منتدى أنا سوداني

الاصدقاء الكرام اهديكم هذه الاغنية الشعبية التي تحتوي علي مجموعة من الوصايا وهي
بعنوان بنيتي هسابك . هسابك : كلمة عامية من دارفور تعني ارجوك
الاغنية من معالجات الاخ الفنان فتحي الماحي من الفاشر
الله والنبي لكلام راجل اسمعا بنيتي هسابك لكلام راجل تسمعا
هسابك يابنيتي كلامي ما تابا نصحتي كم ابيتي تكوسي ماتلقا
لاتقوي راسك بكرة يقولو طللقا فجر كم ولاعندو لي عشية امهلا
بلا ازنو ماتمشي محل مؤاجرة وكن غبن منك نادي اساءئلا

قشي بيتك بدري وعيشك ارحكا وألمي وساخة في خشم بيت لاتكشحا
كن عاطت فوقك لاتدقي تفلعا اشكي لي الله لحقك بخلصا
حتي عجاج بيتا وعنقريبا فرشي وكورة ام قعر تحت سريرو جيبي ختي
وشعرك المشمبل دا لمي مشطي ورجلينك المشقق دا ادرشي حنني
وتوبك المجنقر دا بإبرة امسكي
المي دوانتك من قعرو كركنجي واطوي واقاى ألمي اردي جيبي
عجينك كن تؤسي لدوكة اتكلي وكسرة كم تلي عقابو لمي شري
كن كملتي خدمتك لي نارك اكتلي جري سدادة وجدادك اطردي
كن فتي بطن حلة بيتك طلي شوفي وقالو وقلنا في لسانك لاتجيبي
كلام كن تخاف ليو من بيت لاتمرقي وجارتك المهوهوه دا لبيتك بخربي
بنيتي هسابك لكلام راجل تسمعا

طبعا الاغنية فيها كلام جميل بالهجة اهلنا في دار فور وفيها حماية للمرأة واتمني ان تعمل اخواتنا المتزوجات بهذه الوصايا القيمة

هههههههههههه والله وصايه ما في منها

ياسلام تحية ليك يا العراك وتحية لفتحي وتحية للفاشر زكرياء ولدارفور وأغانيها الجميلة وأمثالها الرائعة ولي نكران ولدي سما قريب سمسم دربا شقوق ولي جرادة في هدوم ولا بسوي شي بس قعادو ماحلو ولي المي حار ولا لعب قعونج ولي دقيق مشرور في حبل ولي الطاحونة ماشفناهو الا شفنا حمير نازلات من الشجرة شايلات دقيق .
تقبلو تجياتي

المي دوانتك من قعرو كركنجي واطوي واقاى ألمي اردي جيبي

تسلم يابا ,,,, نصيحة في محلها وايقاعها جميل ,,, بس المقطع الفوق ده ما فهمتو نرجو الإيضاح
و,,,, يديك العافية

shams alhidaya كتب:المي دوانتك من قعرو كركنجي واطوي واقاى ألمي اردي جيبي

تسلم يابا ,,,, نصيحة في محلها وايقاعها جميل ,,, بس المقطع الفوق ده ما فهمتو نرجو الإيضاح
و,,,, يديك العافية

شكرا اخي شمس الهدي علي المرور
بقصد المي : الماء
دوانتك : الزير يسمي الدوانة بضم الدال
كركنجي : اغرفيه تعني نظافة الزير من بقايا الماء العكر
اوقاي وهي القة اي قطعة قماش تطوي وتوضع بين الراس والاناء المحول
اردي : مأخوذة من الورود
انشاءالله نكون قد وفقت في شرح البيت