تجنس السودانيين في بلاد الغربة والمهجر

[M.Hadad]

عذرا ولكني لا اري مانع من حصول السوداني علي جنسيه اخري وذلك للفائده شرطاً ان لا يتنازل عن جنسيته السودانيه فنحن نفتخر باننا سودانيين

وتذكروا لكل قاعده شواذ

[فنونة]

ياااااااااااااااااااااا ود العم timbirlly
على قولة قايل لافظ فوك :D
كلامك كلام العقل,,,,,,,,,,ووأنا معاك مية المية
(من جانب آخر: نظرة السودانين بتكون احتقار, امتهان وعدم تقدير واحترام
وبيعتبروا الوطنية عندك منعدة وانك اتجردت من وطنك وطنيتك
لو اظفت لي رصيد جوازك السوداني,,,,,,,,,,جواز آخر)

بس في كلامك وسطية عادلة,,,,المفروض تنتشر في فكر
السودانين



كلمة أخيرة:
أنــــــــــــــــا سوداني وبحب السودان مهما كان,,,مهما حصل
ده شعارنا وللابد حيكون,,,بغض النظر عن البيحكوه عننا كمغتربين

[أبو ياسر البطحاني]

أنا يا أخوان ... ضيف جديد عليكم في المنتدى ..
واتمنى أن نستفيد ونفيد ...
بصراحة ...أبدي إعجابي ... بهذا الموضوع .. الشامخ ..
فعلا ...
الاسم سوداني ... الاسم دا ما هين ... ناس ماتوا عشانو ..
وعشان يبقى اسمو سوداني ..مهما كان الوطن هو الانسان والإنسان هو الوطن
وللأوطان في دم كل حر
يد سلفت ودين مستحق ..
بصراحة أوافق جميع من مر على الموضوع بالرضا بتعدد الجنسيات
لا بنزع الجنسية السودانية ...
و اشكر الاخ السني مع الاخ هتان ... على النقاش اللي تعلمنا منو حقيقة....
واكرر ... لا قيمة للمرء بلا وطن ...

وللاخ السني ... مني التحية على الموضوع الأكثر من رائع ....

[saare]

والله التجنيس حلال بعد ما الشفتو في بلدي

[ام الانبياء]

تحياتي اخي دوما..طرحك رائع..وموضوع جدير بالاهتمام..
أوافق جميع من مر على الموضوع بالرضا بتعدد الجنسيات
لا بنزع الجنسية السودانية ..

وإن كنت اري ان لا يكون الاغتراب هدفا للحصول علي الجنسيه..
لو جنسيتك ما نفعتك..جنسيت الغير مابتحل مشاكلك..ومعظم مشكلنا إقتصاديه..
لو حققننا75%.بس نرجع وما ننتظر جوازهم.الا اذا استحقيتهم اثناء فتره وجودي..ودون التنازل عن جوازي السوداني

[النيل الازرق]

الاخ القدير : السنــــــــــــــــــى

لك جزيل الشكر اخى على طرحك لهذه الظاهرة التى بدات باستبدال الجنسية السودانية

بجنسية اجنبية او عربية وفى الحقيقة انا اعرف بعض من هؤلاء وقد احتفظ بجنسيته السودانية

وعندما سالته عن سبب نيله للجنسية الاخرى لى جنسية البلد المقيم فيها قال لى انها لاهداف ومصالح شخصية ومتى مااحقق هذه الاهداف والمصالح سوف اعود للوطن بجنسيتى السودانية .

واما الذى استبدل جنسيته حبا فى وطنه الجديد فهذا بالتاكيد ليس سودانيا اصيل وانما حامل الجنسية السودانية فقط .

