رواد الفن الاصيل فى السودان

[مها]

أنا قلبى من دون الأنام



أَنَا قَلْبِى مِنْ دُونْ الأنَامْ ودْ عِينِى لَجَّ أبَى المَنَامْ
مِنْ يُومْ رَأيتْ جَدَىْ السَّلاَمْ شَالْ قَلْبِى خَتَّ جِنَاحْ حَمَامْ
خَيِّمْ عَلىِ عِينَىْ غَمَامْ لاَ أدْرِى خَلْفِى ولاَ الأمَامْ
يَاخِلِّى مِنْ يُومْ أنْفِى شَامْ أنَا صِرْتَ نَجْدِى وشُوقِى شَامْ
وَجْهُو البَدْر مُحْلُو تَامْ والشَّعْر لَيلْ زَادْ إنْعِتَامْ
لَوْ شِعْرى نَاقِصْ والله تَامْ هُوَ للجَّمَالْ والجِيلْ خِتَامْ
خِلاَىَ كَيْفَ أكُونْ مُلاَمْ أنَا تُهْتَ بَى جَدْىِ السَّلاَمْ
لَوْ هَذَا الحَالْ غَيَّرْ كَلاَمْ عَلَىَّ وعَلىِ الدُّنْيَا السَّلاَمْ
جَبَّارْ بَخِيلْ بَالابْتِسَامْ مِنْ ثَغْرُو لازِمْ عَارْفُو سَامْ
مَا شَافُو عَاقِلْ إلاَّ سَامْ قَلْبُو المُعَرَّضْ للسِّهَامْ
حِينْ شُفْتُو مِنْقَسِمْ إنقْسِاَمْ رَاقِدْ غَرِيرْ سَافْرَ اللِّثَامْ
مِثْلُ الوَسَامَة والوِسَامْ رَجَعْت بَالمِحَنْ الجِسَامْ
رَفَعْ الهُدَّبْ صَوَّبْ سِهَامْ صَابْ الفُؤَادْ صَارْ قَلْبِى هَامْ
فَارَقْتُه صَبَّاً مُسْتَهَامْ سَانْدَ النَّوَاجِزْ بَالبِهَامْ
خِلاَّىَ مَاسَكَنْ الغَرَامْ قَلْباً خِلاَفْ فَرَمو إنْفِرَامْ

[مها]

]تفاح

تُفَّاحْ مِنْ طِيبُو الفَاحْ
هَاتْ يَانَسِيمْ
زُورْ المُرَاحْ غَدْوٌ ورَوَاحْ
أعْمِلْ سَوَّاحْ رُوحْ يَانَسِيمْ
زُورْ الفُرْهَيدْ رَوِّحْ لُو نِهَيدْ
بَرِّدْ لُو الهَيدْ رُوحْ يَانَسِيمْ
حِينْ تَصَلُو دُوبْ لاَ تَهِز التُّوبْ
فَدْ نُومُو كَذُوبْ رُوحْ يَانَسِيمْ
مَاعَلَيكْ حَبَّاسْ رَوِّقْ لاَ بَأسْ
نَايِمْ زَى حَاسْ رُوقْ يَانَسِيمْ
أبْقَى لُو الهَيفْ مِنْ غَيرِ هَفِيفْ
فَدْ نُومُو خَفِيفْ شَيشْ يَانَسِيمْ
أتدَبَّ دَبِيبْ لاَعِبْ لُو سَبِيبْ
أبْقَى لُو حَبِيبْ رُوحْ يَانَسِيمْ
شُوفْ لَيك قَمَرْ فِرَيعْ وثَمَرْ
أخْطِفْ لِى خَمُرْ هَاتْ يَانَسِيمْ
تَلْقَى النَّدَى فِى مُهَنَّدَا
مَا تَعَانِدَا شَيشْ يَانَسِيمْ
خَزْنَةْ جَوْهَرْ خَازْنَالَه بُهَرْ
أوْعَك تَوْهَرْ رُوحْ يَانَسِيمْ
خِلِّى الحَبَّاسْ زَى تَلِج فِى نِحاسْ
أَوْعَى إلتِبَاسْ رُوحْ يَانَسِيمْ

