منتدى أنا سوداني

مرسل: **الخميس 2007.12.6 6:06 pm**

السلام عليكم ورحمة الله وبركاته
يا جماعه انا ما بعرف لاكن هل في مشكلة في لهجتي انا غايتو شايفا
اني بتكلم سوداني صح زي اي سوداني تاني عايش معانا هنا لاكن لمن
اجي اتكلم مع واحد عايش في السودان يقعد يضحك ما بعرف ليش بتخيل
اني بتكلم هندي والله جد
المشكلة في شنو ما عارفة مثلا اقول ليو انا هسي جيت يقعد يضحك ويقول
لي ما هسي بيقولو حسي طيب وين الصح انا ولا هو ؟؟؟؟
هسي ولا حسي!!!!!
والتانية في كلمة ابيت دي الما دخلت راسي دي بيقول
فلانة ابيت ما تتكلم معي انا بقول فلانة ابت تتكلم معي بيقول لي كدا غلط الاولي
صح
يعني ما بعرف وحرف القاف لازم انطقو غين يعني قعدتا اقول غعدتا ولا يضحكو فيني
والله دي حاجة محيراني شديد ومشككاني في لهجتي السودانية

مرسل: **الخميس 2007.12.6 8:22 pm**

لالالا عندك شوية لخبطة لكن اللي انا بعرفوا نحنا بنقول (حسي)مش (هسي) .والتانية بتاعت ابيت دي غلط ابت صح .وحكاية حرف القاف والغين دي انا ماسمعت عنها ابداااااا.يعني القاف قاف والغين غين وشكرااااااا

مرسل: **الخميس 2007.12.6 8:36 pm**

[grade="D2691E 000000 A0522D"]ما هم غلط وما بحيو التانيين يكونو صح
هسع:هي أصلا اختصار لي هذه الساعة يعني الأصح هسع
أبيت:دي بي صراحة غلط ما ليو تفسير كيف يعني فلانة أبيت ما تتكلم معاي في الفصحة وفي القرآن الكلمة دي أبت يأبى
أما موضوع حرف القاف ده فنحن بننطقو غين وبننطقو غلط فعلى الأقل نقوم نكتبو صح
والله المصطلحات البستخدموها هسع دي بس خليها ساي
الله المستعان [/grade]

مرسل: **السبت 2007.12.8 2:58 pm**

بتنا spanisheyes

بالجد اللهجة السودانية بالنسبة لأبناء المغتربين تعتبر مشكلة حقيقية
وبالذات اللي عاشو أغلب سنوات عمرهم أو اتولدو خارج السودان
حبيبنا أحمد أداك النجيضة في موضوع هسع وحسي
اما أبيت و أبت ف عاشقة النيل برضو جابت ليك الرايحة

بس في حاجة مهمة :
ناس أواسط السودان والخرطوم وماحولها بينطقو هسع وهي الأصح
وبعض أهلنا من غرب السودان وشرقه بينطقوها حسي حسب لهجتهم المحلية

أما القاف ف نحن بننطقا زي في الونسه لما نجي نقول (القلم) أو (القمر) بدون تفخيم
وبشتركو معانا في النطق دا أخوانا اليمنيين

لكن الغين السودان كلو عندو فيها مشكلة
لأن أغلب السودانيين بينطقوها قاف مفخمة وبالذات لوتابعتي نشرات الأخبار
وكمان بعض الفنانين في الأغاني مرات الواحد يقرب يقفل التلفزيون ولا المسجل من الحاجة دي

زمااان كان عندي مشكلة في كتابة الكلمات الفيها غين أو قاف
مابعرف أفرق بيناتهم
المعلمة بتاعة العربي أدتني فكرة (القلم) أو (القمر) الفوق دي
ومن يومها لو احترت في كلمة طوالي أنطقها بالعامية بنفس طريقة القاف في (قلم) أو (قمر)
لو جات معاي تبقى قاف ولو ماجات تبقى غين

يديك العافية

ولييييييييييييي قداااااااااااااام

و.................الباقي على الله

مرسل: **السبت 2007.12.8 4:45 pm**

سبنش ايز.
انا زاتي عندي نفس المشكلة دي و لما امشي السودان بيحسسوني اني قعدة اقول في نكات ولى حاجة وانا بكون قاعدة وما فهمة هم بيضحكو لشنو .
والمشكلة اني حاسة ان السوداني بتعي ما بطال بالعكس ممكن تقولي عليه كويس .
خليهم يضحكو وخلاص .
نعمل شنو يعني الله غالب.