[ahmed1994]

السلام عليكم ورحمة الله وبركاته

مشكور على الطرح العم السني وفعلا هو موضوع مهم قبل أن يكون حساس

رأيي أن ما حتفرق إذا كنت حامل جنسية غير جنسية بلدك طالما انت متمسك بوطنيتك
فمثلا انا وعائلتي كلنا عندنا الجنسية الألمانية ودا ما بأثر على شخصيتك أو انتمائك
إلا في حالة الجنسية الإسرائيلية فالوضع بختلف شوية

أما عن فائدة الجنسية الأجنبية سواء كانت عربية أو آوروبية فهي قطع شك مفيدة
وطننا نعزو ونقدرو ولكن غيرننا لا يفعل ذلك أولا لأنه بلد مسلم وثانيا بلد عربي وثالثا معادي لأمريكا
أما أن نقنع نفسنا بعدم أهمية أو حتى فرق حمل جنسية أخرى فهذا أمر لا جدوى منه وبعيد عن الواقع

لو جنسيتك ما نفعتك..جنسيت الغير مابتحل مشاكلك

مع احترامي لكن الحالة دي ما بتنطبق دايما ، فمثلا لو كنت في جامعة في اليابان مثلا
وواحد جنسيته آوروبية والتاني عربية فبالطبع الموضوع دا حيشكل فرق
طيب لو قلنا أنو دا فرق غير ملموس بشكل واقعي لو عايز تسافر لي أي دولة آوروبية أو أمريكية
فطبعا لمن يكون عندك جواز آوروبي الإجراءات حتكون أسهل بكثير دا إذا كان في إجراءات أصلا
أما يكون عندك جواز عربي ... تلتلة مباالغة

وتقبلو مروري

[شايقية و افتخر]

بالجد انا لاحظت هنا في بلاد الامارات ان كل السودانين دايرين يجنسوا و كل وحدي او واحد يقول انا مجنس يقولولاه حظك بالعكس الحاجة دي ما حلوة خالص انو تخلي بلدك اشان بلد تانية ما اظن انو كرامتك بتسمح ليك لكن نقول شنو سبحان الله و يعني اتمنى انو ما يزيد عدد المتجنسين و صراحة انا بفتخر اني سودانية و ما حاتخلى عن بلدي لبلاد تانية لانو دة حايكون في مصلحتهم و موضوعك حلو شديد لانو الناس ديل دايرين توعية بالجد مع تحيات شايقية و افتخر

[sunni]

أعزائي

ترددت كتير قبل ما أكتب الموضوع ده، لحاسايته وبالنسبة لي أنا شخصياً، حيث اني أكتب في محفل عام متوفر للكل. وقد يقرأ الموضوع أحد الذين أعنيهم بالموضوع، لكن ضيقي كان أكبر من ان الجم كبح لساني.
فمعروف عن السودانيين (والحمد لله) عزتهم بنفسهم، سمن جيبهم أو خوى، ومعروف تعففهم وترفعهم عن كل ما يقلل من قيمتهم أو يكون فيه أدنى درجات الإذلال والخضوع.
موضوعي هنا هو تجنس السوداني بالجنسيات الأخرى، ولا أقصد في كلامي الجنسيات اللي يسمح قانون بلدها بالتعدد في الجنسية،، ولكن هناك دول لا يسمح قانونها بأن تحمل جنسيتين، فإذا (إستوفيت الشروط) وتقدمت لنيل جنسيتهم، فعليك (بعد أن يوافقوا) أن توافق بدورك عن التخلي عن جنسيتك طائعا غير مكره. والغريب في الأمر ان هنالك قوانين في بلاد لا تسمح لحامل الجنسية بالتجنس أن يترشح، أو يرشح. ولا نعيب عليهم ذلك، بل الكل حر في بلده،،، ولكن،،، ومع كل هذا، في الفترة الأخيرة، ظهرت صفوف من السودانيين ينتظرون المن عليهم بالجنسية البديلة، ويوقعون طائعين أن يتخلوا عن جذورهم.


