لماذا كل الرجال سواء؟

[الدكتوره]

فنونه المثل بيقول ليك
( الما بتريده خاف الله فيه )

لى عوده وتعليق على كلامك
دمتى بود

[zoolang]

الاخت فنونة .... لك التحية
يقول الاطباء النفسانيين بانه كلما اوغلت المرأة في العنوسة والعذوبية أصبحت لديها
بعض الاراء المتطرفة ومن هنا يمكن الحكم على كل الاراء والاصوات النشاذ...
انا معني وبصفة شخصية بهذا الامر....
فقد مللنا تروهات بعض المعتوهات من الجنس الاخر بتكوين فكرة معينة تجاه الرجل
ووجدن عالم السايبر متنفس للحنق الذي يشعرن به........
فالرجل الذي قالن فيه مالم يقله مالك في الخمر ضحية تجربة شخصية خاطئة بعدها يتحول هذا الكائن الي متسلط ومستخف ووووو الخ من الاوصاف التي تجود بها مخيلتهن المريضة...
هذا ليس دفاعا عن الرجال ولكنه كلمة حق اقولها في حق ابي وامي طيلة 40 عاما من الزواج والي الان تقدمه الي الباب وتعود وفمها ينضح بصالح الدعوات ... فالتجارب الشخصية ليست كافية بالحكم على مايزيد على 4 مليار من الرجال ....
شفاكن الله عودن الي صوابكن
والزمن المسار الصحيح يقل الانتظار
وان عدتم عدنا

[فنونة]

الأخت فنونة.

كمان يا ستي ما تنسي انه الكلام ده بينطبق على الضفة التانية من المشكلة، وهي رأي الرجال في النساء. بس الرجال فيهم خصلتين أداهم ليهم ربنا بحكم بنيتهم وخلقهم. وهي أنه الرجال أكثر تكتما في أمورهم الشخصية، ثم انهم أكثر مقدرة على التحكم على إنفعالاتهم وما بيخلوا إحساسهم الشخصي يطغى على حكمهم على لاأشياء. وده السبب الخلي الرسول (ص) قال (كجزء من النص) ناقصات عقل. ويقصد (ص) تحكم العاطفة في الأحكام تحيد الكثير منها عن الصواب. وما تنسي انه لا ينطق عن الهوى !!!!!!!!!

بس خلينا نقول وبصراحة، أنه في فعلا ظلم واقع على المرأة نوعاً ما، مش للأشياء الذكرتيها انت، لأ ولكن لما قاله الرسول، إذا يجب على الرجال انهم يضعوا الموضوع ده في الحسبان، ولازم الرجل يعرف انه الحكم الصادر من حواء، قد لا يمثل رأيها الشخصي الحقيقي، إنها كثير منها ميول وإنفعالات لحظية قد تندم عليها عشان كدة على الرجل أن يتحمل حتى وإن كان الفعل أو القول يتجنبه الصواب. وبي كدة ح يكسب رضى وإحترام أكبر. وصدقوني، حواء بتفهم لما الموضوع يكون مرفوض في الداخل، لكن غض البصر عنه كان إكراماً ليها. والبيزرع،،، بيحصد

سلام

كلامك عين الصواب يا اخوي السني .
بس حكاية ناقصات عقل ودين قلتلتونا بيها..................؟
وفي حكاية انو الكلام ينطبق على الضفة التانية انتو رايكم فينا شنو؟ممكن اجاوب معظم الرجال لمن تسالهم عن النساء بيقولا غلبانات ومسكينات..............والله يعينهم,ممكن اعرف انتا شايف النسوان مظلومات في شنو؟

[فنونة]

مشكوره فنونه على طرحك

بس احب اقولك ان الرجال مش كلهم زى

بعض وبرضه النساء كلهم مش زى بعض

والله سبحانه وتعالى خلق الناس على مختلف

صفاتهم ولغاتهم واحسن قدوه ممكن تتخذيها

للرجال هى الرسول صلى الله عليه وسلم

تحياتى

تسلمي يا هبوية على ردك الظريف وانا معاكي انو ما كل البشر سواى
بس في شواذ والاغلبية من الرجال كدا.ورسولنا (ص) طبعا مافي زول بلحقو في اخلاقو وتعاملو مع النساء
اريت كل البشر زيو.

