منتدى أنا سوداني

المنتدي العجيب سموهم تب سوداني
فيهو اصول البلد حافظنها اخواني
وفيهو عازة ست ريدي فيها جميل الحاني
ليه يا شهد الكلام زدتي علي اشجاني

المنتدي الجميل نعليهو بافكارنا
نوزن للكلام ونشرف بيهو بلادنا
ننشر للفضيلة الديمة هي زادنا
ويا شهد الكلام ليك الليلة اغلي سلامنا

الاغبش كتب:المنتدي الجميل نعليهو بافكارنا
نوزن للكلام ونشرف بيهو بلادنا
ننشر للفضيلة الديمة هي زادنا
ويا شهد الكلام ليك الليلة اغلي سلامنا

يا شهد الكلام في قلوبنا ديمة سكونك
يا سودانا الجميل دايما مخضرة غصونك
بجاه الاله تسلم من حقد مغبونك
وتعلي راياتك فوق مدارات كونك

الليلة المنتدى صبح ذو فائدة عظيمة
من كل الشرائح جاب لينا غصن نيمة
احسن ليك يازول تزورنا بي ترنيمة
عشان تبقى اصيل وزولا ليك قيمة

اقيف يازول قبال تفوت لي دارك
ادخل منتدانا وقول لينا عن اخبارك
انت الفي الحارة تب ما بتتشارك
محل ما تقبل نقول ليك تتبارك

التحيه للجميع على الروعه

بسحروكم والله
ويا اميره يعنى الشاعر خلااااص منو ؟؟؟ بس هى محاولات من ناس مبتدئه حاولى حبيبتى وبتنجحى اكيد
منتظراكى ................

مهند تسلم على المرور بس فى تعليق على
انت الفي الحارة تب ما بتتشارك( ما بتشارك ولا تشارك هههههه زى القلبت ذم ؟؟؟ )

عموما عينى بارده عليك والاغبش
تحياتى

اختي شهد تسلمي بس المعنى في بطن الشاعر وانا قصدي كان لما يكون في حارة بيتصدى ليها براهو يعني ما في زول بيشاركو وما ادري هل ادت المعنى ام لا بس هي محاولة
وهاك ده مسدار تاني
داك المنتدى بي نورو لاح شفناهو
لامي الناس هديل كل واحد مع دنياهو
بي السمح والعديل الحكمة ما بتخطاهو
كل الناس اخوان ما اظن في زولا براهو

تسلم اخوى مهند على التوضيح بس دايما فى المدح العام بنوصف الجماعه بناس الحاره عشان كدا وقفتنى ....


لامن نكتب الكلمه العديل معناها
لابد من تصل مهما يطول ممشاها
خليك من ناسا ......اللولوه بتختاهاااا
ماشييين التقول فى خط مستقيم راسمه لى دنياها

الليلة الكي بورد لاح نسامو
من سوداني زاع لي لذيذ انغامو
ياربي الكريم تطؤل ايامو
بي جاه النبي دايما عديلة اقدامو

الخبر الاكيد جابوهو في الدغشية
السوداني داك سيدجمال وحنية
يعدل للدرب ويكرم المية
وان خربت كمان بعدل النية

شهد الكلام الديمة واسعة دايرك
ورينا كيف نوصل وكيف اخبارك
وفي السوداني كايسنو تب شمارك
الجلسة الجاية فوق دارك

ليه ما نزيد الكلام ونجيبا محنة
نجلس في النجائل زي حور الجنة
نوصل مهند وكمان يعرفو اهلنا
في السوداني ناس بلد باصلنا

حلاة القدلة فوق صيدةً اسمها حليمه
يطوطِح كفلها الناس النفوسها سليمه
ترعاها العيون ساوات ضميرها وليمه
انكسر اللجام ركَّبنى فيها جريمه

رِكِب لِك فوق جموحاً ما بتدور الَّلكه
جيتِك كارِف المحلب بدور الدِّلكه
من جخنوب دروبِك ما بخاف والشِّبكه
دحين يا ام رشيم ارجينى فوق الدَّكه

نهدا دق تبل ماهو المدوشش قرو

يلعب حردفى توو المراقد ترو

فى بوش العصير الناس يقوموا يبرو

فوق ندادها كرباج النصر بتورو


لخلوخة تقوم مسايسه ومفروقه

بين التقنتين دفق البصير ماروقه

ان جلست معاك وان سمع منطوقه

على المشببات بلحيل بعيد معلوقه

حسرورن زمان انا ضيقنبو خلاقى

طول الليل مساهر وعينى ما بتلاقى

من فرط البجينى الهجعه بالعراقى

وين ما ادور اغلق فوقى يصبح باقى

يلا منو البقوم كدي وينعدل ويغني وينم فوق ام هبج وصاحباتا

والله لو بنعرف شعر كنا شاركنا معاكم
لكين الشعر داير له ناس من شارواكم
الوزن والقافية ديل سلواكم
ونحنا علينا نقرأ ونستمتع اللى بتكتبه يمناكم