هل هانت الجنسية السودانية لهاذا الحد؟؟؟؟؟
هل يستحق بلدنا ما آل إليه من هوان؟؟؟؟

وا سوداناااااااااااااه

با شباب،، لاحظو الجزء الأنا حددته ليكم بالأحمر،، أساسا الموضوع انا طارحه عن من (يتنازل) عن جنسيته السودانية مقابل نيل جنسية أخرى،، فما أعتقد ان هناك غضاضة في حمل جنسية أخرى بالتجنس بجوار الجنسية التي تجري في دمك بحكم الأصل والعرق

[M.Hadad]

الحقيقه اندفعنا في الكلام من شده الزعل ومن ما قريت الموضوع والجه دي مزعلاني للان

كيف الواحد يتنكر لي وطنو؟؟؟؟؟

الوطن الجاد عليو بكل حاجه ووصلو للهو فيهو الان؟

ليك حق تزعل لكن بصراحه احسن حاجه عملوها انهم اتنازلو عن جنسيتهم السودانيه
لانهم ما بيستاهلوها وحيكونو بالنسبه للسودانيين تمامه عدد بس

والغريب انو كل من يتجنس ومهما طال الزمن بيتعامل كمواطن درجه تانيه

هم ما انتبهو لي دي؟؟

مع اعتذاري الشديد للكل بس دي انا بعتبرها خيانه للوطن

[محمد الخال]

السلام عليكم و رمضان كريم

افتكر ان الموضوع ليس بالسهوله التي نتحدث عنها

تخيلوا السيناريو التالي

1- طالب تخرج بتفوق من الجامعه
2-طرق سبل العيش في السودان (تقديم-معاينات-تقصي الاعلانات................)
3-فرص العمل تعطي لاصحاب الواسطات و الانتماء الحزبي
4-ظروف البيت صعبه. الام عاوزه علاجز الاخوان الصغار عاوزيين مصارييف.................
5-العطله تحاصره من كل جانب
6-جاء الفرج من الله بوجود فرصة هجره
7-الان يمكنه مساعده اهله والاخوان و فرصه للهروب من الاحباط والاكتئاب
8-يجب عليه التضحيه بالجنسيه

اعتقد ان حق البحث عن الرزق في جميع انحاء الارض هو حق انزله الله في كتابه الكريم. ما لم يطلب منه ترك دينه وهو في اعتقادي الاساس. حب الوطن لا يقاس بالجنسيات و انما بالتضحيات التي يقدمها الانسان من اجل ان يقدم شيء لاسرته الصغيره ومن ثم لوطنه الاكبر.

هذا نموزج من الواقع. لا يزال هذا الشخص يقدم للسودان اكثر من اعضاء في الحكومه(ياخذون اكثر مما يعطون)

ارجو ان اكون قد قدمت وجه نظر واضحه

نحن في السودان نهوي اوطانا وين رحلنا بعيد نطري خلالنا

[sunni]

السلام عليكم و رمضان كريم

افتكر ان الموضوع ليس بالسهوله التي نتحدث عنها

تخيلوا السيناريو التالي

1- طالب تخرج بتفوق من الجامعه
2-طرق سبل العيش في السودان (تقديم-معاينات-تقصي الاعلانات................)
3-فرص العمل تعطي لاصحاب الواسطات و الانتماء الحزبي
4-ظروف البيت صعبه. الام عاوزه علاجز الاخوان الصغار عاوزيين مصارييف.................
5-العطله تحاصره من كل جانب
6-جاء الفرج من الله بوجود فرصة هجره
7-الان يمكنه مساعده اهله والاخوان و فرصه للهروب من الاحباط والاكتئاب
8-يجب عليه التضحيه بالجنسيه

اعتقد ان حق البحث عن الرزق في جميع انحاء الارض هو حق انزله الله في كتابه الكريم. ما لم يطلب منه ترك دينه وهو في اعتقادي الاساس. حب الوطن لا يقاس بالجنسيات و انما بالتضحيات التي يقدمها الانسان من اجل ان يقدم شيء لاسرته الصغيره ومن ثم لوطنه الاكبر.

