بنات الحاج

[ام اسامه]

اخي طلال عودا حميدا
هي منازعة النفس البشرية
شعوره بالتهميش هو
دافعه الداخلي لتبرير
ماسيقدم عليه
في مقبل الايام

[مسلمة وافتخر]

اخي طلال عودا حميدا
هي منازعة النفس البشرية
شعوره بالتهميش هو
دافعه الداخلي لتبرير
ماسيقدم عليه
في مقبل الايام

نفس احساسى
الله يكضب الشينة

[بانه]

المبدع طلال

اهلا بعودتك

حضوور ومتااابعه 2

[طلال الحكيم]

تم طلاقها بعد خراب سوبااااااااا ...

ربنا يكرمها بغيرو .. طبعاً كلمة ( مطلقة ) فى مجتمعنا السودانى دائماً بتكون مشكلة للبنت واسرتها حتى لو كانت هى مظلومة .. والشخص الذى طلقها هو المذنب

2

دي نتيجة الزواج الغير مدروس يا سنبلاية ... وفي العجلة الندامة

حضوووووووووووووووور

حضورك شرف .. وبهجة أكيدة

[align=center]اهلا بعودتك اخى طلال وبعودة بنات الحاج
هل اصبح يشعر الحاج ببعض الغيرة والتهميش 45
خوفى من انه ياخذ هذا التهميش الذى يشعر به من قبل بناته وزوجته سبيل ودافع الى تفكيره او اقدامه على الزواج من الانثى المفترسة ناهد
الله يجيب العواقب سليمة2 [/align][/size]

أهلا بـ ذات الشجون .. التهميش ممكن علاجه .. بس السؤال .. هل حيعرف الحاج الطريقة الصحيحة لعلاج التهميش ؟

الله يسلمك يا غالي
وشوق شوالات شوالات
وتسجيل حضور

الشوق بحر يا غالي ... وكل سنة وأنت طيب

اخي طلال عودا حميدا
هي منازعة النفس البشرية
شعوره بالتهميش هو
دافعه الداخلي لتبرير
ماسيقدم عليه
في مقبل الايام

أختي أم أسامة
كل سنة وأنت طيبة وربنا يحفظ أسامة وأهل أسامة

نفس احساسى
الله يكضب الشينة

يا ذات الشجون ويا أم اسامة ... الحاج لو عايز يتزوج عندو سبب تاني أقوى من سبب التهميش .. بس أنتو ركزو شوية

المبدع طلال

اهلا بعودتك

حضوور ومتااابعه 2

بانه المنورانا ...... كل سنة وأنت طيبة
حللتي أهلا ونزلتي سهلا

[طلال الحكيم]

* * * بداية العواصف * * *

هبت النسمات الباردة .. وتحركت أغصان الشجر في الجنينة وتساقطت بعض الأوراق اليابسة على الحاج وفوزية ..

تنهدت فوزية وقالت :

- الشتا جا يا الحاج

أجابها بفتور :

- أي خلاص جا

- الشمش لسه ما مغربت والجو بارد


- ..........

- وضل الشتا زاتو بقى كبير .. قبيل نصت نهار لما الكهربا قطعت قعدنا جوا البيت وما جينا الجنينة


- ............

- أنت مالك ؟

- مافي شي

- سمح ساكت مالك ؟


- زهجان

- من شنو ؟


- يعني حيكون من شنو .. من الحالة دي طبعا

- حالة شنو يا الحاج .. قول بسم الله


- يعني بعد ما قلنا خلاص ميادة ربنا سهل ليها وعرست .. ترجع لينا تاني بالمصيبة دي

- دا ما كلو منك أنت .. أستعجلت كأنك ما صدقتا


- أسمعي هوي يا مرا ... أنا موش جيت شاورتك أنت وميادة ... أنا شاورتك أنت بالزات عشان عارف كلامك ده وعارفك دايما بتختي في رأسي أي مصيبة تحصل في البيت ده

- بس على الأقل كان تسأل من العريس


- طيب أنت كلامك ده كان وين في اليوم داك ؟ كنتي غمرانة ؟ موش قلتي لي أمشي أعقدو البت ساكتة عشان خجلانة ؟

- ..............


