شعراء الطنبور

[ناجي عثمان عبد الرازق]

[align=center]

مدن الضياع

والله يـامـدن الـضـيـاع امـالـي فــيـك مابتـنـحـسـب
فـي دوبـا فارقتـا البلـد جيتـك مقاسـي الشـوق غـصـب
شديـت رحالـي بـلا ضجيـج خايـف شياطـيـن الجحـيـم
جيـت دايـر ابيـع الضـل مـا جابنـي لـيـك شـوقـا قـديـم
ضاراني وشك من قفاك ضاريت كمـان واقعـي الاليـم
احـلامـي غــرب شـرقــت شـرقـتـا بـانــت بـالـغـرب
شــان ود غـلابـه وكادحـيـن لاود شـيــوخ لاود عـمــد
مـن قمتـا طاوينـي الشـقـي ومتـعـودي العيـشـي النـكـد
جيت داير اغسل همي فيـك والقالـي فـي جوفـك سنـد
قـايـد شليـلـي ودرتــا انــا تـاريـنـي ضـلـيـت الـــدرب
علمني ليلك كيف اموت واشيـل بـراي نعشـي واحـوام
وكيـف قلبـي يتمـدد تـقـا فــوق الـحـذن كيسـابـو كــوم
والــقــا الـشـقــا شـقـيــش امـــــش الـقــاهــو ويـــــن
مـا بينـي مـا بيـن الهـدوم كايلنـي هـم زايـدنـي خــوف
ســاوي الــــفــؤاد ســـاحــت حـــرب
كيف المصير وانا في وديك تاهـت خطـاي وبـلا دليـل
استسلم ارجي الدار تجي انا عاد ولا اطاوع المستحيل
الرجعـه اقسـي مـن البعـاد اوبيـن ووب هسـي وقبـيـل
اتعوجـن قبلـي ومحـن فـي اوطـانـي عـايـش مغـتـرب
ماسـاتـي يـامـدن الضـيـاع اكـبـر مــن الـحــان الـغـنـا
ميـلادي كـان عــام الـرمـاد الفيـهـو ابـاحـو الغرصـنـا
لاكـت سليمـان يـوم هويـت لا بيـن ايـدي خـاتـم المـنـا
شان اجلبـك باقـي الذمـان او اهـوي بلقيـس ولا احـب
والله يــامـدن الــضـــيــاع
[align=left]محمد سفلة[/align] [align=center]
[/align][/size][/align]

[ناجي عثمان عبد الرازق]

[align=center]

صرخه

هيج سكون الليل بكاى قاسم عويناتى السهر
لمن سمع همسة غناى مجرورة فى قلب الوتر
احمينى من جور الزمان يابوحه من إيد القدر
دسينى فى هدب العيون أو بين تصافيف الشعر
خلينى فى جواك كلام أو بسمه فوق أحلى الدرر
واسقينى كاسات الحنان من فم أكاليل الزهر
سوقينى لى دنية هواك نسينى الام السفر
طرينى ياإلهام غناى افراحنا وايامنا الغرر
ورينى كيف الليل يضيع فى ضى تسابيح السحر
وحجينى بالغنوة الزمان قنا فى وجه القمر
حسينى كان مات الكلام أو بهتت ألوان الصور
تارينى غشانى الخيال عجلت راحل ماأنتظر
غتينى شمس الشوق فقع بكانى والدمع انهمر
ابرينى فى النقعه انشويت ابقيلى ضلالة مطر
سامحينى ندمان دار اموت بى همى والادهى وامر
صافينى ياغالية رجاى الماكى من طينة البشر
نص دينى إيمانى العميق بالريده من غيرك كفر
ود عينى لابد فى الدموع واقف تلوت الليل غفر
يعمينى من تالاهو نوم قطع حبال صبرى الحزر
جايينى جاييك لاننوم ساسقته بى فكرى وفتر
سابينى شوقك مت حى بين حاضرى والماضى الاغر
[align=left]محمد سفلة[/align] [align=center]
[/align][/size][/align]

[ناجي عثمان عبد الرازق]

[align=center]

الضرب فوق الميت




إعدت الجراح ياغالية ما عاد البشوفو جديد
ومابشعر بقيت بالطعنه مهما كان مداها بعيد
واحد عندى كان الامى تنقص واللا تانى تزيد
واللا أصبح ملاقى مأسى واللا يطل على العيد
ماهو غريب عليها الدنيا تقصد قلبى بالتحديد
ودون الناس براى ياحلوة ابقه عدوها انا الويحيد
يانى صريعه من شبيت فوق مهد الطفولة وليد
ولم كبرته واترعرعت فى دنيا الغرام والريد
من نار العذاب الضوقتو لو ماكنت زول صنديد
كان فى قبرى بدرى رقدت فى جوف ود أحدو شهيد
إلا هواك ملانى عزيمه آه يابلبلى الغريد
بلقاك والمحن حابكانى دايماً ليه مادى الليد
الا الليله عاد فى الغربه نازف قلبى دمو صديد
والموت قبل أجيك صدقنى ياهو مصيرى تانى أكيد
الشقى فيها أمسى غرينى والقيد فى خطاى حديد
والشوق بى لهيبو ونارو يلعب فى حشاى عربيد
فى ركن السجون اتباكه أرزح فى الظلام والقيد
وخايف تبقى فيها اقدارى حاكمه على بالتأبيد
لويجدى الشعر ادمنتو كم سطرت فيهو قصيد
وترجمت العليا أغانى لو قول الشعر بيفيد
لو عش فى الجنان يابوحه غيرك ماحأبقى سعيد
ودونك لو هدولى ثماره برضي أشوفه مره شدي
[align=left]محمد سفلة[/align] [align=center]
[/align][/size][/align]