[فنونة]

التربيه التنشئه في بيئه تتهض المرأه وتهضم حقوقها
تجعل الرجل يتسلط علي المرأه دون وعي او ادراك
لان في نظره هذه اشياء عاديه وطبيعيه بحكم نشئته عليها
حتي بعض المثقفون من الرجال يقولون ما لا يفعلون
او يفعلون عكس ما يقولون وينادون به من حقوق المرأه
فيسقطون في اول امتحان حقيقي ويعودون الي فكرهم الذكوري
المتسلط ... والطبع بغلب التطبع

ومع ذلك ليس كل الرجال سواء
وليس كل النساء سواء او ملائكه من السماء

لك كل التحايا اختي فنونه
كوني بالف خير

الحزن القديم يديك العافيو وده الكلامك الكان نفسو كمان اقولو كفيت ووفيت
وجد100% انتا صاح وحاسس بي معاناتنا, بس في حكاية انو ما كل النساءملائكة من السماء دي بعارضك فيها, كل النساء ملائكة وممكن بي اسباب خارجية خلتنا تظهر بي شكل شياطان لكن صدقني من جوه كلهم ملائكةودي الحاجة المستحيل تتغير.

[فنونة]

يا بنية منو القاليك نحنا واحد
أي نعم نحنا واحد كرجال في المظهر
لكن في المضمون هناك إختلاف كبير بيننا
وهذه حقيقة
وأنا متأكد انك تعيشينها

واااااااااااااااااااحد احنا البحدد لانو احنا البنتعامل معاكم, وبس في المظهر ما واحد
الرجال لازم يشكرو نفسهم عشان كدا لو عايز تعرف راجل ما تسال راجل عنو اسال مرة.

[sunni]

كلامك عين الصواب يا اخوي السني .
بس حكاية ناقصات عقل ودين قلتلتونا بيها..................؟

والله يا أخت فنونة ما جاب الكلام إلا الكلام. وأنا هنا ما ذكرتها عشان أتندر ولا أكاوي، وما أنا من البيكاووا بكلام خير البشر. لكن كلامي واضح والبسيط جداً. ولو إتمعنتي في معناه كويس!!!!!!!! ما عارف، يمكن ما كان توافقيني 100% ولا تقولي كلامي عين الصواب (من وجهه نظرك طبعاً).
عموماً لو الإنسان بجنسيه رضى بما خلقه فيه وله ربنا، ما أظن تكون في مشكلة، لكن مشكلتنا مشكلة تمرد على نفوسنا،،، وما عاوز أخوض برضو في الموضوع ده كتير.

أما رأي الرجال في النساء، فماهي جدوى فتح الموضوع بشكل عام؟؟؟؟ ودي واحدة من الناقط الذكرتها في كلامي ضمناً. يعني التعميم هنا لا يصلح، ثم أنا شخصياً لو هناك موضوع أعلم سلفاً إني ما ح أصل فيه لحل، وعارف رأي من سأناقش،،، فليه النقاش؟؟ مش في مواضيع تانية ممكن نستفيد من الزمن ونزيد معرفتنا بي إننا نناقشها؟. لكن صدقيني يا فنونة، انت محتاجة لصديق قريب ليك تفضفضي معاه، تاخدي وتدي وتعرفي رأيه ببساطة،،، وأقصد بكلمة صديق يعني ص د ي ق،، ومش علاقة تانية. إنت لو خليتي الأفكار دي جواك، والله غير ما تاكلك ما ح تعمل ليك شيء. الصديق ده لازم يكون رجل بتثقي فيه، مش بنت لها معرفة بالرجال،، لأ راجل وبتهمه فنونة الإنسانة. ويافنونة اللستك المليان شديد لو حاولتي تنفسية، بيطرشق،،، لكن المليان نص نص، بينفس ويرتاح، ولو خليناه مليان ونسيناه،، لو ما طرشقة الزمن، ح يعيش طول عمرة مشدووود وفي الآخر بيبقى رهييييف ومرهل. خليك أمينة مع نفسك، وأنا أديتك رأيي، وما في إلزام بالتنفيذ، لكن والله لما المنتدى ده يجمعنا، بنخاف على بعض،، وما تنسي إنك في ردك لي بديتيها (يا أخوي السني).

