أروع القصائد

[waya]

يا صالحة

" ازهري محمد علي "

دخلتى زي ختّـة نفس
ومرقتى في لمحة بصرْ
مرقتي لا حِس لا خَبـَرْ
لا لوّحـَـت إيديك تلويحة وداع ..
لا سبتي جنب الباب أتر
... هشّيتي أسراب الحمام
و أفشيتي في الأرض السلام
و كأّنِك إنتي المنتظر ..
و كأنك إنتي المُنتهى ..
وأول تصاريف القدر ..
ونحن إدخرناك ... لليالي الحالكات
للزمان المُـرْ
وساعات الخطرْ
أديتي فرضِك والنوافل
والباقيات الصالحات .. يا طيبة ..
وانتي على سَفر ..

يا الله .. مِن هذا السفر
يا الله ... مِن هذا اللهيب ..
مِن ... وجهها الطلق الخصيب
مِن ... كفها دعاش المطر
مِن ضحكتها و رِقة صباحاتا الحليب ..

من وشّها المليان بطر
أنا خُفتها تفتح شبابيك النحيب ..
و تشُر على روحي الفَّـترْ ..

وانا شفتها في لحظة الحلم الغريب
تتوالي في الخاطر صُوّر
كانت حكايات كلّها
و أضحت مواجع كُلّها
أدمنّا وجع الاجترار
و إحتجنا لي لحظة مقيل .. في ضُلها
إحتجنا نكتبلِك قصيد
ونغنى ( بنحبِّك بحر) ..
واحتجنا لى لحظة زمانّا المترعة
زمن الأمانى الطيبة .. و الريد .. والدِّعة
والقلب فاتح والخلايا أبوابا كلها مشرعة ..
العاديات .. عدّت على تعب الجسد
و ركضت خيولك مسرعة
ليه راقدة في ضِيق اللّحد
و الدنيا بي هذى السِّـعة ..!

الغيم في متناول إيديك
والقلب بور
والمطر زى ما تشتهِى
أرميني في أرضك بذور
لميني من وجع الغياب
تلقيني في دمّك حضور
و أديني مفتاح السحاب
نرسم مسارات الطيور ..
يا مُترعة ..
مفتوحة شارات المرور
ما بين غيابك و ( مشرع الحلم الفسيح)
ضاعت محطات الوصول
من حيلة الخطو الكسيح
قدرِك...
تباريك المناحات
و تعيش سنين العمر في قفص التباريح
والذكريات في كل ليل
تفتح حنينك بيت بكا
و تعصف رياح الفرقة
بي حلم المراجيح
قدرك ...
تلاقي الدنيا في باب الخروج
و تفتح حنين القلب للراحلين ..... ضريح
قدرك ..
تداري الحزن في القلب الذبيح
لا انت آخر الأنبياء
لا إنت في حلم المسيح

ويا صالحة .. وينو ضلك ..
في الطريق .. وين خطوتك ..فى الرملة
صُرِّيها في منديل علق ..
و مديها بحق السنين ..
والعُشرة .. والدم .. و العرق ..

أيدك في إيدى سوا سوا ..
من الصباح حتى الشفق
من الشفق حتى الزوال
و القمر إذا اتسق
و كما اتفق ..


,,,, يتبع ,,,,

[waya]

نجلس على ضل المزاج
نتعاطى ضحكات الحبيبة
و نحتسي كاسين من الحب الرحيم
نقراها باسم الذى خلق
ونقراها حرِف حرِف
نسكب صهيل الجرح
في صمت الورق
و نلقاها في الريح العصف
خُضرة سنينا اليانعة
و اتحتحتت صفق
ونلقاها في ضهر الخيول
البتفزع من حوافرها في السبق ..
و تهرع كلّما اشتدّ الرهان
وبانت ملامح اللّفة في آخر النفق ..
نلقاها ..
في جيّة الضيوف
والفرحة كلما الباب طَرَقْ
نلقاها في ختّة الراس والحلم
في الهجعة وإن طال الأرق
نلقاها في ضُل الصباح
والونسة .. ضحكات الصغار ..
و طقطقة الاصابع .. طَقْ ، طرق ..
نلقاها بآخر رمق
وقفت على حد الكفاف
رمَت السناسن في الطبقْ
فجّت ضلامات السنين ..
قامت على ذات النسق ..
مدّت ايديها على الحنين
و رشّت المشاغبين بالنبق ..

ياصالحة
لِميني على ثراك
واعفينى من هذا الرهق
وسلميلى على المعاك
السابقين .. الطيبين ..الصادقين
الجمّلوا العالم هناك
طفلة وملامحها من رؤاك
موءودة انتي على التراب
موءودة كانت فى حشاك
انا شفتها بتضمدي أحزانك براك
و أنا شفتها ..
في البعث في هيئة ملاك ..
في جيدها باقات النجوم
و في إيدها أغصان الأراك


,,, يتبع ,,,

[waya]

أنا شُفتها ..
في ذلك اليوم العظيم
في نشوة بتردّد غُناك
بى حِسّـها الرطب الرخيم
فتحت عليك في الكَتمَة
شباك النسيم ..
حضروها كل الأولياء الصالحين
في الطور مع موسى الكليم
مرقت بواطن الأرض من رحم الأديم
و فتحت مصابيح الخلاص
في عَتمة الليل البهيم
وأنا شَفتها
عبرت معاك .. حبل الصراط المستقيم
و مرقتي أجمل ما يكون
إنسان على كف النَّعَشْ
مرقن معاكي بنات كتار
وغابن وراك بنات نعش ..
ركّن على دم الغروب
فرّن مع وش الدّغَش
ردحّن على حِس الهبوب
و انا حِسِّـي
يبقالِن طرَشْ
غشّني بي موية الرهاب
و شنقّنِّـي بى حبل العطش
واعدتهِن ..
ما تواعدن
واعدتهن ...
ماتواعدن ..
ضحكاتن اللبن الحليب
والقمرة مرّة مرّة بتشبهِن ..
ما شُفتهِن .. شافنّي هِـنْ
مابين طشاش السّكة والشوف البصيص
.. شبّهتَهِنْ ..
غسلنِّى من خوفي الرخيص
شبّهتهِِن ..
حِزنن علّيْ
و حِزِنْتِ أكتر مَنّهِن ..
وبكينا كلّنا من دواعي الخيبة
و الحظ التعيس ..

سرقن صهيل الجرح من خلف الكواليس
و كتبن تراجيديا الصراع الجب
و امرأة العزيز
النسوة والدم .. والقميص ..
مديتي أيدك للحريق
بَـقّـن أصابعينك شموع
والقلب كان حِنّة عريس
و بكيتي والوش منطرح
و ضحكنا والايد في الجرح ..
لمعَت دياجى الأرض في ضو الفوانيس
ما تلبسى تياب العطش
اتلفحى النيل قرمصيص ..
و ادخُلينى على عجل
يا صالحة من باب السلام
مفتوحة أبواب الفراديس
اتفضلي ..

[waya]

" بيوت "

مُناي في الدنيا سُترة وبيت..
وأصل البيت حنان وأمان.. مودة وريد
محال البيت يكون بس طين.. وزنكي وحيط
ولا ممكن يكون سكر وصلصة وزيت
كلام البيت كلام تاني.. كلام إحساس مقدس وشرع رباني
وريد إنسان عزم وإختار
فتح باب قلبو لمّاني.. بني العش الصغير طمّني آواني
٭ ٭ ٭ ٭
بيوت الدنيا مختلفات وما كل البيوت واحد
في بيت داااافي.. وبيت باااارد
... وبيت عمران هوى وتحنان.. وبيت جامد
بيوت مليانة فرحة وحب
وخير وأمان
بيوت عدمانة من الود..
زمن مسكونة بالأحزان
بيوت زااااهية.. وبيوت وااااهية
بيوت تديك سلام وأمان
عشان فيها النفوس صافية.. وفيها التقوى والإيمان
٭ ٭ ٭ ٭
بيوت متروسة مال وإثاث
وخالية من الأمل والناس
بيوت لا لمبة ولا بوتجاز
وناسا لُطاااااف حُنان ولُذاذ
في بيت عاااالي وحوشو كبير
وسيدو وزير خيرو وفير
وليهو غفير .. وبيت من طين
في راكوبتو بس فد زير
ورغم الساكنو زول مسكين
بس حقاني عندو ضمير.. بيوت البهجة عنوانا..
وطول اليوم ضحك وهزار
وبيوت طوالي حرقانة
مولعة زي تقول من نار
بيوت بتراعي حق الجار .. وفيه من الخيار أخيار
بيوت لا بتعرف الجيران..
ولا بتستطلع الأخبار
بيوت تمليك.. بيوت إيجار
وماااابتلقاها بالهين .. ولازم تكرم السمسار
وشوف في سكتك كم بيت .. وفي كل البيوت أسرار
٭ ٭ ٭ ٭
وفي بيت مسكون.. وبيت فاضي .. وبيت جاحد.. وبيت راضي
وبيت مشكلتو معروفة
ووصلت محكمة وقاضي.. عشان عُشرة سنين هانت
وكل واحد بقى في وادي.. وفي بيت حدادي مدادي
بس مافيهو غير إتنين.. وبيت ملياااان تقول نادي
٭ ٭ ٭ ٭
وفي بيت سكانو متآلفين.. على الحلوة وعلى المُرة
وبيت سكانو مختلفين.. ما بتفقوا بالمرّة
وبيت ستو مرة ضيفان.. مرة سُترة
ما بتستاهل الهجران.. ولا بتستاهل الضرة
بيت ستو دوام.. بتباري في النسوان
لا بتعرف تكرم الضيف.. ولا بتورِّق الخُدرة
٭ ٭ ٭ ٭
وفي بيت محروم من الأطفال
من ضحكة عيون حلوين
وكل يوم ناسو عند دكتوركبير.. أتعابو بالملايين
وبيت أطفالو زي عشرين .. ومحتاجين حق كراسة ما لاقين
وبس عايشين على الله.. ما قادرين يسدوا الدين
وناس تانيين.. مرتاحين.. وهَم في الدنيا ما شايلين
٭ ٭ ٭ ٭
وياما وياما تلقى بيوت .. بيوت صاخبة
وبيوت لا ليها حس ولا صوت .. وكل ناس البيوت بتموت
ويبقى البيت شبر واحد.. وبكرة تكون بيوتنا قبور
لا هم مويه لا هم نور .. ويبقى مُنانا في الجنة
وننسى حكاية السُترة.. وحكاية الريد
كأننا لحظة ما كنا.. ولا فتشنا يوم عن بيت
حليل البيت.. وهم البيت.. وناس البيت
حليل الدنيا بالفيها!! وكل الفيها لا ماليها ولا مكفيها