[مها]

رُوحْ شقِيقْ البَدْرِ هِبْ لَىَّ طِيبْ حَلِيفْ الخِدْرِ جِيبْ لَىَّ
عَزَّه أمْ دِى الطَّلْعَة بَدْرِيَّه سُعَادْ أم لُبْنَى أمْ مَىَّ
أمْ بُثَيْنَة أمْ نَجْوَى أمْ رَيَّا دِى أمْ صَبَاحاً لَيْلَه قِدْرِيَّه
هَاكْ مِنْ تِيَّارَه قَطْرِيَّه هَاكْ مِنْ قَامُوسَه شِطْرِيَّه
النَّفَايْلَ المَاهَا مَطْرِيَّه فِى أُمْ ثَبَاتَاً خِلْقَه فِطْرَيَّه
البِرُوقْ اللاَّمْعَه قِبْلِيَّه فِى السِّحَايْبَ الهَامْعَه لَيْلِيَّه
والشِّخُوبْ الهِىَّ دُرِّيَّه دِى الدَّرَارَى الفِيهَا مَجْلِيَّه
مَا الزَهُورْ الفِى البسَاتِينْ مَا خلاصة الورد والتين
إنْتِ والبَدْرَينْ كَهَاتَينْ يَا حَلِيفْ الخِدْرِ سِتِّينْ
يَا الهِلاَلْ يَا اللَّيْلِ يَا البَدْرِ يَا مَقَرْ قَلْبِى بَدَلْ صَدْرِى
يَا أخَا المِرِّيخ فِى القَدْرِ إنْتَ رَاحْ رُوحِى فَهَلْ تَدْرِى
يَا رَشِيقَاً مَاسُه دَيْجُورَه يَا غَزَالاً بُرْجَهَا حِجُورَه
يَا النَّظِرْتَكْ بَتَّ مَحَجُورَه بَمَوانْعِ الدِّينَ مَزْجُورَه
مَتَنِى مَتْنُو رُوبَتَه تَقُودَه البَهَا جِيدَه تَهْفُتُو عِقُودَه
بَاهِى جِيدَه البَهَى عِقُودَه تَايْهَة المَا دَارْيَه مَفْقُودَه
يَا الحُسْنِ فِى قُرَاوُه وأمْصَارُو البُقَارِنْ بَيكِى لاقْصَارُو
إنَّمَا المَحْرُومَة أبْصَارُو يَا مَلاَكَاً جُنْدُه أبْصَارُو
البِقَارنْ بَيكِ يَاعَزَّه إقُولْ لَبَّيْكِ وإنْ عَزَّ
عَزَّ رَبْ العِزَّة لَيكْ عَزَّ بَى بَدِيعَاً لَى سِوَاكْ عَزَّ
السَّلاَمْ يَا ذَرْوَةْ المَجْدِ مَا شَكَى صَبَّا مِنْ الوَجْدِ
مَا تَنَسَّمْ رُوحْ صَبَا نَجْدِ مَا عَشُوقاً صَاحَ وا وَجْدِى
السَّلاَمْ يَا صِينَة العَرْضِ يَا ألِيفْة النَّفْلِ والفَرْضِ
يَبَلِّغِكْ سِلِّمَاً مَرْضِى يَرْضِيكْ ولأرْبَعِينْ يَرْضِى

[مها]

