها وشاءت الاقدار ان تسقط فى الامحان وتتدسمس
اى تترفد من الجامعه فانشد دكتور عمر محمود خالد هذه القصيده

ياسيده لا
فايتانا وين مستعجله؟؟؟
شرط امتحان؟؟؟
ما انت كملت الحلا
ولازم علوم؟؟؟
ما انت قاطعه مكمله
***
ملو العميد مالو البليد
مالو لو رفض المفتش والمعيد
لو خلا ست الناس تعيد
!!!!
القاعة تبكي مولوله
حزنت صباحتها تبكي اصائلها
والجامعه صبحت كوم رماد
لابتنفع اداب لا اقتصاد
لافيها طب لا صيدله[/align][/b][/size]

مرسل: **السبت 2007.3.31 5:34 pm**

[align=center]لهلوبه

هذه القصيده أخرى للمتجكم العلفي

يا ام ريداً شعل في جسمي لهلوبه
انا المعيوس دوام كسره
وفارد ضلعي راكوبه
انا المفروم اكيد كفته
وجنبك قالب الهوبه
اشيل احزاني واتوجع
واعاين ليك بعيني الدوام تدمع
اجيب الفانته
ما تنفع
اقدم كولا
ما تنفع
اعزمك سينما
ما تنفع
الف في القهوه واتمرصع
وارقص جيركي واتوقع
والبس ليكي شارلستون
وقمصان قوس قزح مليون
انا المخروط انا المغبون
انوم فالق اقوم مفلوق
انوم منفوخ اقوم مطفوق
انا المتروك بدون احباب
وانا المشنوق في حلق الباب
وانا المارق من المولد بدون حمص
وانا الامسخ من الترمس
وانا الرامني في الكوشه
وانا العفصتني نعنوشه
وانا الضاربني نوك اوت
وكل اسناني مدشوشه
وحي لو حي تفيد ملكوم
لو بترجع اللكوم
ولو بتروح الدوشه
كنت اقوم واقول ا حي
هه.. كنت احوم واصول ا حي
كنت انوم واقول ا حي
كنت اعوم واقول ا حي
هه كنت اصوم واقول ا حي
كتلتني الجضوم وآآآآآآآآآه ا حي
وحي وا حي وحي واحي
انا اللاعب وفاقد اتوه
ودايماً وارمي في البوشه
انا الكاتلاني حنتوشه
وانا الشارني في الكوشه
انا الشارني في الكوشه[/align][/b][/size]

مرسل: **السبت 2007.3.31 5:37 pm**

[align=center]خليناك وما خليتنا

هذه القصيده للاستاذ محمد عبد الله الريح

خليناك وما خليتنا
يا القصيت دربنا وجيتنا
من بين الشباب ناديتنا
قلت كتير خلاص حبيتنا
لما شبكنا فيك ابيتنا
يظهر ناوي تخرب بيتنا
قول باالله كيف باريتنا
بي موية العيون جريتنا
في حبل الغرام شريتنا
مااا تنزلنا ياااا الماطريتنا
ورانا كتير جريت سكيتنا
لي قاضي المحنه شكيتنا
لما شبكنا فيك فكيتنا
بدمع العيون بكيتنا
جيتنا وبالعيون باكيتنا
لمّن غلبتك صكيتنا
زي لعب الورق شكيتنا
جيت حمبكته ليه دكيتنا؟؟؟
تاني بريس بريس لاقيتنا
لما رضينا بيك صافيتنا
تاني بدون سبب جافيتنا
ليه يا جكسه يعني طفيتنا
قمت وبالحنان وصيتنا
لمن للاهل عصيتنا
ولمن في الدرج رصيتنا
في الاوت بعيد باصيتنا
زي لعب العيال سويتنا
واتفششته زيييييين كاويتنا
ياالغسلتنا ولاويتنا
ما اتكرمشنا ليه ما كويتنا؟؟؟
اتشتتنا ما لميتنا
في قفه هواك خميتنا
في كانون هواك حميتنا
لمن زيتنا فاح شميتنا
لمن زيتنا فاح شميتنا[/align][/b][/size]

