رواد الفن الاصيل فى السودان

[مها]

متين يحصل
الشاعر اسماعيل حسن

بيكتلنى الأسى !!..قبال أشوفك..وقبال ..العيون الطاشة!!..ترتاح فى جُروفك
أنا .. يا بهجة الأمل المنور .. حنين!!..مندسى فى داخل حروفك
أنا لو شفتى .. بس يانى البهاتى .. واعانى اللوعه!!..من حظى ..وظروفك
شن بنسوى ..فى قدرن غدرنا ..وجمعنا!!.. بلا تشوفينى وأشوفك
بقيتى حنين.. تزغردى فى دفوفى..وانا هيمان!!.. بنقز ..فى دفوفك
وفى جوف الزمان .. مثل الحكاوى..عشقتى الطيف
وانا زيك مهموم ..أشابى ليك .. واعانق فى طيوفك
جرحتك ..فى الهوى..بى حد سيفى .وقلبى الدامى!!.. بى طعنات سيوفك
وتبكى براك ..فى جوف الليالى..وانا ببكى ..وأمد الكف عشانك
واحس فى الضُلمه .. !!..اتمدن كفوفك
تصورى ..كيف تكون الدنيا لما..تشوفينى عديل
أنا بى حقيقتى ..و انا زيك .. حقيقه عديل أشوفك

[مها]

منو البقدر ..يوصف لى مداين الشوق ..دريبن وين
وبشرح ليه ..عن حالن ..يكون زارن ..وشافن شوف .. عديل بالعين
كتير ..من قبلنا فاتوا..وفى درب الهوى ماتوا
ما فيهم فرد ويحيد ..رجع فى يوم .. يحدثنا يونسنا
يقول لينا .. !؟..الدرب بى وين
مداين .. قالوا جوه ضباب ...على لوح الزمان مقفول .. طريقن
خالى..ما مأهول ..وبين المشية والجيه ..قوافل ..!!..طاشة ليها سنين
منو البقدر..يوصف لى ..مداين ..!!؟..ما مداين الناس ..وحُجابن
غلاد وشداد… ومن دونن .. سيوف القدره ..حارسه الباب..تقرب ليها..تلقى العين
تسافر فى درب مجهول ..وترجع تانى من أول..وتبدا طريق
ما ها بيوت .. مفرقه ..!!؟..فى التراب الساس .. ما بتمس بالايدين
وما بتنشاف .. !!؟..بشوف العين ..تحسها ..جوه جوه الروح
تعاين ليها بالاحساس..مدن قدر البحر ممدودة..لا بتعند ولا بتنقاس
هدير فى لجة المجهول .. وقاع اللجه .. ياما..حير القياس
بدور واحد ..فرد ويحيد ..يكون زارن ..وشافن شوف ..عديل بالعين
مداين .. شدّت الركبان ..وفاتوا ..على الدرب عايرين
مشدودين .. ومشدوهين ..لدار الغربة مشتاقين
وياما ..!!..شفتهن ..خايفين
على وصفن قديم .. سمعوهوا .. ما مثبوت
بأنك يا مداين الشوق .. ربيع خالد .. خلود القدرة
!!..لا بيفوت ولا بيموت

[مها]

