جاء اليوم وتلموا القراب والبعاد ؟ العريس فى بدلتو الرمادية ؟ والعم احمد فى جلابيتو السكروتة ؟ وعثمان فى بدلته السفاري ؟ ولؤى فى بدلته السوداء ؟ والحاج سعد فى جلابيتو التترون وعمته الكبيرة الما خمج وشالوا فى كتفه ؟ والحاجة زينب لابسة توب ابو قجيجة السماوي الجابو ليها عثمان من السعودية ؟ والاميرة علوية لابسة الاسكيرتو والبلوزة وطرحه بنفسجية الجابن ليها اخوها من السعودية ؟ والخالة سعيدة لابسة توب الرسالة الكبدى برضو جابو ليها عثمان بس عروسة ؟ وحليمة لابسة توب اخضر مورد جابو ليها عثمان من السعودية ؟ طبعاً كلهن حلفن ما يلبسو الحاجات دى الا فى عرس بشير ؟ وجات الساعة والكل جاهز للذهاب الى نادي الضباط فى الخرطوم لحفلة الزفاف طبعاً العشاء هناك يبداء الساعة زي تسعة ومراسيم حفلة الزفاف تبدا الساعة العاشرة والنص وكان هناك مجموعة من الفنانين وكل واحد من دفعته جاب فنان وكان من الدفعة المتواجدين فى الخرطوم ستة والبقية موزعين فى مديريات السودان المختلفة ؟ حفلة غنى فيها وردي وابو المين ود البادية وحمد الريح وكابلى و الفنان الذري ابراهيم عوض وكانت من اجمل ليالي الافراح ؟ وفى الصباح ودع بشير الاسرة وعلى المطار طوالى وكان هناك بنتظاره عثمان ولؤي وقضى العريس وعروسته اجمل اسبوعين من شهر العسل ؟ وعادا الى بيت الاسرة وكان متبقى له اسبوع بشير والاجازة تخلص ؟ والعم احمد كان باقى له خمستاشر يوم ويسافر ؟ وحليمة وزوجها واولادهم خلاص على وشك السفر الى الابيض المدارس قربت تفتح ؟ مضى الاسبوع كانه ساعة اليوم سفر بشير بعد وعد عروسته بانه سوف يقوم بتجهيز البيت ويرسل لها للحضور فى ظرف شهر ان شاء الله ؟ وقال لها تقعد عند اهلها حتى يرسل لها ؟ وقالت العروسة اهلي انا هنا مع خالتي الحاجة زينب بقعد معاهم وهي التى سوف توصلني القضارف وفرح كثيراً بشير لهذا التصرف من زوجته ؟ واخذ بشير اخوه احمد بعيد وقال ليهو اسمع يااخوي نحنا على اتفاقنا بتاع الجنوب انت ماعليك حاجة انا مسؤول عن كل شى فى الاسرة ويكفي انك انت اخونا الكبير اراد احمد ان يتكلم ؟ وهنا بشير قال ليهو اسمع انا سوف استعمل معك الاوامر العسكرية بصفتي ضابطك وضحك الاتنين وتعانقا وركب بشير مع عثمان ولؤي لتوصيله محطة السكة حديد القطار بيقوم بعد ساعة ونص ؟ ومروا الخمستاشر يوم والعم احمد بعد غداً بيسافر وهو واولاده ايضاً والبيت تاني يخلاء من جوطة الصغار ؟ وجلس العم احمد مع ابوه ؟ وابوه قال ليهو اسمع ياولدي انا راضي عنك وربنا يسعدك ويطول عمرك وابقا عشرة على اهلك ؟ العم احمد انت مالك يابوي بتقول فى الكلام دا انت الخير والبركة ؟ الوالد ياولدي الاعمار بيد الله بس لازم اوصيك اسمع انا لو ماتت امك او احد اخوانك انا ما بكلمك عشان ازعجك الا لو الموت جاني انا سافر بالسلامة وانا عافي منك واصر الوالد لازم يمشى محطة السكة حديد يودعه وفعلاً مشى معاهم بعربية لؤي وسافر العم احمد وكان هذا آخر لقاء بين العم احمد ووالده وان شاء الله لو كان فى العمر بقية نكمل