[مها]

ﻳـﻪ ﺷـﻌـﻮﺭَﻙ .. ؟
ﻟـﻮ ﺗﺤـﺒـّﻚ ﺯﻭﻟـﺔ ﻋـﺎﻳـﺸـﺔ
ﻋـﺸـﺎﻥ ﺑـﺘـﺘـﻨـﻔـّﺲ ﺣـُﻀﻮﺭَﻙ !..
ﺃﻳـﻪ ﺷـﻌـﻮﺭﻙ ؟
ﻟـﻮ ﺑـﻘـﻴـﺖ ﺿﺤـﻜـﺔ ﻋـِﻨـﻴـﻬـﺎ !..
ﻭ ﻛـﻨـﺖ ﺃﺟـﻤـﻞ ﺯﻭﻝ ﻟـﺪﻳـﻬـﺎ !..
ﻭ ﺻﺮﺕ ﻣـﻨـّﻬـﺎ - ﺃﺩﻧـﻰ ﻟـﻴـﻬـﺎ ..
ﺩﺍﺧـﻠـﺔ ﻗـﻠـﺒـﻚ ﺑـﻰ ﻣﻬـﺎﺑـﺔ ..
ﻭ ﺷـﺎﺭﻗـﺔ ﻧـﺒـﻀﻚ ﺑﻰ ﺍﻟـﺼﺒـﺎﺑـﺔ ..
ﻭ ﻓـﺎﺗـﺤـﺔ ﻓـﻴـﻚ ﺧـﺰّﺍﻥ ﻛـﺘـﺎﺑـﺔ ..
ﺩﺍﻓـﻘـﺔ ﺣـِﻨـّﻬـﺎ ﻓـﻰ ﻭﺭﻳـﺪﻙ ..
ﻛـﻔـﻜـَـﻔـﺖْ ﺃﻛـﻤـﺎﻡ ﻧـﺸـﻴـﺪﻙ ..
ﻭ ﺻﻨـْﻔـَﺮﺕْ ﻛـﻠـﻤـﺔ ) ﺑـﺮﻳـﺪﻙ ( ..
ﺻﻨـّﻔـﻮﻫﺎ ﺑـِﻨـﻴـّﺔ ﻫـﺎﻳـﻤـﺔ ..
ﻓـﻰ ﺳـﻜـﻚ ﺩﻧـﻴـﺎﻛـﺎ ﺣـﺎﻳـﻤـﺔ ..
ﻭ ﺑـﻴـﻚ ﺑـﺘﺤـﻠـﻢ ﺻﺎﺣـﻴـﺔ / ﻧـﺎﻳـﻤـﺔ ..
ﻗـﻠـﺒـﻚ ﺍﻟـﺒـﺮﺩﺍﻥ ﻭ ﺩﺍﻓـﻰ ..
ﻭﺟـَّﻌـﺖ ﻓـﻴـﻬـﻮ ﺍﻟـﻘـﻮﺍﻓـﻰ ..
ﺷـِﻌـﺮﻭ ﻳـﻤـﺮﻕ ﺟﺎﺭﻯ / ﺣـﺎﻓـﻰ ..
ﻋـﺎﻳـﺰﺓ ﺗـﺒـﻨﻰ ﻣـﻌـﺎﻙ ﺣـﻴـﺎﺗـﺎ ..
ﺷـﺘــّﺘـﺖْ ﻓـﻴـﻚ ﺃﻣـﻨـﻴـﺎﺗـﺎ ..
ﻭ ﺷـﺎﻳـﻠـﺔ ﻣـﻨـﻚ ﺫﻛـﺮﻳـﺎﺗـﺎ ..
ﺍﻟـﺤـﻨـﺎﻥ ﻣـﺎﺭﻕ ﻣﺠـﺮْﺗـَﻖ
ﻣـﻦ ﻋـﻮﻳـﻨـﺎﺗـﺎ ﺍﻟﺮﺣـﻴـﺒـﺔ !..
ﺷـﻮﻓـﺘـﺎ ﺗﺮﻃـِّﺐ ﺩﻭﺍﺧـﻠﻚ
ﻟﺤـﻈـﺔ ﺍﻟـﻮﺣـﺸـﺔ ﺍﻟـﻌـﺼﻴـﺒـﺔ ..
ﻣﺎ ﺑـْﺘـﺴـﻴـﺒـﻚ ..
ﻫـﻞ ﺡ ﺗـﻘـﺪﺭ ﺇﻧـﺖ ﺗـﻨـﺴـﺎﻫـﺎ ﻭ ﺗـﺴـﻴـﺒـﺎ .. ؟؟
ﺳـَﺮَّﺣـﺖْ ﻃـﻔـﻠـﺔ ﻣـﺸﺎﻋـﺮَﻙ :
ﺷـﻮﻕ ﻭ ﻟـﻬـﻔـﺔ ﺑـِﻘـَـﻦ ) ﺿـﻔـﺎﻳـﺮ ( ..
ﻃـﻤّـﻨـﺖْ ﺑـَﻄـْﻦ ﺍﻟـﻤـﻈـﻨـّﺔ ,
ﺑﻰ ﺻﻮﺍﻧـﻰ ﻣـﻦ ﺍﻟـﺒـﺸـﺎﻳـﺮ ..
ﻛـﺎﻥ ﻭﺷـﻴـﺶ ﺍﻟـﻜـﻠـﻤـﺔ ﺃﻏـﺒـَﺶ -
ﺷـﺎﻓـﺎ ﻋـﺎﺩ ﻟـﻰ ﺳـﻄـْﺮُﻭ – ﻧـﺎﻳـﺮ ..
ﺃﻳـﻪ ﺷـﻌـﻮﺭﻙ ؟
ﻫـﻞ ﺡ ﺗـﻔـﺮﺡ ؟ .. ﻫـﻞ ﺡ ﺗـﺴـﺮَﺡ ؟
ﻫـﻞ ﺡ ﺗـﺘـﻠـﻔـّﺖ ﺗـﻌـﺎﻳـﻦ -
ﻭ ﺗـﻔـﺘـﻜـﺮ ﻓـﻰ ﺍﻟـﻜـﺎﻥ ﻭ ﻛـﺎﻳـﻦ .. ؟
ﻫـﻞ ﺡ ﺗـﺰﺭﻉ ﺭﻳـﻖ ﺻُﺒـﺎﻋـَﻚ
ﻓـﻰ ﻗـﻮﺍﻣـﻴـﺲ ﺍﻟـﻤﺤَـﺒـّﺔ ؟
ﻫـﻞ ﺡ ﺗـﻌـﻠـِﻦ ﺟـُﻮّﻩ ﺩﻣّـﻚ ؟
ﺇﻧـﻮ ﺣـﺎﻟـﺔ ﺍﻟـﺮﻳـﺪﺓ ﺻﻌـﺒـﺔ ..؟ !
ﺃﻳـﻪ ﺷـﻌـﻮﺭﻙ ؟؟

[waya]

" الزمان الزاهي "

الزمان الزاهي مرّ
وعدت ايام المسرة
وفضلت الذكري الحبيبة
نارة توقد مرة مرة
حار خلاص الكون ده اصبح
وخوفنا بكرة نشوف احرّ
واسه ما طايقين مرارتو
كيف مع الجاي الامرّ

اسدل الابداع سدولو
وما فضل بس غير طلولو
العمالقة انفضو فاتوا
وابتدو الاقزام يطولو
يا زمن ايه النقولو ؟
هل نقول نضب المعين ؟
و فننا اندثرت حقولو
او نقول كملو البغنو
والشعر اجدب خميلو

كانت ايامنا الخوالي
حلوة طاعمة ومستطابة
يا زمان رجعنا ليها
كان فضل عندك عقابا
نحن منها ما ارتوينا
مالو قافل بدري بابا ؟
النوابغ شتو فاتو
خلفو الاسي والرتابة
لا قصيدة تهز كيانا
لا كمنجة ولا ربابة
لا ولد هز الشباك
من تاني او سجل اصابة
كورة ماف زولا بعدنا
للشباك اسدا مشابا
وفرح الامة الجسورة
الكورتا العالم بهابا

العصافير الوديعة
الراكه في ينبوع امان
افردت جنحينه طارت
لما خضاها الزمان
في الاقاصي وفي الفيافي
اصلو ما خلت مكان
انحسر صخب الاماسي
وانبهم حس الكمان

كانت امدرمان وديعة
وليلا عامر بالحدائق
البصادفك كلو ضاحك
والبقابلك كلو رايق
والحبايب اللينا فيها
بالجمال لفتو الخلايق
الا ما قطعو العلائق

كانت الخرطوم جميلة
وليلا يلصف بالكهارب
المتاجر الضخمة تفتح
لما فجر اليوم يقارب
الشجر ظالي الشوارع
النوافير النجايل والملاعب
المحطة الوسطي كانت
ملتقي الناس والحبايب
ناس تناقش وناس بتضحك
وناس تقالد وناس تطايب
جاطت الدنيا الجميلة
واصبحت ساحة مأرب
ناس بدون مجهود تحصل
فوق وتصفالا المشارب
وناس تقول مافي البطولا
وفجأة نجمها يمشي غارب
وناس تكابد وناس تجابد
وبرضو ما سادة المطالب
الخليل الكان بزورنا
صدّ مننا مالو هارب ؟
والحسان الكانو غزلان
كيف تحولو لي عقارب ؟

يا سلام انا من زمنا
الكان ينابيع من سرور
كانت الحاجات عديلة
ودوغري لا زيف لا قشور
الطيور كانت طيور
والعطور كانت عطور
والزهور كانت زهور
بي شذاها وبي نداها وبالعبير
الغني مجاور الفقير
والوزير صاحب الخفير

[waya]

الزمان الباهي

مجتمع كان من بساطة واحترام
لا تطاول لا تباهي
لا تجافي ولا ملام
تبدا يومك بي حبابك
وتنهي بي مرحب سلام