قلب الزمان الراح

بسافر ليكى ..زى زولن .. تخنقه العبره .. ما بيقدر يوصف حاله بالكلمات
ويبقى الشوق .. مدن مطموره
فى عمق البعيد ما باينه .. ما منظوره
للسارحين ورا ..الغيمات
وللشادين .. زوامل الغربه .. هجو الليل
وهداين على الأبعاد .. تقاقيبن تسرج الليل .. مسافرة على ضهر نجمات
وطاشين .. يا عقاب التيه .. وحادى النوق .. براهو الشوق .. يهاتى يهاتى مانن مات
قوافل .. ضاربه فى المجهول .. تكربت .. فوق ضلوع الصى ..وليلها ..يطول
وتبدا جديد .. جديد تانى .. دا ما معقول .. ولا يمكن يكون معقول
قوافل القدره .. هاجه الليل .. خيالات باهته .. فوق .. موج الأسى داجات
ويبكى الليل .. على ..دا الحال
ومن قلب الزمان .. قلب الزمان الراح ..يهبهب...فى البعيد..موال
صداه ينوح.. تشيلو ..جبال ....وتدى..جبال
ويفضل زول .. غريب مبهور .. كأنه زوال
تخنقه العبره .. لا أمات ولا خيات .. تصورى حاله .. فى جوف القبس رحال
تصورى ..حاله يتنسم .. !..ويكرف من هوى الحلال
تصورى حاله .. عبر الماضى ..كيفن..كان .. وكيف بيكون أسى الجايات
دحين يا عابره .. لو فكرتى ..كل الكان .. وحاتك أصله ما بيكون
وما تاهت ..مراكب الغربه ..ما لجت .. تصارع فى رياح الشوق
وريح الشوق ..يولول ..!!..فى الدجى مجنون .. ومات الكان على الليدين ..
ونحن نهاتى للبيكون .. وسكين الأسى يا عابره ..بتقطع ..حشاى يا عابره
ما بقدر ..وكيف اقدر ..على نصلن.. رهيف مسنون ..
دا ما شيتن.. بيقدر ليهو .. زول...متلى .. غريب مبهور .. إذا قوقن قميريات
تخنقه العبره .. لو ما مات ..
!!..قريب..بيموت .. وما ببكنه .. وا ..أسفاى .. !!..لا أمات ولا أخيات

[مها]

العرافه

يا عرافه .. لو بتعرفى .. لو بتشفى ..لو بتكشفى .. علم الغيب ..وحاتك ..هاكى ..!!..هاك..كفى
سنين .. فى الدنيا .. دى..ضايع ..كمان..ضايع
شايل الويل ... وسهر الليل .. وكل الميل .. !على ..كتفى
حمول ..بترجف الرجاف ..اتوقيت ..لا كليت ..لا مليت ..ما هميت .. شلت الشيله واضعفى
يا عرافه .. شن بتقولى ..فى حظى .. !..التعيس..مكفى
شموعى .. تضوى .. درب الناس ... وأنا..!!..واحسرتى مطفى
أحس الغربه .. رغم الدار..ورغم الجار ..وحيد..!!..فى غربتى منفى
مسافر .. يا مراكب الشوق ..وفى اللجات ..أصارع الليل .. فوا ..حزنى ..ووا..اسفى..
يا عرافه .. من تبيت .. من تاتيت ..من شبيت .. شفت الهول ..امامى جبال وبى خلفى
محل قبلت ..القى الصيف ..سموم شربت .. !!..خدار..جرفى
شن بتقولى .. !!؟..يا عرافه .. كان وصفك .. !!..متل وصفى

[مها]

حكايتى مع الناس

بدور .. اشرح حكايتى براى … ومن يومى ..البقيت غناى
بقيت يا ناس ..وحب الناس ..سكن فى جوفى ..جوه عضاى
وغرقان فى مآسيهم ..مراكبى تفوت ..تفوت وتفوت
وياما ..ضاربة فى اللجات ..تحت وتكوس .. وترجع لى مراسيهم
أقالد النسمه ..فيها بدوب ..وجوه الجوف ..عواصف الريد
تسوى الوور ..ترد الروح ..نسيمه تفوح ..!!..تهبهب من اراضيهم
فوا..أسفاى ..ووا..اسفاى ..نُص الليل ..على الأبعاد ..ومن أبعد من الابعاد
مناحتى تقيف .. اذا ناحت سواقيهم ..وكيف يا ليل !!؟..وكيفك .كيف
اذا قُت ليك.. شيك الشوق..سلامى كتير ..كتير وكتير
وسلّم لِيه..للاحباب ووصيهم .. وقول ليهم
قيود الغربه شدتنى ..وما قادر ..قدر ناتلته ما قادر ..أكسر القيد
ويوم انفكه ..من دى الشبكه ..يا دنيا ..برجع تانى ..ابقى وليد ..يلولونى واكاويهم ..
محال اقدر ..أصور حالى ..يوم الشوف ..يلاقى الشوف ..والاقيهم
أشد واركب ..براق الشوق ..أهجم الليل ..واقول يا ليل ..وازغرد ..فوق اراضيهم ..
بحب الناس .. انا المكتول .. بحب الناس.. وكل منايا ..ابق حجاب !!..من المقدور اغتيهم
امد ايديه..للملهوف ..وللبيشابى ..ضايع فى بحار الخوف .. اعدل الميل
واهدمك .. يا جبال الويل ..أغنى الناس !!..وأقول ياليل
وترقص ..فى دروبنا حروف ..شتيل الريد ..يفرهد فى اغانيهم

