عقدة الغريبه ولا القريبه !!!!

[سيكرت ليدي]

تخيلو لسا الناس بتفكر وتقول :

لا - ده غريب ما بنزوجو بتنا !!!!

عجييييب والله عجييييب

كأنو هم من سلالة النبي محمد , ومافيك يادنيا زيي

والباقيين ( من خارج العائله والنسب ) من سلالة ابو لهب ولا منحدرين من فرعون !!!

ولا جاييين زاتو من كوكب اورانوس !!!

الراجل الغريب ده , ولا العجب كان ولدهم اتزوج غريبه إشوفوها ليك ضفدعه بس

كان سوت السبعه وزمتها عشان ترضيهم , ما تعجبهم

مادي الغريبه , عاد الزيك منو يا بت اخوي , ولا يابت العم والخال !!!

كان وشك وش حماره يقولو عاد زي جمالك ماشفنا

وكان ما عنك أخلاق زاتو يقول ست الواجب والعرفه والاصول ............

لكن العيب ما علي الزوجه الغريبه ولا الراجل الغريب , العيب علي ولدهم ما دام هو عارف

أهلو معقدنها عقد الحبال كده , مااااااااالو مورط بت الناس معاهو .....


مع احترامي لناس الجزيره (وأنا من الجزيره و بفتخر والله) بس الخصله دي عندكم

لسا (الا من رحم ربي )(انا قلت الا من رحم ربي , يعني ماتاكلوني , يعني في ناس فاهمه وما عندها العقد دي ) .........

والله انا طرحت الموضوع ده لانو بصراحه ضارب فيني وتر حساس , اتمني الناس تعيد الفهم

من جديد ( وخلقناكم شعوبا وقبائل لتعارفوا إن أكرمكم عند الله أتقاكم ) .....

[jasmina]

[glow=ffccff]

اختي سيكرت فعلا الموضوع ده للاسف لايزال موجود وزي ماذكرتي لسه موجود

عند اهلنا في الجزيرة تحديدا او زي مانقول ناس القرى بوجه عام ... بس عامه كده الانا بشوفو

انو الراجل الغريب بيكون ليهو احترام كبييير في الاسره كنسيب ..بل قد يكون احترامو اكبرمن

احترام النسيب القريب ذاتو ... وده من طبع الاصاله فيهم...بالنسبه للمرة الغريبه ممكن حتواجه

ماتواجه من نسابتها وتعامل كدخيله بس في الحاله دي يبقى الباقي عليها في نظري تقدر تلين قلوب

الناس ليها ...وبتقدر انها تكسب ود واحترام العائله كامله اذا كانت ذكيه ذكاء اجتماعي وعرفت كيف

تفرض احتراما وتفرض وجودها على اسره زوجها ((( بالذوق والعقل والاحترام))) لانو ناس القرى

وناس الجزيره تحديدا ناس بسيطين وطيبين شديد ..بل هم نواه الطيبه ذاته ..فالتعامل الحلو معاهم الاحترام

التقدير ...الوقفه معاهم في المناسبات ...ومشاركتهم الافراح والاتراح ....في الحاله دي حتكوني بت ليهم

مش نسيبه بس ...يعني في رايي الشخصي انو موضوع قبول النسيبه الغريبه ده بيرجه للمرة نفسها مش

لزوجها ...وانا ماقلت كلامي ده الا عن تجربه انا عايشاها وشفتها ..حيث انو والدتي ووالدي من قبيلتين

مختلفتين ...الوالد طبعا كنسيب ما واجه اي مشاكل بالعكس ...بس الوالده واجهت ماواجهت من عماتي

واهل الوالد عموما اول سنين زواج بس بعدين قدرت انها تكسبهم لانو في الاول والاخير لزم تكسبهم

ولازم يحبوها ...عشان خاطر زوجها الخلى بنات اهلو واختارها ...وعشان خاطر اولادها ..لانو ديل

اهلهم لحمهم ودمهم..عذرا ً على الاطاله ...تحياتي اختي الغاليه ..لي عوده

[/glow]