تقبلي مروري
سودانية100%

مرسل: **السبت 2007.12.8 6:13 pm**

عاشقة النيل واحمد مشكورين
علي التوضيح والله يادوب رجعتو فيني الروح

ود الدريدري مشكور اخي علي التوضيح دا وشكرا
علي المعلومة اللي اديتها لي حستفيد منها

سودانية كلنا في الهوا سوا ما علينا الا نصبر

مرسل: **السبت 2007.12.8 10:36 pm**

والله غايتو ناسك اللي بيضحكو فيك ديل اعندهم موضوع

ناس السودان الواحد كان غلط في النطق يعملو موضوع

غايتو من خلال كلامك في المنتدى انا شايف انو كلامك مافيهو حاجه

تقبلي مروري

مرسل: **السبت 2007.12.8 11:19 pm**

العزيزة سبنيش ايز

ما تخلي حاجات زي دي تشكك في نفسك ولا تهزك،،، البحبك وانت بتمثلي ليه شيء ما بيضحك عليك حتى لو ما نطقتيها بالعامية السودانية بالشكل الصحيح،،، فنحن لو رجعنا للعامية السودانية أو أي عامية تانية،، بتلقي انه الموضوع موضوع تأثير وتأثر،، والعرب لما دخلو السودان تأثرو وأثرو وتكونت اللهجة السودانية،، وانت اسه لهجتك لو بقت هجين ما بين السودانية والليبية،، وين الغلط في كدة ؟؟؟ مش لما تتكلمي بنفهم منك عاوزة شنو ولا قصدك شنو؟؟؟

نحن لو إهتمينا بالبيضحك،، ولا للبيقول على الناس اللهجتهم هجين انهم (حناكيش) مثلا،، ما ح نتقدم،، وح نكون بنحفر في الموية،،، وزي ما بيقولو اهلنا،، الأصغر منك،، دوسيه،، وما تهتمي ليه،، والبنتقدك عشا يقومك،، بوسي يده،، لكن البنتقدك من أجل النقد،، أرفعي نخرتك فوووووق،، وعايني ليه من طرف عينك،، ولاا يهمك شي،، ولا يهز طرف فستانك

إتفقنا؟

مرسل: **السبت 2007.12.8 11:29 pm**

spanisheyes
موضوع قيم ومستهدف لشريحه معينه من اللهجه السودانيه
وصراحة قصت انو الاختلاف في نطق الكلمه فا انا معا أخي ود الدرديري
بالنسبه لحرف القاف والغين
اللي من المستحيلات انها تتغير بالساهل في السودانين
وبيني وبين أصحابي بنلاحظ الحكايه دي فينا
وما أظن انو كلامك فيهو حاجه
واذا جاني شخص وقعد يضحك باستهتار او استهزاء من كلمه او حرف انا قلتو ما في محلو
حا يكون ردي ليهو (( ما في محلو نهائي ))
فا طنش تعش تنتعش دي اسمح حاجه
تحياتي يا غاليه ...