- بس أي مصيبة أنا سببها .. موش كده ؟

- ياخي هسه الكلام ده فايدتو شنو ؟


- ما براك سألتيني وقلتي لي مالك ساكت .. أها ياهو ده كلامي ال ما بعجبك

- هسه ما حصل شي ... بكرة بعرسوها تاني .. تعرس سيد سيدو


- أنت بتضحكي على منو يا مرا ؟ ما شفتي شكلها بقى كيف ؟ بقت ضعيفة زي العصاية وعيونا دايما محمرة .. والله بقت تذكرني جبارة

- جبارة منو يا راجل .. كلامك زي السم


- خلاص خليني ساكت

- آي اسكت عليك الله


حل الصمت لبرهة من الزمن فقطعته قائلة

- هن البنات أصلهن بختهن ما واحد ... أريت بختها كان زي بخت مي

فقال بتهكم وتريقة

- ومي عرسوها من ورانا ولأشنو ؟

نظرت إليه بحدة

- أقعد أعمل لي فيها ما عارف كده

- عارف شنو ؟


- موش أنا زمان قلت ليك عبد الله عينو عليها ؟

- والأستاذ عبد الله ده شغال شنو إن شاء الله ؟

سكتت وبدأت تتعجب من كلماته فواصل حديثه الساخر

- الأستاذ عبد الله ده وارث من أبوه أراضي ودكاكين .. ولأ هو عندو شركات وعمارات ...؟

- يا الحاج

هب واقفا يتفصد غضبا ويقول بإنفعال

- بلا الحاج بلا زفت .. منو عبد الله ده العاملين ليهو قومة وقعدة ؟ ولد عاطل ما لاقي شغلة عايزاني أديهو بتي كده ساكت في سبيل الله ؟ خليهو يعرف ياكل أول .. أفرضي أديتو بتي وقلنا ما مشكلة إن شاء الله ياكلو كسرة بموية .. طيب حيسكنو وين ؟ هنا معانا وسط بناتك ولأ هناك في بيتهم مع أبوه السكران ديمة ... أنا ما عايز كلام في الموضوع ده تاني وكفاية علينا ميادة والبشتنة الحصلت ليها .. كمان تلحقها مي .. أكيد الدور بجي على منى ويضيعو بناتي مني واحدة ورا التانية

- بس ده ما كان رأيك في عبد الله من زمان ... مالك إنقلبت عليهو كده ؟


- هسه بقى رأيي فيهو كده ... عبد الله ده ترسليهو الدكان ولأ السوق وخلاص ... بس تديهو بتك تبقي غلطانة وستين غلطانة

- القروش بتجي أهم شي الزول يكون كويس


- بتجي في الأحلام ... طيب لما تجيهو القروش بعدين خليهو يجيني ...

- أنت أصبر عليه شــويـ


- أنا ما عايز كلام في الموضوع ده تاني ...... وخلي بتك مي تحترم نفسها وتبطل الحركات الفارغة البتعمل فيها دي ..... أنتو قايلني راجل طرطور وما فاهم شي .. أوعا أشوفها تاني تجي تقعد مكان هو قاعد .. وأنا زاتي حــ أقطع كراعو من البيت ده .. بلاش كلام فارغ معاك أنت وبناتك



ثم خرج من البيت .. وصفع الباب صفعة قوية ... تساقطت منها وريقات يابسات .. وأهتز لها قلب فوزية وخفق بالخوف خفقات .

[السنبلاية]

تحياتى بقدر مقام بنات الحاج ....
والشـــــتاء جانا ....2

وبنات الحاج عليهن الذهاب الى السوق
من اجل شراء الكريمات ( اللوشـــن ) 45

[مرسال الشوق]

المبدع الحاج .... منورنا في بنات الحاج

[ام اسامه]

ما اصعب مواقف الاهل
حين الوقوف في وجه المشاعر
لاجل الخوف من الارزاق
حينها تتحول القلوب الي رماد
مودتي"

[ام صبا]

طلال منور وحمدلله على السلامه

[طلال الحكيم]

الغالين .. السنبلاية , مرسال الشوق , أم أسامة , أم صبا

منوريني جدا
وما عدمناكم

[طلال الحكيم]

* * * وللجمال سطوة * * *

توالت الأيام ..
والحب في قلب مي ينمو ويكبر ... وكلما زاد حبها كلما زاد القلق في عيني فوزية بعد أن سمعت ما سمعت من الحاج في ذاك اليوم

كانت تشعر بأن الأيام المقبلة تحمل في طياتها أحداثا موجعة وعنيفة ..
تغيرت شخصية الحاج كثيرا ..
فأضحى شارد البال متذمرا على أي حال ..
يغضب لأتفه الأشياء وكلما غضب فتح الباب وخرج ..
باتت تتجنب مناقشته .. خوفا من تعكير الأجواء أكثر مما هي عليه ..
فـ طلاق ميادة كان كافيا لتعكير البيت لسنوات قادمات ..