ليالى سرور

لَيَالِى سِرُورْ بَينْ تِيهْ ودَلاَلْ وحُورٍ عِينْ فِى جِنَانْ وزِلاَل
بِدُورْ فِى خِدُورْ مِنْ أبْهَى سُلاَلْ كَأرَايلْ تَخْطُو تَمِيسْ بتِلاَلْ
حَوَارِى حِسَانْ ونُدامَى جَلاَلْ جَواهِر دُرْ وظِلاَل وزِلاَلْ
لَدَانَة وتِيه يَكْسُوها جَلاَلْ كَغصُون تَتْهَادَى وتَمْشِى عَلاَلْ
زِهُورْ ونِهُورْ تَتْرأى خِلاَلْ عِيُونْ وخِدُودْ وَوِجَنْ تَتْلاَلْ
نُجْل كُلْ نَجْلاَءَ يَزيِنه هِلاَلْ سَحَرْنَ قِلُوبْنَا بسِحْر حَلاَلْ
لَيَالِى بَهِيجَة أمْثَالَه قُلاَلْ تَحَلِّى جَبِينَه بِتَاجْ وهِلاَلْ
جَمَالْ ورزَانَه عَفَافْ وكَمَالْ كَرَوانْ يتْغَنَّى وجُؤذَرْ مَالْ
تَمِيلْ بِمَعَاطِفْ يَمِينْ وشِمَالْ عَظِيمْ نَفْدَاكْ بَالرُّوحْ والمَالْ
جَوَارِى أدِيبَه تَمِيزْ لَمَجَالْ جَالَنْ وقَلْبِى مَعَاهِنْ جَالْ
دِى حَفْلَة بَدِيعَة تَهَابَه رِجَالْ تَشَاهِدْ فِيهَا دنُو الآجَالْ
أشْجَعْ يَاطَلَبْ الرِّيمْ طَفَّالْ صَرِيعْ لَحْظَاتْ وقَتِيلْ أكْفَالْ
بِقَلبِ جَبَانْ ونِفُوسْ أطْفَالْ تَشَاهِدْ الرِّيلْ البَيكْ حَفَّالْ
لَكَ هَتَفْ الحَظْ بَحُسنِ الفَالْ ولِسَانْ الحَالْ يَتْلُو الانْفَالْ
والحَظْ إنْحَلَّ مِنْ الاقْفَالْ عَلَيكْ مُبَارَك ولَينَا الفَالْ
نَسِيمْ يَنْشَر لَكَ نَدْ سَطَّالْ نَهَبْ أفْكَارْ وفَضَحْ أبْطَالْ
عَلَيهَا دِمُوعْ كَالمُزْن هَطَالْ وعَلَيهَا الشُّوقْ إشْتَدَّ وطَالْ

[مها]

داير أشوفك لمحة

دَايِر أشُوفَكْ لَمْحَه قَبْل أمُوتْ يَاسَمْحَه
عَينِى جَافْيَة النُّومْ
قُومِى يالَمْتنيَّه تَمِّمِى الأمُنِيَّة
رَقْصَتِك فَنيِّه شِئ عَجِيبْ لليُومْ
قَامَتْ المِنْتَبْلاِه لُونَه صَافَى التِّبْرَه
سَالْمَة مِنْ غَير تَبْرَه لَوْ كَسِنْ الإِبْرَه

[مها]