مرسل: **السبت 2007.12.8 11:29 pm**

sudani مشكور علي المرور والله
ما عندهم موضوع معاك حق والله انا
بتكلم سوداني وما عاجبهم اتكلم ليبي برضو
ما عاجبهم نعمل شنو؟

مرسل: **السبت 2007.12.8 11:33 pm**

الاخ sunniخليو بالانجليزي عشان ما نتلخبط
انا بتكلم سوداني كويس وشديد كمان وبتكلم ليبي كمان
لاكن لمن اجي اتكلم سوداني بحاول بقدر الامكان ما ادمجو
مع الليبي الا بعض الكلمات دي بتدخل كدا من دون قصد وزي ما قلتا
لي البينتقد من اجل النقد دا شخص ما بهتما بي ابدا لذلك انا ما حهتم باللي
بيقولو

مرسل: **السبت 2007.12.8 11:35 pm**

هههه طناش دي نصيحة حلوة شديد
شعارك كول خالص طنش بس بيمشي الحال
حفكر فيو من اليوم خخخخخ مشكور

مرسل: **السبت 2007.12.8 11:54 pm**

تعملي نايمه يافرده وما تشتغلي بي زووووووووووووووووول

مرسل: **الأحد 2008.3.2 9:58 am**

تيمبرلي مشكور عالنصيحة بعمل بيها من اليوم

مرسل: **السبت 2008.3.8 9:49 pm**

انالاحظت انو اي سوداني اتربى خارج السودان لازم يكون عنده شيء في
في كلامه ودا شي طبيعى ن الطفل في المدرسة يختلط بابناء البلد المقيم فيه ولازم
يتاثر بكلابكون مهم وبعض عاداتهم.. ولهجتنا السودانية فيها بعض الكلمات مامعروفة الا
لا للسودانيين وكمان ماكل السودانيين .. بلدنا بحجم قارة فيه قبائل ولهجات .. امكن
الزول الساكن شرق السودان يقول كلمة انت ماتفهمها وكمان الفي الغرب .. عشان كدا
مافي مشكلة في انك ماتعرف تنطق بعض الحروف .. واقول كلام كل اولاد المغتربين
لما يجوا السودان بكونوا موضح سخرية من زملائهم

مرسل: **الأحد 2008.3.16 12:04 am**

ام العشرة شكرا للمرور معاكي حق
بنقي موضع سخرية طيب لبتين حيبقي
الوضع كدا

مرسل: **الثلاثاء 2008.3.25 1:46 pm**

وكمان يااخ سوداني جاياكم مصيبة تانية ..
قالوا عاوزين يعملوا جامعة للمغتربيين .. يعني انتوا في بلدكم مغتربيين
يعني بدل مايخلوا ابناء المغتربين ينصهروا في المجتمع
يقوموا يفصلوهم بجدار الفصل العنصري ...
الله يكون في عونكم ..

مرسل: **الثلاثاء 2008.3.25 4:04 pm**

سبانيش هوووى اسمع كلام البيكيك
ليش دى اصلو ما عندنا

من الله خلقنى ما شفت لى زول سودانى
بيقول ليش وما داير الناس تضحك فوقه بديتى كلامك مية مية الا ليش دى صبت مطرة

الشى التانى الداير اقوله ليك انا السودان ده ما شفته غير شهر ونص ولو للصح ما شفته غير 15 يوم فقط لا غير الباقى البعرفه استشفيته من حكاوى الاهل والمعارف والفضائيات السودانية ولمن مشيت السودان فى ال15 يوم دى راسى لفت الاطه ما طلعت اطه طلعت كديسة والـ ايه طلعت شنو و الميه طلعت مويه وموضوع السخرية ده موضوع تانى كنت بحس انى اداة ترفيه وترويح اى زول زهجان ومدبرس يمسك فوقى تعال يا ود مصر ( التقول تسالى ولا جك عرديب يبرد بيه على روحو) الموضوع ده خلانى اللتفت للهجة واحسنه لكن ما اتحسست شديد لانو النقد ده ما نابع من تحقير ولا تهكم لكن لانه لهجتى كانت غريبة بالنسبة لهم زى ما لهجتم كانت غريبة على الى حد ما وهسى ( وبالمناسبة انا البعرفه انها هسى زيك ) بعرف اتكلم سودانى ومصرى بدون ما المصرى يلاحظ انى سودانى ومع السودانى سودانى افنى عمره على تراب الوطن وبدون ما السودانى يقول ده كيشة ويلاحظ انى طيرة ما ناقش كتير عن بلدنا ويسخرو زى اول مرة ...