طرقت ميادة باب غرفة مي ومنى ثم دخلت

- مي عندك رصيد ؟

- ما كتير .. عايزة تتصلي وين ؟

- جيبي بس موبايلك مالك جبارة كده ؟

خطفت التلفون من يدها وجلست بجوارها .. ثم ضغطت على الأزرار

- ألو ... عمتو السلام عليكم .. كيف حالك إن شاء الله كويسة ؟ الحمد لله .. قلت ليك عبد الله موجود .. طيب أديني ليهو لو سمحتي ..
نظرت إليها مي بدهشة وخفق قلبها عندما سمعت إسم عبد الله فأعتدلت في جلستها

- ألو عبد الله كيفك .. آي ميادة معاك ..أخبارك شنو ؟ أنت كويس ؟ الحمد لله ... والله تمام الحمد لله كلنا كويسين ... ليك كم يوم ما جيتنا إن شاء الله خير ؟ ...... بالله نزلت الشغل الجديد ؟ والله خبر كويس .. بالتوفيق إن شاء الله ... والله بس كنت عايزة أكلف عليك شوية .. معليش حـ أتعبك معاي ... عارفاك ما بتقصر والله .. عندي صاحباتي مفروض أقابلهم في مكتبة الجامعة عشان أشيل منهم شوية كتب كده ... بس والله ما عندي نفس أطلع من البيت ولا أقابل أي زول ... كنت عايزاك تقابلهم قدام الجامعة وتاخد منهم الكتب لو ممكن يعني ؟ ...... كتر خيرك .. بعدين المسا لو قدرت تجينا في البيت يكون كويس عشان أديك رقم تلفون واحدة منهم عشان تتواصل معاها .. بعدين المسا في أي وقت .. يعني ممكن زي الساعــ

ثم سمعت صفارة تعلن بنفاذ الرصيد .. فألتفت إلي مي وقالت بمنتهى البراءة والبرود ..

- رصيدك خلص

رمت الموبايل في حجرها ثم قامت منها تتبعها نظرات مي الواجمة

ماذا حدث في الدنيا ؟

وماذا حدث لميادة ؟ وما هذه اللهجة الجديدة التي طرأت عليها ..؟

منذ متى كانت تعرف التحدث بهذه الكيفية ؟

من المؤكد أن طلاقها أصابها بالجنون

لم تعهدها تتحدث مع أحد بهذه الرقة مطلقا ..
هي لم تهنأ بالخروج من مأزق منى .. أتقع في فخ ميادة ؟

ميادة العسكري ؟ يا للعجب

ماذا تريد النساء من عبد الله ؟
ألا يوجد رجل آخر في الدنيا غير عبد الله ؟

ثم تقول بكل براءة (رصيدك خلص )
لعنة الله على الرصيد .. ولعنة الله تغشى الذي صنع الموبايل .


*******************



توترت العلاقة بين الحاج وكمال .. وكان ما حدث لميادة هو السبب بلا شك
ولكن كمال كان يسعى بكل ما وسع من قوة لإرجاع العلاقة إلى سابق عهدها

باءت كل محاولاته بالفشل أمام صدود الحاج وعزوفه عن الكلام إلا في مجال العمل وحسب

إلى أن أتى ذاك اليوم الذي كان مشغولا فيه في مكتبه غارقا بين أوراقه ..

طرق الباب ... ودخل سكرتيره يخبره بقدوم امرأة تود مقابلته .. فأذن لها

فكانت ناهد ..
دخلت تتهادي في مشيتها في مكتبه الفسيح .. وتتراقص البسمات في شفتيها وعينيها ..

وقف من هول المفاجأة ولا يعرف كيف حملته قدماه .. ويحمد الله أن طاولة المكتب قد سترت إرتعاشهما

مدت يدها الغضة تسبقها رائحة عطر نسائي قوي

- سلام .. قلنا نسأل حتى لو ما سألتو

تنحنح .. ومد يده بإرتباك واضح

- أهلا يا ناهد .. شنو المفاجأة دي .. إتفضلي .. أتفضلي

وأشار إلى الكرسي الوثير فجلست عليه

- يا سيدي أتمنى تكون مفاجأة سارة

- طبعا طبعا .. سارة من غير شك

- تسلم

- تشربي شنو ؟

ضحكت بدلال

- طوالي كده ؟ ما تخليني آخد نفس .. شكلك عايز توزعني قوام قوم

- لا أبدا .. معقول الكلام ده ؟

- طيب يا سيدي أشرب عصير لو ممكن

- جدا ..