[مها]

زوبعه فى ملاعب الخيل

أمسكى ..عليك ..عيونك ديل..أمسكيهن
وخلينى ..اللروح انفك..من شبكة ..عيونك ديل
دا شيتن..أصلو ما شفناه ..لا فى الناس!!..ولا فى الريل
دا ما قدر الله ..!! جانا..عديل
بحار الشوق..بلا ساحل..ودايرات..زى ملاعب الخيل
أكون كضاب..أذا عيبيه..شابن!!.. لى عيونك..ديل
مراكبى ..ضعيفه..ما بتقدر..تلاوى الموجه!!..عكس النيل
سألتك ..بالذى سواك..تمسكى ..عليك..عيونك ديل
يتاوقن ليه..زى شباك..منور!!..فى ضلام الليل
يكوركن ليه..نص الليل..يشابن ليه..أنا الغرقان..أنا الضهبان
وزى القشه..أرجف!!.. فى مهاوى السيل
عليك ذاتك..تمسكى عليك…عيونك ديل
قليبى رهيف..وما بيقدر..على الهبباى..فى عز الصيف
اذا شديتى!!..خايفه يقيف
عليك ..دارجيهو..فى الحجرات..!!..بجنب القيف
عيونك..ديل!!..عيونك ديل
محيط الهول..!!..قصدنى عديل
منو البقدر..!!؟.. على العقبات..زمان!!..نخن .زجمال الشيل
حليل..زمان..ما ابته..من صاقعة!!..عيونك ديل

[مها]

المراكب والرواويس

يوم اشوفك .. بنتشى .. متل المهر ..فى الساحة .. خلفولو ..النقاقير
يناتل ..فى اللجام .. بى شوقه .. من الداره!!.. بس كايس يطير
جناح اشواقى..اتمدد ..بقيت أكبر من الساحات..ومن الدنيا .. أكبر بى كتير
حنين الغربه .. فى اعصابى .. بيزغرد زغاريد.. لهفة الأمات
تمد جنحاتها ..فوق عش الزرازير
تبين الرؤيا..فى عينيه..زى ضهبان..وزى رواسي
فى بحر الهوى غرقان .. مراكبه مضت مع الموجات
وما طايق !!..يسافر فى البوابير
مواسم الريد ..تهبهب..فلى حصاد ..اشواقى .. زى سرب العصافير
وجيهك..يا كريم يا الله..ما لاقين..حروفن..توصف الأنوار!!..تزغرد..بالتعابير
نغيمك..يا حنين الراعى فى الوديان!!..يرتل فى ..المزامير
بريق فاطرك يفوق فى الضلمة !!..انوار الفنايير
عيونك يا بلادن فيها !!..كم طالت مشاوير
ولونك يا ضهب شيبون وبى لهب الخجل !!زايدهو ..تخمير
بشم ريحتك من الأبعاد دعاشن هبه من وادى الأراك !!..خلانى سكير
بقيم الليل مع طيفك أسوى غناى .. وانقرش فى الطنابير

[مها]

بى علم الوصول

كل شى منك وصلنى .. السطور والحروف الشاربة !!..من لهب الحنين
الكلام المن جذور الشوق يعرش دربى فى تيه السنين
كل يوم بل كل ساعه وكل ثانيه استشف حرفك وابين
والق نفسى من جديد من تانى عطشان لى حروفك
الشمس تجلد حياتى وفى ظلال حرفك لقيت !!..ضلى الرهين
افتح الصفحات واعاين كلى متفتح ..عيون
وبى بشيش اشرب حروفك قطره قطره
واستريح .. واتكى لمان ينوم جرحى الدفين
يا سلام لمان تعاتبى ويا سلام لمان تلومى
تنهمر من عينى دمعه والحروف تصبح طشاش
فى الحلق تخنقنى عبره العواصف تندلق فى جوفى تبكى
وا..مرارة الدمعه !!..فى كاس الأنين
وتانى ارجع لى حروفك وبى حنان.. !!..انضم ..معاها اعتذرليك عن خطايا
يا حنانن سالبرفرف فى الحنايا .. يا شعاعن يغزل النور !!..فى ..دُجايا
يا صلاة ..طهرت نفسى هدتنى.. من أراجيف الغواية
يا مزامير الهوى لمان..تغنى أنا عارفك !!..إنتى فيها
!!..شان كدى بى وداد الشوق بلولى فى حروفك
يا سلام لمان ..تنامى وتغرقى بى لهفه !!..فى قاع الحنين
أقولك .. أقولك إنتى وين !!..إشان أقولك
يا رهابن بان على درب العطاشى الحلق اصبح جفاف
ولما نوصل نبقى تانى تانى..تانى من جديد متعطشين
شن أقولك يا دريبن بان !!.. ومرات ما ببين
الصليب فوق..كتفى خدر واليباب كل اليباب يا عابره..نور
وا..اساى لمان !!اقولك إلا انا
فى وهاد التيه مسافر .. والزمان بجلدنى .. بى سوط الحنين