[ناجي عثمان عبد الرازق]

[align=center]

يا وطن

الـنختلف يمنى ويسار حتى ان نصل حد الكجـار
بس ما نكون فى يوم صغار قدامنا هم أكبر من الكرسى الرحيب
وجايينا غـم نتسـاوى فيهـو عـدو وحبـيــب
الفرصـة جات النتفق أنا وإبن عمى على الغــريب
***
بعـدين كـدى النجى نختلف بعـد الجراحـات ما تطـيـب
بعـد الـدخيل الجـاى ظـنـو كمـان يـخيـب
يلقانا قشـطة على عسل ويلقانا سمنة على حـليب
ويلقانا دخان الرصاص حولنا نسـمـة وهـمبريب
ويلقانا فـوق فـد عنقريب نتحاجى فى الوحدة السـلام
ونـتـنـا جـى فـى العـشــم الـقـريــب
بعدين كدى النجى نختلف بعد الجراحات مـا تطيب
***
هـيـلـك تـفـتـخـر وأصـلـو الفخـر مشـهـادك
مـا طـال انـت أبـونا ونحـن يـانـا ولادك
لا دينكا وشلك لا نوبة أو جعلية لابرقو ومحس بقارة أو شـايقية
يوم نارك تقوم بالجملة سودانية نفديك يا وطن لا حزب لا جهوية
أدينـا الإذن والبـاقـى خـلـو عـليـنـا
قـضـايـيـن عـوج مـا فينا راجل إضينا
الدايرك يـمـيـن نـمشيـلـو قـبل يـجـينـا
لا سـيـف لا سـلاح تـفـقـه رقـبـتـو إيدينا
***
ثـابـتـيـن ذى أحـد مـافينـا نى ينهضــه
وعــن سـاعـة الـدواس ننقـز نسوى العـرضة
غـيـر شـورتـنـا راى لا ينسمـع لا يقضــى
والـدايـرنـو تبقـى الـدنـيـا تـابـا وتـرضى
***
وشـيـشـك يـا وطـن ننجـم نـبـايـعك جملة
غربال الدفـاس فينـا آب يـمـرق الـخمـلة
يـوم نـارك تقـوم مـانا النسـوى الـعمـلـة
دمنا يـــوم تحـر نسقـى الجبـال والرملـة
[align=left]محمد سفلة[/align] [align=center]
[/align][/size][/align]

[ناجي عثمان عبد الرازق]

[align=center]


جاروا الأهل
جاروا الأهل خلوكى تتباكى بين نارين
نار الظلم والجور وبعد الحبيب الزين
ظلموكى فى أفراح راجاها ليكى سنين
كتلو الفرح جواك وئدوا السعادة جنين
خلوكى زى طفلاً باكى وتملى حزين
وعايش حياتو عذاب مابين نواح وأنين
لوقدروا جاروا على وشالوكى من العين
حتظلى فى جواي يقدر يشيلك مين
لاتبكى تشكى البيك يبقن على همين
مابيتحملو بكاك قلبى العليك حنين
بيناتنا ختو أميال شان نتفرق ناسين
إنو الحبيب بالشوق بيطير بلاجنحين
أنا مامته موتت ذله انا مت بى سكين
لكن قدربى صديق بى سيف خيانة سنين
لامينى ليل ونهار عارف الشهير ودفين
وريتو أدق أسرار ما كان عليها أمين
صبراً على الأيام يمكن شويه تلين
تجمعنا بعد الحال ننساهو مر البين
وكت انتى زى تمام وقلوبنا متعاهدين
حنعيش حياتنا أحباب ونشوف حا يخسر مين
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]


رسالة من الآخرة
ســـــــارة من الآخــرة بكتــب ليـــك تحـــية
من حبيب مات يوم فراقك الا نارك لسة حية
من جهنّــــم ليك بكتب رغــــم آلامى العـــلى
أقلب الأحزان مباهج كان يخـف ألمـك شوية
عارف إنى أنا فى قليبك وعـارفو قلبك لسة لىَّ
وعارفو باب سكـة فرحنا سدتو الإيد القــــوية
أهلك القايلين سعادتك تبقى فى العيشـة الثرية
شالو فرح الدنيا خلوك تبكى بالدمعـة السخـية
رغم أفكارم بريدك ريدة ظـاهرة ومو خـــفية
واختلاف الفكر عمرو ما فسـد للود قضــــية
حالتى من غيرك تمحن عيشــة فى نار سرمدية
مافى زول أحكيلو حالى وإنتى مــاك عارفة العلى
سارة مابقـــدر ألومــــــك إنتى ما اتلـــومتى فيــاَّ
والبزح فى الواطة قاعد ما بتطــول قدمــو الثريا
سارة أمسحى سيل دموعك وعيشى لحظاتك هنية
والفرح فد مرة قالوا عنـدو فى أعمــارنا جيـــــة
أوعى تحزنى يوم زفافك إنتى ما شبه الأســـــية
الاَّ أقدارك معــاندة وإنتى ليهـــا دوام ضــــــحية
افتقدتك فى إحتضارى يوم أحاطــت بى المـــنية
وقالوا فى الليل المضَّلم يفتقد قمـــــــر العـــــشية
سارة طاريك ما نسيتك وكيفن أنســــــــاك يا بنية
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]


