يا سيد البن والبال والكيف
يا منجل سل أساي نضيف
أنا بين دقات البن بلقاك
زول ما بتلوم في حق ضيف
شقيش الغول يندس وراي
تمرق شايلّك درقة وسيف
تقطع أحلام الغول بالصح
تتدحرج بين صحراي خريف
يا زول ياااا كيف ...
ككيفك يا البي طعم البن
غنيتك للبتقريفو صاح
وزرعتك للشايلين الهم
فوق كل شروق وقصيدة أفراح
ومرقتك مني تحدي الليل
نوّمتَ الضلمة وجيتني صباح
يا زول ياااا صاح
كيفنّك وكيف هسع حالك
غنايك ما وراك إنك
بتفرّح بي جيتك فالك
وإنو القمر الطوّل راجيك
شان فرحة ريدك ما طالك
ما نام الليل من قل الضو
ما ونّس وحشة أطفالك
يا زول كيفنك وكيف حالك
صباح / مساء الخيرات
أهديكم قصيدة جميلة للرائعة
الشاعرة/ نضال حسن الحاج
( إبنة الجزيرة الخضــراء )
القصيدة بعنوان " وعدتك "
[ جزء من النص ]
وعدتك بالمطر و الليل
تَراها أتفاوتت مدني
ونزف غيم المواجع سيل
رِجيتك تهدي موج الريـد
تَكَفِت إندِفاع النيل
ولا ساسَق عليك غنياي
ولا وعد إنتظاري مَقِيل
وناديتك
هـ يا.. فتر الغنا المكتوب
على الأعماق.. وغنيتــك
شَتلت عيونك السمحات
على نعب المسافة غيوم
و لُولِيتك..
قِنعت من القـمـــــر
وكت علي طليت !!
و حَجيتك.. بَحَجِي
اليومِ فرحانابو..
وندهت ليك ...
يا مارقه من شهقة زفير اللحظه والنوم السهر
ها بنيه وين عولك إذا كان انتي ما زي البشر
ها بنيه ما سر التقارب بين عيونك و القمر
يا بت مسربله بي عناوين الوتر
لا لاقي لي ليلك صباح لا لاقي لي فجرك اتر
وندهت ليك ... يا بت مغنيه بالصبر
طبالك اتعلم معاك مزيكة الناس الشتر
غنيتي كم ، غنيتي كم مكتول معاك
بي توب معاناة الفقر
ها بنيه من العين دقر
مالك ملتقه من سنين آخر مزاج وآخر عمر
مالك إذا لونك طواف الكعبه طعمك ما لو مر
مالك إذا ضلك مقيل النار علي ضل الجمر
مالك بتشبهي انتماي لي وجعة الناس السمر
وندهت ليها وطن وطن
فتشت ليها مع العروق لا ردّ صوته ولا رطن
فرشت ليها مسام قواي يا ريته ما عرفت سكن
كتلت صغار حضن الأمان والقوه بي شخص الوهن
هابنيه أدخلي في العروق
اتوسدي المطر البكب لا تخافي من ضي البروق
وانعطني في جوف البحر كان وتّرت صوتك حروق
واتوضي من دمع الشروق
مالك وكت كوركت ليك انبحّ صوتك و ما نطق
مالك مخيطة حسي فيك قبال لده شفتيو انفتق ؟
مالك بتفتحي في جرح طول برا ووجعو اتلتق
مالك تهددي في جرح طول برا ووجعو اتلتق
مالك تهددي في البحر والحوت قصادك بالغرق
شلهتي حال القمره ليه ضيك ولا مدا لنا ايد
حردتي وش أعيادنا ليه طولنا ما شفنالنا عيد
بتحندكي السما بالمطر بتغازلي في الدم الوريد
أنا ما البفارق سكتك قبال يحدد كيف يجيك
وأنا ما البستف اندهاشو وينتظر لحظة مشيك
وأنا ما البطقطق باب زمن عمدا بفرقو من وشيك
وأنا ما البفلق بالوجع حيطة غنا الحزن السميك
طيب إذا سافرتي ليه ، جاياني في آخر الدرب
ليه ما استفزيتي المطر ينهي الحزازات بالحرب
ليه ما طلبتي من الشمس تعلن شروقه من الغرب
راجياني ارقص في بكاك يبكيني حسك وانطرب
إذن انتي ما بتعرفي لي
سالمي الفجر واديهو وصفي وخلي منك ليهو ضي
مديني إيدك للقدر نتونسك بالليل شوي
أوعاكي خوفك يندمج في حس هتافاتك علي
جوفي البريد عينيك رقد في حافة الجرح النزف
جرتقتي حسك بالغنا وسيرتي صوتك بالأسف
قلبك سكن آخر مضيق في الجوف ودربك ما انعرف
ممزوجه آخر اختزال بين الشرايين والغرف
ما تحنسي القلب البريدك وتغري بي لحظة صفا
أنا ما البقيف كاتف يدينو علي اليقين الانطفا
وأنا ما البسوقو من الأمان لي صوت هبوب العاصفه
وماني البسد اضنيهو واتوسد قفا
شكرا مبدعتنا آمال الناس والتحية للمبدعة نضال حسن الحاج وكل شعراء بلادي
_ هناك أيضا شعراء أثروا ساحات الأدب في الفترة الأخيرة ، وقد كانت لهم لونية تميزهم وقافية سهلة التناول ، نجد منهم شاعرنا الشاب محمود الجيلي صلاح وله روائع وأعمال كثيرة نختار لكم منها :
مــــي
أطلّ من المشـــارق وجــه مي بنور مثـلـــما شمــس الضحي