[مها]

الكاس المر

قلبى مشدود فوق !!..ضلوع الليل وتر
غنى للشوق من قديم لليله !!..أصلن ..ما فتر
جواب دروب الكون بكوس ارض الحنان حتى إن بقت !!.. فوق..القمر
سايقنى فى دربه السهر … الريد بزغرد فى الدروب رُكبانه !!..شدت للسفر
يا حليل بريقن لاح بعيد .. شدانى لى أرض الصعيد
يا حليل هناك .. الصيد ..يصيدك !!.. وانت ما بتقدر تصيد
ما كلى ريد .. عطشان وبحلم بالمطر
فرقانه .. من أرض "الدنادر" .. حس القوافل .. فى البعيد بتلوح .. ومرات ما بتبين
زى المراكب .. فى الدميره الكاشحه لجت صوبت
يا الله سترك .. ما خلاص !!.. لجينا فى جوف الخطر
جيتك وقيع .. حفيان .. وضايع فى الهوى .. أنا .. من رضيع شقيت بحور
!!..فوق التراب فوق كتفى يا حمل الدهور مربوط .. اناتل فى الصخور
شوف حالى .. من..زمن الصغر الصيف يسلمنى الربيع … فى نارى !!..مشتاق للصقيع
ما بستطيع اسكت على هذا ..الوجع
إن قلت .. شى .. قالو لى !!..شيشك دا ..القدر
صابر .. وما عارف الصبر .. يا حبان قساى !!..أنا عارفه مر
جربته … من زمنن قديم .. حفيان !!..وطيت فوق الحجر
لكنى خايف .. والله يا حبانى خايف ..
خوفى أرضع .. من … ضروع الغيب أمر

[مها]

والله..يا بحر الشمال .. من فوق .. ضفاف الغربة
بعد الغربة..!!.. ما جيت ليك هارب
جيت ليك .. من بعد الودار .. فوق اليباب .. العمر صوب .. ارتحل ..عبر المغارب
والله يا بحر الشمال .. الشوق .. يغالبنا وغلبنا
ونحن … فى لجج الهموم.. !!.. قاعدين نغالب
تصور..حالتى كيف .. فى الغربه ..متبشتن
يجابدنى الحنين طولت من دار الأهل !!..طولت غايب
وصيتنى من قبل الوداع قبل الرحيل دار التراب ..ما دارنا لا يمكن .. تكون محراب لراهب
خليت كلامك فى الهدير سافرت فى الأرض اليباب
بعد الضياع .. كمين سنه بان ليه صدقك يا بحر.. !!..ما كنت كاضب
والليله يا بحر الشمال جيت ليك وا..جيدليه ما جيت ليك !!..من وادى العجائب
شايل الأسى فوق الأسى.. تعبان ..انخ .. نخيتا .. من قبالى كم ناخت ركايب
القصه يا بحر الشمال قصه هروب منك ومن الكان
وشوف الليله .. من بعد الهروب !..جيت ليك هارب
حالين على قلبى الضعيف مُرك أخير .. ما أصلى من تبين متعلم !..على مرك وشارب
العابرين .. أسألنى يا بحر الشمال عالم ضياع
ماهن … وما ياهن … لقيتن يا بحر .. شيتن كتر فى لجتن .. !!..طشت ..مراكب
ضلمة قلوبن يا بحر .. لُججن سجوف .. مندلى ..فوق اللجه ..
ما ممكن .. يغسل ضلمتن !!..سيل الكهارب
إشان كدى جيتك عشان تغفر خطاى ياياب
جيتك ..معتذر .. أنا .. من حتايا الماضى مُستغفر وتايب
فُتك .. صغير يا بحر .. والليله .. جيتك وا..أساى !!..يا يابا ..شايب
ما طقت .. عيشن فى التراب .. الناس !!..يغشوك بالعديل
والشى المحير .. أنهم ساوين .. !!..على ذاتك حبايب