وكل زول حايم اخوكا
و ان ختيت او يوم غلطت
في الكبار البزجروكا
والمعلم كان ابوكا
كنا نحترمو ونجلو
كانت الناس بي سلوكا
كان صحابك في المدارس
طول حياتم يذكروكا
لما تطلع فوق تشيلهم
ولما يطلعوا يرفعوكا
كنت تشتاق للحبايب
ولما تبعد يشتهوكا
والقطر كان ستة شوكة
الزمن ما فوضى روكة
بيهو للحبان نسافر
ولا هم حلوين يجوكا
كانت البوستة التواصل
ان بعد منك خليلك
وان بعدت يحنو ليكا
يقولوا وينك يا حليلك
والخطابات المسطرة
والمناديل المعطرة
زي حمام زاجل تجيكا

الوداد شار فوقنا ضلو
والحبيب كنا بنجلو
العواطف حاجة تانية
والغرام كان طعمو حلو
المحبة قطوفا زاهية
ولي فروعا الناس يعلو
تزدهي الحيشان وتجمل
الحبايب يوم يطلو
كنا اوفي الناس مودة
في عموم الكون ده كلو
اصلو مافي اتنين تدانو
وفرتقوا وبعدوا وتخلو

العفاف كان سوقو عامر
وليهو ما بنفض سامر
كنا بي رقتنا نزهو
وكنا بالتهذيب نفاخر
الصغير كان كلو طاعة
والكبير كان ناهي امر
والوداد كان البشكل
العلاقات والاواصر

البلد كانت رخية
لا كلاش لا بندقية
القروش تكفي وتفضل
حتي لو كانت شوية
مافي زول ساكي المعايش
والاكل ما كان قضية
كانت الناس بالعواطف
والمشاعر جد غنية
لا بتجيك من زول اذية
لا بتواجهك يوم اسية
ظلل الابداع زمانا
وطالت اشجارو الطرية
كانت المزيقا طاعمة
صادحة منسابة وشجية
كانت الجامعة في زمنا
واحة زاهية وشاعرية
الثقافة قطوفه دانية
والشعر كان بالسجية
كل يوم اشعار جديدة
كل يوم نكتب قصيدة
مرة في المهدي الامام
ومرة في غصن السلام
ومرة في بدر التمام
مرة في نهرو المناضل
ومرة في عزة الفتية
مرة في الزهرة الندية
ومرة في الجارت عليا
ومرة في الدر البراري
الفيها شفت شبه صغاري
وليها اوفيت الله داري
ومرة في اخت القماري
ومرة في الحلوة القصيدة
ومرة في النافرة العنيدة
ومرة في الاسرني ريده
مرة في الوادعة القيافة
ومرة في الجادة البخافة
ومرة في ست الظرافة
ومرة في الاسر عفافة
ومرة في السامقة الزرافة
مرة في عبدالفضيل
ومرة في شدو الخليل
ومرة في برعي الجميل
ومرة في حسبو الطويل

صاح زمانا الزاهي مرة
وتفضل الذكري الحبيبة
نارا توقد مرة مرة

[waya]

ضلفة البت الرتينة
" هاشم صديق "

• ضلفة البت الرتينة
  بورولوج
  (1)
  الحصة
  اتذكرتِك
  كُت فتران
  مهدود الجِتّه
  فجأه لقيتَ
  أقدامي اتْصابن
  عيوني انفتحن
  عِرْفو السكه.
  كنت مشوّش
  وعاشق لِكّه
  بقيت تلميذك
  عديل أتهجّا
  واعرف أقرأ
  كمان اتفاصح
  طول الحصة
  (2)
  التلاشي
  رفعت مَخدّه
  في بيتنا
  لقيت خليتي
  لي بسمه
  فَتَحْت عيوني
  في الذاكره
  طار بجناحو
  صوت همسه.
  فتحت كتاب
  طلع من وسطو
  نور بصماتك
  الخمسة
  سمعت موسيقى
  حسيتك
  تقول تاوقتي
  لي حسه.
  (3)
  شاي الصباح
  صباحك خير.
  من إيديكْ أشيل
  إلفة كبابي الشاي
  يولع فيني
  صوت النايْ
  وأقول ليكْ
  الغرام جِرْسَه
  أقول ليك
  القَلُب بكّاي.
  ......
  ملامحك
  والصباح والبُن
  وضحكاتك
  تدوبي معاي
  يِبشِّر فوقنا
  بوخ الشاي
  وأعاين ليكِ
  راسي يِزن
  وقافيه حنينه
  فيني تَرِن
  أغيب في الحَضْره
  واتلبّش
  واخاف من جني
  بيكِ
  أجن.
  (4)
  الفيضان
  أقول ليكْ
  الكلام الجد
  هواك جوايا
  فاض بالجد
  أخير ياروحي
  نفتح سد.
  (5)
  البذره
  حكايتي معاك
  حكاية البذره
  والمطره
  كِبِر إحساسنا
  باللُقيا
  صِبِح يا روحي
  ضُل شجره.
  (6)
  التهاني
  كل عام
  وانتي طيبه
  وبت مَسَرّه.
  .........
  كل عام
  وانتي صابره
  جروحها حُره
  ........
  كل عام
  انتي عارْفه
  الحاله مُره
  إلا ضحكك
  «ساكْس» يزغرد
  ألف مره
  (7)
  التوجس
  الشوق برد
  ولاّ الحنين
  نام في الصباح؟!
  عندي إحساس
  إني مارق
  من عيونكِ
  وإنو شيتاً
  كان يناغم
  ليّا فيكي
  زي تقول
  غَمّض وراح
  .......
  وين أقَبِّل
  لما أمرق
  من ونستك
  والسلام؟!
  .......
  أمشي وين
  وجوه وتراً
  بيكْ يدندن
  وقايلو نام؟!
  .........
  خوفي يوم
  ألقاكِ
  خاصمتي المسام.

[waya]

النشيد
يابِتْ يا رتينه
ايديك في إيدَيْ
حُمِى وربّابه.
حضورك «طار»
فُقَرا وتُقابه.
بقراك في السر
بقراك في الجهر
واكتب ليكْ
سطرين
في سحابه.
علمتي الحُزُن
يتهجّا الفرحه.
الشمس الزازت
غار السكه
اتماصت وطارت
رجعت ركّت
فوق أغصانك
شايله دوايه
سبحه وآيه
بالّه محايه
راسمه كتابه
في صفقة غابه
محفّله صندل
وين ما تْقَبِّل.
فاتحه عيون
المطره الجايه
تَرُش النار
في صحن الدار
الشَبّ حرابه
للفُقَرا تَفُرشي
البِرش الأسمر
وتطوي
بساط الساده
الأحمر.
تَقِلْبي الصفحه
دُعاش في لمحه
صوابعي تفرهد
تمحا وتكتب
تكتب وتمحا.
إشارْة الشارع
تَفْتِّح أخضر
يأذِّن لينا
صباح في اضينّا
تترتر راجعه
الفاجعه الشينه
مراكبْ الرحله
تبوس المينا.
النيل يتململ
يتُف الحنضل
يَرجع أجمل
ويمشي مهابه.
يلوِّح ليهو
هتاف الحِلِه
ترقص صَفقَه
تصفق شتله
ويغَنّوا غلابه.
يا بت يا رتينه
في «سيره»
وعَرْضَه
غَيّرتي الحركه
مشت للبركه.
بصمتي بعشره
تَخُتي الضحكه
محل الكَشَره.
تختي النُقطه
في نون الشنطه
تقولي :
- جميل
بدل «يا شَرطه»
تقولي :
- أصيل
بدل «يا شطه»
تقولي عديل
في عين الفيل :
- حَنْخُت حِنّتْنَا
في قلب الخرطه.
ما بْتَنْعس جمره
تقوم تتمطّا.
ما بسكت ناي
بي أمر الشُرطه.
ما بترمي جريده
غُبار في سِيره
ما بنبكي نقول :
- يا آهـ من ديل
ويموت الحيل.
ما بننسى القَمَره
نَمُرْق السَهَله
نَشِب للمطره
ونرمي شليل
والرَحْل التايه
يلاقي محطه.
- يا بت
- يا توب
بسيمه تَبَقْبِق
ضحكه في لمبه.
يا لمسه
في نسمه
ترازي الرمَضَا
التَقْلِي الحبه.
.....
ونستك ساي
جبنه وشاي
والصُحبه كبابي.
طَلَقْتي بخور
يطير فوق سور
لي ضُل هبّابي
خليتي الدهشه
تخاصْم العادي
......

[waya]

صوابعك
دقّت باب البيت
انتشت الحله
وجاها منادي.
خليتي الهاتف
يِرِن ويتمحن
الصوت يتجنن
البحه تجازف
تصبح فرحه
تَرِن في وادي.
.....
نفختي الروح
في ضلفه يتيمه
بِقَت منشرحه.
رَشّيتي الإلفه
بلمسه حنينه
بكت بالفرحه
وتصحصح يومي
تدندن عادي.
رميتي البذره
في رفقه وعِرفه
خَلَطِّتي المنقه
معاها زبادي.
خليتي التوب
يقول الروب
بي صوت سوداني
كتبتي بيان
بي صوت
و «كمان»
غناهو الرادي.
(9)
الحواشي
(أَلِف)
ألفين وخمسه
لسه ما وِصلت
(لميسنا).
البشاير بي عيونّا
ماها
مكياج الإشاعه.
أبقى بت
فهمِك جروحك.
أدِّي عقلك
للحواري
وما لروحك
أَمْلي أنفاسك
شجاعه
أبْري من بنط
الجرايد
ومن أناشيد
الإذاعه
(باء)
باقي منك
جوه فيني
كلك انتي
وزايده سُتره
ولمبه خضرا
وحوش وضلفه.
وباقي مني
جوه فيكِ
روح وجته
ونار وسكه
وسيف وكَفّه
(تاء)
تَبّيتِي في الوهطه
وجفونك
مرسى للقمره
النِسَت
(أحلام صبانا)
يا مسايرك
ليلها أصبح.
يا ملامحك
لونها أفصح
من رطانه
.....
يا تَخَاكْ
من غيمه سمرا
لما تَبْتَب
فوق سَدُر
قَش البُطانه.
(ثاء)
ثرثرة
ومن صوت سكون.
شَبَك الحروف
في الصمت
ما بعني الجنون.
حبل الكلام
بينّا اتْربط
ما ببقى بس
باللسان
أو حتى
بي «لغة العيون».
نحنا اكتشفنا
الونسه
في لغة «التخاطر»
في سكون
والتواصل
في «نكون».
(جيم)
جابني ليك
طيراً خرافي
من زمن
موجود .. و .. مافي.
وما بقيت
في الدنيا في
وحَبِيت وَقَفْتَ
ضحكت تاتيت
في المشي
إلا لامِن
جيتي طالعه
صبيه فارعه
من غباش
غار المنافي.
ومشيت هواك
مستور ... و ... حافي.
(الهوامش)
(1)
من دفتر
البت الرتينه
الهوى الهَدْهَد
مسادير الغبينه.
كان ولسه
زمان وهسه
السلام
الموده
والسكينه
و ... «ضلفة
البِت الرتينه».
(التاريخ)
أربعه وعشرين
... شهر واحد
.....ألفين وخمسه
......
ولسه برضو
في الباقي قصه

