اعرف الجانب الاخر لــ ...........

[السنبلاية]

اتيت هنا لاستمتع بالروائع

[ابن عوف]

يعنى ممكن اسئل
وبدون احراج

اتفضل يا حبيب بس ليك فرصة واحدة

طرح هادف وممبز متوقع من أمثالكم

محسية & إبن عوف أطيب التحايا لكم

تسلمى المبدعة ماسة
ولك اجمل التحايا واطيبها

اتيت هنا لاستمتع بالروائع

حباب سنبلة ونحن نستمتع معك

[ابن عوف]

محسية واحبابي الكرام
مساء النور عليكم
فتحتي نقاش التعليم تلك المساحة الهامة وتقوم عليها امم
ورسولنا الكريم عليه افضل الصلاة واتم التسليم قال اطلبو العلم ولو في الصين
نرجع للماضي شوية وندردش فيه
كنا في المدارس قبل الطابور عندنا حصة صباحية والمعلم كان احرص مننا في الحضور يتكبد الصعاب ويقدم الحصة بدون مقابل
السؤال هل معلم اليوم يعمل نفس معلم الامس . ولماذا ؟
المعلم بالامس كان يادى رسالة عظيمة شنو الحصل اليوم بقي تجارة هل السبب في الدولة ام ام المعلم ؟
لماذا اختفت الجمعيات العمومية في المدارس ؟
الغاء المرحلة المتوسطة واثرها في التعليم ؟
وهل الغاء المتوسطة اتى بنتائج سلبية ام اجابية ؟
طلاب الجامعات اليوم وهم في الجامعات هل يعتبرو شباب ام لسة فى مرحلة المراهقة ؟


ولي عودة بأذن الله

[ود الخير]

ابن عوف ومحسيه وكل يدلو بدلوه ومساء الخير عليكم
بفكركم ماهى القيمه التى تخلق المجتمعات
الاسلام يدعو لحسن الظن وألتماس الاعزارللناس برايكم الحكمه فى ذلك
وتعالو معاى للحلال والحرام
1/ الاختلاط بالنساء
2/التحدث مع النساء( عبر كل ادوات التواصل فيس واتس منتديات هاتف او مباشر
والله كانت عندى ايئله بس طارت
س اخير لمحسيه
مالك مركبه وش الجديه مافى مجال للمرح
ابن عوف
بنتك اختك قريبتك ممكن تزوجها لمغترب وانت عارف سلبيات الاغتراب
تحياتى واحترامى

[ابن عوف]

ابن عوف ومحسيه وكل يدلو بدلوه ومساء الخير عليكم
هلا بالتائب .... صباح الخير عليك وعلي الاعضاء
بفكركم ماهى القيمه التى تخلق المجتمعات
التعاون والتأزور والمشاركة في جميع ما يهم المجتمع
الاسلام يدعو لحسن الظن وألتماس الاعزارللناس برايكم الحكمه فى ذلك
وتعالو معاى للحلال والحرام
ربنا سبحانه وتعالي قال لرسولنا الكريم عليه افضل الصلاة واتم التسليم لو كنت فظا غليظ القلب لانفضو من حولك وحسن الظن ببعث في النفس الثقة بالاخر
وفتش لصاحبك 99 عذر لانه لما تعذره اكيد ما بضجر منك ويكون مشتاق للقاءك
1/ الاختلاط بالنساء
علي حسب الاخلاط ما خلا رجل بامرأة الا الشيطان ثالثهم هنا بكون حرام
في الحتة دى استثناء الشيطان لانه الشيطان حريص انه يزيد العدد لانه اقسم لربنا لاقوينهم ويشاركهم وربنا قاله الا عبادى منهم المخلصين وانت عشان تكون مخلص لربنا تتقرب لله بالطاعات
2/التحدث مع النساء( عبر كل ادوات التواصل فيس واتس منتديات هاتف او مباشر
والله كانت عندى اسئله بس طارت ؟ انت تطير بلد بحاله موش اسئلة
يكون فيه حرمة علي نوع المحادثات مثله ومثل الخلوة خاصة اذا كان الشخص ضعيف النفس يفعل ما يشاء وخاصة انهم ما شافو بعض اما اذا كان يخاف ربه والله رقيب عليه يمكن يحادث النساء وما تنسي المراة كانت تقاتل وتداوى الجرحا في الغزوات وقصة نبي الله يوسف مع زليخة لولا ان راى برهان ربه
باختصار لو كان الايمان قوي ما بحدث شئ
س اخير لمحسيه
مالك مركبه وش الجديه مافى مجال للمرح
ابن عوف
بنتك اختك قريبتك ممكن تزوجها لمغترب وانت عارف سلبيات الاغتراب
تحياتى واحترامى