جن الريد

أحمد معروف بالطيبـة حسـن أخـلاق وعليهـا إتربـه
تكفي شهادة ناس الحلـة إنـو خلـوق وخجـول ومُربّـه
مهذب رغم حداثـة سنـو لبـس تهذيبـو أصالـة وهيبـة
أدي الناس الحـب أدوهـو حسـن الظـن بيناتـن شبـه
خشت فجأة أميمة حياتـو وصـارت بينـو وبينـا محبـة
قلبو إختارها عشان معروفة زولة حنينة وراقيـة وطيبـة
دسو الريد في السر بيناتُن وخلّـو حبيـس دفيـن ومخبـه
وكيف تنضارى متل أشواقن وليه زي ريدُن يـوم يتخبـه
بعد أيام وصلتـو رسالـة جـواب مليـان تقيـل ومعبـه
قبال ما يفتحو عرف الراسل باينة وظاهرة رسائـل وهبـة
أخوهو الليهو زمن متغرب تسعة سنيـن قضاهـن غربـه
مرسل ليهو تذاكر وفيزا دايرو يجيهو هنـاك فـي طيبـه
طار في الأول أحمد فرحه كلـم كـل النـاس والصحبـه
لما إتذكر أميمة حبيبتـو فجـأة إنتابـو شعـور بالخيبـه
لكن قـرر إنـو يسافـر سرعـة يعـود ويتـم الخطبـه
لأنو الغربه طريقه قصير وفيهـا يهـون تحقيـق الرغبـه
جاتو اميمة حزينة توادعـو جاتـو تجفـف دمعـو الكبـه
جاتو توصي عشان ما يقوى لا ينساها هناك فـي الغربـه
جاتو تطمنـو إنـو حيفضـل ريـده الخالـد مهمـا غبـه
حافظه عهود الريدة البينُن ومهمـا كـان ح يظلـو أحبـه
أهدتلو المصحف شان يرعاهو من العين والهـم والكربـه
لبّسه عهد الريد في جيده عقـد ممهـور بصـورة الكعبـه
قامو إتوادعو زين إتباكـو فـات خلاهـا وحيـدة وخبـا
سافر شال همو وأحزانو بعـد أيـام فـي المملكـة طبـا
لاقو الناس يا زول كيف حالك بالأحضان قام سالم وهبـه
قالو نصاح ناس أمـي وأبويـا مشتاقيـن راجنلـك أوبـة
قالو أحمد سافـر يـا وهبـه غيـر جـوَّك وروِّق حبـه
أمـك ياخـي تلاهـي عليـك لاخـلالا ضريـح لاقبـه
السودان مشتاقلك كلو ضفـاف ورمـال سواقـي وتربـه
وحتى النيل فرحان راجيك تجي وتنهل من مويتـو العذبـه
بعد أيام كان وهبه هناك بيـن أصحابـو وأهلـو وأحبـه
في حضن أمو الطول منو في حيشانـو الواسعـة الرحبـه
قالتلـو أمـو أخوانـك كبـرو ومـا فضلنـا زول يتربـه
بس فضلي أشوفو جديـدك وكتيـن لسـع حيـه وطيبـه
إختارولو بنيي سميحـي تشـع حيويـه ورونـق وهيبـه
أديبه وراقيه وكلها عفه وبرضو أهل وقراب فـي الحسبـه
يوم العرس الحي صباحي فرح مطبوق والنـاس منطربـه
شاق الليل صوت كم زغروده وحس طنبور ودليبـن ربـه
إلا في واحده حزينه وباكيه سايلـه دموعـا دوام منسكبـه
وفي دموعا سؤال بيحير وفـي آهاتـه أسـرار محتجبـه
وقالو الناس دي دموع الفرحه وغيرا شنو الحا يكون السِّبه
بعد أيام ساق وهبه عروسو ساقا رجع لـي بلـد الغربـه
سايقو حنين لي كل أصحابو ولي أحمد أخوهو أشواق ملتهبه
وصل الباب كورك يا أحمد فتح أحمد بـي لهفـه ورغبـه
شاف قدامو الما متوقع هم الكـون فـوق راسـو إنصبـه
شاف السلسل عهد الريده نفس السلسـل وصـورة الكعبـه
شاف قدامو أميمه حبيبتو كانت قاسيـه وقاضيـه الضربـه
شاف أحلامو تضيع قدامو بعـد مـا كانـت منـو قريبـه
كانت لحظه تفيض بالدهشـه شـاف الدنيـا كأنهـا كذبـه
كورك أميمه أميمه وصنقـع صنقـع ودنقـر ودّر وغبـى
وجن أحمد في نفس اللحظه جن الريـد مـا أظـن ينطبـا
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]