[waya]

(حبوبه)
داليا الياس

نتح الحنين جواي... طراني حلتنا
زمن الجمال والخير... أيام مسرتنا
شجر العشر والنيم... المالي سكتنا
صوت الصفق والريح... وأغنام زريبتنا
ضل الضحى الممحوق... وكبابي جبنتنا
الضحكه والترحاب... وبواقي ونستنا
والوقفه جمب الباب... لي ناس معزتنا
عايشين على الموجود... حابين بساطتنا
يوم كنا متكاتفين... و(الجد) منارتنا
والقمره عز الليل... ضوّت رتينتنا
نسمة دعاش الصيف... وريحة زلابيتنا
أمي بتسوي الشاي... و(حبوبه) حجّتنا
وهسع بقت فى الدار... (يا ويح نخوتنا)
وشكرا لأهل الدار... الداروا سوءتنا

(حبوبه) وينك وين؟!...حبوبه والله زمان
كاتلني شوقا ليك... ولي حضنك الدفيان
منك عرفنا دروس... وروينا ريد وحنان
بي توبك المعطون... غطيتي كل بردان
ودعيتي بالتوفيق... وحصنتي بالمنّان
عفوا ملانا غرور... ونسينا كل الكان
لا فهمنا درس البر... لا قيمة الإحسان
وعرفت درب الدار... وضاع مننا العنوان

(حبوبه) زوريني... أنا داير أحجيكي
بي قصة الأحفاد... الخانوا ماضيكي
صغرت مروءتنا... وكبرت مآسيكي
لا سدّ جوعك حن... لا لهفه ترويكي
لاهين ورا الدنيا... ومرات كده نجيكي
لا بنفهم أحزانك... لا بندري بالفيكي
ولو يوم ظلمناكي... عدل الله راجيكي

الغول ختف فاطنه... وما فينا أي حسن
ملينا من عجزك... فتشنا ليكي سكن
وكل ما يطول عمرك...حتشوفي ياما محن
إمكن نزورك يوم... لو مره بس أمكن
لو سنحت الأحوال... ولقينا باقي زمن
بعناكي للمجهول... وقبالها بعنا وطن

الجاب أبوه الدار... ما عنده أي عذر
مهما يكون ظرفه... لو حتى ضاق المر
معقوله يستغنى.. عن والده مرّه بشر؟!
الجابه للدنيا... وعليه ياما صبر؟!
كان راجي يبقى سند... لو شاخ وعدّ عمر
لا راجي جاه لا مال... ولا راجي حتى شكر
داير شوية حب... والذكرى ديما تمر
عن حالنا نحنا زمان... أطفال صغار وشتر
نضحك بدون تكليف... وللهم براه يجر
علشان يعيش مستور... ويلبي كل أمر
والليله جينا خلاص... لي عهده نتنكر؟!
نرميه جوه الدار... والقسوه تتفجر؟!
لا رحمه لا عرفان... لا نخاف ولا نخجل
من ربنا الديان... الوصى يوت بالبر
بالوالد المسكين... العشمه كان أخضر
لكن جفا الحبان... من عشمه كان أكبر
وبقت الحكايه جحود... وإمكن تكون أكتر
منعول ولادة الهم... لي والده ما قدر
والدنيا بكره تدور... وفي الدار دي يتحكر

ضاقت بيوت العز... ووسعت مآوينا
الحزن ماليكم... والزهو مالينا
ما نسيتوا عشرتنا... لكننا نسينا
بارينا درب الغي... وأنكرنا ماضينا
(حبوبه) تاج الراس... نرجوك تسامحينا
وان شا الله داركم يوم... ترحم وتأوينا

دار الحكومه بقت... آخر المطاف بيتكم
فيها بتقيموا الليل... وتصابحوا يوم عيدكم
الدمعه صحبتكم... والخوف أكيد سيدكم
وفي منتدى التغريب... دايما مواعيدكم
ضيعنا أحلامكم... تاجرنا بي ريدكم

(حبوبه) جوّه الدار... محزونه مكلومه
والدار دي في الأحزان... يكمل عديل يومها
تستقبل الأفواج... لا قعده لا قومه
تفتح مع الآذان... قبال تتم نومها
محتاجه رحمه ونور... متجدده همومها
من الفرح والحب... يوماتي محرومه
لازم نساعد الدار... وتعفينا من لومها
معقوله حتى البر... ملزومه بي حكومه؟!

[waya]

ﺃﻗﻴﻔﻲ ﻣﻌﺎﻱ ﻧﺸﻴﻞ ﻣﻦ ﺍﻟﺰﻣﻦ
ﺣﺰﻧﻮ
ﻭﻧﻔﺞ ﻃﻴﻦ ﺍﻷﺭﺽ ﺑﻲ ﺣﻦ
ﻧﺸﺮﺑﻮ ﺭﻳﺪﻙ ﻭﻧﺪﻓﻨﻮ
عشان تنبت ملاحك صدق
يكونو عيونا شايفنو
ﻭﻧﻬﺪﻱ ﺍﻟﺸﻤﺲ ﻟﻮﻥ ﻋﻴﻨﻚ
ﻋﺸﺎﻥ ﺍﻟﻀﻮﺀ ﻳﺒﻴﻦ ﺣﺴﻨﻮ