مرسل: **السبت 2007.3.31 5:39 pm**

[align=center]بص البنات

هذه قصيده أخرى للمتجكم العلفي

الليله شوف باص البنات
عجلاتو كيف متحننات
الكي قبل والكيس حرن
يمشن تقول متوحلات
لمباتو خلقه مكحلات
من غير دلال
كنباتو من داخل عدااال
شايلات بلومات الكلالي
الحبهم في عروقنا سال
بنزينو من ازكي العطور
عادمو الكبير يطلق بخور
سواقو ديمه صباحو نور
و مساهو نور
ورفارفو من قدام خفاف
مضروبه بأحمر شفاه
وانا بس بخاف
وخوفي الشديد لايدك شداد
دايرين وصولك بالسلامه
وتجينا يا برج الحمام
نتلمه في الكافتيريا كوووم
ويتلاقوا احباباً قداام
نعمل تمام
الكل حضور مافيش غياب
وكل التياب اتجمعوا
تسمع ضحك تسمع سلام
وتحت التحت تسمع كلام
اه يا حريم نوعكم عجيب
مرات كلامكم لينا طيب
لي روحنا انتو بترفعوا
مرات علينا تزرزروا وتتأندلوا وتتدلعوا
ولآمن تحين ساعه الدفع
نحلف يمين ما تدفعوا
ونفضل نجيب الشاي وباللبن الحليب
وكمان نجيب وكمان نجيب
ليمون ملخبط في القريت وتبلعوا
وتقدو جيبنا ونرقعو
ولم ينتهي الليل سارمشن
وتقولوا دايرين ترجعوا
من نوعنا خالص تقنعوا
تاخدونا طرحه بدون ايجار
تاخدونا ويتفك الحصار
وتروحوا غير ما تودعوا
راكبين علي باص البنات
خطراتو باقه حلا وحمار
يا ناس خلاص انا قلبي فار
نطرح بلاش من دون ايجار
وجوفنا من باص البنات
جوه الخشم فتحت غبار
نطرح بلاش لستكنا طار
نتعب نلقطهااا في الظلام
تلقوها ميتات بالنهار يا ناس نزار
تلقوها ميتات بالنهار يااا ناس نزار[/align][/b][/size]

مرسل: **السبت 2007.3.31 5:43 pm**

[align=center]تتذكري؟؟؟

أيام الامتحانات كانت تجي وتقول ليه اشرح لي ويشرح ليها
ويجتهد معاها ويتعب معاها وبتاع وبعد الامتحانات انتهت
والله قال ليك زولك قالو كلو كلو ما لمه فيها
انشاء الله بس يسالها ساكت انها اشتغلت كيف في الامتحانات
علي الطلاق والله قال ليك كلو كلو ما لمه فيها
قام قال ليها

تتذكري يا حلوه ساعه الزنقه دييك؟
ما قلتي لي اصبر لبعد الامتحان
ما قلتي لي يا حلوه بعد الامتحان
الونسه اجمل بي كتير
والخلطه اظبط يا عوير
وفعلاً عوير
لو ما عوير ما كنت صدقت الكلام
القولتي ساعه الكبكبه
ساعه الجنون والهضربه
في اللحظه ديك ما كنت في حالات قرف
ياحلوه يا لمبه نجف
ياسمحه يا فته علف
اتعب كتير اسهر كتير
علشانك انتي اجيبها ليك درجه شرف
لبسته ليكي قميص جديد
شاريه بي كمين جنيه
نضاره بي اتنين جنيه
والريحه ديك غيرتها
بواحده صارفه قريب جنيه
وساعه اجيكي قريب عليك
في الريحه ديك كترته ليك
وتزحي مني اتب عليك
وتسهي مني اقهي فيك
انا كل يوم بالله طاع ليكي بي احسن كلر
ما لاقي غير صرف النظر
ما قولتي لي يا حلوه قبل الامتحان
عاجبك عجب
راجل جميل راجل لزيز
عينيكي كانو محوصين؟؟؟؟؟
والله المقصود ما انا؟؟؟
اثبتي حالات الهلع والبشتنه
يا حليل زمان
ياحليلو مارس كان يمين اظبط شهر
رغم الكوارس والسهر
رغم الدعك والانبراش
خلطات كتير خلطات بلاش
ما فيها اي مهدئات
ما فيها اي مسكنات
لا كافنول لا اسبرين
يا حلوه وين
يا ريتو كان زبطوكي لي بي ملحقين
كان تمشي في دربك عدييييييييييل
تتذكري العهد الزمان
كل الكلام القولتيو لي يا حلوه ساعه الامتحان
كل الكلام القولتيو لي يا حلوه ساعه الامتحان
في لحظة هان[/align][/b][/size]