يانـي أنـا

راجـاك لاتقلق لو غبت تسعة سـنة
ويوم بالسلامة تعود تلقاني ياني انا

* * *
لا غيرتني ظروف لا ريدي صابو عنا
لا قلبي شالو سواك لا عنك استغنى
تلقاني منتظراك فوق نار ومستنه
والله غير لقياك ما عندي تاني منـى

* * *
كـل مـا يجيني الليـل انا ببكـي وإتالم
تلقاني سـارحه معـاكا وبي لقـاك بحـلم
مالك قليبي هواكا وجاري مجرى الـدم
فيك التروح الروح وأنا عندي زيك كـم

* * *
طال الزمن بالحيل وانا قاعده مستناك
وبرجاك ومابندم وانا عمري كـلو فـداك
بس يوم تعود ارجوك لاتسيبني تاني وراك
يا أقعد إنت معاى يا إمـا سـوقني معـاك

* * *
سألوني عنك يوم وعن غيبتك العزال
قالوا لي فتَ خلاص غبت وبعادك طال
زول من رحـل خلاك لا جيه لا مرسال
وكتين نساكي وفات خاتاهو ليه في البال

* * *
قالوا لي انسى خلاص زي ما هو برضو نساك
صهين يكون مشغول بي واحـدة تانيه سواك
إبتسمي للأيـام تلقى الزمـن ضحـاك
خطابك انتي صفـوف الآف بتتمناك

* * *
رديت حياتي بقت مقـرونه بـي إنسـان
رابطنا فد شريان ساقينا ريد وحنـان
بيهو بنعيش أحباب في روقة وإطمئنان
ويصبح مصيرنا المـوت يوم ينزف الشـريان

* * *
خليني في جواك لا يبقي بينا عزول
نوم مُطمئن وارتاح واسمع خلاصة القول
لا مال بغيرني لا إغراء بينا يحـول
لا بيملا عيني سواك لا تاني بعشق زول

* * *
همش كلام الناس زي ماجَ خلي يفـوت
واسمع حديثي عديل لا يجيبوا ليك ملفـوت
ماناسيه عهدي معاك جوه الفـؤاد منحوت
ويوم ارتبط بسواك ان شاء الله قبـلو امـوت
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]

سحابة حزينة
بعد طلَّتنا سحابـة حزينـة.. أحالـت ليلنـا.. نـواح وأسيـة
بدت الفرحـة خطاهـا علينـا.. تعـم آفاقنـا ..شويَّـة شويَّـة
نـار الغربـة ملهلبـة فينـا.. ونـار الشـوق ..اللِّـسـع حـيـة
حلاة اللقيا بعد طـول فرقـة وبعـد الغربـة سماحـة الجيَّـة
***
شوقى كتير لى لحظة شوفتك.. وشـوق أطفالـك بالكميَّـة
مشغولين بى ذكرة بابا.. وبسمـع بابـا.. صبـاح وعشيَّـة
جانـا جوابـك شايـل البشـرى.. بـى تحقيـق أجمـل أمنيَّـة
عودتك وعودتك بلسم شافى يداوى جروحنا الطالت نيَّـة
***
كنا نمنِّى الروح بى اللقيـا.. نـدارى دموعنـا ورا الحنيَّـة
وكنـا نطـوِّع زمنـا ً قاسـى..لـو الأقــدار تنـسـاق بالنـيِّـة
يفرح بيك طنبورنـا ويصدح..يعـزف ليـك أجمـل أغنيَّـة
وبعد إحجام صامتبو قريحة حترجع توحى إلهامه سخيَّة
***
لما تعـود حتكـون أيامنـا.. رايعـة ورايقـة وهاديـة هنيَّـة
عودتـك قمـة هـرم أفراحنـا .. هداهـا الينـا زمَّنَّـا هـديَّـة
لما تعـود حيهلل(ناجـى).. تجيـش أشـواق كانـت مخفيَـة
ورغم طفولة (نازك) إخيتو يقولها زغردى هوى يا بنيَّة
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]