[مها]

حروف

حروف .. كُلّ النَّاسْ تَجى .. يَايُمَّه .. لى أمَّاتَها .. شَايْلَه .. مَحَمَّله الليدينْ
مَستَّفه ..يُمَّه … فى كُلّ الظروُفْ
وأنَا .. يَايُمَّه … بعَدْ النَّاسْ يَجِى … أدَّبَّه فُوقْ طَرَف الأصابعْ أتَاوِقْ
والعَدَمْ خَانِقْنِىِ .. مَالِى حَيَاتِى خُوفْ
بَدُورْ .. أهْدِيكى شِيتنْ … مَا بتَقْدَرْ .. عَليهوُ النَّاسْ
وَحَاتِكْ .. يُمَّـــــه ... كَانْ دَفَعُوا الأُلوفْ
حُرُوفْ .. حُرُوفْ .. يَايُمـــــَّه فِى دَفَتَْر غُناىْ
غَنَّايَه … جَارّه النَّمْ …. تَرقِّصْ فى الحُروفْ

[مها]

حد الزين

حَدَّ الزِّينْ .. وَيَاحُدُودْ حُدودْ الزِّينْ .. حَدّ الزِّينْ
بِنَيَّةْ شيخْنا إسْماعِينْ .. نِغِيمْ نَايَنْ .. بَعِيدْ وحَزِينْ
مَرَاكبْ القُدْرَه .. شَايْلاَتَنُّه … يَامَا شَالَنْ الطّيبينْ
ونِحْنَ .. عَلى ضِفَاف الشُّوقْ .. عَذَابْنَا .. نَودِّعْ الرّاحْلِينْ
نَلوِّحْ .. فِى الهَوَى بى دينا .. بى آهَاتْنَا .. بى دَمْعَاتْنَا .. خَايْدِينْ فى الرَّبوُبْ وَ الطِّينْ
وَمَا قَادْرِينْ .. نَفُوتُو قَدَرْنَا مَا قَادْرِينْ
حِليلِكْ … يَا حُدودْ الزّينْ .. حِليلِكْ يَا قَمَرْ دُورينْ
يَا هَدَّايَا .. يَا ضَوَّايَا .. يا أمْ الوِّليدْ وَ الزِّينْ
فُراقْ وَاحِدْ .. بكُتْل الزّولْ .. وكيفْ يَا يُمَّه .. إنْتُو اتنينْ
خَلّيتُونَا .. فِى دَرْب الضَّيَاعْ … ضَايْعِينْ
مِنُو اليًا ..يُمَّه .. فِى شَهْرينْ .. فَقَدْ أخْتُه .. وحَيدَةْ دَارْنَا يَايُمَّه .. ((جَوَاهِرْنَا))
وفَقَدْنَاكْ … إنْتِى فىِ شَهْرينْ..؟؟
بَقُولْ للدُّنْيَا مَافُتُّونَا ..يَا حَنِّينْ بَشُوفْكنْ يُمَّه فىِ الزُهَّادْ يرَتِّلوُا فىِ الضُّحَى وَيَاسِينْ
بَشُوفِكْ يُمَّه … رَاىْ العينْ وِكِتْ مِنْدَلِّى غَاشِى (( السَّابْ)) وَمَاشِى ((جَرينْ))
ويَا أعْرَقْ مِنْ الأعْرَاقْ خُلاَصَةْ أهْلَنَا الطَّيبْينْ
((كُلْنكاكُول)) فىِ الشِّمَالْ ..بِبْكىِ وفُوقُو اتْحَزّمُوا الصَّالْحِينْ
وكُلّ الفَاتُوا قُبَّالِكْ عَلى بَابْ الخُلودْ وَاقْفِينْ
((حُسُونَه)) ينَقْرِشْ الطَنْبُورْ حِسَارْ الآخْرى زَادُو ..حَنِينْ
((جُمَال البَّاشَّا)) تِتْلَقَّاكِى فِى سُوقْ ((المَقَلْ)) فَارْشِينْ
وشُوفِى ((مِهِيَرة)) سِتْ الخِيلْ وسِتْ الفِى الدُّرُوعْ خَايْدِين
بَنَاتْ الحُورْ صُفُوفْ وَ صُفُوفْ يَسَوَّنْ فِى العَديِلْ وَ الزّينْ
يَا العَارْفينْ وَمَا عَارْفينْ دِى حَدّ الزّين بنَيّة شيخْنَا إسْمَاعِينْ