مرسل: **السبت 2007.3.31 5:47 pm**

[align=center]يا طبيبة

يا اللي ريدك فيني طبعة .... يا المكسرة فيني ضلعة
يا البجيك في الجامعة دايش .... يوم خميس ألقاه جمعة

يوم أشوفك ... قلبي ينتف .... عرقي ينزف
وابقى اشوفك سبعة سبعة
" أصلو ريدك جاني فجأة " .... وأدى لي صنقوري كبعة

****
يا طبيبة ... يلا شيلي القرقريبة
ويلا عوسي قليبي كسرة
ويلا دنكلي منو لقمة .... والعبيبا

عل بس شيليها مرة .... وابلعيها كالجاتوه
خليهو يسأل جوة يسأل .... والبيسأل ما بتوه
ولما جات المعدة تهضم .... قيل مهلاً اتركوه
أنه لا يطلب شيئاً
إنه قلبُ ُ متيم .... جاء يسأل عن أخوه

*******
قد سألتك لا تجافي .... إنه حب خرافي
ما بسيبك .... كان بترضي وكان تخافي
ما بسيبك كان رضيتي وكان أبيتي
كان وقعتي .... وكان جريتي
كان عقب طلعتي زيتي

ما بسيبك .... كان خلطتي الأمة جملة
كان طلبتي المهر عملة
وإن طلقتي علي نملة

ما بفوتك إنت ملي
كان بترضي وكان تملي
ما بفوتك إنت للي

إنتي أقري .... وكل معلومة بتفيدك
يا حلاوة المايكروبايو .... جاري في موية وريدك
كل جرثومة بتريدك .... صارو هيلك من عبيدك
وإنتي للباثولوجي تقري .... أصلو شيتاً دمو بقري
علة جنبك يبقى ساهل .... وفيهو تجري

******
وإنتي يا أشطر طبيبة .... يلا شرحي فيني حلي
فرتقي الجواي وسلي

تلقي روحي مناها ريدك
والعلاج جاهز في إيدك

ماهو كم كبسولة "فاليوم"
إسبرين أو كان يورانيوم

العلاج جاهز في إيدك من سنين
العلاج يا انتي آخذ حقنة حُب أو حبتين
من عيونك .... من كلامك .... كلو ريحة بنسلين
واشفى من كل المواجع .... وأبقى زين

---المتجهم الأممي[/align][/b][/size]

مرسل: **السبت 2007.3.31 5:51 pm**

[align=center]دقلوشه

دقلوشه ما لك ما بتجي وانا مشتهيكي أدقلشك
كان دايره حنكشت البنات والله نفسي أحنكشك
زي بيبسي قلبي أخجو ليك جقمة جقمة و ينعشك
طرطشتي عقلي وفي هواك الريدة خلتني انحشك

دقلوشه يا احلى البنات خصلك جميلة مع المشاط
وشك تقول شارع زلط بيراري أصفى من البلاط
في القدله فستانك حلو وبى جزمتك ديك ام رباط
دقلوشه ما تتأخري انا منتظر فيك رأسي جاط

ان شاء الله يا رب ما تكون دقلوشه شاكوشاً نصيح
خشباتو من عود الطلح وحديدو جد ما بالصفيح
ان شاء الله يا رب ما تقوم تديني في يوم وش قبيح
شان ما اقوم يوم جمبلق فوق البحر ملحة وتسيح

المسحراتي ...