وبالنسبة لموضوع هسى وهسع اعتقد انو الاختلاف ده لانو السودان فيه تعدد عرقى وقبلى حتى فى شمال السودان عوضا عن المستويات الاجتماعية البتفرض احياناً ميلاد مصطلحات وكلمات خاصة بطبقات دون الاخرى علشان كدا هتلاقى اختلافات فى اللهجات واساليب الكلام ولو لاحظتى ده السبب البيخلى الناس يعرفوا البيتكلم ده جنسو شنو
واعتقد انو القاعدة دى ما ماشة على المغتربين لانو نحنا بنلقط الكلام برانا من الاهل والمعارف والتلفزيون حتى ازكر عرفت لى سودانين بالصدفة وبقينا اصحاب ولقط لى كم كلمة جديدة عجبونى بس مشيت البيت اى زول يكلمنى ارص ليه الكلام وافرح لمن الاقيه ما عارف المعنى واقول ليه انو انا انتمائى ما عادى واعمل استاذ والكلام علق معاى حتى بعد ما سافرو الشباب ديل لمن جانا واحد وظبط لينا الموضوع وطلع كلامى كلام شماش س ــة وكان بيعكس صورة ما لطيفة خصوصا انو الفرحة كانت بتقتلنى وانا بقوله وعامل مغترب خارق لكن كنت عديت لا اخوانى كم كلمة و مصطلحات مية مية

وبالمناسبة انا ما بحبذ التميز والتفرقة وثقافات الاجناس دى والله اعلم ان كنت ولدت ونشئت فى السودان كان هيبقى ده رئى ولا كنت هاخضع لنفس المفاهيم

انا نصيحتى حاولى جودى فى لهجتك ما علشان الناس ما تسخر منك لكن لانو ده اصلك واصل اهلك وناسك وموطنك ودى لهجة التواصل حتى لو كان الدارجى صعب شويه وانطباعك عنه ما للدرجة يمكن لمن تتعايشى فى الجو حقو تحسى انه طبيعى وجميل وماخد بساطة البيئة والمناخ واكيد الناس البتسخر دى جوها شعور طيب نحيتك معبئ محبة واللفة
وبالمناسبة يا يا سبانيش انا كان قدرت نفسى اتعلم رطانة اهلى
وباللهى يا جماعه زول يجى يورينى انا زاتى كلامى فى هسى وهسع ده صح ولا كيف
ويا ام العشرة انا ده ما عندى شى غلط اصلووو يها مغترب لكن اصلو مافى وتحدى اهاا

يسلموووووو سبانيش وانشاء الله ايامك كلها وخير وسعادة وراحة بال والله يرد غربتك على خير
اخوكى ادروب

مرسل: **الخميس 2008.4.24 11:44 pm**

يبدو الاخ احمد جاوبك صاح يا اسبنش ايس الاول هذه او ها لساعه و الثانيه ابت يعني رفضت الشئ

مرسل: **الجمعة 2008.4.25 12:14 am**

أولاً يا عيونهم مساء الخير بالنسبة لموضوع اللهجة عندنا خلطات كثيرة بالرغم من اننا افصح الأعراب نطقاً للعربية .

أول كلمة قلتيها كانت خاطئة منكم الاثنين لانها في الاساس هى هالساعة .
ثانى كلمة انتى نطقك سليم وهى أبت .
والثالثة وهى نطق القاف أنتى تنطقيها فصيحة وهم بالدارجية ولهم فى الفصحة بعض الإستغراب

منتدى أنا سوداني

يا جماعة انا عندي مشكلة في لهجتي السودانية؟؟

يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟

لـــــــيـــــش

رد: يا جماعة انا عندي مشكلة في لهجتي السودانية؟؟

رد: يا جماعة انا عندي مشكلة في لهجتي السودانية؟؟