[مها]

طير الرهو

والله والله يا طير الرهو
قسماً عديل ما فيه لو
دمع الحبايب ذي نغيم الساقية
في الوادي البعيد وتسوي جو
والله يا طير الرهو..ء
ما كت مصدق اني بلقاك يارهو
اشكو ليك من جور زماني ..
كيف رماني ..شوف براك ..شوف الزمن
كيفن بسو..ء
حتى باقي الزاد كمل
والليل ..طويل طولاً غريب مافيه ضو
والريح تنوح فوق الدروب
وآخوفي من صوت الرياح
وكتين تنوح وتسوي او
زيك غريب و الغربة طالت يا مسيكين
متلي يا طير الرهو
التراب ملينا عيشته
اريتني زيك
كل يوم يحضني جو
في بحور الريد نسافر
والمراكب كاسحة..ما دام ريحنا نو
نمشي لي أرض الحبايب يا حلاتن
في المغيرب والدنيا ضو

يا سلام لما نسالم ... طائر مغرد
.يستحيل.......شل العواطف
في قليب عاشق .مغرد...ء
زي تميرا في الشمال لمن يفيض
النيل يفرهد
تنتشي الدنيا وتزغرد
النسيمة الحلوة تطبقنا
وتنقر بابنا كو كو
يا سلام ..يا سلام

[مها]

يا سلام منك أنا آه
يا سلام ..ياسلام
العيون فيها سهام
والكلام فيهو كلام
في حديثك
في ابتسامتك
زينة يا أحلى غرام

لديارك جيت يا روحي ليك أزور
ومن كلام الناس والله قد ضاع السرور
في إيدية
ليك هدية
سامحيني
واعذريني
واقبليها يا بدور

العواذل قالو ليك
قالو إيه
قالو بحب
والله إنتي وبس
إنتي في قلب المحب
هددوني
ألموني
عذبوني
بدلوني الفرحة نار وهيام يوم الغرام

إنتي لونك
وإنتي طبعك
هادي ما فيهو البشين
تشبهي الفل في الجناين
حتى عطرك ياسمين
ربي يعلم
كم قلبي مغرم
إنت ترحم
بين ضلوعي النار تقيد
دا حرام والله حرام

[مها]

يا طير يا طاير من بعيد فوق الغمام
من ربوعي أحمل الشوق يا حمام

انشالله تمشي وتشمي يا طير لي تعود
لي حبيبي تحمل الحب والورود
احكي عني وقلو يا طير هل يعود
من فؤادي ليهو ليك ألفين سلام

يا طير يا طير خوفي بس تنسى الكلام
يوم تشوفو هالّي زي بدر التمام
في جبينو نور يشع يضوي الظلام
في عيونو يرقد الشوق والغرام
حِبِّي عارف إنو في صمتك كلام

ياطير يا طاير لي حبيب زي اليمام
هادي طبعو زي صغير قبل الفطام
ديمة ضاحك ثغره يعلوه ابتسام
من فؤادي ليهو ليك ألفين سلام

[مها]

ميرى واو
ياسلام
لو شفتو ميرى..... ياسلام
لونها ..... زى زيتونة
ناضجة.. راقدة فوق غصن السلام
العيون الشاربة
من الجور
توشوش ليك ... كلام
القوام بس شن نقول
ما خلاص ... كمل الكلام
ميرى ... زى الريح تولول
وميرى زى فرخ الحمام
كنا ننضم...
و يا حلاوة اللهجة
ميرى... كان تمتم ... فى الكلام
وبى بشيش حدثت ميرى
قلت ,,, ميرى..
انشاءالله ... موتو انا
وبى حنين ... قالتلى .. هاو
قلت ... هاو والله هاو
ما زمان فرقنا هاو
ادفنونى ان شاء الله حى فى ربوع الجنة واو