ﺗﻌﺎﻟﻲﻧﺸﻴﻞ ﻧﺪﺍﻙ ﻟﻠﻨﻴﻞ ﻧﺒﻞ
ﺭﻣﻼﺗﻮ ﻓﻲ ﺩﻧﻮ
ﻧﺴﺄﻝ ﻣﻮﺟﻮ ﻋﻦ ﺣﺎﻟﻮ ﻭﻋﻦ
ﻭﻋﺪ ﺍﻟﺮﺯﺍﺯ ﻣﻨﻮ
ﻫﻞ ﻻﻗﺎ ﺍﻟﺒﺮﻕ ﻭﺭﺍﻫﻮ ﺇﻧﻮ ﺩﻭﺍﻡ
ﺑﻜﻮﺱ ﺣﻨﻮ
ﻫﻞ ﻓﻲ ﺯﺍﺗﻮ ﻻﻗﺎ ﺇﺣﺴﺎﺱ
ﺑﻘﻮﻝ ﻏﻴﻤﺎﺗﻮ ﻋﺎﺟﺒﻨﻮ
ﻫﻞ ﻓﻲ ﺑﻄﻨﻮ ﻧﺎﻡ ﺷﻮﻗﻚ
ﺻﺒﺢ ﻭﻋﻮﺍﻃﻔﻮ ﻣﺎﻟﻜﻨﻮ
ﻭﻛﺖ ﺩﺧﻠﺖ ﺧﻄﺎﻙ ﺃﺭﺿﻮ ﺑﻴﻚ
ﻗﻴﻔﺎﺗﻮ ﻭﺭﻧﻮ
ﺗﺴﺐ ﺷﻮﻗﻮ ﻓﻲ ﺟﻮﻓﻮ ﻭﺣﺖ
ﺃﻣﻮﺍﺟﻮ ﺑﻴﻚ ﺟﻨﻮ
ﺯغرﺩ ﺷﺠﺮﻭ ﻣﻦ ﺣﻮﻟﻮ ﻭﻛﻞ
ﺃﻃﻴﺎﺭﻭ ﻟﻴﻚ ﻏﻨﻮ
ﺟﺎﺕ ﺍﻟﺸﻤﺲ ﺯﻋﻼﻧﻪ
ﻗﺎﺻﺪﻩ ﺗﺒﺨﺮﻙ ﻣﻨﻮ
ﻭﻫﺐ ﻫﺐ ﺍﻟﻨﺴﻴﻢ ﻋﺠﻼﻥ
ﻋﺸﺎﻥ ﻣﺎﻳﺒﻌﺪﻙ ﻋﻨﻮ
ﻗﺎﻡ ﻣﻮﺝ ﺍﻟﺒﺤﺮ ﺩﺳﺎﻙ ﻋﺸﺎﻥ
ﻋﻴﻨﻴﻚ ﻋﺎﺟﺒﻨﻮ
ﺃﻫﺪﺍﻙ ﺩﺍﺭ ﻫﻮ ﻓﻲ ﺟﻮﺍﻩ
ﻣﻨﺴﻮﺝ ﺑﻲ ﻭﺩﺍﺩ ﺣﻨﻮ
ﻓﺎﺗﺢ ﺑﺎﺑﻮ ﻓﻲ ﺣﻀﻨﻮ ﻭﻛﻞ ﻋﺠﺎﻟﻮ
ﺣﺎﺭﺳﻨﻮ
ﻋﺸﺎﻥ ﻣﺎﻳﺪﻗﻮ ﺷﻮﻕ ﻟﻲ ﺯﻭﻝ
ﻳﺘﺎﻭﺭﻙ ﺣﺲ ﺣﻨﻴﻦ ﻓﻨﻮ
ﻭﻻﻳﺜقب ﺟﺪﺍﺭﻭ ﻫﻮ ﺻﻮﺕ ﻳﺠﻴﺐ
ﺃﺳﻤﻚ ﻫﻮ ﻓﻲ ﻟﺤﻨﻮ
ﻭﺳﻮﻥ ﺳﺪ ﻗﺼﺎﺩ ﺍﻟﺪﺍﺭ ﻳﺼﺪ ﻛﻞ
ﺻﻮﺕ ﻏﺮﻳﺐ ﻋﻨﻮ
ﺗﺮﺳﻮ ﺍﻟﺴﻜﻪ ﺑﺎﻟﺘﻤﺴﺎﺡ ﻭﺟﺎﺑﻮ
ﺍﻟﻘﺮﺵ ﻭﺻﻨﻮ
ﻋﺸﺎﻥ ﺑﺲ ﻣﺎﻳﺰﻭﻙ ﻃﻴﻒ ﻳﻔﺮﻍ
ﻓﻲ ﺭﺅﺍﻙ ﺩﻧﻮ
ﻳﻤﻨﻌﻮ ﻟﻠﻨﺴﻴﻢ ﻳﻐﺸﺎﻙ ﻗﺪﺭ
ﻣﺎﻳﺤﺎﻭﻝ ﻳﺤﻤﻨﻮ
ﻭلمو ﺟﻤﻴﻊ ﻓﺼﺎﻳﻞ ﺍﻟﻨﻴﻞ ﻭﺟﻤﺒﻚ
ﺯﻏﺮﺩﻭ ﻭﻏﻨﻮ
ﺳﻮ ﺍﻟﺤﻔﻠﻪ ﺻﺒﺎﺣﻲ ﻭﺑﻴﻚ
ﻳﺒﺎﺭﻛﻮ ﻭﻳﻴﻬﻨﻮ
ﺭﻗﺺﺍﻟﻨﻴﻞ ﻋﻠﻲ ﺇﻳﻘﺎﻉ ﺧﻄﺎﻙ
ﻣﻨﻮ
ﻓﺮﺡ ﺟﻮﺍﻫﻮ ﻋﺮﻕ ﺍﻟﻄﻴﻦ
ﻋﺸﺎﻥ ﻋﻴﻨﻴﻚ ﻟﻴﻬﻮ ﺩﻧﻮ
ﻣﺪ ﺇﻳﺪﻳﻬﻮ ﻟﻲ ﺣﻀﻨﻚ ﻋﺸﺎﻥ
ﺑﻲ ﺇﻟﻔﻪ ﺗﺘﻬﻨﻮ
ﺟﺎﺀ ﺍﻟﺘﻴﺎﺭ ﺑﺪﺍ ﻳﺠﺮﺗﻖ ﺭﺑﻂ ﻛﻢ
ﻋﺸﺒﻪ ﻓﻲ ﺇﻳﺪﻙ ﻭﻛﻢ ﻣﺮﺟﺎﻧﻪ
ﻓﻲ ﻛﻔﻨﻮ
ﺯﻏﺮﺩﻭ ﻟﻴﻬﻮ ﻫﻮ ﻳﺒﺸﺮ ﺑﻨﺎﺕ
ﺍﻟﻤﻮﻳﻪ ﺑﻴﻐﻨﻮ
ﺷﻤﻞ ﺍﻟﺤﻮﺕ ﻳﺒﺎﺭﻙ ﻟﻴﻮ ﻳﻘﻮﻝ
ﺇﻧ ﺸﺎﺀ ﺍﻟﻠﻪ ﺗﺘﻬﻨﻮ
ﺗﻌﻴﺸﻮ ﺳﻌﺎﺩﺓ ﺗﻤﻠﻲ ﺍﻟﻜﻮﻥ
ﺗﻔﺮﺣﻲ ﺑﺎﻟﺠﺪﻳﺪ ﻣﻨﻮ
ﺑﻴﻚ ﻓﺮﺣﺎ ﻛﺘﻴﺮ ﺩﺍﺭﻭﺍ ﻭﻃﻮﻝ
ﺍﻟﻌﻤﺮ ﺑﺘﻤﻨﻮ
ﻳﻼﻗﻲ ﺍﻟﺮﺍﺣﻪ ﻓﻲ ﺭﺋﺘﻴﻚ ﺩﺍ ﺃﻣﻼ
ﻛﺎﻧﻮ ﺭﺍﺟﻴﻨﻮ
ﻳﻨﻮﻣﻮ ﻭﻳﺼﺤﻮ ﻓﻲ ﺣﻀﻨﻚ ﻳﻼﻗﻮ
ﺍﻟﺸﻮﻕ ﻳﻘﺎﻟﺪﻧﻮ
ﻭﻻ ﺣﺴﻦ ﻣﺪﺍﻣﻊ ﺍﻟﻨﺎﺱ ﻭﻻ ﻟﻲ
ﺣﺎﻟﺘﻲ ﻳﻮﻡ ﺣﻨﻮ
ﻭﺃﻧﺎ ﺍﻟﺴﺄﻟﺘﻬﻦ ﺑﺎﻟﻠﻴﻞ ﻋﻦ ﺣﺎﻟﻚ
ﻫﻮ ﻛﻴﻔﻨﻮ
ﻫﻞ ﺷﺎﻓﻮﻙ ﻓﺮﺣﺎﻧﻪ ﻭﺭﺍﻗﺪﻩ
ﻏﺮﻳﺮﻩ ﻓﻲ ﺣﻀﻨﻮ
ﻫﻞ ﻋﺎﺷﻮﻙ ﻳﻮﻡ ﺃﻓﺮﺡ ﻭﻫﺴﻲ
ﺑﻴﻚ ﺑﺘﻬﻨﻮ
ﺳﻜﺘﻦ ﻟﻲ ﻣﺎﺭﺩﻥ ﻋﺸﺎﻥ ﺑﺲ
ﺻﻮﺗﻲﻋﺮﻓﻨﻮ
ﺻﻮﺕ ﺯﻭﻻ ﻛﺘﻴﺮ ﻧﺎﺟﺎﻙ ﻣﺠﺮﺡ
ﺻﻮﺗﻮ ﻣﻦ ﺣﺰﻧﻮ
ﻭﻃﻮﻝ ﺍﻟﻠﻴﻞ ﺑﻨﺎﺩﻱ ﻋﻠﻴﻚ ﻭﺣﺖ
ﺇﺣﺴﺎﺳﻮ ﻋﺮﻓﻨﻮ
ﺯﻭﻝ ﻓﺎﺗﻨﺎﻫﻮ ﺟﺪ ﻋﻴﻨﻚ ﻭﻗﻠﺒﻚ
ﻟﻴﻬﻮ ﻛﺎﻥ ﻭﻃﻨﻮ
ﺷﺎﻟﻚ ﻣﻨﻮ ﻣﻮﺝ ﺍﻟﻨﻴﻞ ﻋﺸﺎﻥ
ﺻﻮﺗﻚ ﻳﻜﻮﻥ ﻟﺤﻨﻮ
ﺣﺮﻡ ﻋﻴﻨﻴﻬﻮ ﻣﻦ ﺷﻮﺗﻚ ﻭﺷﺎﻝ
ﺭﻭﺣﻚ ﺑﻌﻴﺪ ﻋﻨﻮ
ﻭقرﺭ ﻳﻌﻴﺶ ﻋﻠﻲ ﺫﻛﺮﺍﻙ ﻳﻐﻨﻴﻚ
ﻓﺮﺣﻪ ﻟﻲ ﺣﺰﻧﻮ
ﻭﻛﺎﻥ ﺑﺎﻟﻠﻴﻞ ﺑﺸﻮﻑ ﺻﻮﺭﺗﻚ
ﻋﻠﻲ ﻣﺮﺍﻳﺔ ﺍﻟﺒﺤﺮ ﺗﺪﻧﻮ
ﻭﻟﻤﺎ ﻳﺜﻮﺭ ﻫﺪﻳﺮ ﺍﻟﻤﻮﺝ ﻭﺻﻮﺗﻚ
ﻳﻜﻮﻥ ﻫﻮ ﺳﺮ ﺣﻨﻮ
ﺗﺮﺗﺎﺡ ﺭﻭﺣﻮ ﻓﻲ ﺟﻮﺍﻩ ﻭﻳﺤﺲ
ﻋﻴﻨﻴﻚ ﺷﺎﻳﻔﻨﻮ
ﻭﺩﺍ ﻛﺎﻥ ﻛﻞ ﺍﻟﻔﻀﻞ ﻟﻴﻬﻮ
ﻭﻣﺼﺒﺮﻭ ﺑﺲ ﻋﻠﻲ ﺣﺰﻧﻮ
ﻋﺸﺎﻥ ﺑﺲ ﻓﻲ ﺍﻟﺨﻴﺎﻝ ﻳﻠﻘﺎﻙ
ﻳﺤﺲ ﺑﺨﻄﺎك ﻗﺮﻳﺐ ﻣﻨﻮ

[waya]

وغشيتك أسلم عليك
أتكّل قصادك
هموم الحراز
أطمّن طيوف الخريف الوشيك
أبشر دواخلك بوعد الرزاز
مودر ملامحك
غبيتك
لقيتك
بتلفظ شوارعك بيوتك
تصادر خطاك وتكاجر مشيك
تغالط حواسك ملامحك
وتحرد عيونك مقاطع وشيك
سألتك خبارك ؟!
مسُوكر لسانك
! وصمتك يشفق
خبارك ! بتغرب شموسك
زمان الشموس البتشرق
تضيع الملاحه التعطن وجيهك
ومّنك تدفق
! خبارك غريبة
أقلب دواخلك
أكوس الحبيبة اللى عنك بتفرق
بتفرق حبيبتى البتلبس فصول الخصوبة
بتضحك أغانى
وتدفق عذوبة وبتنزل مطر
عشقتك لأنك حبيبتى
وبحبك بحر
عشقتك لأنك خواتم الحقيقة
وطريق الوصول لأنك بداية الخليقة واساس القبول
أحيّى الغيوم البتفطم ذبولك
ترضع سهولك ، مواسم الهطول
واحيّي المدائن البتفتح حدودا
وتمنح عيونك جواز الدخول

يزيد خيرك
ولا طابت بلاك عيشة
مقسمة إنت فى غيرك
مقسمة فيك ما فيشه
ومخيم ليلك العسعس
لا برقن بروق صحوك
لا صبحك رضى اتنفس
يحندك فى العطش غيمك
تمطري إنت فى الخاطر
وتنفضي من دواخلى العس
بديت أتسامى للآخر
رميت توب البيات الرث
قويت إتيقنت روحي
وسقط منى الكلام الغث
أنا الدّاخرك بصيرة وشوف
يا بقعة ضو
فى عتمة قلبى المحفوف
ومسربل فى بالشتا والليل
والخوف
فارغة ومليان بيك
وضيقه عليك البشره
أنا غيبتك بينى وكنتك
زمَلتك فى الخاطر بُشرى
مزَقت ستار الجلد الهش
وطلعتى من الجسد القشرة
تاوقت
لقيتك فينى النفس الكاملة
تتوقى اليابسة
والنهر فى إيدك صلصال
يتسارق ضوَك خافت
متهافت نحوك أجرى
مهرول راكض
سابقت خُطاى وحدقتك
غيمة .. وضل .. وبُحيره
ضاريتك بينى وضاريتك
من الحزن القابض
نفسى وروحى واقف عارض
ستفت عيونك بالمطرة
وقرحتك ضد الزمن الراكض
وحدقتك حبيبتى
البتشبه فصول الخصوبه
تضحك أغانى وتدفق عذوبة
وبتنزل مطر
عشقتك لأنك حبيبتى
وبحبك بحر .