نادى على صبي المكتب وطلب منه عصير برتقال ..

ثم قام وخرج من المكتب قليلا ... كان بحاجة لضبط نفسه إثر هذا الهجوم العجيب

مسح وجهه بالمنديل وجفف العرق .. وأخذ أنفاس عميقة ثم دخل إلى مكتبه حيث الإثارة كامنة في أحد الكراسي

جلس قبالتها وجها لوجه ... ثم نظر إليها وهي متظاهرة بقراءة أحدى الأوراق التي فوق المكتب

كانت تلبس ثوبا بني اللون مطرز بألوان ذهبية .. تمازج لونه مع لون بشرتها بصورة بديعة
وضعت حول عنقها عقد رفيع من الماس مع أقراط ماسية طويلة تدلت من أذنيها

قدم لها صبي المكتب عصير البرتقال بأدب ..

فأخذت الكأس ترشف منه رشفات بطيئة .. وهي تنظر إلى الحاج وتبتسم بدهاء

كانت نظراتها تكاد تنطق وتقول له أنها تعرفه فيما يفكر .. وأن ينظر ..

تصرفاتها البسيطة والتلقائية والجريئة كانت هي السر الذي يجذبه إليها..
هذا السر الذي بحث عنه ولم يجده ..

ثم يأتي جمالها ليدمر كل جيوش المقاومة التي تنشأ للحظات في داخله ..
ماذا تريد منه هذه المرأة ؟
ألا يكفي ما سببته له في مصر ؟

كان الحاج ذكيا .. وذكائه يخبره أنه سيخسر أي معركة مع هذه الأنثى ذات الفم الممتلئ والجالسة أمامه الآن ..

- شنو يا سيدي ..... سرحان وين ؟ الظاهر جيت في وقت ما مناسب

- بالعكس يا ناهد ... أنت تشرفي في أي وقت ..

- عاين .. ما عايزة آخد من وقتك كتير .. ببساطة كمال حكى لي عن كل شي .. وعن علاقتكم المتوترة بسبب العريس والمشاكل الحصلت .. بس أنا بأكد ليك إنو كمال إتغشى في العريس زيك بالظبط

- بس الحاجة دي كلفتنا كتير ... هسه بتي أتحسبت عليها زواجة وبقت مطلقة ..

- طيب المشكلة شنو ؟

- كيف المشكلة شنو ؟ أنت ما عارفة حياة المطلقات كيف ؟

- عارفاها طبعا ... أنت نسيت أنا كمان مطلقة ولأشنو ؟

أحس بالحرج قليلا فقد كان ناسيا فعلا أنها مطلقة

- لا ما ناسي طبعا .. بس هي أكيد حياة صعبة زي ما عارفة

- طبعا صعبة .. بس بتك لسه صغيرة وبكرة ربنا يعوضها

- إن شاء الله

- المهم إنت ترجع لينا زي الأول .. أحلف ليك كمال كان مغشوش زيك

تنهد وأطلق زفرة حارة ثم قال

- حصل خير .. حصل خير يا ناهد

- حصل خير كيف بعد النفس الحار ده .. أنا مخصوص جيت الليلة عشان أراضيك

- وجيتك دي غالية علي

- أنا وعدت كمال وقلت ليهو أنا حـ أحل المشكلة دي .. خلاص أعتبرها إتحلت و لأ حـ تكسفني ؟

- لا خلاص إتحلت ..

قالت وهي ترفع حاجبيها وتنظر بطرف عينيها نظرات مربكة

- أكيد ؟

كح من فرط الإتباك .. فتلاعُب الحواجب لعب بأنفاسه

- .. أكيد طبعا ..

- خلاص الليلة تجي تتعشى معانا عشان نفرح بالصلح

- عشا ؟ لا مافي طريقة

- ليه ؟

- ما ليه لزوم وغير كده الواحد برجع تعبان والله من الشغل

- ياخي ما بنتعبك .. كلها نص ساعة .. ولأ بتكون مشتاق لأم العيال يعني ؟

هرب من مباغتتها هذه وتركها تبتسم لهروبه إبتسامة ذات معنى ..