بالصراحة لو الامر بايدي ما بزوجها لكن ارادة الله فوق كل شئ
لانه الغربة اذا ما كانت معاك زوجتك ضياع للطرفين

[مسلمة وافتخر]

موضوع هادف ومميز
محسية&ودابنعوف لكم تقديرى وامتنانى2

[محسية]

الغاليات الماسه الخماسيه والسنبلاويه وذات الشجون

نورتم المكان

وخليكم متابعبن
تحيااااااااااااااتى

[محسية]

محسية واحبابي الكرام
مساء النور عليكم

مسسساء الورد

فتحتي نقاش التعليم تلك المساحة الهامة وتقوم عليها امم
ورسولنا الكريم عليه افضل الصلاة واتم التسليم قال اطلبو العلم ولو في الصين
نرجع للماضي شوية وندردش فيه

عليه افضل الصلاة والسلام

كنا في المدارس قبل الطابور عندنا حصة صباحية والمعلم كان احرص مننا في الحضور يتكبد الصعاب ويقدم الحصة بدون مقابل
السؤال هل معلم اليوم يعمل نفس معلم الامس . ولماذا ؟

المعلم اليوم والمعلم امس فرق كبير بينهم ان معلم اليوم طبعا المعلم اللامبالي بالمسؤولية الملقاة على عاتقه وغير المتفهم لدوره التربوي الحقيقي.. فهناك هذا النموذج من المعلمينفهل يصلح هذا المعلم ان يكون قدوة صالحة لطلابه فضلا عن الاجيال؟.
اما معلم الامس فقد كون شخصيته من خلال التزامه بأخلاقه الشخصية ثم بأخلاق مهنته لذلك ارتقى معلم الامس الى تلك المنزلة.
قم للمعلم وفه التبجيلا ... كاد المعلم ان يكون رسولا.
وانا لا نقول ان معلم اليوم لا خلاق لهم وانما نقول ان معلم الامس كانوا ملزمين تمام الالتزام بأخلاق مهنتهم.

المعلم بالامس كان يادى رسالة عظيمة شنو الحصل اليوم بقي تجارة هل السبب في الدولة ام ام المعلم ؟

أرأيت أعظم أو أجمل من الذي يبني وينشىء أنفسا وعقولا..

اسباب تدهور العملية التربوية في مجتمعاتنا و بالتالي هو الحديث عن رجل وقف نفسه لتعليم الناشئة تعليما يحصنهم ضد عوادي الزمن و يشحن عقولهم بالمعرفة.إن المهنة التي اختارها هذا الذي كاد أن يكون رسولاهى من أشرف المهن و أنبلها على الإطلاق كما انها من أصعب المهن ،لأن الذي اختار هذا الطريق المليء بالمتاعب ينبغي أن تكون له شخصية لها وزن كبير كيف لا و هو القدوة و المثل الاعلى ومعلم الأمس الذي كان يفنى و يذوب من أجل تبليغ الرسالة على أحسن الوجوه..لقد قل نظير معلم الأمس و أصبحنا أمام معلمين انعدمت ضمائر بعضهم ،وسنوا سنة الدعم أو ما يسمى بدروس التقوية وبل دفع انعدام الضمير ببعضهم إلى فرض هذه الدروس على من لا حول لهم ولاقوة...ولاحول ولاقوة الا بالله العلي العظيم..

لماذا اختفت الجمعيات العمومية في المدارس ؟

بصراحه ما عارفه شنو هى الجمعية العمومية فى المدراس فشى ء انا نا فاهمه ما بحب التكلم فيه ,

الغاء المرحلة المتوسطة واثرها في التعليم ؟
وهل الغاء المتوسطة اتى بنتائج سلبية ام اجابية ؟

ما يقدر افيدك لانى انا تعلمت خارج السودان لحد مرحلة الثانوية .

طلاب الجامعات اليوم وهم في الجامعات هل يعتبرو شباب ام لسة فى مرحلة المراهقة ؟

من راى لسه طلابه مراهقيييين
لانى اصلا تصرفاتهم هى اللى دلت على عدم نضوجهم كفاية وطبعا هنا ما نعم جميع الطلاب فى طلاب وااااعيييين ونفتاخر بيهم .

