منتدى أنا سوداني

في حلتنا كان ساكن واحد معذبني عذاب وقت ما اطلع الشارع والقاهو يشاغلني يلاحقني وكل بنات الحلة تعبانين منو ، لكن مافي واحدة قادرة تتكلم معاهو لانو ناس بيتم ذاتم كعبين ومنبوذين من ناس الحي .
في يوم من الايام وقت زنقة الامتحانات في الجامعة كنت وصحبتي في الاوقاف بالسوق العربي بنصور مذكرات ونحنا طالعين من المحل مشوا وراءنا شباب وبيقوا يشاغلوا فينا ونحنا ماشين سريع وهم لاحقيننا وبيتكلموا معانا ونحن جارين جري المهم حصلونا ووقفوا قدامنا واحد منهم قال لينا يا شابات نحن ما قاصدين نضايقكم بس حابين نتعرف عليكم بتقروا في ياتو جامعة ، وانا كنت زهجانة جدا من تصرفهم لكن حاولت اضبط اعصابي لاننا في السوق العربي ومافي داعي للفضائح والبت المعاي خوافة شديد فرديت عليه لااسفين نحنا ما حابين نتعرف واذا سمحتوا خلونا في حالنا وزحينا من قدامهم وحاولنا نمشي بشارع تاني في اللحظة دي جاء ولد حلتنا داك ومسك في الولد البيتكلم معاي انت يازول مالك بتشاغل في اختي بتعرفها من وين ونهرنا ليك نهرة يلا يا بت امشي ونحنا مشينا جري وخليناهو هو واصحابوا مع الاولاد الكانوا بيضايقوا فينا وسامعين الشكلة مولعة وراءنا، المهم بعد مدة لقيتو في الحلة واقف لكن المرة دي قلت السلام عليكم وهو رد عليكم السلام ومن اليوم داك بطل يشاغلني .