----------------
دقلوشة.. الطفلة المدللة
دقلش.. يدقلش.. دقلشة.. أي يعامل الطفل بتدليل به شي من الفكاهة.
---------------
عشان الحسس بتاع الشهادة العربية ما يتحسس[/align][/b][/size]

مرسل: **السبت 2007.3.31 6:19 pm**

[align=center]تغزل في السستر
د. أحمد الأمين محمد - المتججه الأممي

أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور[/align][/b][/size]

مرسل: **السبت 2007.3.31 6:22 pm**

[align=center]الإستيكة
محمد أحمد إسماعيل
بتصرف
قال ليك محمد كان في المكتبة.. قعدت جنبو بت حلوة.. قالت ليت ليهو "تسمح؟" و
شالت منو الإستيكة قبل ما يرد.. و ختتها فوق منديلها و جاء الهواء كفى المنديل
على الإستيكة.. فقامت شالتها جوة المنديل جوة شنطتها و مشت الكافتيريا
وجات راجعة.. فقال ليها

قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
-------
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديلل
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
-------
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
-------
أحك راسي
و أبلع ريق
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح

-------
تقوم السمحة تتلمم
و تتبسم
و أنا أتراجف.. و أتخمخم
و أقوم أفرح
و أدق الجيك
و أطق روري
و أرمي الكرسي.. أوبس سوري
و أقع في الجنبي.. أوبس سوري
و أدقش الماشي.. أوبس سوري
و جنب السلم.. أوبس سوري

-------
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي

-------
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل.. و تتعقد

-------
أنا أتعقد؟؟؟
أجر الكرسي
أزيد الخمسة تدليكة
و أقول ليها
وبي صوتا ندي و رايع
يفيض رقة و موسيقى
من فضلك
و أترجاك
ترجعي لي الإستيكة[/align][/b][/size]

مرسل: **السبت 2007.3.31 6:23 pm**

[align=center]الهاري كاري
عبد الدافع الخطيب

سمحة و طيبة
يا ناس الله ساحراني
و بالهاري كاري كاتلاني
المجهزة من زمان كفني
و أصلو القصة قصة حب
و ما بقدر أناضمها تب
أقيف قدامها أتكبكب
و أمرق كلمة
ألاقي التانية ما بتركب
أحك راسي
و أخم نفسي
و أعاين بي قعر عيني
يجيني مغص
أغادر في البركس بالدس
------
و كل ما يوم
أقول الليلة أبقى عنيد
و قلبي حديد
و فرصي الليلة حقو تزيد
و أنقشها بي كلام الريد
و مما أشوفها
ريقي يجف
و راسي يلف
و ساقي يخف
و قلبي يقيف
و أقيف أرجف
أحس بي نومة في العينين
ست عربات (set)
و دبابات
صلاح الدين
-------
جملي تلاتة ما بتزيد
و ديمة بقولها متلهف
صباح الخير
و كيف الحال؟
و عاملين كيف؟
ست الناس تقول: أهلا
تقول أهلا و تتبسم
و أنا أتبكم
و دمي يفور
و يتسمم و يجيني مغص
و أغادر للبركس بالدس
و نكفي الناسة في جلسة
نقول باكر نعيد الكرة
لي هسة
عدنا الكرة مليون مرة
نرمي الكلمة تطلع برة
يا ناس الله
---------
دي ماسكة في قلبي ما بتفك
و أنا إستسلمت.. ملك و هلك
الرخ و الطابية عاملين كيف؟
نوديه يمين يقيف إسمك
نوديه شمال يقيف حسنك
و بي حسنك
نموت بالجملة بي حسنك
حلاتك يا صباح النور
حلاة إسمك[/align][/b][/size]

مرسل: **السبت 2007.3.31 6:25 pm**

[align=center]شوكة الحوت
للدكتور ود الرضي

القصة إنو شاعر القصيدة دي كان طالب طب و كان بياكل في سمك في الداخلية و وقفت ليهو شوكة
في حلقو.. فأخدوه أصحابو للمستشفي.. فقابلتو ممرضة أو دكتورة بتتمرن و قالت ليهو أمشي لدكتور
ENT
بتاع أنف و أذن و حنجرة.. فقبل ما يفوت منها نزلت الشوكة.. فقال