[waya]

ﺃﻧـﺎ ﻋــﺎﺫِﺭﺍ ..
ﻣـﺎ ﺃﺻﻠـﻮ ﻣـﺎ ﻣـُﻤﻜـﻦ ﺗـﻌـﻴـﺶ ,
ﺗـﺴـﺘـﻨـَّﻰ ﻭﺍﺣـﺪ ﻭﺿْـﻌـُﻮ " ﺑـِـﻴـﺶ " ,
ﻭ ﻇـﺮﻭﻓـﻮ ﻏـﺎﻟـﺒـُﻮ ﻳـﻐـﻴـِّﺮﺍ ..
ﺃﻧـﺎ ﻛـﻨـﺖ ﺻﺎﺩﻕ ﻭ ﻣـُﺴـﺘـَﻌـِﺪ ... ﺑﻰ ﻋـﻤﺮﻯ
ﻛـﻠـُّﻮ ﺃﻧﺎﺻِﺮﺍ
ﻭﺩﺍ ﻳﺎﻫـُـﻮ ﺣﺎﻟـﻨﺎ ﻭ ﻣﻦ ﺯﻣﺎﻥ ... ﺑﻰ ﻓـﻴـﺾ
ﺣـﻨﺎﻧﻰ
ﻣـُﺤﺎﺻِﺮﺍ
ﻟـﻮ ﺩﻣـﻌـﺔ ﻣـﻨﻬـﺎ ﺭﻗـﺮﻗـﺖ ... ﻗـﺒـّﺎﻝ ﻧـﺰﻭﻻ ..
ﺑـَﺼﺎﺩِﺭﺍ
ﻟـﻜـﻦ ﺩﺍ ﺇﺣـﺴـﺎﺱ ﻣﻬـﻤﺎ ﻛﺎﻥ ... ﺑـِﻘـﻰﻣﺎ
ﺑـِﻜـﻔـِّﻰ
ﻳـﺼﺒـِّﺮﺍ
ﻣﺎ ﺍﻟـﺒـِﺖ ﻇﺮﻭﻓـﺎ ﺑـﺘﺨـﺘـﻠـﻒ ... ﻭ ﺍﻟـﺸﺎﺏ
ﺿﺮﻭﺭﻯ
ﻳـﻘـﺪِّﺭﺍ
ﺍﻟـﻔـﺮﺻﺔ ﻭ ﺍﻟـﻌـُﻤـﺮ ﺍﻟﺤـَﺮِﺝ ... ﻭ ﻗـُﺼﺎﺩﺍ "
ﻭﺍﻗـِﻊ "
ﺟـﺎﺑـِﺮﺍ
ﻭ ﺃﻣـﻮﻣـﺔ ﺿـُﻠــّﻬـﺎ ﺑـِﻨﺤـﺴـِﺮ ... ﻛـُﻞْ
ﻣـﺎﺗـﻔـﻮﺗـُﻮ ﻳـﺘـﺎﻭِﺭﺍ
ﺍﻟﺤـُﺐ ﺟﻤـﻴـﻞ ﻟـﻜﻦ ﻛـﻤﺎﻥ ... ﺑﺮﺿﻮ
ﺍﻟﺤـﻘـﺎﻳـﻖ
ﻧـﺸـْﻬــِﺮﺍ :
ﺍﻟﺤـُﺐ ﻣﻊ ﺍﻷﺳـﻒ ﺍﻟـﺸـﺪﻳـﺪ ... ﻣﺎ ﺑـِﺒـﻨﻰﺃﻭﺿﺔ
ﻭ
ﻳـﻜـَﺴـِّﺮﺍ
ﻭ ﻑ ﻟﺤـﻈـﺔ ﺍﻟﺠـُﻮﻉ ﺍﻷﻛـﻴـﺪ ... ﻣﺎ ﺑـْﻐـَﺪِّﻯ
ﺃﺳـﺮﺓ ﻭ
ﻳـﻔـَﻄـِّﺮﺍ
ﻭ ﻣﺎ ﺑـِﺪِّﻯ ﻟﻰ ﺍﻟـﺘـِﻠﻤﻴـﺬ ﺭﺳـُﻮﻡ ... ﺃﻭ ﻳـﻜـْﺴـِﻰ
ﺟـِﺴـْﻤـُﻮ
ﺇﺫﺍ ﻋـِﺮَﺍ
ﻻ ﺑـِﺸـﺘـﺮﻯ ﺍﻟـﺸـﺎﺵ ﻻ ﺍﻟﺤـُـﻘـَـﻦ ... ﻻﺑـْﻠـِﻢ
ﻗـﺮﻭﺵ
ﺍﻟـﺘـﺬﻛـﺮﺓ
ﻭ ﺩﺍ ﻣﺎ ﻛـﻼﻡ ﺿﺪ ﺍﻟـﻘـﻠﻮﺏ ... ﺑـﺲ ﺩﻯ
ﺍﻟﺤـﻘـﻴـﻘﺔ
ﺍﻟـﻤـُﻀْﺠـِﺮﺓ
ﻟـﻮ ﻛﺎﻥ ﺑـِﻔـﻴـﺪ ﺍﻹﻋـﺘـﺬﺍﺭ ... ﻳﺎ ﻏـﺎﻟـﻴـﺔ ﺁﺳـِﻒ
ﻭ ﻣـﻌـﺬﺭﺓ
ﻣﻊ ﺇﻧـﻰ ﻋـﺎﻓـﺮﺕَ ﺍﻟـﺴﻨـﻴـﻦ ... ﻭ ﻟﺤـﺪﻯﻫـﺴـﻪ
ﺑـﻌـﺎﻓـِﺮﺍ
ﻧﺎﻗـﺮﺕَ ﻓﻰ ﺩﻧـﻴﺎﻯ ﻫـﻤـﻮﻡ ... ﻣﺎ ﻛﺎﻥ ﻓﻰ ﻧﺎﺱ
ﺑـِﺘـﻨـﺎﻗـِﺮﺍ
ﻭ ﺳـِﺨـِﺮﺕَ ﻣﻦ ﻭﺟـﻌﻰ ﻭ ﻣﺸـﻴـﺖ ... ﻓﻰ
ﺳـِﻜـﺔ
ﺟﺎﺭﺣـﺔ ﻣـَﺴـﺎﺧـِﺮﺍ
ﺑـﺎﺻﺮﺕَ ﻓﻰ ﺍﻷﻳـﺎﻡ ﻇـﺮﻭﻑ ... ﺃﺗـﺤﺪَّﻯ ﻏـﻴـﺮﻯ
ﻳـﺒﺎﺻـِﺮﺍ
ﻭ ﺍﻟـﺒـِﻤـﺸـﻰ ﻛﺎﻥ ﻗـﺪﺭ ﺍﻟـﺒـِﺠـﻰ ... ﻣـﺎ
ﻟـﻘـﻴـﺖ ﺯﻳﺎﺩﺓ
ﺃﺑـﺬ ِّﺭﺍ
ﻣﺎ ﻋـﻨـﺪﻯ ﻓﻰ ﺩﻧـﻴـﺎ ﺍﻟـﻤـﺰﺍﺝ ... " الشيشه ﻭ ﻻ
ﺳـﺠـﺎﻳـِﺮﺍ
"
ﺑـَﺲ ﺑـﻴـﻦ ﺭﺻﻴـﺪ ﻭ ﻣـﻮﺍﺻﻼﺕ ... ﻋﺪﻣﺎﻥ
" ﺣـﺪﻳـﺪﺓ "
ﺃﻭﻓـِّﺮﺍ
ﺣـﺘﻰ ﺍﻟـﻤﻼﻟـِﻴـﻢ ﺗـﻠـﻘـﻰ ﺯﻭﻝ ... ﺳﺎﺍﺍﺍﻛـِﺖ
ﻋـﻠـﻴـﻚ
ﻣـُﺴـْﺘـﻜـْﺘـِﺮ ﺍ
ﻭ ﻧـﺎﺱ ﻳـﺎﻛـﻠـﻮﺍ ﺣـﻘـّـﻚ ﻛـﻞّ ﻳـﻮﻡ ...
ﺭﺿـﻴﺎﻧـﺔ ﺑـﻴـﻬـﻮ
ﺿـﻤﺎﻳـِﺮﺍ
ﻭﺩﺍ ﻳـﺎﻫـﻮ ﺣـﺎﻝ ﺑـﻠـَﺪﻯ ﺍﻟـﺒـِﻘـَﺖ ... ﺃﻟـﻐـﺎﺯ
ﻏـَﻠـﺒْـﻨـﺎ
ﻧـﻔـﺴـِّﺮﺍ
ﺣـَﻴـﺚُ ﺍﻟـﻜـﻔـﺎﺀﺓ ﺷـِﻰ ﻣﺎ ﻣـُﻬـِﻢ ... ﺇﻳـﺠـﺎﺩﻭ
ﻭﺳـْﻂ
ﻛـﻮﺍﺩِﺭﺍ
ﻭ ﺍﻟـﺴـَّﺎﺳـَﺔ ﻣـَﻐـَّﺼُﻮﺍ ﻗـﻠـْﺒـَﻬـﺎ ... ﻭ ﺑﺎﻋـَﻮﻫـﺎ
ﺧﺎﻧـُﻮﺍ
ﻣـﺸـﺎﻋـِﺮﺍ
ﻭ ﺍﻟﺨـَـﺘـُّﻮﺍ ﻓﻰ ﺇﻳـﺪﻭ ﺍﻟـﻘـَﻠـﻢ ... ﻣـَﻼ - ﺑﻰ
ﻣﺼﺎﻟﺤـُﻮ -
ﺩﻓـﺎﺗـِﺮﺍ
ﻭ ﺍﻧـﺎ ﺯﻯ ﻛـُـﺘـﺎﺭ ﻓـﻴـﻬـﻢ ﺛـِﻤﺎﺭ ... ﺩﺍﺳـَﻮﻫـﺎ
ﻇـُﻠـْﻢ ﻭ
ﺇﻓـْـﺘـِﺮﺍ
ﻻ ﻋـﺎﻳـﺰﺓ ﺗـﻨـﺼﻔـﻨﻰ ﺍﻟـﺒﻠـﺪ ... ﻻ ﻻﻗـﻰ ﻓـُﺮﺻﺔ
ﺃﻏـﺎﺩِﺭﺍ
ﺣﺒـّﻴـﺖ ﻋـﻴـﻮﻧـِﻚ ﻭ ﺍﺷـﺘﻬـﻴـﺖ ... ﻓـﻰ ﺑـﻴـﺘـﻨـﺎ
ﺑـﻜـﺮﺓ
ﺃﻫـﺎﻇـِﺮﺍ
ﺃﺩﺧـﻞ ﻋـﻠﻰ ﺣـﻮﺷـِﻚ ﻋـﻔـﻴـﻒ ... ﻭ ﺍﻟـﻘـﺎﻛﻰ
ﻭﺍﻋـﻴـﺔ
ﻣـُﺪﺑـِّﺮﺓ
ﻗـﺪْﺭ ﺍﻟـﻨــَّﻠـَـﻘـّ ﻮُـﻃِ ﺑﻰ ﺍﻟﺤـﻼﻝ ... ﻛﺎﻓـِﻞ
ﻗـﻠـﻮﺑـﻨـﺎ ﻭ
ﺳـَﺎﺗـِﺮﺍ
ﻟـﻤـَّﻦ ﻳـﺠـُﻮﺍ ﺍﻟـﺸـُّﻔـَﻊ ﻛـﻤـﺎﻥ ... ﺃﺭﺯﺍﻗــُﻦ
ﺍﻟﻠﻪ ﺑـِـﻴـَﺴـِّﺮﺍ
ﻭ ﻟـﻮ ﻣﺎ ﻓـﻰ ﻗـِﺴـﻤﺔ ﻧﺠـﻴـﺐ ﻋـِﻴﺎﻝ ... ﺑﻰ
ﺍﻹﻟـﻔـﺔ ﺩﺍﺭﻧﺎ
ﻧـﻌـَﻤـِّﺮﺍ
ﻋـﻠﻰ ﺃﻯِّ ﺣﺎﻝ ﻟـﺴـﻪ ﺍﻟﺤـِﻠـِﻢ ... ﺟـُﻮَّﺍﻯ ..
ﻣـﺪﺍﻳـِﻦ
ﻣـُﺰْﻫـِﺮﺓ
ﻟـﻜـﻦ ﺇﺫﺍ ﺣـَﺼَﻞ ﺍﻟـﻨﺼﻴـﺐ .. ﻣﻊ ﺯﻭﻝ
ﺳـِـﻮﺍﻯ .. ﻭ ﺩﺍ
ﺁﺧـِﺮﺍ
ﻣﻦ ﻗـﻠـﺒﻰ ﻭ ﺍﻟﻠﻪ ِﺍﻟـﻌـﻈـﻴـﻢ ... ﻣﺎ ﻋـﻨـﺪﻯ ﺇﻻ
ﺍﻟﻤﻐـﻔـِﺮﺓ
ﻭ ﺑـِﻔـْﻀـَﻞ ﻣـﻜﺎﻧـِﻚ ﻟـﻰ ﺍﻷﺑـَﺪ ...
ﺷـﺎﺭﻉﺟـﻤﻴـﻞ ﻓـﻰ
ﺍﻟـﺬ َّﺍﻛـِﺮﺓ