- لا بس ما متعود على العشا بره البيت وكده

- يا سيدي يوم واحد ما بعمل ليك شي

- طيب خليها مرة تانية

- لا .. اليوم

- والله ما عارف أقول ليك شنو؟


قالت هامسة

- قول لي (بجي)

يا لسطوة النساء حينما يستخدمن سلاح ضعفهن وسلطان جمالهن ..
لا يوجد على وجه الأرض شيء أخطر على الرجل من امرأة جميلة ذكية ..
فهي تعرف كيف تنسف عناد الرجل وتحيل جبال صدوده إلى هباء منثور .. و كثبان رملية تنفثها بهمسة واحدة
نظر إليها مليا .. وإلى تلك اللمعات المتلألئة فوق خديها بفعل البسمات
وجد في عينيها إنتظار وترقب وثقة بما سينطق به فمه ..
تاهت نظراته في نظراتها .. وجالت في وجهها ثم إستقرت حول فمها الممتلئ

أطرق منهزما .. وقال

- بجي .

[معتبر]

قالت هامسة

- قول لي (بجي)

يا لسطوة النساء حينما يستخدمن سلاح ضعفهن وسلطان جمالهن ..
لا يوجد على وجه الأرض شيء أخطر على الرجل من امرأة جميلة ذكية ..
فهي تعرف كيف تنسف عناد الرجل وتحيل جبال صدوده إلى هباء منثور .. و كثبان رملية تنفثها بهمسة واحدة
نظر إليها مليا .. وإلى تلك اللمعات المتلألئة فوق خديها بفعل البسمات
وجد في عينيها إنتظار وترقب وثقة بما سينطق به فمه ..
تاهت نظراته في نظراتها .. وجالت في وجهها ثم إستقرت حول فمها الممتلئ

أطرق منهزما .. وقال

- بجي .


سلاح فتاك

طلال تحياتي

[مسلمة وافتخر]

يا لسطوة النساء حينما يستخدمن سلاح ضعفهن وسلطان جمالهن ..
لا يوجد على وجه الأرض شيء أخطر على الرجل من امرأة جميلة ذكية ..
فهي تعرف كيف تنسف عناد الرجل وتحيل جبال صدوده إلى هباء منثور .. و كثبان رملية تنفثها بهمسة واحدة

جمال المراة وذكاءها هذا هو الخليط المتفجر
واما اذا اضفنا لهذا الخليط دهاء الانثى المفترسة ناهد فحتما سنشهد العاب نارية من العيار التقيل

[ام اسامه]

يالسطوة النساء حينما يستخدمن سلاح ضعفهن
وسلطان جمالهن
لايوجد علي سطح الارض اخطر علي
الرجل من امراه جميله ذكيه
ويالسطوة تعابير الكلام عندك يا اديب
تاخذنا الي براحات نجيب محفوظ والطيب صالح
دام بريق يراعك
انحني اجلالا

[معتبر]

قالت هامسة

- قول لي (بجي)

يا لسطوة النساء حينما يستخدمن سلاح ضعفهن وسلطان جمالهن ..
لا يوجد على وجه الأرض شيء أخطر على الرجل من امرأة جميلة ذكية ..
فهي تعرف كيف تنسف عناد الرجل وتحيل جبال صدوده إلى هباء منثور .. و كثبان رملية تنفثها بهمسة واحدة
نظر إليها مليا .. وإلى تلك اللمعات المتلألئة فوق خديها بفعل البسمات
وجد في عينيها إنتظار وترقب وثقة بما سينطق به فمه ..
تاهت نظراته في نظراتها .. وجالت في وجهها ثم إستقرت حول فمها الممتلئ

أطرق منهزما .. وقال

- بجي .


سلاح فتاك

طلال تحياتي

سنبلاية ماهو سبب تعديل مداخلتي دي

عفواً طلال

[بانه]

طلال سرد ف قمه الابداع والتميز

واصل يا اديب

حضور ومتابعه 2

[السنبلاية]

سنبلاية ماهو سبب تعديل مداخلتي دي

عفواً طلال

حزفت الرابط بتاع المشاركة الخاص بالتنسيق .. عشان هو منتهى و عمل على تشويه مشاركتك ..

ملحوظة

اردت ان تكون مشاركتك مظبوطة .. فقط ,, مع العلم أن لا يوجد هنالك اى خطأ أملائى ولا فى التعير

فقط تمت ازالت الروابط المنتهية خاصة بالتنسيق الخط ..!!

شفتا كيف

تحيااااتى 2

[السنبلاية]

وين باقى قصة بنات الحاج ... 2

[مسلمة وافتخر]

وين باقى قصة بنات الحاج ... 2

ونحن كمان منتظرين بنات الحاج
وينك طلال

[مسلمة وافتخر]

السنبلاية رايك شنو فى الانثى المفترسة ناهد