سلام

[فنونة]

فنونه المثل بيقول ليك
( الما بتريده خاف الله فيه )

لى عوده وتعليق على كلامك
دمتى بود

والله خايفة الله فيهم الاهم انهم هما يخافوا الله فينا
لاننا غلابة, ومنتظراك يا دكتورتنا على احر من الجمر.

[فنونة]

الاخت فنونة .... لك التحية
يقول الاطباء النفسانيين بانه كلما اوغلت المرأة في العنوسة والعذوبية أصبحت لديها
بعض الاراء المتطرفة ومن هنا يمكن الحكم على كل الاراء والاصوات النشاذ...
انا معني وبصفة شخصية بهذا الامر....
فقد مللنا تروهات بعض المعتوهات من الجنس الاخر بتكوين فكرة معينة تجاه الرجل
ووجدن عالم السايبر متنفس للحنق الذي يشعرن به........
فالرجل الذي قالن فيه مالم يقله مالك في الخمر ضحية تجربة شخصية خاطئة بعدها يتحول هذا الكائن الي متسلط ومستخف ووووو الخ من الاوصاف التي تجود بها مخيلتهن المريضة...
هذا ليس دفاعا عن الرجال ولكنه كلمة حق اقولها في حق ابي وامي طيلة 40 عاما من الزواج والي الان تقدمه الي الباب وتعود وفمها ينضح بصالح الدعوات ... فالتجارب الشخصية ليست كافية بالحكم على مايزيد على 4 مليار من الرجال ....
شفاكن الله عودن الي صوابكن
والزمن المسار الصحيح يقل الانتظار
وان عدتم عدنا

zoolang
مهما قلتا فينا كلامك على عيني وراسي وجه نظر واتقبلها, اولا: في العمر انا ما زلت صغيرة لم اتعدى 20 عشان اخرف وما معتوهه؟؟؟؟؟؟؟؟ وتانيا لسه ما اوغلت في العنوسة ولاالعذوبية (مخطوبة قريب) فيعني كلامك ما بينطبق علي.
واحكامي الاصدرتها مش من شخص واحد ولا اتنيييييييييييييييييين ولا تلاتة
انا من عمري سنة عانيت من حاجة اسمها رجال...............ولحد الان , بس تفكيركم واحد مهما قابلتا رجال مقامات كبيرة او صغيرة تفكيرهم واحد في النساء حتى لو كانوا بيتكلمو في النساء بشفقة وانهم معاهم بس صدقني مجرد كلام بيطلع "والجوه بيعلمو الله" يعني انتو مجرد كلام لا افعال ودي صفة رجال الزمن ده.
كانوا زمان رجال اقوال وافعال بس اسي انتهى زمنهم, وسامحني على كلامي ده.
كلمة اخيرة: ما تنسى انو احنا الطفشنا ومللنا اكتر من تفكير الرجال واحكامهم الظالمة فينا, ومممممكن اكيد مليون مثال عليهو وتعرف انو الحق معانا."الله معانا ودا المهم"

[sunni]

فنونة،
دايرك تراجعي كلامك البتقولي فيه من لأول، وشوفي الردود،،، انت ملاحظة إنك بتقولي (النساء ملائكة) لكن من البداية إنت بتجرحي في ناس بي كلام وانت ما بتعرفي عنهم حاجة،، ومع كدة الناس بتناقش فيك بكل طولة بال ؟؟؟؟؟؟ ده ما بيعني ليك شيء؟

والله لو ما عني ليك حاجة، معناها الموضوع عناد، وأفتكر نقفله على كدة.

[Halimeek]

اسف تعليقي على موضوعك تأخر شوية لكن داير اقوليكي حاجة....