هذا نموزج من الواقع. لا يزال هذا الشخص يقدم للسودان اكثر من اعضاء في الحكومه(ياخذون اكثر مما يعطون)

ارجو ان اكون قد قدمت وجه نظر واضحه

نحن في السودان نهوي اوطانا وين رحلنا بعيد نطري خلالنا

عزيزي محمد الخال،،
حتى ما يكون عرضك خارج الحلبة، خليني أنبهك لعنوان الموضوعن وهو (تجنس السودانيين في بلاد الغربة والمهجر)، وليس السفر والعمل في بلاد الغربة والمهجر، وقد حصرت كلامي في تغيير الجنسية مع التخلي عن الجنسية السودانية.

أرجو ان أكون قد وضحت الرؤية

[حبوبة]

سلام آ ناس
السني اخوي عوافي عليك واريتو حالك زينِ

بادئ ذي بدء سودانية وبفتخر (علي شنو ده موضوع تاني خلو ورا)
و بعد
السودنة يا حباني حاجة في الوريد جارية فينا مجرى الدم لا وريقة بتثبتا لا عدمها بيزيلا الجنسية هي شهادة مسجلة في الدولة للتقنين وتسهيل الإجراءات الرسمية .
أما كينونتك كسوداني مافي واحد يقدر يغيرها .... ولا حتى انت نفسك .... ما انت خلاص اتربيت وكبرت واتشربت بأفكار وموروثات وتقاليد بقت راسخة جواك صعب انك تمحيها ولو حاولت.

المشير الزبير ( طيب الله ثراه ) سئل من أحد السودانيين عن التجنس وموقف السودان في الجنسية البديلة قال ليه انت حل امورك وسوي الفيه منفعتك وكت تجينا ما بننكرك.
لأنو طالت والا قصرت (مصيرو يرجع تاني لي أهلو وترابو ينسى آلامو وشجونو ينسى حرمانو وعذابو) لأنو صدقني بجنسية والا بدون الغربة نااااااار والحمدلله.والجنسية بتفرق ..... أي نعم انت ما مواطن درجة اولى لكن حقوقك كاملة ولو فيك فايدة بتنفع ناسك وبلدك
هتان ولدي ده هجمتو بلعتو لسانو ساكت لكن الحق يقال كان عندو حق مافي مواطن ممتهن زي المواطن السوداني داخل الوطن وخارجه لأنو الوطن الما علا شانك جوة ما بعليهو برة ..... وماتفهموني غلط
السودان الجواهو بقولو وووب والبراهو بيكوركو ووووبين(أعذروا اللغة). تنطبق عليهو المقولة لابدورك لابحمل بلاك.الابن أحمد الأخت ياسمين و محمد الخال كلامكم في الصميم يديكم العافية..... وينك يا ابوصلاح ماتهرش وخش المعمعة بقلب جامد في انتظارك.....

أستاذنا السني ...... انا دخلت توش لأنو موضوعك كالعادة رهيييييب ..... لكن انا ما معاك على غير العادة :D

[sunni]

العزيز شمس الهداية

أولا أحييك على طرحك الجميل، وإن إختلفت معاك،، فإختلاف الرأي لا يفسد للود قضية،،، وبسبب إختلاف الرأي ومافاهيمه،،، وما ممكن ان نسوق من فوائد إختلاف الرأي،، انا برفض فكرة (تبديل) الجنسية السودانية.

السودان عزيزي لو انا وإنت ومحمد أحمد أدوه ضهرم،، منو البقول فيه كلمة حق؟ حتى وإن كان لينا من الأسباب ما ينوء عن حمله الجبال وليس قلوب الرجال.