حبي أنا ليك كان زادي

حبى أنا ليك كان زادى وكان جوه الحنايـا دفيـن
كتّ بضارى من الناس وخايفه عليهو مـن العيـن
عليهو كت بصوم وافطر عليهـو بكابـد الناريـن
كت بحسب سنين الغربة لما تعـود تجينـى متيـن
وكت برجاك فوق النار لمـا وكـت لقانـا يحيـن
نونس فى براءة أطفال وفى الحب نروى ننهل زين
وكلما يوم يزيد البينـا لمـا بقينـا قـاب قوسيـن
اتارى أنا كت فيك مخدوعه وكم من زي مخدوعين
ما قايـلاك حبيـب آلاف وقلبـك قبلـه للضاليـن
وما قايلاك بتنسي حبيب صبر راجيك ستـه سنيـن
وساهر كم ليالـى طـوال يتقلـب شمـال ويميـن
كيفن يهون عليك تنساهو زولاً كان عليـك حنيـن
وتشغـل بالـك الأشـواق لمّـن تزبـل الياسميـن
كت دايراك بسمة عريضة فى وجه الزمان الشيـن
وكت دايراك ساعة الحاجة تبقى ليّ دخرى خزيـن
كت دايراك مقنع حوبه وكتيـن المضـارى يبيـن
وكت دايراك فارس احلامى تشاركنى ونتـم الديـن
وكت دايراك أمل بسام يزيل ألـم البعـاد والبيـن
كت دايراك شريك الروح واخدمك حافيـة القدميـن
وكت بحلم بك انت معاي مجرتق بالعديـل والزيـن
جنبك فى يمينك قاعده نسمع فـى دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبه الموج اكيد مرسايا بين موجتين
وداعاً يا زمـن ظالـم وبالأفـراح علـيّ ضنيـن
وداعـاً يـا قلـب قاسـي لا بيحـن ولا بيلـيـن
وداعاً يا سراب خداع محال ما بيروي عطشانيـن
وداعاً يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن
تبشر بى خريف جايينا ياما الناس رجوهو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك يا قلبي المسالم وديمه طبعو حنين
يتاورو الشوق ويلعب بيهو تنحر فى حشا السكيـن
تعاودو الذكري تنتر جوا حالـو يحنـن المسكيـن
أخيراً مى ليك سلام وقبل ما تجـف دمـوع العيـن
وقبال منى ما تعـدى وقبـال الفـراق مـا يحيـن
بخيت وسعيد عليك إن شاءالله يبقالك عمار وبنيـن
وقلبى أنا خلى فى أناتو بعدك يامـا راجـى أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحب عليك حرمان ووعد الحر أمانه وديـن
[align=left]علاء الدين عبد الرحيم[/align] [align=center]
[/align][/size][/align]

[ناجي عثمان عبد الرازق]

[align=center]

سامحنـي واصفـح
سامحني واصفح يا حبيب ساقوني منك بالغصب
ندماني ليه سبتك براك تتباكى في نص الدرب
طمني حالك انت كيف والبي يهون مهما صعب
انا اصلي زول احساسو مات من بدري معتاد الضرب
كم مرة شانك يا مناي من حنضل الآلام شرب
من خشمي تتقاطر دماي لو ينطق اسمك بالكضب
نفوني من نص الديار يوم عرفو اني انا ليك بحب
لكن كل ما زاد بعادي لقيتو شخصك لي قرب
سجنوني بين اربع حيط زربوني من جيهتك زرب
لكني شايفاك كل يوم هل طيف خيالك يحتجب
طالوني بالايد واللسان ما فيّ شيتا ما سلب
غير حبك الما قدرو يوم يصلوهو ما ساكن القلب
اغرب شي اني انا بي وراك بنزل واتهان وانضرب
لكني في لحظة لقاك بنساهو زي الكان لعب
وريتم انو انا لي حبيب لو خنتو بشعر بالذنب
ساقيني راويني المحبة ومن حنانو كمان شرب
يا اخوي زي ريدك ولادك برضي للمريود بحب
والله لو حاس بالعلّي ما بترضى بيتي انا يتخرب
زي ما بتدور لهم السمح لي برضو خير الدنيا حب
لكني القى الدايرا وين من ناس معين خيرن نضب
في شورة زي بيعة الملح باعوني في السوق بالجلب
وما راعو لي امي الدوام تتباكى شاني وتحتجب
باريت لي زول بالجتة بس بارنك الروح والقلب
انا قلبي لو فارق ضراك ما اظنو من بعدك كسب
متحملي الآلام براي شايلي الهموم ما بتتحسب
وما لقيت زول حس العلي قاسمني همي معاي تعب
عرفت صح ألم الضرب ما بحسو زول غير الضرب
الغربة كيف وعذابا نار ما بيطرا الا المغترب
فوضت لي الله الأمر وقتين من التحنيس تعب
مظلومة والمظلوم دعيوتو من الإله ما بتتحجب
بكتب لك اسع يا الحبيب متصبري وماسكي القلم
بكتب لك اسع والقليب مجروح يعاني من الألم
مكتوبي من شهر العسل شهر المرض وشهر السجم
ملفوفة بي كفن الزفاف والحنة في إيدي دم
مرقت من سجن الطغاة وقعت في الزل والوهم
قبلت بالواقع المرير آمنت بي أمر القسم
وقبلت بالدايرنو لي كم قبلي مظلوم اتظلم
ويئست من عيشة عذاب راماني في زول ما رحم
انسانة صرت بلا طموح بلا مباديء بلا قيم
وقنعت من الرحمة تب بس فيك ما انقطع العشم
ما زلت ياك مالك القليب رغم انو امري انا اتحسم
لا زلت بفخر بيك واقول انت الحبيب في كل ملم
ولا زلت بي اسمك بصيح لو حتى ساكت اتهجم
وبقولا قدام أي زول ما خايفة اصلو الموت هو كم
آخر رسالتي بطمنك أرجوك ما تشيل لي هم
خليك في عهدك معاي ارجاني ما يطولبك سئم
أحفظني في جواك فرح بلسم تداويبو الألم
زي حفظي ليك بين الضلوع انت وقليبي نجم نجم
اخواني سيبم يفرحو انا جرحي لسع ما التئم
يمكن ضميرن يوم يحس ويعرفو اني انا انظلمت
ويعودو شان يبنو الوقع كيفن بينو الانهدم
ديل ناس هوايتن الظنون ديل خلو عيشتي بلا طعم
ما سوو بي حكم العقل وما بيرضو بي الليهو احتكم
الناس بتتقاس بالعقول ما بالجلاليب والعمم
وانا ماسكي في حبل الصبر في الله أملي انا ما اتعدم
[align=left]علاء الدين عبد الرحيم[/align] [align=center]
[/align][/size][/align]