أمام حضرة عيونك ديل
و رموشك السوداء زي الليل
كتمت اللهفة و الآهات
بلعت الويل
أمامك سيدة البنوت
كتمت شعوري و الإحساس
و كيف تغلبني شوكة الحوت
و لمن صوتك الرنان
تفجر في ضلوعي حنان
شعرت بضجة في قلبي
و في عيني بالزوغان
وشفت عليك مليون لون
عملت
release
أخمخم جين وكم هرمون
.....
و نزلت مني شوكة الحوت
و فضلت شوكة في قلبي
ولا بتعدي لا بتفوت
نشوف دكتور بتاع إضنين و
ENT؟؟
منو الدكتور؟
دا ما إنتي
عشان قدامي لو بنتي
بنور عينيك
و لون الورد في خديك
و خصلات شعرك الإتوسدوا لكتفيك
تزيلي شقاي و آلامي
وييييين دكتور بتاع إضنين و
ENT؟؟
بدون ما يلمس العيان
بدون مشرط ولا
forcep
بدون قوة و بدون جبروت
ينزل مني شوكة ؟؟
و ديل واحدين يلوموني
يقولوا لي بتبالغ
و ديل و الله ما شافوك
و هم و الله لو شافوك
أكيد قدامك الواحد
بيبلع ليهو غرزة شوك[/align][/b][/size]

مرسل: **السبت 2007.3.31 6:32 pm**

[align=center]شارلستون حنكوشة
د. (طبيب) ساتي محمد صالح

ناس عصومة
ناس عدولة
ناس هشومة
ناس حنكوشة
فاكين الشعور منفوشة
زي قطية فوق معروشة
***
وأنا هناك مستغرب
وضارب الدوشة
أقرأ الفاتحة.. أردد ساي
أقول يا الله رب الكون
تخلي القاسي لينا يهون
***
وداك بهناك يشيل تلفون
ويخت تلفون
يشيل تلفون
ويخت تلفون
وداخل جوة شارلستون
أقول والله زول مجنون
وحقو يعاقبوه بي قانون
***
ولما تجينا ست الناس
حلا و إحساس
تظهر لابسة شارلستون
وتضحك باسمة فارة سنون
أشوف الويل
وأنسى الكنت قلتو قبيل
أقول دا حلاتو شارلستون
دا ما يشمل على القانون
***
وست الناس تمر بجيوشها
قدامها القرود مفروشة
وأنسى الناس
وأنسى كمان كلام حنكوشة
وتفتو المنكوشة
وأنسى السلسلة المنقوشة
و أقول أحي
وأنادي عمر وأنادي جدي
و أقول أحي
وحات ريدا معنكل في
دا زولا لي
ومااااشي علي
***
و أصلح نفسي فركو
قبل ما أتم
يجيك حنكوشة نازل وب
وماشي يخب
وشارلستونو ليهو ضنب
وفاكيه تقول قماش مركب
أقيف وأسب
وأقول أنا أكيد حا أتمقلب
ولمن يشوفو زولي أنا
يقبل مني لا غادي.. ويمشي عليه
ومني أنا يصهين تب
ويقيف جنبو وبنغمة حب
وين إنت؟ ووين إنتي؟
وين إنت؟ ووين إنتي؟
وبالغت.. وبالغتي
قلبتي الهوبة؟؟ جنيتي؟؟
ووين يا السمحة ما بنتي
وأنا واقف أتكبكب
وحالتي كرب
أقول يا رب
رقيبة الزولة تقلمها رررب
***
وأمشي بعيد
أكوس في الريق
وأنادي فريق
نراجع لى دروسنا نعيد
قرينا
Start
قرينا لبد
أقول يازول أخير تبعد[/align][/b][/size]

مرسل: **الخميس 2010.2.25 10:18 am**

الله يديك العافية با خالو

منتدى أنا سوداني

حلمنتيش @ حلمنتيش @ حلمنتيش @ حلمنتيش

قصيدة حلمنتشيية رائعة الجرداة بترضع فى الكد يسة

حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش

رد: حلمنتيش @ حلمنتيش @ حلمنتيش @ حلمنتيش