مر الان كم سنة وعدد من الشهور والعم احمد فى الفاشر واخوه بشير فى القضارف وزوجته معاهو واخوه عثمان اتخرج وادارة النادي بصدد ايجاد عمل له فى مجاله وطارق زوج اخته ترقى واصبح مدير مدرسة وعلوية الان ماشة الصف الثالث ثانوي وياسر فى الصف الثامن ان شاء الله السنة الجاية التاسع وآمنه فى الصف الثالث والصغير اسامة آخر شقاوة شفع ؟ وجاء تلغراف للعم احمد من اخوه عثمان بوفاة الوالد عليه رحمة الله وفرش العم احمد تلاتة ايام ثم طلب اجازة خمستاشر يوم وسافر وتارك اولاده نسبة للدراسة وقابل اخوه بشير واصبح بشير نقيب وعثمان موعود بالعمل فى شركة كبيرة لها فى فروع فى جميع انحاء العالم والحاجة حزينة لفراق شريك عمرها وعلوية وفاة والدها اثرت فيها شديد وحليمة جات اخذت يومين ورجعت عشان اولادها فى المدارس ؟ وجلس العم احمد مع اخوانه الاتنين وقال لهم طبعاً انت يابشير بعيد وانا فى الفاشر الحمدلله عثمان قاعد فى البيت لكن عثمان ظروف الكورة ما معروفها اها رايكم شنو انا اسيب الجيش اصلوا باقى لى ثلاثة سنة وكم شهر واجي اقعد هنا مع ناس امي وفض مرة اشوف بيتي شغالين فيهو كيف ؟ وهنا عثمان يقول بعد اذنك يا احمد اخوي تسيب الجيش انا ضد الكلام دا وبعدين بيتك انا كل يومين تلاتة بمشى اشوف الناس شغالين كيف اما ناس امي وعلوية انا لو جاتني اى سفرية مع الفريق تجي خالتي تقعد معاهم لامن ارجع ولا شنو كلامك يابشير والله يااخي عين العقل كلامك صاح يقول العم احمد طيب ياجماعة خلاص ربنا يعمل الفيها خير ؟ عثمان يا احمد وبشير انا عاوز اقول ليكم كلام ممكن ؟ العم احمد اها قول ؟ عثمان طبعاً انا ان شاء الله من الاسبوع الجاي بنزل الشغل والحمدلله عندي قروش عند امي يعني انتم تاني ما ترسلوا لينا مصاريف انا لو عاوز حاجة بكلمكم احمد خليه يبني فى قطعته دى وانت كمان يابشير تشوف ليك قطعة تاخذها وتبنيها ؟ العم احمد خلاص يا عثمان الاعتماد على الله ثم عليك ؟ طيب يا جماعة انا عندى خبر سعيد ودا ما مواعيده بس انتم الاتنين مسافرين ؟ العم احمد خير قول فى شنو ؟ عثمان صحبي لؤي قال عاوز علوية ويمكن ينتظرها حتى تكمل الثانوي وامه زاتها اتكلمت معي ومع امي وابوي زاتو الله يرحمه كان عنده خبر بس انا قلت ليهم الامر كله فى يد اخونا الكبير احمد ؟ العم احمد يازول خير ست الموضوع زاتها عندها راى ولا شنو ياجماعة انا براحه بسال امي فى اليومين الباقيات لى ديل وبسال علوية زاتها ؟ ويسال العم احمد بشير شنو ولى العهد ما قرب يجي ؟ ويضحك بشير والله يااحمد اخوى تلاتة مرات تدافق بس قالوا فى ام درمان هنا فى اخصائى ممتاز وان شاء الله فى الاجازة نجي نشوفه وتفرق الاخوان بشير سافر الى القضارف واحمد عاد للفاشر وعثمان نزل الشغل مهندس ومعه فى نفس الشركة صديقه لؤي وان شاء الله لو كان فى العمر بقية نكمل