[نهر المحبه]

التحيه ليك أختي على طرحك....
وخدي بالك اهلك من الجزيره هنا كتااااار
فعلا هي مشكله حاصله في كتير من المناطق الفي السودان حكاية القريبه والغريبه
والغريبه اني مره سمعت انه تقريبا في الغرب الحكايه بالعكس يعني الغريبه بشيلوها فوق الراس
بعزوها عشان ماتشيل حالهم وبحترموها وبعملو ليها مكانه....
في كلا الحالتين....
المفروض انه الواحده مادام رضت بالزواج من الشخص ده من البدايه وباقيه على العيشه معاه وهو كمان بحترمها وكل شي
المفروض تصبر تشيل الصبر
وتكون حكيمه ورزينه في تصرفاتها وما تكون متسرعه وما تدخل راجلها في المشاكل البتحصل بينهم...
مع مرور الزمن هي بتكون فرضت احترامها عليهم
بس هي عاده المفروض الناس تتخلى عنها لانه في النهايه المواضيع دي قسمه ونصيب وما في شخص يقدر يغير شي ربنا كاتبو ومقدرو
ويكون في شوية توعيه لانه مع كترة الأمراض البقت شايعه من الاسلم الزواج يتم من خارج الاسره عشان الناس تقدر تضمن جيل سليم صحيا.....
واسفه على الاطاله اختي....

[حبيب الناس]

ببساطة عرسو اهلكم وخلوهم يغطو قدحكم بدل دق الجرررررس ده

[حبيب الناس]

فعلا والله المسألة محتاجة لوقفة حقيقية .

بس انا بعيب عليك في حاجة - ما أهل الجزيرة منفردين بالحكاية دي في كل القبايل بتلقي الموضوع ده سايد - وفي قبايل عاملة خط أحمر عند الموضوع ده زي قبايل البجا في شرق السودان وقبايل خط الرعاة زي الحَمر والمجانين والهواره والبقاره وأغلب قبايل شمال كردفان وجنوب كردفان وبالتحديد قبايل الفلاته زي الفوطه والهوسا وما ننسى البني عامر والشوايقه - يعني لو جينا حنلقى إنو في قبايل متعصبة جدا لمسألة النسب دي وكمان بتمشي لدرجة إنو أحسن ليهم ينتهم تعمل علاقة محظوره بشخص غريب لكين لما يجي الزواج يقولو ليك ود العم وبس .

الدين الإسلامي وصى بالزواج من البعيد ومحاولة إجتناب زواج الأقارب ، وأثبتتت دراسات حديثة إنو الزواج من الأقارب سبب رئيسي لإنتقال الأمراض الوراثية النادرة والبتهدد حياة الشعوب .

اما حكاية إنو الغريبة عقربة دي فأظن في حالات ورتنا إنو الكلام ده ما جاهم من فراغ ، البنت الغريبة في منظورهم حتشيل الراجل وتودي على أهلها ويبقى منهم مش العكسو المره تبقى من أهل الراجل وإذا بقت دايما يعايروها بأنها غريبة ويرمو فيها الفي والماف .

المفروض نحنا دخلنا عصر جديد من الوعي والفكر الحديث لازم نعيد النظر في الكلام ده ونحاول إنو نبقى جنس واحد بدل ما كل واحد منطوي على نفسو .

[ملاك الورد]

يسلمو سيكرت على الموضوع
المتداخلين القبلي كفوا و وفوا ما شاء الله
بس حاجة اضافية كمان , القبايل المتعصبة دي عندها حاجة بتضحك كمان
الولد ممكن يعرس بره (السلاله الملكية) , لكن البت لو تنطبق السماء على الارض ما في بره (السلاله الملكية)
و لما الولد يحارب و يعرس بت بره الاسره كده هو مفروض يحمي مرته من اهله لانه بكل بساطة حتكون حرب البسوس اشتغلت بمجرد ما انه عرسها ...
و الله ابدعتي في وصفك للواقع , يسلمو يا عسسل