لكل من يؤيد بأن الجنسية البديلة هي المخرج وإن كان مؤقت لحياة كريمة،، حتى وإن إستشهد بقول المولى عز وجل (الم تكن أرض الله واسعة)،، وهو ما قاله لي أحد الإخوة في نقاش عام (مش في البوست ده يعني)،، فنحن في السودان يمكن أن نكون مقهورين إقتصاديا، أو سياسياً،، ولكن لايوجد قهر ديني، وإن إدعى البعض. لهؤلاء أقول،، تعالوا نقارن بأخواننا الفلسطينيين،، أكثر المقهورين في هذا العصر الحاضر (نصر الله غزة وأهل غزة)،، فلم غزة؟؟ لأنها فقط قاومت،، ونسى الناس في الوقت الحاضر فلسطينيي 1948، مع العلم بأن العديد منهم (أجبر) ولم يكن له الخيار في ترك بلده والتجنس،، فأي تختارون؟؟ أن تكونوا مثل فلسطينيي 48؟ أن فلسطينيي المهجر من ترك بلده لليهود؟ أم أهل الضفة ومهادنة قيادتهم لليهود؟ أم مواجهة الوضع مع كل ما فيه من جدل، وليضع كل منا قطرة ماء على الدلو، وللتفاعل وتختلط المياه الصالحة مع الطالحة،، ففي النهاية لن يغلب إلا السواد الأعظم،، فهل نترك الساحة لحملة المياه الطالحة حتى يمتلئء دلونا بالمياه الطالح؟؟ أم نقاتل على وضع ما نحملة من ماء (ولو كان قطرة) في هذا الإناء لزيادة نسبة ما نؤمن بأنه الماء الصالح؟ ومن يستهين بما أقوله،، فليرجع للتارخ،، وليتذكر أن (ما المياه والمحيطات إلا نقط ماء جمعت لبعضها البعض)
طلعنا كتير من موضوعنا،، بس يديكم العافية برضو على الإثراء

[الشوش]

السلام عليكم ورحمة الله وبركاته
تحيه لآخ السني.
كم تمنيت ان يكون مع هذا الموضوع إستفتآ عن سبب هذه الظاهره?
الجواب هو آصبح آن آهل السودان يتعرضون للإهانه من بعضهم البعض
لهذا ذهب الكثير يبحثون عن جنسيات اخرى تضمن لهم العيش الكريم في دول آخرى
وقد ذكر بعض آلآخوه المشاركين انواع مختلفه من تلك الآهانات.
بارك الله فيكم.

[sunni]

عزيزي الشوش،،
هل الإهانات المذكورة،، من (سودانيين) أم من (السودان) ؟
وليه نترك جنسيتنا لأشخاص لا يتميزوا عننا سوى انه (في الوقت الحاضر) قد يكون القلم في يدهم؟
كيف سينشأ أولادكم بعدين؟
هل يستحق السودان من المتجنسين كل هذا العقوق؟

[أبو عمر]

الأخوة الأعزاء ... السلام عليكم ورحمة الله وبركاته .
مجرد قراءة الموضوع فقط .. وفكرة التخلي عن الجنسية السودانية فقط جعل عيوني تمتلئ بالدموع .. فكيف لو وقعت وحلفت على إبدال الجنسية بأخرى .. أعتقد أنني ممكن أروح فيها في نفس اللحظة.
ياجماعة دا كلام شنو .. التخلي عن الجنسية السودانية يعني التخلي عن دماءك وعرضك وشرفك .. وزي ما تنازلت عن وطنك بتلك المشاعر .. ممكن تتنازل عن أمك وأبوك بنفس المشاعر وزي ما بعت بلدك بذات القيمة ممكن عادي تبيع أخواتك وأهلك بنفس القيمة ..
حرااااااااااااااااااااااااام والله العظيم يكون في سوداني بهذا الفهم وهذه القسوة .. وبهذه الرداءة من الأخلاق.
لو المصلحة أجبرتني على أخذ جنسية أخرى مع الإحتفاظ بجنسية بلدي دي ما فيها مشكلة وعااااااااادي يكون عندك جنسية واثنين مع وجود جنسيتك الأصلية والتي لا بديل ولا غنى عنها مهما قسى علي السودان ومهما جوعني وحرقني بظلمه فلن أتركك ياسودان.
أما أن اتنازل عن السودان من أجل حفنة من المال ومن أجل نعيم فاااااااني فيه راحة بالٍ مقلّدة .. فلا وألف لا وطز في اي جنسية تمنح لي بعدم وجود الجنسية السودانية ..
أنا سوداني .. سودااااااااااااااااني .. وسودانيتي في دمي تجري في عروقي أحسها في مشاعري وأعصابي استنشقها في نفسي وأشمها في زفيري .. مستحيل أتنازل عنك يا بلدي .