شىء عَجِيب لليُومْ

قُودِى يَاالمِنْحَلَّة إنْتِ زِينْةَ الحُلَّه
أنْتَ نُورْ الحِلِّه شِىء عَجِيبْ ياالفُلَّه
شَىء عَجِيبْ لليُومْ
يَالوَضِيبَه يَقُودَه القِلُوبْ مَفْقُودَه
بَاللهِ يالقْرِى قُودَه وَرِّى كَيفْ القُودَه
شَىء عَجِيبْ لليُوم
عَرْجِنِيهُ الطَّايِلْ شَعْرُه عَاتِمْ وهَايِلْ
العَلَىْ مُو زَايِلْ خَاتِى قُولْ القَايِلْ
شَىء عَجِيبْ لليُوم
مَهْمَا كَانْ تَخْفِيهُ الجَّبِينْ لِصْفِيهُ
المُزَمْزَمْ فِيهُ والجَّوَاهِرْ فِيهُ
شَىء عَجِيبْ لليُومْ
نَسِّفِى التَّسْرِيحَه المَعَطَّرَه رِيحَه
كَلْمَة أقُولَه صَرِيحَه مَا بِتَدَاوِى جَرِيحَه
شَىء عَجِيبْ لليُومْ
العِيُونِكْ سَاهْيَه القِلُوبْ لَيكْ شَاهْيَه
عَرْجِنِيهَا البَاهْيَه والنَّرُوحْ فِى دَاهْيَه
شَىء عَجِيبْ لليُوم
تَانِى مَا بنَتْعَزَّه عَلِى البَنَاتْ يَا عَزَّه
الخَلِيفَة إهْتَزَّ سَلَّ سَيفُه وهَزَّ
شَىء عَجِيبْ لليُوم

[مها]

من الأسكلا

مِنْ الاسْكِلاَ وحَلَّ قَامْ مِنْ البَلَدْ وَلَّى
دَمْعِى للثِيَابْ بَلَّ
بَى دَاهِى العَذَابْ حَلَّ وبَى تِذْكَارُه بَتْسَلَّى
قَلْبِى الذَابَ وإِخْتَلَّ وَينْ بَدْرَ التَّمَامْ هَلَّ
صَفَّرْ وَدَّعْ الوَابُورْ حَاجْزِينْ قَمَرَه إِثْنَينْ دُورْ
الوَابُورْ مَرَّ بَالمَجْرُورْ شَالْ ظَبْيَاً سِكُونُو خِدُورْ
جَبَلْ أَوْلِيَا حَبِيبِى غِشَا وحَصَّلْ فِى القَطِينَه عِشَا
يَا قَلْبِى الطَفَشْ وفَشَا المَا آلْيتُه يَنْكَفِشَا
حَلَّ زَىْ الصَّقُرْ خَوَّى بَالبَدْرِ الدِّوَيمْ ضَوَّى
عَادْ لاَ حَوْلَه لاَ قُوَّه حَبِيبِى اللَّيلَه فِى الكَوَّه
صَبَاحْ الخَيرْ عَلَى أُمْ نَفَلَينْ أَهَنِّى البَيهَا مُحْتَفِلِينْ
سِيدْ الحُسْنِ رَبَّ اللِّينْ شَرَّفْ كُوسْتِى والجَّبَلَينْ
هَنِيئَاً حَانَ وَقْتَ زَهَاكْ الرَّنْك إِحْتَفَلْ بَبَهَاكْ
وَينْ اللَّيلَه ياالنَّشْهَاكْ يَا لَيتْ كُنْتَ فِى الجَّلَهَاكْ
يَا كَاكَا الحَبِيبْ طَلاَكْ بُعْدُه الزَّادْ نِفُوسْنَا هَلاَكْ
يَا مَلُّوطْ حَلِيلْ نُزَلاَكْ يَا زَمَنْ الفُرَاقْ نَسْلاَكْ
بَقِدُومَكْ كَدُوكْ أَصْبَحْ سُوقُو مِنْ الكَسَادْ أَرْبَاحْ
أَنَا مِنْ نِيَاحِى صِرْتُ أَبَحْ كَأنِّى فِى مَبْرَكْ المِذْبَاحْ
زَادْ مِنْ بُعْدَكْ الانْكَالْ قَلْبِى البَالهمُومْ إنْكَالْ
شَاطْرِى العَاصْمَه يَا مَلَكَالْ تَوْفِيقِيَّه صَبْرِى أنَا كَالْ
شَامْبِى أضْحَى بَيكْ مَسْرُورْ بَعْدَ المَنْقَلاَ يَا سَرُورْ
يَا جُوبَا حَىْ أنَا المَضْرُورْ بَعْدُه النُّومْ بِقَى لِى ضَرُورْ
مِنْ دَا الْهَمَّ مَا بَنْجَى حَبِيبِى اللَّيلَه فِى تُونْجَا
يَا خَالْق الخَلِقْ تَنْجَا تَرْكَاكَا حَلَّتْ العَنْجَا
سَلاَمْ مُتْنَامِى مَاغَبَّ مَا مَرَّ النَّسِيمْ صَبَّ
يَرْضِى أِلْ للعَفَافْ رِبَّى ويَخْدِمْ كَامِلْ الرُتْبَا
صُبْ يَا دَمْعِى لاَ تَكُونْ رجَّافْ ويَا قَلْبِى البقِيتْ رَجَّافْ
البَدْرَ الخَفَا الأنْجَافْ اليُومْ شَرَّفْ الرَّجَّافْ