ولي عودة بأذن الله

هلا بيك
تحياااااااااتى

[محسية]

ابن عوف ومحسيه وكل يدلو بدلوه ومساء الخير عليكم

اهلييييين بيك مسسسسسسسساء النور
بفكركم ماهى القيمه التى تخلق المجتمعات
الاسلام يدعو لحسن الظن وألتماس الاعزارللناس برايكم الحكمه فى ذلك
وتعالو معاى للحلال والحرام
1/ الاختلاط بالنساء

الاختلاط بالنساء موجود من زمن بعيد االاختلاط فى دار العباده والاختلاط فى تادية مناسك الحج والاختلاط فى العمل والدراسه والشارع والمواصلات ما حرام ولا عيب مدام فى حدود الاحترام والادب وكل شخص لازم حدوده .

يعنى فى فرق بين الاختلاط والخلوه
الخلوه هى اختلاء الرجل بامراه غريبه عنه فى مكان مغلق وغلى انفراد ده الحرام .

يعنى يوجد فرق كبير بين الاختلاط والخلوه

2/التحدث مع النساء( عبر كل ادوات التواصل فيس واتس منتديات هاتف او مباشر

مدام كل شخص مراقب لتصرفاته ويعلم ان الله رقيب بما تعملون وقتها يتصرف بكل ادب واحترام .

والله كانت عندى ايئله بس طارت

ده حالتك

س اخير لمحسيه
مالك مركبه وش الجديه مافى مجال للمرح

انا ولا مركبه وش الجدية ولا شىء بس وقت الجدية بكون جدية وقت المرح بكون مرحه جدا .
ابن عوف

بنتك اختك قريبتك ممكن تزوجها لمغترب وانت عارف سلبيات الاغتراب
تحياتى واحترامى

نورت المكان
تحياااااااااااااتى

[محسية]

مسسسسساء الورد ود عوف وعليكم جمعيا

ما رايك فى الغربة ؟؟؟

وهل حققت حاجاتك منها ؟؟؟

ولورجع بيك الزمن للورء كنت ستختار ان تغترب ؟؟

هل الحقيقى الغربة بتعلم القسوة ؟؟

نجى عن حياتك الشخصية شوية

من هو ودعوف ؟؟؟


واحكى لينا شويه عن طفولتك؟؟

وما هى كانت طموحاتك التى لم تتحقق ؟؟

لى عودة


تحيااااااااااااااتى

[ابن عوف]

موضوع هادف ومميز
محسية&ودابنعوف لكم تقديرى وامتنانى2

تسلمى ذات الشجون
خليك قريبة

[ود الخير]

مالكم ناعمين كدا
دايرين الشكله

[ابن عوف]

مسسسسساء الورد ود عوف وعليكم جمعيا

مساء معطر ومحبة من الرحمن عليك وعلي احلي اعضاء انا سوداني

ما رايك فى الغربة ؟؟؟

الغربة المساحة لاتكفيها اولاها من طلع من داره قل مقداره اسمها براهو يروع بس نرجع انكتب علينا وظروف السودان تجبر الواحد انه يغترب والواحد ما يقتنع الا يجرب

وهل حققت حاجاتك منها ؟؟؟

مشكلتنا نحن السودانيين الاسرة الممتدة نادرا ما تحقق اهدافك واغلبها يمكن يكون بالدين وبترجع لوضع السودان الما مستقر فكرت مرارا وتكرارا انهي الغربة بس اصطدم بواقع مر وارجع ادراجي الي حيث كنت وما زلت امنى النفس بالعودة النهائية

ولورجع بيك الزمن للورء كنت ستختار ان تغترب ؟؟

لو رجع بي الزمن كنت ح اختار اقيف في محطة الطفولة فقط اما اذا اجبرت علي العودة النهائية ما ح افكر اغترب مرة اخري سوف اظل في السودان رغم كل شئ

هل الحقيقى الغربة بتعلم القسوة ؟؟

علي حسب ظروف الغربة العايش فيها والبئية المحيطة بك اما انا فعملت معي العكس كنت قبل الغربة قاسي هسي بقيت لين شوبة

نجى عن حياتك الشخصية شوية

من هو ودعوف ؟؟؟

يسري ابنعوف انسان بسيط الاقدار والظروف طلعته من اهله ليبحث عن لقمة العيش في بلد غير بلدي
من قبيلة الكواهلة فرع الكمالاب قبيلتنا استوطنت بمنطقة شمال الجزيرة من الجهة الاب اما الوالدة فهي رفاعية من جهة والدها وكاهلية من جهة امها يعنى خليط

واحكى لينا شويه عن طفولتك؟؟

قضيت اجمل طفولة زمن الالعاب الشعبية وليالي السمر في ليالي قمرية وكنا بنلعب مع ابناء الفريق اليوم حافل باللهو واللعب لعبة الريمة وحراسها وعم علي ودش الميس وحرة وشد العصب وكمبلت ووو دا في زمن الاجازات ما اروعها من ايام
وما هى كانت طموحاتك التى لم تتحقق ؟؟