يعني على حسب مافهمتا من كلامك انك مريتي بتجربة عاطفية مع رجل وحصلت ليكي مشكلة فالمشكلة دي اسندتيها على كل الرجال وشفتي انهم كلهم سواء على نفس النمط

داير اقوليكي حاجة هل انت بتشوفي انو الرجل دا من البيئة المناسبة ليكي ؟
هل انتِ متأكدة أنو الرجل دا فعلا سيء وخانك ولا مجرد شكوك ؟

شوفي انا عارف انه انتي لسه بنوتة في عمر الزهور ...لكن


أول شي مافي حاجة اسمها كلهم سواء لا بنات ولا شباب

داير اتكلم كلام عام انا مابخصك بيه لاني مابعرف مشكلتك شنو بالتفصيل لكن ممكن تستفيدي منه

انا على حسب مافهمتا وشتفا للأسف الشديد انه في بنات ( مجهجهات ) وشباب (غير واعي) ديل دايما بتلقاهم في حتات زي اوزون ولا المول ولا الحتات البسموها ( طق حنك ) واكتر العلاقات من الحتات دي انا ببصم ليكم بالعشرة انها علاقة غير صادقة وغير صريحة يعني الهدف منها مجرد تسلية
ودي اكتر العلاقات البتعزب اصحابا لانها مبنية على اساس ركيك فبتكون البنت فريسة او الولد .. خصوصا الداقسين .. ونحن الحمد لله الشرع ورانا انو الكلام دا غلط طيب ليه نحن بنمشي ليه بكرعينا ونتعب قلبنا بيه مادام الشرع قال غلط ماعناها فيه ضرر لينا وخطر .. يعني اسي في شاب من الشباب الفي شوارع ديل الصايعين دايما هل بيرضى ليه وحدة من المجهجهات ؟؟؟
اكيد لا .. مهما كانت حالته وصياعته اكيد بيرفض وبيقوليك لا انا داير لي وحدة بت ناس ، والسبب انه يشعر بالأمان معاها ماداير ليه وحدة تمرق من البيت وهو مافي ماداير ليه وحدة متعودة على الجهجهة والشغل الباير ، ودا نفس الكلام بالنسبة للبنات دايرات واحد يكون صادق ووفي وامين عشان تشعر معاه بالأمان والأمان مهم جدا بالنسبة للمرأة اكتر من الرجل يعني المرة كان مالقت الزول البيطمن قلبها اصلا مابترتاح وتوفير الأمان يكون بصدق الكلام ولازم الراجل يوري مرته انه مافي وحدة غيرها في حياته .. لكن بالنسبة للزول الماشي يفتش على جكسوية كدا ولا الماشة تعرض نفسها ديل من وين بلقوا الكلام دا والامان ؟؟ ماديل اتعودو على الحاجات دي حتى كان بعد الزواج بيشعرو انه مادايرين يقيفوا على علاقة وحدة .. المهم الكلام دا كله ممكن يتصلح لو الواحد حكم عقله شوية ورجع لربه وتاب من التفاهات دي وراحع نفسه شوية .

[sarona]

الشعنونة فنونة
اجمل ما في البوست بتاعك انه بيخلي الكل يطلع أجمل ما عنده...
وتقبلي الراي الاخر بروح طيبة...
اللي عايزة اقوله ليك يافنونة ان الحياة ياما فيها
وبحكم صغر سنك وقلة تجربتك اللي شفتيه ده مهما كانت تجربتك ما هو الا
زاوية صغيرة من اركان الحياة الواسعة
الدنيا دي فيها الزوجة القاسية اللي وصلت لحد قتل الزوج وتقطيعه ووضعه في اكياس
مش لانه قاسي معاها...بل لانها حبت اخر
(كلام مثبت في محاضر شرطة )
فيها الام اللي اتخلت عن اولادا عشان تشوف حياتها من غير مسئولية تقيدا
فيها البت اللي فسخت خطوبتا عشان واحد تاني اكثر ثراء
فيها الفتاة اللي ضيعت شرفها بجهلها وغبائها
فيها البت اللي خانت الامانة والشرف
فيها....وفيها ......وفيها
وفيها امي... وامك... .ومن قبلهم امهات المؤمنين عنوان الشرف والطهارة
السوء والشر ما نهاية العالم ولا بيعني أن كل النساء شياطين والرجال ملائكة
ده بيعني ان الحياة فيها كل التــضاد الموجود لاالخير مطلق ...ولاالشر مطلق
وكما عانيتي من ظلم رجل هناك من يعاني من جبروت امراءة
............
اسفة للاطالة وتقبلي مروري

[zoolang]

الاخت فنونة ......
أنا لم اناقشك من منظور شخصي حتى تذكريني بخطبتك...........
اذا كنتي مخطوبة فخطيبك من الشريحة التي تتحدثين عنها (بمعنى أنه زائف وسحطحي)
وان كان اليوم عيد ميلادك الاول طالما تبنيتي رايا كهذا فمعناه ان هنالك تراكم لتجارب الغير أثرت في نفسيتك وجعلتك ترين الرجال من خلال التجارب السمعية التي قصت عليك خلال العشرين عاما التي عشتيها فهو ليس بالعمر الطويل حتى يعد الراي ووجهة النظر مسلما بها...........