[مها]

غزال الضحى

يَا غَزَالْ الضُّحَى يَا مُزِينَه هَا ضُحَاكِى ومَالَيكْ وزِينَه
يَا مِثَالْ الحَيَا يَا رَزِينَه غَانِى حُسْنِك عَنْ زَىْ وزِينَه
فِى بِرُوجْ البَهَا أبْرِزِينَا أفْرِحِى الألْبَابْ الحَزِينَه
فِيكْ جَوَاهِرْ حَكَمَتْ مَتِينَه فِى صَبَاحِكْ مَتْبَنِّتِينَا
رَوْضَه يَانْعَه عِيُونِكْ هَتِينَه فُضَّكُمْ مِنْ تِينَه ورَتِينَه
مَا الرَّتَايِنْ يَا أنْجَبِينَا لَى خِدُودَه الزُّجْ حَاجِبَينَا
النَّشَتْ فِى التَّرَفْ المُبِينَا مَاتَكَدَّرْ يَوْماً جَبِينَه
يَارَبِيبْة السَّاحَة الأمِينَه طَاهْرَة سِيرْتِك مِنْ أقْدَمِينَه
فِى نَعِيمْ الشَّرَقْ أسْلَمِينَا يَجْهَلُوكْ النَّاسْ العَمِينَا
فِى سَنَاهَا مِمَّا بَدَينَا بَى مَحَاسِنَه لَيهَا إهْتَدَينَا
طَالْ وضِيبَه وجِيدَه وبَدِينَه هَادْلَه ضَامْرَه الفَاقْلَه اللَّدِينَه
هَاكْ قُولْ كَخُزَاعَة وجُهَيْنَه عَنْ بَعَضْ دَادَاتَه البَهَينَا
تَنْضَحْ الكَافُورْ يَنْدِى هِينَه والقِدَيمْ الطَّرِى كالدَّهَينَه
يَانَضُوحْ مِمَّا إتْلَهَينَا بَى نَصَايحْ مَا إنْتَهَينَا
لَوْ مَا نَأمَلْ طَيفُه إنْ سِهِينَا مَا تَصِّدْقَ غَمْضَه إشْتَهَينَا
نَمْسِى نَصْبِح مِتْأوَّهِينَا مَاسْكِينْ فِى خِيُوطَاً وَهِينَه
نَارْنَا جَنَّه وبِهَا إزْدَهَينَا خَلَّى عَنَّك نِحْنَ إنْتَهَينَا
َتَمايِمْ القُضَّيمْ تَزِينَه فِيهَا تَشْبَه دُرَرْ الخَزِينَه
والقَرَضْ فِى الجِّيدْ أحْلَى زِينَه فَهْى زِينَه لَيه لاَبْسَه زِينَه؟
يَا يَتِيمْه الدُّرْ الثَّمِينَه جَنَّ حَاسْدِكْ عَضَّ اليَمِينَا
يَقْلَع شِمَالُه يَغْطِس يَمِينَا نَارْ حَشَاهُ تَفَوِّرْ كَمِينَه

[مها]