[بانه]

إبراهيم بن عوف


رؤيــة



والله ما كذب المنام كل الرأيته لقيته صاح
البسمة والنظرة الخجوله وقدلة الريل في البطاح
***
نامت عيون العاشقين ساهرت لامن فجري لاح
راقبت طيفك ذكريات يا رايعه زي طلة صباح
ناحت بلابل الشوق عليك ندماني مكسورة جناح
اتأوهت للناس قصيد صرخت من آلام الجراح
***
رقصت علي النغم الحزين في غفلة العمر الي راح
نادت عليك كل الزمان صادف نداها جفا السماح
رجعت تجابد في الصبر وتدفن دموعا وراء المزاح
وتتصنع البسمه الزمان مسروقه من شرف النواح
***
وين إنتي والحلم الجميل وين كنتي والأشواق رياح
ياراحله في الأزمان قدر تبخل بك أياماً شحاح
يامعوداني الإنتظار , الإنتظار في قلبي شاح
***
وين كنتي واندهدهدتي ليه وكتين لقاك كان بي متاح ؟!
راجيك علي كل الدروب العامري والضماها واح
دقيت أبواب الغيوب لا ارتحت لا فاطري استراح
خايف من العمر قبال أراك يرحل متل ضل الصباح
***
والليلي جيتي بلا خبر ياقدري حيا علي الفلاح
وغنت عصافير الغرام لمن ظلام الفرقه زاح
ما أجملك , ما أجمل صباك لما الجمال لبسك وشاح
وما أحلي ساعات اللقا الوردية والعطر الي فاح

[بانه]

إبراهيم بن عوف


عيونك ديل


عيونك ديل قليبي هن الأذنو .. ربي يسامحك كان عذبنو
***
مسكين في بحور الشوق رمنو ... تايه فوق دريبن ودرنو
مظلوم في الغرام ما أنصفنو ... وكمان ناوات عميرو يقصرنو
***
جافاهو المنام كم سهرنو باكي ... البيه ناح والحولو غنو
باكي الماضي والدمعات رونو ... كيف يعود ماضيه والأيام طونو
***
خلنو ونسن ريدتو ونسنو ما ... راعن ودادو وقدرنو
لا جادن عليه ولا طرنو ... ولا يوم في لماتن عشمنو
***
وروني الحصل إيه سمعو عنو ... وبس ليه السلام قطعنو منو
مات بالشوق عليهن ما بكنو ... وما أظن فـ تريبتو يريحنو
***
بقيت أبكي وبكاي الناس تظنو ... تقول ود أبنعوف عاد ليهو جنو
ما بكيت تعذيبي عارفو مقدرنو ... إلا بكاي علي قليبي الحطمنو
***
انا العارف عيونك ما بحنو ... لاون قليبي لامن فترنو
يصارع في الرموش متل التكنو ... قويرب جنو موجات غرقنو
***
يجيه الليل طبول الهم يرنو ... ويسوق سوقار مصايبو يكابرنو
إنت باقيلك بيسعد ؟ ما أظنو ... ياهو شقاه منك وإلا منو

[بانه]

إبراهيم بن عوف


حبيبتي أنا


بتسألوا عن حبيبتي أنا
حبيبتي أنا ..
وسعادة عمري في الدنيا
الوراها فنا ؟؟
***
دي آمالي العريضة البيها أشوف
دنياي سرور وهنا
وصباحي الزار بعد ليلا ً
سهرتو ضني
حبيبية عمري , آمالي وأعز مني
وشعوري الفايضة في جواي
هناك .. وهنا
وحروفاً ديمة أفخر بيها وسط الناس
وفي الدارات أشيلا غنا
دي حبي البين ضلوعي
إشراق ونور وسنا
تسألوا عن حبيبتي انا ؟؟
***
اسألوا عنها بتلقوها
في كلمة سلام ما أتقال
وما قالو الحبيب لحبيبو ..
أبدأ .. وما خطر بالبال
في رنة نغيم سلكاية ..
وفي سيرة العديل والفال
وفي زغرودة في الدارة
وادين مرفوعة للشبال
بتظهر في جلال لقيا
وتبين في براءة أطفال
بتسألوا عن حبيبتي أنا ؟؟
***
حبيبتي نغم حنين ..
ينساب مع موال
من عالم بعيد جواي
يموج بالبهجة
ينسيك إنو لينا زوال
فيهو أحلم وأشوف واحات
خضرة كست تلال وجبال
عالم في ترابو الغالية
ما حطت رحال ورحّال
وما عبرت سهولو أحزان
ولا هجرت رحابو آمال
عالم .. عندي أشوفو حقيقة
إلا الناس تشوفو خيال
تسألوا عن حبيبتي أنا ؟؟
***
حبيبتي أنا من عهود الريدة
عهداً باليمين أوفيهو
وحتي ان كان شقيت في دابا
قلبي تكون سعادة عليه
شان لولاها ما كان ينسي
أيام مرة من ماضيه
شان لولاها ما كانت
تزور البسمة يوم شفتيه
شان لولاها ما دنياه
باسمة والحزن ناسيه
وشان لولاها
ماعاش في نعيم
الناس تحسدوا عليه
تسألوا عن حبيبتي أنا ؟؟