وعلى صعيد أخر فهناك كثير من السودانيين دخلوا سجنون واتهانوا واتذلوا وانضربوا واتعذبوا من أجهزة الأمن التابعة للأنظمة السابقة والحالية التي كانت تحكم السودان في فترات متعددة ومع ذلك لم يتركوا السودان ولم يهربوا ليبحثوا عن البديل للجنسية السودانية بل ثبتوا وصمدوا وتحمل كل ألوان العذاب وظلوا يدافعوا عند بلدهم من الظلم والقهر وحرية الرأي وعن أفكارهم ومبادئهم وثقافتهم وعن حقوقهم المشروعة لهم .
ياجماعة الواحد مهما جاع في بلدوا ومهما اتهان في بلد .. أفضل مليون مرة من أن تتهان في بلد ما بلدك وفي الصغيرة والكبيرة يقولوا عليك (أجنبي .. متجنس ) وفي أقل مشكلة مخالفة للنظم والقوانين حقتهم يقوموا يسحبوا منك الجنسية اللي أعطوك لها وتصبح بلا هوية ويرجعوك لبلدك وانت مطأطِء رأسك خجلان من بلدك ..
ياأخوان الواحد مهما حصل له في بلده من مشاكل وحوادث برضوا بظل معزز مكرم .
ونحن مع بعضنا البعض ا بنقدر نحل مشاكلنا ونأخذ حقوقنا من بعضنا .. ولكن في بلاد التجنس العكس تماماً لأنك تعتبر أجنبي في نظر أبناء الأصلين وليست لك كل الحقوق والواجبات كباقي أبناء البلد.
نسأل الله الهداية لنا وللجميع .

[sunni]

أبو عمر ،،، يسلم فمك

[حبوبة]

العوافي آسمحين
هو الزول لو حاول يديهو ضهرو بيقدر؟
انتو ماتفهموني غلط .... الحياة عمرها ماكانت اسود وابيض
الدنيا ما امسك لي واقطع ليك لازم تحاولو تنظرو من منظور الآخرين
عشان المركب تمشي .
وبعض المتجنسين قدمو للبلد اكتر من الرافضين وقاعدين ممحنين .....
السودانيين الفي البلد العصرة غيرتهم والبرة مجهجهين والايدو في الموية مازي المغبرين
في ناس وناس ياحنين
ده حين السني آخوي برد نفس ابو عمر وما تحمس الطار زيادة ,,,, بنشرط :D

وعايني جاي انت هسة لو في السودان كنا استمتعنا بي طرحك الجميل ده كيف؟؟

ماتزعل من صاحبك المسامح كريم ,,, وعسى أن تكرهو شيئا......!
انا قبلت وبحرت مالقيت أحلى من موية النيل طعم (الكركتي) والمنقة والنخيل
لكن برضو life is never fair
ودمتم,,,,,,,, وصلي ع الحبيب

[أبعاج]

الجنسيات خشم بيوت ياس !!
سعوديه : صلاح أدريس
أماراتيه : واحد صاحبنا
قطرى : سامى الحاج
والموضوع حسب التساهيل
وكلو عند العرب صابون !!!!