حبيبى قلبى يرضاه

حَبِيبِى قَلبِى يَرْضَاهُ لكِنْ أيْن يا رُضَاهُ
وطرفِى يَهْدِى لَى طَرْفُه مَنَامُو ولَيْتُ يَرْضاهُ
سِكُون اللَّيلِ أصْحَاهُ لِحِينْ الصُّبْح يَمْحاهُ
مَتْرقَّبْ نَسِيم يَسْرِى يَفُوحْ مِنُّو بِفَيْحاهُ
ويَنْتَعِش الفُؤادْ مِنُّو ويَلْهمْنى بإيْحَاهُ
وقَلبِى مَع الخَيالْ سَابِحْ وقَلْبَ الشُّوقْ ويْحَاهُ
نَارْ الوَجْد مُزْدَادَه وإنِّى لَسْت ألْحَاهُ
خلاَفِى يَحْكِى مِنْ جَرْحُو إذَا مَا حَاكَى أحْكَاهُ
أقُولُّو لَيِّن القَوْلَ ومِن ثَنَاه أثْنَاهُ
ولا يُرَى حُلْمُو فَالحُلْمَ بَعِيداً عَن مُسَمَّاهُ
وحُبُّو فِى سِوْيدَائِى ومَا فِى القَلْبِ إلاَّهُ
وطَرْفِى يَهْدِى لَى طَرْفُه منَامُه ولَيْتُو يَرْضَاهُ
حَبِيبِى قَلْبِى يَرْضَاهُ لكِنْ أيْن يَا رُضَاهُ

[مها]

طفح السرور

طَفَحْ السِّرُورْ مَلأ الصِّدُورْ أهْلاً بِرُبَّاتْ الخدُورْ
هَلْ دَيلْ مَلاَيْكَه أمْ بِدُورْ أمْ يَا أخِى نَاسْ عَزَّه وبِدُورْ
دِى الرَّاقْصَه أمْ فَلَكَاً بِدُورْ دِى الوَاقْعَه فِيهَا المُوتْ بِدُورْ
أهْلاً بَغَالْيَاتْ المِهُورْ بَالنُورْ بالمَاءَ والزِّهُورْ
كُلْ بَدْرِ فِيهُ إثْنِينْ شَهُورْ أوْجَانْ كَأنْجُم فِى نِهُورْ
حَفَلَنْ بَينْ زَاهْرَه وزَهرْ أسْعَد صَبَاحْ أبْرَك شَهَرْ
الكُلْ مَلاكْ الكُلْ بَهَرْ فِى الجُّمْلَه إخْدِمِنْ الدَّهْر
يَا رَبْ غِصَينِنْ مَطِّرُو رَحْمَة وفِرِيعِنْ عَطِّرُو
فِى خِدُودِنْ الرَّيدْ سَطِّرُو أحْفَظ شَبَابِنْ وبَطِّرُو
َمْحَفْل عَقَلْ فِيهُ الشَّعِسْ دَارْ مَعْرِكْ النَّظَرْ النَّعِسْ
دَاء الغَرَامْ هَمْ مُنْبَعِسْ والعُمْرُه سَنَتَينْ مَانِعِسْ
أمَّا إنْتَ يَاالطَّيِّبْ شَدِيدْ كَأنَّ قَلْبَك مِنْ حَدِيدْ
هَلْ مَا عَنَاكْ ذَاكْ الهَدِيدْ البَهْدَلْ الجِّيشْ العَدِيدْ
ظَبْيَاً نَشَأ فِى أرْقَى حَىْ أنْجِيهُ يَا قَيُومْ وحَىْ
حِينْ مَا رَأيتْ ذَاكَ المُحَىْ ظَنَّيتْ دَخَلْتَ الجَنَّه حَىْ
فِى تِيهَه تَايْهَه ومُفْرَمَه أكْتَافَه فِى الأرْدَافْ رَمَى
صَحَّى بُو صَدْرِى المُبْرَمَا عَجَباً لِمْوجٍ غَيرِ مَاء

[مها]