[بانه]

إبراهيم بن عوف


من فارقت واديك


من فارقت واديك قلت تميت حـول ..
كيف يبقة العلى وأنا للسنيـن عديـت
أنا صابر يا سحاب حولا وراهو الحـول
وعارف يوم وقع فى حبـو مـا سميـت
تراك وسط الدوع تضحك بريقك شال .
أما انا يا حليلى العمـرى مـا فريـت
روح يا سحاب فلـل عليـك الليـل
وبلغ لى السـلام لـى دارو ان مريـت
كلمو بالحصل لـو تانـى لـى يعـود
وأوعة تعاتبو شان يزعل يقولـك أبيـت
وبعـد الـحـول تـعـال غاشيـنـى
برجاك فى محلى دة أنا بقيـت حييـت
وان بقة ما لقينى ابـك علـى ونـوح .
واعرف انى مت بى شوقـو واتفكيـت

[بانه]

إبراهيم بن عوف


أبكن ياعيون


الليلة أبكن ياعيون ... كتر وحيحك ياقلب
وينو الزمان يهدي الحنان ... من غير وداع راح محتجب
***
ليه يابا راحل دون وداع ... ما قلت من دنياك تعب
دايرنا نحن نعيش وراك ... كيف بي قليباً .. متخرب
ولا القدر جبرك تسيب ... ناس ليها ياما كت تحب
في الحسرة والأسي الهموم ... والعبره والدمع البكب
***
غشاشة .. يا دار الزوال ... كل النعيم الفيك كذب
كل ما تجودي الناس بخير ... يلقوه .. شرك متقلب
يادنيا ليه بتشيلي أبوي ... يادنيا حار جرح القلب
ما هسّ كان بيناتنا نور ... واليوم دريبو علي صعب
***
مابيرحم الموت يابا زول ... دايماً .. مسلط للسلب
أتام عيال .. خراب ديار ... بكاي عيوناً تنتحب
هو القدر .. هو الآجل ... هو المسطّر ومتكتب
رغم العلوم إتقدمت ... ياموت دواك ما عرفو طب
***
جاني الخبر في يوم رهيب ... في نفسي أشوفو كذب كذب
غشوني يابا وقالو لي ... راجيك أخوكي المغترب
يابا .. ما شفت العلي ... لمن عرفتك أنت غب
الكون ده شفتو عكس بعض ... حتي الشمس طلعت غرب
***
جيت للديار مافي بال ... البال وراك تب منشطب
جيت للديار وطعم الفراق ... في حلقي مرّ مراً كعب
جيت للديار ابكيك ودمع العين ... يسيل يسكب سكب
يا أبويا وآ أسفي الشديد ... ما جيت قبال .. تنترب
***
روحت ما خليت غير ... ذكري المحبين للمحب
ذكراك مقدسة في قليب ... أرضعتو حنين القلب
ذكراك رسمتها في الخيال ... بين النجوم في ليل ضهب
ذكراك دايماً في صحاي ... وعليها من النوم أشب
***
بذكرك عند الصباح ... مندلي للمزروع تقب
وبذكرك نصف النهار ... في نومه والنسام يهب
بذكرك عند المغيرب ... جاي طالع بالدرب
بذكرك في كل صلاة حتي ... الجمع حين تسمع الآذان تتب
***
الهي أبوي عندك غريب ... أغفر لو كل ذله وذنب
وارسل سحاب الرحمة يوت ... فوق قبرو يتزاحم يكب
وتأنسو بحرواً حسان ... لا تتوصف .. لا بتحسب
وأقبل \عاي قول لي أبوك .. في الجنة لا شقا لا تعب

[بانه]

إبراهيم بن عوف


زغـــرودة


زغردي يمه في البلد البعيدي .. جابو لي وليد والليلة عيدي
***
أنا الراجيهو زمناً مو قريب .. أشوفا طفولتي في وجه الرحيّب
دا ماهو الأبله الدايماً مغيّب .. عشا أماتو قنّاع أم سبيّب
***
ولداً لي أبوه يكون ضراعو .. يا سلام في روقته وأخلاقه وطباعو
يرجّع لي سنيني المني ضاعو .. كلامو اليجبر الزول لاستماعو
***
ماك الصار وشيهو ويوت مكشّر .. ومن المده كفك ما بيقصر
عشيمك تلفا في اليوم المعسر .. وتصبح وتمسي فوق خيرك تبشّر
***
إنت نسل الما بيضيمولن ولايه .. ناس الفاتحي واللوح والدوايه
خلاويهن معمره بالتلايه .. ومريضن يشفوا بي رشة محايه
***
جدودك في الفتيح راقدين سويه .. وأبوك ود موسي هوان البله
أبوك الكنّيابي أسد البنية .. وأماتك غبيشي بتد رويه
***
يجوك من أوسلي قاطعين الفيافي .. يقولوا ولدنا ما دلا وعوافي
فوق راسك يذكروا أسم الله كافي .. وجسيمك يمسحوا ويملوهوا عافي
***
تكبر أنت ياعكاز عمايا .. وراكوبة مقيل ضلي وضرايا
تخلفلك عشرتولاد صبايا .. تعيش المية مية .. ومية جايا