[مها]

واحدة تمت للقراية
وظفوها
والغريبة الحظ رماها
ضمن باشكاتبن قديم
جنه جن صنف الحريم
وابتدأ التلفون يرن
كل دقيقة
وكل ثانية
وبالطبع دايرين فلانة
وهى تنضم
مرة تهمس
مرة تضحك
مرة بتوسوس وخايفة
من نضم زولنا القديم
قام سألها
يا فلانة...
البضربولك منن ؟
قالت..أخوانى الكبار
خدلو ضحكة
وتانى ضحكة
اصلو أمك يا خرابة
يعنى كان ولداها تيم ؟؟؟
ياسلام

[مها]

لو بإيدي !!

كنت طوعت الليالي ..

لو بإيدي كنت زللت المحال ..

والأماني !!

والأماني .. الدايرة في دنياي ماكانت محال

دي الإرادة ..ونحن ما بنقدر نجابه المستحيل

دي الإرادة.. والمقدر ما بنجيب ليه بديل ..

دي الإرادة أجبرتني في هواكم ..من قبيل

غصبا عني ..وغصبا عنك

انت حبيتني.. وهويتك

لو بإيدنا من زمااااان ..

كنت خليتني ونسيتك

والنهاااااية !!

انت عارف وانا عارف

لو بإيدي ..كان هديتك

أصلو حبي أقوى وأكبر من إرادتي ..

وانا حاسس في جحيم نااااارك ..سعادتي

والهيب البكوي في روحي..

في ذاتي..

هو إنت

قلبي دايرك ..

حبي عارفك..

في شبابك في صباااااك ..

في جمااااالك.. في وفاك

يا المسير!!

يا المسير.. وماك مخير

انت يا الصااااابر .. و عند الله جزاك

[مها]

بعد ايه!!

جيت تصالحني ..

بعد ايه!!

بعدما ودرت قلبي الكنت فيه !!

جيت تشكي ..

جيت تحكي..

جيت تبكي.. لي ليه!!

اعتذااااارك ..مابيفيدك

ودموعك ..مابتعيدك
..
العملتو كان بإيدك ..

انا.. ما لي ذنب فيه

انا ..خلدتك بشعري في زمااااانك..

وياما.. غنيت وكان كلو عشانك ..

كان جزاي منك ..صدودك وهوانك ..

انا استاااااهل !!

انا استاهل.. وضعتك في مكانا ما مكانك..

روح !!

الغدر بي نفسو ما ببكوا عليه

جيت تااااايب ياحليلك

والفؤاد ملكوه غيرك..

ربي يعدل ليك سبيلك ..

كل مناي في الكون عديلك ..

ونهاااااية الخير مصيرك..

اصلى عهد العشرة ما اتنكرت ليه..

ضيعوك!!

ودروك !!

انت مابتعرف صليحك.. من عدوك..

استغلوا.. الطيبة في قلبك ..

وبي.. اسم العواااااطف خدعوك..

حتى من.. كلمة حنااااانم .. وودادم.. حرموك

الله ياخد ليك حقوقك ..ويجااااازي..

الظلموك !!

[مها]

ذات الشامة للعملاق إسماعين حسن
صدح بها الأستاذ وردي

وحياة الأحلام القلبي سقاها
وحياة أجمل بسمة عرف معناها
وحياة سمر اللون وحاة محياها
وحياتك
وحياتي عندك
وحياة حبي
النار صدك
وحياة أول نظرة لمحتك بيها
وحياة أجمل صدفة عرفتك فيها
وحياة الآمال العشت حياتي عليها
وحياتك
وحياتي عندك
وحياة حبي
النار صدك
وحياة الأيام الجايرة وظالمة
وحياة حبي الكاتمو براك العالمة
أملي وكل منايا هناك يا حالمة
وحياتك
وحياتي عندك
وحياة حبي
النار صدك
وحياة لونك انتي وحاة السمرة
وحاة حبي اليك من أول نظرة
وحياة طهر غرامي انتي القمرة
وحياتك
وحياتي عندك
وحياة حبي
النار صدك
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
وحياة أجمل ريد في الكون يا حمامة
وحياتك
وحياتي عندك
وحياة حبي
النار صدك