اقلها بناء بيت يسعنى انا واسرتي الصغيرة
بيني وبينك قنعنا من بناء بيت في الدنيا والسعي لبناء بيت في الاخرة
بيت الدنيا بطمع الجيران بحتتة الارض وجشع التجار بغلا مواد البناء

لى عودة


تحيااااااااااااااتى

ومنتظر عودك
وتحياتى لك وللاحباب وان شاء الله اكون وفقت فى اجابات ترضيهم

[ابن عوف]

محسية واحبابي الاعزاء
اسعد الله جميع او قاتكم اتمنى ان اسعدكم في هذا المساء
وفي الاسئلة السابقة سؤال الجمعية والجمعية العمومية جاءت بالغلط
اعيد سياقة السؤال مرة تانية واسف للاخطاء الغير مقصود....
لماذا اختفت الجمعيات الادبية في المدارس ؟
اكبر غلطة في السلم التعليمى هي الغاء المرحلة المتوسطة
لانها كانت فترة تغير من مرحلة طفولة لفترة مراهقة
حاليا ادخال فصل تاسع لمراحل التعليم قبل الجامعي
تفتكري انه بحل مشكلة التعليم ؟
هل اضافة الفصل بدل علي انه قرار الالغاء خاطي ؟
اليوم كتير من نشوف خريجين الجامعات بيضعو نغمة التخريج اغنية هابطة مع مصاحبة رقيص هابط
الي درجة تثقي خريج يقوم بهذه التصرفات للتعامل معاه في المستقبل سواء طبيب او محامي او قاضى ؟
كرنفالات التخرج وما يصاحبها انتى معها ولا ضدها مع ذكر الاسباب ؟
متى تقولي هذه المقولة التى تحمل معنى الاسى
يا خسارة عمري الي راح هدر ؟
محسية ل الايام دى عايشة قصة حب ام الحب لسة ما طرق بابك



وبجيك صادي

[ابن عوف]

مالكم ناعمين كدا
دايرين الشكله

شكلة شنو يا زول
الشكل لو بجيب نتيجة كا اتصلح حال البلد

طيب قيمنا لينا وضع السودان والحال الوصل له
وحلولك شنو ؟

[shosho wbs]

مالكم ناعمين كدا
دايرين الشكله

انا زاتي مستنيه الاسئله الناشفه

[تائب]

انا زاتي مستنيه الاسئله الناشفه

يلا اسمحو لى ابدأ الأسئله الناشفه و(الزعل مرفوع)
- محسيه ..نجد إن محمد وردي إشتهر بالغناء العربى
أشعار اسماعيل حسن مثلاً ومع ذلك بحاول يصجنا
بالغناء بالرطانه (ولا يجيده يعنى بعض المحس بغنو
بالرطانه أحسن منو) ويذكرنا صباح ومساء انو محسى
من جزيرة صاى .. بينما نجد حمد الريح محترم نفسو ومحترم
غنائيتو التى منحته الشهره وكذلك عثمان حسين وهو شايقى ما
شفناهو يوم شايل ربابه ..
السؤال للأخت محسيه إنت من ياتو صنف ؟؟؟
- ود ابنعوف أنا شايف جسمك جسم شايقى وراسك راس
جعلى إنت جنسك شنو؟؟؟

[ود الخير]

انا زاتي مستنيه الاسئله الناشفه

ولعى والنار بس انتى

[shosho wbs]

يلا اسمحو لى ابدأ الأسئله الناشفه و(الزعل مرفوع)
- محسيه ..نجد إن محمد وردي إشتهر بالغناء العربى
أشعار اسماعيل حسن مثلاً ومع ذلك بحاول يصجنا
بالغناء بالرطانه (ولا يجيده يعنى بعض المحس بغنو
بالرطانه أحسن منو) ويذكرنا صباح ومساء انو محسى
من جزيرة صاى .. بينما نجد حمد الريح محترم نفسو ومحترم
غنائيتو التى منحته الشهره وكذلك عثمان حسين وهو شايقى ما
شفناهو يوم شايل ربابه ..
السؤال للأخت محسيه إنت من ياتو صنف ؟؟؟
- ود ابنعوف أنا شايف جسمك جسم شايقى وراسك راس
جعلى إنت جنسك شنو؟؟؟

والله يا التائب وردي دا مافي منو
كان عربي ولا رطانه ومافي زول احسن منو
ولو بتسمع في فنانين كتار بقلدوهو في الرطانه ومنهم امجد صابر !!

[shosho wbs]

ولعى والنار بس انتى

كان ما ولعتها انا بولها منو
هم زاتهم قالو دا الهدوء القبل العاصفه مش كده