[waya]

أقول ليكم ... كلام عبد الله .. زول الله
شعر : هاشم صديق
_________
(1)

أقٌول ليكم كلام انسان
بعز ( نبتا )وبحب شعبو
شرف الكلمه شرف الأمه
للحاكم وللداير صلاح ارضو
ومعني الوعي في الفكر
البقود ضالّينا لي دربو
وشأن أشرح واقول الدايرو
لي نبتا .. ولي ناسا
.................
بذكركم بظلم الكهنه يا أهلي
وبدور الناس تكون حاسّه
تقيس افعالها بالتفكير
وما تتبع مهاوي العاده والكُهان
تَفَرّق بين عبادْة النَجمْ
وبين الخِشيه والايمان .
جابت ليها ياعبدالله كتَاحه
زيطه وعرضه ذكّارا وشكّارا
دق نُقاره مدّاحين وطمبارا
.......
جرايد شَوفا طشّ وطاش ودنيا غباش
صف كورس من الغِربان
صبح هِتّيفه في الأعشاش.
مسّاحين من الأقلام
من الأقزام و.. ترزيه
فنانين في قص الكضبة
وغنايين ورقاصين ( هنود أفلام ).
جزارين محترفين
في قطع الرقبه عميانين .
حطابين يجزوا هواكْ
بضربة فاس .
........
جابت ليها يا عبدالله
زَمبارا .. وزُمبارا.
كضابين وشمشارا
نقازين ونقاشين وسمسارا .
........
شوف الكتمه يا عبدالله
قِل المويه موت النسمه
دمع البسمه عَدَم الزاد .
شوف اوجاعنا كيف صبحت
نبيح ومزاد . شوف واعقل
باسم الله أيا عبدالله
كيف (اتسنسروا ) الآيات
وكيف اتباقصت أوراد .
......
قاضي الحِلّة باع أتراحنا
يا مولاي واتْلفتّ
يا عبدالله زول الله
جاي بي جاي
لقيت حتي المثل مقلوب
- الحدّاس صِبِح سوّاي
اتشنقلنا جوه وطنّا
اتظلمنا للقاضي
شال الباقي واتحاكمنا .
راح ( فايل) المظالم ساي
.......
نقبّل وين يامولاي ؟!!
نّخُش الغابه ولا ّنَبُق
حريقه قيامه بي كترابا
ولاّ نَمِش نكوس ( حاحاي) ؟!
.......
ولاّ نلم لباقي هدومنا
نتوسد تلج كندا
أو نِنْدَش علي ( بومباي)؟!!
..........
عفيت منك
وانت ركزت يا عبدالله
تقول حاوي في قد الابره
اتمدّدتَ ما اتكرفست .
بنيت في خُرمو قطيه .
حرثت زرعت فجريه .
صبرت حصدت عصريه .
سويت الخُرم أصقاع .
وزي عُمده خَلَفْتَ أزاكْ
كراع في كراع .
.........

[waya]

(2)

يا ممكون بريد ربك
وريد ناسك وريد أرضك
عفيت منك
لا بتبيع ولا بْتِتْباع .
لا اتجرست في زنقة .
لا خشيت بلاط أحزاب .
لا اتقاصرت لي والي
لا اتجمّلت زول كضاب .
أو غَضيّت شرف طَرْفَك
عن الحاصل ولا ذليت
ايدين صبراً جميل ماهل
ولا طبلت لي مخلوق ولا باطل .
........
لا زاورت بين أعتاب
لا اتمسّحت بي قُبه
لا اتْكتفتَ بي كُبه
ولا فتّشت لي أرباب .
.........
يا عبدالله زول الله .
مسكينه البلد بي حالها
كان لحسوها كم نصّاب
مسكينه الكراسي
تهاتي للآفات
ناس ( شلضم) تقيل الدم
وناس ( سكروتا ) سيد الخم
وناس تهتف ( لكسري) الجاي
( وسيدا) الفات و .... مشاطات .
..........
مسكين الشِعِر مكسور
وكت صِبح ( الوَزِن ) لا فتات .
مسكينه الصُحُف سوّت
نشاز ( ناس هاكا )
زي ( موازرات) .
مسكينه المسارح
سيدا بس )عُمدة )
أكان الفن صبح شَنَبات .
ويا ( كليه ) انتي ضحيه
كان قادوكْ سماسرا الزفه
والحفلات .
.........
عفيت منك حيلك لسه
يا عبدالله ماشاالله
ما رفسّ وفتْفَت ومات
وما أغناكَ بالقرشين
والعراقي والسروال
وجُغمة روب وكيس تُمباك
وما أبهاك وأنت تهاتي
وانت تشابي للجايات
وما اتحسرت للرايحات .
...........
وقول يا زول ( وحات دمي )
النزف يوم داك
وبلّ الطين أقيف واركز
ولا بتهدّ بالكلمات ولا السكين .
وشان بلدي
وشان الخير يزيد ويدّي
أقيف مارد أريد أرضي
أعيش فوقها واموت فوقها
ومحال يرخص تراب أهلي) .
........
و( يا قبر أبويا )
المنسي مجدوع في الفيافي
وشاهدو موصوف للغلابة
قول لي نزيلك أصحا يابا
وقول حكايتك للمواليد الجديده
وغني للطين والحرابه
وصحّي أموات المدينه

[waya]

ما دمتِ عيدي فكل الناسِ أحبابُ..والشمسُ والقمرُ النشوانُ أصحابُ

والصبحُ يغبِطُني والليلُ قافيةٌ .. إبريقُ أحرفَ والأشعارُ أنخابُ

للناسِ عيدٌ ولي أَلـفٌ مُطَهَّمَةٌ .. خيولُها وصهيلُ الشوقِ عَرَّابُ

ألستِ أنتِ فصولٌ فاضَ مَبسَمُها .. فاخضرَّ قلبي وراشت فيه أعشابُ

وأنت ميلادُ أحلامي وفرحتُها .. وشرفةُ الدارِ والأعتابُ والبابُ

ألستِ أنتِ دَواتي حين تكتبني .. قصيدةٌ طَلعُها نخلٌ وأعِنّابُ

وأنت نيسانُ في أردانهِ مطرٌ .. يبلل الصيفَ حتى ينتشي آبُ

تاهت بكِ الأعين النجلاءُ فانحورت..وأرخت الظلَّ في الأجفانِ أهدابُ

ورفرفَ الثغـرُ حتى ذابَ فامتلأت..من نكهة البوحِ أكوابٌ وأكوابُ

يا نعمياتُكِ هل تدرينَ اوّلَها .. نَدّ وآخرُها مِسكٌ وأطيابُ

جنات عدنك ترياقٌ مراشِفُها .. لا منتهاها الذي أوسمتِ خلاّبُ

واللاحدود التي أرخت جدائلها .. تلعثمت حين تاهت فيك أحقابُ

فكيف بي وأنا أضـواؤكِ انسكبت .. في عتمَتي فإذا بالليل كذّابُ

أنثايَ أنت التي زنّرتني شُهباً .. بوّاحةُ الومض والنجماتُ أثوابُ

تابت حدوس الرُّقى عن لغوها ومضت..ترقاك وحدكِ والحسادُ ما تابوا

وغابت الشمس في مشكاتها خجلاً .. حتى غدت تتوارى وهي ترتابُ

كيف انسربتِ إلى أنفاس سوسنةٍ ..والورد يكتمنا والحقل والغابُ

كيف انسللتِ من الجنات أغنيةً .. الحرف يرقص والموال إعرابُ

يا روحَ روحي فهل للوصل أغنيةً .. القلب يعزف والأوتار أعصابُ

أفديكِ بالآه بالعمر الذي سكنت .. عيناك والوجدُ حَرّاقٌ وغلاّبُ

عيناك أشرق في فجريهما وطني .. فالشمس باذخةٌ والأهل ما غابوا

يا عطر أهلي ويا داري التي ضحكت..أتلك أحضانها أم تلك أبوابُ

للناس أسبابهم في الحب إن عشقوا..وليس تعرفني في الحب أسبابُ

ما دمت محبوبتي فالناس كلّهُمُ .. من أجل عيدك أحباب وأصحابُ

[ninar tato]