[بانه]

إبراهيم بن عوف


كوسيلي الخلاص


كوسي لي الخلاص من بدري في حبك ترانـي غــرق
عارف نفسـي مابلقـــــــــــاكي سـاكت فيـك متعـلق
قالوا الدنــيا يامحــــبوبة تجمـع يوم ويوم تفـرق
بس نان مالا مابتجمــــعنا والله ده ماهو متحـقـــق
صـــح ماليها أمان واللــه لي مضـيقي المشِـــــــقّ
مادالي اليمين تضحـك لي وبي إيـدا الشـمالي تعـق
هـــاك شكوايا يا محبــــوبة لو قلبك علي يــــــــرق
ديل أربـع سنين متــواري من محني وشقاي ما فق
خوفي شقايا قبل ألقــــاكي يمحق لي عميري محـق
وأجيك ساير علي الأكتـاف عزب لا حني لا جــرتق
آه من دنيــتي وأقــــدارها ينصـبـقن علي صـــبـــق
وساقة الهم تسوق في راسي تتعــــاقب بلا تتـــــــق
بس تحـريني شن سويتا غيـر زول لي عيونو عشـق
لمن اشــوف حياتي الغالية ليلا صبحو ما بشــــرق
ساعة الناس تنوم تتهـــني والعين للمنـام تســــــرق
ألقي رويحتي فوق المـــلي شقيش ما انقلب بي شـق
الله من عبرتاً ســــــــــادي وارداً للقليب بتشـــــــــق
والله من دموعـــــاً نازلي ينجــارن بلا ميرتـــــــق
دار انساكـي عــــارف قلبي للغير حــبو ما بطـلـــــق
منك لو أموت كل لحظــــــة بالريد قلبي ليك يخفـــق
ما بنساك عشان كملت صبري ولي حدودو لحـــــــق
إلا الريد تعقبو عــــــــدواة وليكي أنا من عدواتو شفق

[بانه]

إبراهيم بن عوف

شقيت يادنيا


الشقي الفي الدنيا وخاتي الدنيا فيه
خلوه اليحنس روحه كان تقبل تجيه
***
اليشوفو يحسبو زي الما .. عليه !
جوه جوفو باقي نار مطلوقه فيه
إن سكت خايف الخلوق ما يحسوا بيه
وان بسم شان يخفي حزنو الفوق وشيه
***
يجري ورا السعاده الليلي وينها سعادتو ليه
والأماني علي الرهاب دافقاه ميه
الزمن لا أداه لاقدر .... جريه
وكان حماه الجني قبلو آدم أبيه
***
الناس الفرح في عيونها لوح لي إديه
وده الهموم تابعاه ماشي علي مشيه
ساكت بي غناه طرابه في الكلمات يتيه
ما عارفنو بي أشعارو يكتب في نعيه
***
في غرايب الدنيا تضحك لو ..وتجيه
تونسو بي حديثها ..... البشتهيه
وكتين يأمنا ..... ويطرح وشيه
تحدثو بي حديث لاسمعو لا جابوه ليه
***
قدر من تاني يبني تهد بنيه
عاد تبكيه ..وتبكي الناس عليه
تفرقو في مصايبها .....تبتليه
التقول لا شافا لا شافت شبيه
***
شقيك يادنيا أوعك ترحميه
إنتي جوري .. وعذبيه وعذبيه
فرحك تاني شن بيسوي ليه ..؟!
ما دام جافاه أعز الناس لديه .
.

[بانه]

إبراهيم بن عوف


غرويدة صحاك

نومي اصحي على غرورك معاك لازال التحدي
وآي طريق يوصل لي قليبك منى سدى
ده لو كان تلقيهو صبرا يماتل صبري وتمدي
صبري عليك أنى صابر تشققي قليبي وتلحي
هيا ابعدى كل العواطف واشاورك من وين ضرورى
لاتزيدى مواجعك على لا ترجعى فرحى وسرورى
فى الحالتين راضى عنك تنصفى او كان تجورى
وسمح حكمك زى سماحتك وبرضو قسيمة الله سمحى
اوعى تغرك سماحتك سماحه الغنا يانى سيدها
سماح يبلى مع الليالىيبقى سماح القصيدة
اخلخل بيها المشاعر واتوها ازمان عديده
وفكرتها انتى وبيانها وكدى اقدرى من خاطرى زحى
او انفذى كل ما اسطتعتى مداركى ابعد من سماء كى
وجوبى اراضيكى تلقى جنونى تهاجر وراكى
اسلكى كل العوالم خيالى بيدرك مداكى
انا الكون المحتويك يا قصيده فى الجوف توحى
احبك احبك ويسعدنى حبك وقت يبقى حلوهو مرو
احبك غلبا يقطع والملمو فى الجوف واصرو
انا المجنون البيعشق مرامى الريد التضرو
قبلان بى ضررى راضى منو القال ليك ضحى
شيشك بى بشيشك اصحى صحاك ونومك بيشفق
وجيبى جفاك وازرعيهو قصاد الحن المدفق
كفاية اشوف فى عيونك تغنى الدنيا وتصفق
بعد داك نومى اطمينى ولومك فى خاطرى ممحى..