عاد العم احمد للفاشر وبعد اسبوع من العودة تم نقل قائد سريتهم وجاء قائد جديد وقبل سفره اجتمع مع السرية وقدم لهم القائد الجديد وودعهم فرداً فرداً ؟ وقد كان قائده اوصى القائد الجديد بالعم احمد وعرفه بانه انسان خلوق ومجتهد فى عمله وهو مرشح لكورس البرادة لانه بيعرف فى العربات كتير وبعد مضى شهرين للقائد الجديد ؟ طلب العم احمد فى المكتب وهناهو بالترقية الى رتبة رقيب وهذه الترقية جات من الخرطوم وذلك قائده السابق نقل للعمل فى رئاسة السلاح اركان حرب قائد السلاح وهو الذى وصى بهذة الترقية اما الخبر التاني السعيد هو الذهاب للخرطوم كورس برادة لمدة سته شهور فى النقل المكانيكي ؟ عاد العم احمد البيت مبسوط وبرتبة رقيب والخالة سعيدة فرحانه بقت مرت الرقيب احمد سعد ؟ وقال العم احمد للخالة سعيدة انا بسافر الخرطوم كورس لمدة سته شهور انتي ما فى طريقة تسافري معي الاولاد فى المدرسة وبعدين انا ماهيتي مخليها هنا كل خمستاشر يوم بجيبوها ليك فى البيت انا كلمت البولكامين بواسطة القائد كل خمستاشر يوم تجيك الماهية وان شاء الله تمر الشهور وارجع بالسلامة ؟ وطوالى كتب جواب لبشير يخبره بالترقية و موضوع الكورس وايضاً جواب لعثمان ؟ وطبعا عثمان كلم امه وعلوية ومنتظرين بتين يجي احمد من الفاشر ؟ وصل العم احمد الى الخرطوم وطوالى سلم نفسه لرئاسة السلاح ووجد قائده السابق فى رئاسة السلاح اركان حرب السلاح ورحب به وقال له طبعاً انت اهلك هنا فى ام درمان امشى بكرة الخميس وتجي يوم السبت عشان تاخذ الجواب وتمشى للنقل المكانيكى عشان تبدا الكورس معاهم وربنا يوفقك يااحمد ؟ وذهب العم احمد للبيت ولقا عثمان اخوه قاعد فى البيت ؟ عثمان ليه ما كلمتني عشان اجيك فى المحطة ؟ ويرد العم احمد انا الان فى مهمة عسكرية وهنا فى المحطة سكة حديد عندنا مكتب اى عسكري جاي فى مهمة عسكرية المكتب مسؤول هنا عن ترحيله لوحدته عشان كدا انا ما كلمتك وفهم عثمان الموقف ؟ العم احمد ان شاء الله بعد بكرة السبت طوالى انا بنزل الكورس بعدين يا كابتن انا هنا ما عندى ماهية يعني مصاريف منك الترحيل والفطور وما شابه ذلك ؟ ويرد عثمان ابشر يا اخوي انا عمري كله ليك بس انت تامر ؟ ودخل العم احمد مع امه فى ونسة اها يمة حليمة واولادها ان شاء الله كويسين وناس البلد كيف تمام كلهم ناس عمتي وعمي وخالتي وخيلاني الاتنين واولادهم ؟ امه كلهم بخير وطيبين اها اولادك انت خليتم كيف ؟ العم احمد كويسين والحمدلله وبخير بس فاطنة غير البكاء ما عندها حاجة ؟ ويضحك العم احمد ويسال علوية اها عاملة كيف مع الدراسة ماشة كويس ولا الدراسة عصلجت معاك ؟ ترد لالا الحمدلله ماشة كويس وان شاء الله من العشرة الاوائل السنة دى ؟ ويرد العم احمد والله مبروك مقدماً يلا شدي حيلك ؟ وجاء السبت ونزل العم احمد الكورس ؟ ومرت الايام والعم احمد فى تقدم فى الكورس اصلوا العم احمد كان بيعمل فى ورشة قبل الجيش وكان عنده خبرة كويسة ما بطالة ودى نفعتوا بظهور بمستوى كويس فى دفعته المعاهو فى الكورس ؟ بقى للعم احمد شهر ويخلص الكورس ويعود الى اولاده ؟ وجاء يوم التخريج واستلم العم احمد شهادته بانه اكمل الكورس وحصل على خمسة وتمنين فى المية طبعاً نتيجة كويسة ومشرفة وقالوا له ناس النقل دى شهادتك انت وان شاء الله بنرسل الملف لوحدتك فيه الشهادة ونشاطك بالورشة ؟ وشكرهم العم احمد وغادرهم الى رئاسة السلاح وقابل هناك قائده السابق واداهو الشهادة التى نالها وهنا هناهو قائده ؟ وقال ليهو لوعاوز انقلك هنا فى الخرطوم بنقلك ؟ ويردالعم احمد لا ياجنابو الفاشر كويسة واتعودت عليها احسن اكون هناك وكمان الولد الكبير ماشى كويس فى الدراسة ؟ وبعد اربعة يوم غادر العم احمد الى الفاشر وان شاء الله لو كان فى العمر بقية نكمل
وصل العم احمد الفاشر وباشر عمله طوالى وذلك نسبة لسفر البراد فى مامورية الى الصحراء الكبري وذلك لااحضار مجموعة كانت مسافرة الى ليبيا وتاهوا فى الصحراء ووجدواتنين منهم عمال حفر الابار عند بير وادى عطرون وقالوا ان باقيهم موجود فى الصحراء ؟ وهنا العمال عملوا اشارة الى رئاستهم فى الفاشر وبدورهم كلمو ناس الجيش وكانت المامورية لجلب باقى المجموعة ولهذة الاسباب العم احمد طوالى نزل العمل وبعد تلاتة شهور جات اجازة المدرسة وقال العم احمد للخالة سعيدة انتي اخذى الاولاد وسافروا شوفوالاهل وتعالوا انا حسع كنت معاهم وفعلاً جهزت الخالة سعيدة حاجاتها ؟ وطلب العم احمد اذن لمدة اربعة يوم يوصل اولاده نيالا ويركبن القطر ويرجع وقد كان وسافروا اولاده وعاد العم احمد لعمله ؟ وجاء جواب من اخوه بشير يخبره بان زوجته هي حامل والحمدلله وبرضو خيروني فى النقلية بين الفاشر ولا الابيض وانا اختارت الفاشر قلت عشان اكون قريب جنبك اسلم السرية للقائد الجديد واكون معاكم طبعاً نادية بتقعد فى ام درمان حتى تضع وبعدين اجيبها الفاشر ؟ ورد العم احمد والله خبر كويس وتكون قريب جنبنا ؟ وبعد اسبوع كمان ارسل عثمان جواب للعم احمد يخبره بان الشركة عاوزة ترسله بعثة لمدة سنة فى بريطانيا ويعود ويمسك مسؤول الفرع الاول هنا فى الخرطوم والنادي سمح له بالذهاب وعلوية جابت نتيجة كبيرة وماشة تانية ثانوي بجدارة واهل لؤي جابو لها هدايا تجنن وهي مبسوطة واولادك بخير بس الصغار مجننين حبوبتهم واسه ناس خالتي كانو معنا هنا فى ام درمان ومشوا الاسبوع الفات وسعيدة مشت معاهم وقالت لى اكتب كلم احمد باني مشيت مع ناس امي واخبار الحي تمام تعيش انت عمك طه سيد الطابونة الله ير حمه مات ليهو حسع اسبوعين واخو طارق راجل حليمة الصغير عملو ليهو عملية بتاعت زايدة لكن الان الحمدلله حسع كويس بعدين عمك عبد الكريم العربجي جارنا تعيش انت مات الله يرحمه قبل شهر ونص بس يعني انت سافرت كدا وهو اتوفى طبعاً سمعت فى الرادي وفاة رئيس النادى الله يرحمه ؟ وبعدين عندى ليك خبر جميل ياسر ما شاء الله عليه حريف زى عمه وكمان اكتر الكورة جارية فى دمه ربنا يخليهو ويحفظو من كل عين حاسدة يارب ؟ ورد العم احمد على اخوه عثمان متمني له النجاح والتوفيق فى بعثته الى لندن وعلى الاخبار الحلوة القالا ليهو فى الجواب ؟ وكمان علوية ارسلت ليهو جواب بالنجاح وهي مبسوطة عشان ناس ياسر معها وعرفته ان اهل لؤي جابو ليها هدايا قيمة وجميلة وان امها تمام بخير بس اولادك الصغار مغلبنها لكنها هي مبسوطة وما تخلى زول يهبشن ولا امهم ولا عثمان ولا انا ؟ وقام العم احمد برد على اخته علوية مذكرها بان تجتهد عشان تكون الاولى دايماً وتخلص دراسة عشان يجي يحضر عرسها ؟ طبعاً الجواب لعلوية بواسطة عثمان وارتاح العم احمد لجوابات اخوانه التلاتة والاخبار الحلوة القراها كانت دافع له فى العمل واستمر العم احمد فى اداء عمله حتى عادو اولاده من اجازة المدرسة ؟ ومرت الايام وهو فى يوم كان شغال تحت عربية يصلح فيها طلع من تحتها ولقا اخوه بشير واقف قدامه وبالحضن اخذ اخوه ؟ العم احمد طيب ليه ما عملت لى تلغراف قلت انك جاي ليه ؟ بشير قلت اعملها مفاجاة طبعاً جيت امبارح زى الساعة واحدة ظهر وسلمت نفسي للقيادة واليوم استلمت السرية من القائد السابق وحسع طوالى جيتك من المكتب وقلت اجي اسلم عليك وبعدين ارجع السرية وفى نهاية الدوام اجيك ونمشى نتغدا سوا طبعاً انت عزابى ؟ ويضحك العم احمد منو القاليك الحمدلله المعسكر كلو اهلى والغدا كل الناس بيقعدوا بر تحت الهجليجة الكبيرة وناكل سوا انت البتمشى معانا خلاص يااخوي بس انتهي واجيك نمشى سوا وان شاء الله لو كان فى العمر بقية نكمل
انتهت اجازة المدرسة وعادت سعيدة واولادها ومرت الشهور وجات زوجة بشير مع طفلتها ومع بداية العام اكمل عثمان بعثته وعاد للوطن وعلوية اكملت الثانوية وكانوا اهل لؤي فى انتظارعودة عثمان ليتم الزواج ؟ وهنا كانت المفاجاة وهي طلب لؤي من عثمان ان يزوجه اخته الاصغر منه وهي فى نفس عمر علوية وهي ايضاً صديقة علوية الروح بالروح ودرسوا سوا فى مدرسة واحدة ولكن عثمان كان بيشوف بان هؤلاء الناس عندهم القرش وهو انسان كادح وما عنده الشي الذي يجعلها تعيش بمستوى عيشة اهلها ولهذا كان صارف النظر من اساسه ؟ وقال عثمان لصديقه لؤي والله يشرفني ان اتزوج اختك ولكن انت عارف البير وغطاها وما بقدر انا اعيشها زي ما هي عايشة وبعدين اكون سبب فى تعاستها فى الحياة ؟ وقال لؤي لعملك هي قالت بتعيش معاك بالفى والمافى بعدين انت علوية ما قالت ليك ؟ عثمان هي جاب الموضوع وانا طوالى سبتها وقلت ليها هي صحبتك ايوا لكن زواجي منها هذا من رابع المستحيلات عندى هم وين ونحن يازولة وين وقفلت معاها الموضوع على كدا ؟ خلاص يا لؤي تجي اختك رانية وانا اتكلم معها قدام علوية وانت واسمع رايها وهل قبلانه با الزواج وان شاء الله نعرس سوا بس الاهم موافقتها هي وجات رانية وكان الموافقة منها وباقى العرس ؟ ومشى عثمان وقعد مع امه وقال ليها يمه انا عاوز اتزوج رايك شنو وطبعاً هي كلمتها بتها علوية ؟ اها لقيت العروسة ولا امشى افتش ليك عروس ؟ وقال لها العروسة موجودة بس الموافقة منك اتتى ؟ اها هي منو ياولدي ؟ هي اخت لؤي رانية وزغردت امه ؟ وقالت ليهو انا كلمتي علوية وانا قلت ليها خلي يجي منه هو الكلام والله ياولدي الف مبروك ؟ وهناك فى الفاشر العم احمد رزق بآخر العنقود والتى اسماها فاطمة لها الان عام ونص والحمد لله البيت اكتمل فى الثورة وكمان فى ناس قالوا عاوزين ياجروا بس العم احمد قال لالا لازم اول حاجة يسكن هو فيه وبشير رزق بولد واسماهو سعد باسم ابوه الله يرحمه وله الان ستة شهور وكمان سافر الى الخرطوم لمتحان الترقية الى رتبة رائد وتوفق وركب الصقر وبرضوا مشى شاف بيتو الفى الخرطوم الشغل ماشى فيه كويس الان وعثمان متابعوا طوالى كل كم يوم والتاني يمشى يشوف الشغل ماشى كيف وياسر فى زمنه كان خطة التعليم بنظام السلم التعليمي الجديد والذى ادخل دا فى دا ولكن حمدلله ياسر ماشى كويس فى الدراسة وايضاً آمنه ماشة تمام فى المدرسة واسامة فى الصف الاول ؟ وكلم عثمان بشير فى التلفون وقال ليهو عليك الله جيب احمد وانا عاوز اتكلم معاكم انتو الاتنين ؟ وقاليهو بشير نص ساعة واضرب يكون احمد معي هنا فى المكتب وفعلاً ارسل بشير احد الجنود باالعربية يمشى سرية النقل ويجيب الرقيب احمد سعد وبعد عشرة دقائق حضر ؟ العم احمد خير يا بشير فى شنو ؟ ويرد بشير لالا مافى حاجة عثمان ضرب تلفون وقال عاوزنا الاتنين من غير ما يوضح لى حسع بيضرب انتظر شوية وخمسة دقائق والتلفون يضرب ويرفع السماعة بشير ؟ الو وجاء الرد ؟ ايو يا بشير احمد جاء ؟ بشير ايو هاك ليهو ؟ الو ايو يا احمد اخبارك واخبار اولادك كيف ياسر وآمنه فى المدرسة واسامة دخل المدرسة العم احمد ايو دخل السنة دى اها امي وعلوية وصحبك لؤي واهلهو ان شاء الله كلهم بخير ؟ عثمان انت عارف يا احمد انا ما بعمل حاجة من غير كلامك انا عاوز اتزوج والحمدلله العروسة موجودة وامي وعلوية موافقين عليها الاهم رايك انت شنو ؟ العم احمد اسمع يا اخوي الحمدلله انت زول عاقل واكيد اختيارك كويس والحمدلله امي وعلوية قالوا خير يعنى تاني ما ناقص شى غير العرس ؟ اسمع ياعثمان البت دى انا بعرفها ؟ عثمان ايوا يا احمد هي اخت لؤي رانيه صحبت علوية وزميلته فى المدرسة ؟ العم احمد طيب اهلها موافقين ؟ عثمان ايوا طبعاً ؟ العم احمد طيب خلاص حددوا العرس ونحنا بنجي ؟ هاك بشير كلموا وترك العم احمد السماعة لبشير وطلب الاذن عشان عندو شغل كتير ؟ بشير قال ليهو خلاص بعدين انا بجيك فى البيت وان شاء الله لو كان فى العمر بقية نكمل
روووووووووووووووووووووووووووووووووووووووعة واصل بلا فواصل.