ﻳﺎﺭﻳﺘﻨﻲ ﻓﺎﺭﻗﺘﻚ ﻗﺒﻴﻞ ...
ﻗﺒﺎﻝ ﻳﻤﻴﻞ ﺑﻴﻨﺎ ﺍﻟﺰﻣﻦ
ﻗﺒﺎﻝ ﻳﻔﻮﺕ ﺿﻞ ﺍﻟﺴﻤﺎﺡ
ﺍﻟﺮﺍﻣﻲ ﻓﻲ ﺣﻴﻄﺔ ﺍﻟﻤﺤﻦ
ﻗﺒﺎﻝ ﻳﻔﻴﺾ ﺑﻴﻨﺎ ﺍﻟﺤﻨﻴﻦ
ﻳﻬﺪﻡ ﻣﺘﺎﺭﻳﺲ ﺍﻟﺸﺠﻦ
ﻭﺍﻟﻮﺣﺸﻪ ﺗﺴﻜﻦ ﻓﻲ ﻗﻠﻮﺏ
ﻛﺎﻧﺖ ﺯﻣﺎﻥ ﻟﻠﺮﻳﺪ ﻭﻃﻦ
ﻳﺎﺭﻳﺘﻨﻲ ﻻ ﺭﺩﺗﻚ ﻗﺒﻴﻞ ...
ﻻ ﺩﺭﺕ ﻣﻦ ﺧﺎﻃﺮﻙ ﺣﻨﺎﻥ
ﻻ ﺑﻴﻚ ﻛﺎﻳﺪﺕ ﺍﻟﻈﺮﻭﻑ
ﺳﻠﻴﺖ ﻟﺴﺎﻧﻲ ﻋﻠﻲ ﺍﻟﺰﻣﺎﻥ
ﻭﺑﻌﺪﺕ ﻣﻦ ﻛﻞ ﺍﻟﺨﻠﻖ
ﻭﺇﺧﺘﺮﺕ ﻗﻠﺒﻚ ﻟﻲ ﻣﻜﺎﻥ
ﺗﺎﺭﻳﻨﻲ ﻣﺎﺭﺍﻋﻴﺖ ﻣﻌﺎﻙ
ﻓﻲ ﺍﻟﺮﻳﺪ ﻓﺮﻭﻗﺎﺕ ﺍﻻﻭﺍﻥ !!..
ﻳﺎﺭﻳﺘﻨﻲ ﻻ ﺷﻔﺘﻚ ﻗﺒﻴﻞ
ﻻ ﻛﻨﺖ ﻓﻲ ﻳﻮﻡ ﺳﻴﺪ ﻫﻮﺍﻱ
ﻳﺎﺭﻳﺘﻮ ﺻﺎﺏ ﻗﻠﺒﻲ ﺍﻟﻜﻔﺎﻑ
ﻭﺃﺻﺒﺢ ﻓﺮﺍﻗﻚ ﻧﻮﺭ ﺭﺅﺍﻱ
ﻭﺇﻥ ﺷﺎﺀﺍﻟﻠﻪ ﻛﺎﻥ ﻳﻐﺘﺲ ﺣﺠﺮ
ﺫﻛﺮﺍﻙ ﺗﺮﺣﻞ ﻣﻦ ﺟﻮﺍﻱ
ﺗﻨﺸﻞ ﺭﺟﻞ ﺃﺷﻮﺍﻗﻲ ﻟﻴﻚ
ﻭﺍﻧﺸﻞ ﻛﺎﻥ ﺟﺎﺗﻚ ﺧﻄﺎﻱ
ﻳﺎﺭﻳﺘﻨﻲ ﻣﺎﻧﺎﺩﻳﺖ ﻋﻠﻴﻚ
ﻭﻗﺘﻴﻦ ﻃﻠﻊ ﻟﻲ ﻗﻠﺒﻲ ﺻﻮﺕ
ﻳﺎﺭﻳﺘﻮ ﻣﺎﻋﺮﻑ ﺍﻟﻜﻼﻡ
ﻣﺎﺩﺍﻡ ﺗﻌﺎﻝ ﻣﻌﻨﺎﻫﺎ ﻓﻮﺕ !!..
ﻣﺎﺩﺍﻡ ﺣﻜﺎﻳﺎﺗﻚ ﺑﻘﺖ
ﺗﺸﺒﻪ ﺗﻔﺎﺻﻴﻞ ﺍﻟﺴﻜﻮﺕ !!..
ﻓﺎﺭﻗﻨﻲ ﺃﺣﺴﻦ ﻭﺇﻧﺖ ﺣﻲ
ﻗﺒﺎﻝ ﻛﻤﺎﻥ ﺟﻮﺍﻱ ﺗﻤﻮﺕ

[waya]

نسب (الريد) و (الهم)
عمر مصطفي ابو منة
(1)

انا لسة مُصِر
علي انو (الريد) و(الهم) اخوان
(الريد) ود (بت الشوق) و(اللهفة)
(اللهفة) ال بت عم (الاشجان)

و(الهم) اكبر اولاد (الغم)
و(الغم) معروف ود (الاحزان)

أها

(اشجان الريد)..و(احزان الهم)
في حسبة كل انساب (الدم)
اخوان من نفس الابو والام
ومذاقم وااحد نفس الطعم
واتشابهو في كل الالوان

وانا لسه مصر
على انو (الريد) و(الهم) اخوان
الخوة ال بين (الريد) و(الهم)
ما جات من محض فراغ وعدم
جات بي امشاج من لحم ودم
بي قصة حب كانت سيرة
يوم (بت الشوق) ادوها (الغم)

و(الغيرة) ملت قلبها غيرة
قالت حررم كضاب (الغم )
كان يقدر يعرّس بت غيرا
و(الحزن) حلف ب(الدمعة) طلاق
لو ما (الغم) عرس (بت الشوق)
كان يملا عقاب (الريدة) فراق
و(الغم) كان راجلا فقري وشين
بس كان واضح ما زول وشين
و(الشوق) عارف كيفن بتّو
بي حب (الغم) كانت اسيرة
قال احسن يلم بين القلبين
ويرتاح من سيرة ها السيرة
و في ليلة اختلفت عن غيرا
(الغم) زفوو للسمحة عريس
في اجمل موكب زفة وسيرة
فرحو الاطفال
واتلمت كل الحلة هناك
نسوان و رجال
والحفلة بدت
قام غنّا (الفال)
و(الفرحة) رمت ل(الشوق) شبال
و(الخوف) طرباااان
وكان اول يوم تدخل افراح
بيت (الاحزان) ..
كانت ايام
زي اجمل عيد
واتلمّ (الغم) علي (بت الشوق)
و(الغيرة) هناك في نارا تقيد
وعاشو الاتنين زي احلى اتنين
بككرو بي ود سموهو (الريد)
و(الريد) قررب بين القلبين
كل ما الاقدار كانت بتكيد
اها (بت الشوق) في يوم عادي
زي عادة كل نسوان الحلة
لفحت توبا وقالت تمرق
تدي الجارات في الحي طلة
غِشت (الاهة) تكففر ليها
وهاك يا حق الله و بق الله
يا (بت الشوق) هي يا الفالحة
ماك عارفة سجم
جدك في الحسبة دا خالي لزم
حبوبة عمة خال بت عمك
جابت خالة حبوبتي
جابْت (اللهفة) الجابت امك
وجابْت (الحسرة) الجابتني))
دي حسبة طوييلة عليك يا بتي
وشجرة كبيرة
وفي غمرة هاتيك السيرة
جات (الغيرة)
(قققن )

[waya]

(2)

وكان اول يوم يتلاقو
(الغيرة) و(بت الشوق)
كان (بت الشوق) بالجد خايفة
لكن (الغيرة) ب خبث شديد
و بي بسمة وش كانت زايفة
قدرت تقلع منها خوفا
و غَمَزن همسن نسوان الجن
في القصة البينم معروفة
يا (بت الشوق) ما يهمك عااادي
كلْ زولا قسمتو بيشوفا
و الاقدار مكتوبة علينا
نرضابا و نرضخ لظروفا
وانا هسة الفات ما واجعني
الفات اوراقو بقت مكشوفة
واجعني (الغم) الما مهتم
شايفاو شايف غيرك شوفة
وقبال ما تواصل في كلاما
النار انطلقت في جوفا
قامت وما شايفة القداما
ما بين موجوعة وملهوفة
قالت ل(الغم) بس طلقني
ما دايرة معاك دنيا اشوفا
يا مرة مالك
بس طلقني
كدي ياخ اهدي
بس طلقني
ياخ استهدي
بس طلقني
بس طلقني
بس طلقني
ياخ طلقانة
ما دام بتشككي في ريدي
الريدة معاك تب حرمانة
واتفارقو (بت الشوق) و(الغم)
واتمزّق اقوى نسيج من دم
وامتن بنيان ريد اتهددم
و(الغيرة) هناك نصبت صيدا
ووقع في شرك (الغيرة) الغم
وجابولم ود سموهو (الهم)
كدا صِبح (الهم) و(الريد) اخوان
من نفس الاب ..
ومن داك الحين ول حد الان
ما اتفارقو تب ..
بقى مافيش (ريد) على وجه الارض
من غير احزان
وهموم وتعب ..
و مآسي و صد
وعوازل تبقى قصادك سد
وفتوق من فرقة ولا بتنسد
وبدون ما تضوق في الريد احزان
ما بتعرف طعم الريد الجد
وبقى في العشاق مفهوم راسخ
(من كدد هموم الريدة وجد)
وانا لامن كنت مُصِر جدا
و مصمّم جد
علي انو الريد والهم اخوان
والنسب ال بيناتم ممتد
ما كان من محض فراغ وعدم
كان بي امشاج من لحم ودم
الخوة ال بين الريد والهم