الاخت sarona
اخدر ضراعك انشاالله وتسلمي

[فنونة]

كلمة اخيرة :
لاني بي صراحة حسيتكم اضايقتو من موضوعي.
ما تزعلو مني وانا كررتا مليوووون مرة انو ما تجربة شخصية الحاصل لي كل رجل بقابلو في الشارع بلقاهو بي نفس النمط والتفكير والتعامل لي الشفتو قبلو ......ليه؟؟؟؟؟؟؟؟؟؟ظ
حتقبلكم زي ما انتو والله يعيني,
مهما تقولو ومهما تفعلو فسأظل ذلك الملاك الذي يتربع فوق رؤسكم.

[سودانية نار]

حتقبلكم زي ما انتو والله يعيني,
مهما تقولو ومهما تفعلو فسأظل ذلك الملاك الذي يتربع فوق رؤسكم.[/quote]

القلم يعكس نفسية صاحبه ؟؟؟؟؟؟؟؟؟
الناس مجرد ردها علي موضوعك معناها قيمتك وادت موضوعك اهمية وادوك من زمنهم عشان يتبادلو معك الحديث ويبادلوك الاراء مافي انسان في المنتدي اساء لرائك لكن الناس بتختلف وكذلك ارئها وعلي الانسان يحترم رائ الاخر وقالوا من زمان اختلاف الاراء لايفسد للود قضية .
الاحترام اساس الحياة ربنا يوفقك لما فيه الخير

[احمد يس]

كدا يا فنونة
شابكانا الرجال متسلطين والرجال ظالمين و و و و و و و و
وفى الآخر تقولى خطبونى .........................

لعبتيها صح ...................الف مبروك على الظلم والتسلط

[sunni]

الأخت فنونة،
مافي زول إتضايق من موضوعك،،، لكن (وأنا هنا بتكلم عن نفسي) بصراحة انا إتضايقت من طريقة كلامك ومخاطبتك للناس اللى مافيها إحترام لشخص أو رأي محدثيك. يعني الناس إتفاعلت معاك دون أن تهين إحساسك. لكن بس عليك الله أرجعي للكلام القلتيه، وطريقة طرحك ليه،،،، مش الناس الحلوة دي تستحق إنك تعتذري ليها؟؟؟ مش عشان موضوعك،، لأ لكن عشان كلماتك.

وقال (ص) ليس منا من لا يرحم صغيرنا ويوقر كبيرنا،،، وأعتقد إنك هنا صغيرتنا،، ومع كدة كان هناك إحترام من الكبير الصغير، وتتفيه رأي وعدوانية من الصغير للكبير ؟؟؟؟؟؟؟؟؟؟؟؟؟؟

سلام

[ابراهيم الجيو]

مبروك الخطوبـــــــــــــــــــــــــــــة,,,,

[فنونة]

جد انا اسفة اذا كانت كلمتي الاخيرة غلط, بس انا ما قصدي اقلل من كلامك كلكم على عيني وراسي ومستحيل اعامل واحد فيكم بقلة ادب وعدم احترام لانو دي ما من القيم الاتعلمتها في بيتي, بس انتو اساتو فهمي انا قصدي في الكلام القلتو " مهما تقولو ومهما تفعلو فسأظل ذلك الملاك الذي يتربع فوق رؤسكم."
ما قصدتا بيهو انتو الفي المنتدى دا كلام شامل لي اي راجل بيهين المرأة.
بس جد اتاسف واتمنى انكم تسامحوني لو غلطا في حقكم , بس واللللللله العظيم مجرد سوء فهم.
وبكرر اعتذاري واتمنى انكم تقبلوه.

[فنونة]

مبروك الخطوبـــــــــــــــــــــــــــــة,,,,

تسلم والله يبارك فيك .



بس المصيبة انكم ايام الخطوبة بتظهرو بي وش وبعديها بتبانو على حقيقتكم. الله يستر ويعين.