الغالي العزيز ميرفابي من القلب كل الشكر والتقدير لك علي تواجدك المميز في متصفحي المتواضع والذي يضيف لي الكثير اليوم الفصل الاخير في قصة العم احمد وان شاء الله هناك قصص آخري تحكي عن الواقع السوداني الجميل الذي افاخر به منها ما عايشتها بنفسي ومنها ما سمعت بها وصاغها الخيال لتجسيد السوداني ود البلد البسيط مهما كان مركزه دكتور مهندس وزير خفير عامل هو هو السوداني الحبوب وقت طيب مع نهاية قصة العم احمد والي اللقاء في قصة آخري ان شاء الله لو كان في العمر بقية كل الود والاحترام
بسم الله الرحمن الرحيم وبه نستعين الفصل الاربعين والاخير سافر العم احمد واخوه بشير لوحدهم للزواج وكانت ليالي العرس من اجمل الحفلات وعاد بعد اسبوع اصلوا اولادهم ما سافروا معاهم بشير قطع تذكرتين بالطائرة واخذ اجازة لمدة اسبوع والعم احمد اجازته كانت شهر ؟ واتفق العم احمد وبشير بان يسكن عثمان هو وزوجته فى البيت وطبعا علوية مع اهل زوجها ومرت الشهور والسنوات والعم احمد تمت ترقيته الى رتبة رقيب اول والبراد الاول فى السرية وياسر ابنه باقى له سنة ويمتحن للجامعة وآمنه فى الصف الاول ثانوي واسامة فى الصف التامن والصغيرة فاطنة هي الان فى الصف الاول يا دوب والعم احمد باقى له سنة وهو وينزل المعاش لانه له الان خدمة سبعتاشر سنة والباقى له سنة ويكمل التمنتاشر سنة ؟ وتكلم مع اخوه بشير بانه خلاص سوف يقدم الاستقاله والذهاب الى ام درمان وفتح ورشة فى المنطقة الصناعية با ام درمان ويسكن فى بيتو حاول بشير ان يثني ولكن احمد اقنعو بان السنة الجاية ياسر بيدخل الجامعة ان شاء الله ولازم يكونوا هناك قريبن جمبوا وقدم العم احمد طلب الاحالة الى المعاش ورفض قائده وقال له خلاص اديني يومين وانا برد عليك بخصوص انك تنزل المعاش وذهب قائده الى العقيد بشير وطالبه بان يقول للعم احمد بان يترك موضوع الاستقالة ولكن بشير افهموا بان احمد خلاص عاوز يمشى يقعد فى ام درمان وذلك عشان الجامعة لولده الكبير ياسر وبشير ترقى الى رتبة عقيد بعد ان ادى الامتحان فى كلية الاركان فى جبيت بور تسودان واصبح قائد ثاني القيادة الغربية وبنتوا الكبيرة الان فى اول ثانوي وولده البعدها سعد الان ماشى الصف التامن وولده عادل كمان فى الصف رابع الان وولده الصغير مجدي فى الصف الاول زى فاطنة بنت عمه هم اصلهم مولدين فى سنة واحدة بيناتهم شهرين وطبعا بيتو فى الخرطوم على وشك الانتهاء وعثمان متابعو من الاساس والان فى التشطيبات الاخيرة ويكون البيت خلاص جاهز وحسب كلام اخوه بشير بانه سوف يقوم بتاجيره لمدة سنتين او ثلاثة وبى ايجار البيت يشتري ليهو عفش عشان البيت يكون جاهز وذلك عندما ينزل بشير المعاش ؟ وبعد مرور حداشر شهر من زواج عثمان وعلوية ضرب لؤي تلفون لبشير يخبره بان علوية حامل فى شهرها التالت ؟ وبعد مضى شهرين اتصل عثمان واخبر اخوانه بان زوجته رانية هي حامل وفى شهرها التاني ؟ وحليمة زوجها نقل تاني الى ام درمان واصبح مفتش تعليم فى وزارة التربية والتعليم واولادهم ما شاء الله ماشين كويس فى المدارس ؟ وبعد مرور الستة شهور جات البشارة بان ضرب له لؤي يخبرهم بان علوية جات بنت وهو اختار لها اسم زينب تخليد لذكري الراحلة الحاجة زينب والدتهم ؟ وبعد شهرين ضرب عثمان بان رانية وضعت وجابت ولد وهو سماه سعد تمننا باالمرحوم الحاج سعد والدهم ؟ وتمت السنة وسلم العم احمد عهدته العسكرية واخذ اولاده وسافر بعد ان جاب ياسر مجموع كبير يدخله جامعة الخرطوم كلية الطب وفتحوا بيتتم فى الثورة وفتح العم احمد ورشته فى المنطقة الصناعية با ام درمان وفى احسن حال وهو واسرته استودعكم الله ولو كان فى العمر بقية نلتقى فى قصة آخري ان شاء الله