عز وصلك

عَزَّ وِصْلِكْ وطَالْ الجَّفَا عَزَّة عَينِى الصَّبْ أتْلَفَه
السَّهَرْ بَاللَّيلْ وَالَفَة والمَنَامْ جَافَانِى ونَفَى
يَاحَسِينْة الذَّاتْ والصَّفَا حَالتِى صِعْبَتْ إنْ أوْصِفَه
صَدَّ عَنِّى أصْحَابْ الصَّفَا والحَبِيبْ الكَانْ مُنْصِفَا
يَاشَرِيكْ الرُّوحْ الجَّفَا كَبْدَة الأُمَّالْ رَجَّفَا
ألْقَى مِنُّه قَبْلَ الوَفَاة وَرِّى زُولِكْ كَيفْ الوَفَا
هَلْ تَجَامِلْ أوْ تَعْطِفَا تَطْفِى جَمْرِى المَا إنْطَفَا
الحَنَانْ فِى صُورَة جَفَا وإنْحِرَامْ فِى قَالِبْ وفَا
قَامَتَة الخَلاَقْ هَفْهَفَا والنِّغَيمْ الرُّوحْ ألْهَفَا
عَينُة جَدْىَ الرِّيمْ ألْهَفَا عِيُونَه حَامْلَة سِيُوفْ مُرْهَفَا
فِى عِيُونِى الضَىْ إنْطَفَا وقَلْبِى يَالمَرْيُودْ طَفْطَفَا

[مها]

مية وتمانية

مِيَّة وتَمَانْيَة وسِتَّة وسِتَّة حَبِيبِى حَلِيلُو القَامْ يُومْ سِتَّة
لَوْ مَا المَعَنى المَرْسُومْ سَتَّة أنَا كُنْتَ أتْشَوَّمْ كُلَّ السَنَّة
يَا العُدَلَة الأرْبَعَة والسَتَّة أنْجِدُوا بَى ضَاقَتْ القِبَلْ السِّتَّة
حِلَيلَة المَاهَا خَشَّانَة لِهَيجَة العُمْرُو مَاشَانَة
الدُّرَّة الخَلَّتْ حَيشَانَة يَادَمْعِى تَسَاقَطْ عَلِشَانَه
الخَدْ السَّاطِعْ تَوْرِيدَو وَينْ أصْبَحْ شَرَّقْ يَامُريدو
شَالْ نُومْنَا وطَابْ تَغْرِيدُو وحَرَمْنَا الكَانَتْ بِتْرِيدُو
تَنَاجِى خَيَالَكْ أرْوَاحْنَا ونَزَاورْ حُوشَكْ فِى رَوَاحْنَا
إنْ شَاء الله العُودَة يَاسَمَاحْنَا إنْ شَاءَ الله نَوَاصِلْ أفْرَاحْنَا
بَطَّلْنَا الجَلْسَة والجَّمْعَه مَادَامْ فِنْيَارْنَا بدُونْ شَمْعَه
بَطْرَاكِى يَاطَيْبَة السُّمْعَه بَالعَبْرَة الخَانْقَة والدَّمْعَه
يَاحِلَيلْ المُهْرَة المَحْسُوسَه يَاحِلَيلْ الدُّرَّة المَدْسُوسَه
مَاطَرَقَتْ بَابَه الجَاسُوسَه العًودْ السَّالِمْ مِنْ سُوسَه
يَانِعْمَة العَافْيَة المَشْهُوَّه فَكَأنَّنَا بَعْدَكْ فِى هُوَّه
ألْ الانْتِ مِثَالِكْ مِينْ هُوَّ مِنْ عَينْ الحَاسِدْ [قُلْ هُوَّ]
رُبَّاتْ الحُسْنِ الفِى خِدُورِنْ فُرَاقِكْ كَاسِفْ لَبِدُورِنْ
تَبُشْ دَمَّاعِنْ فِى صِدُورِنْ يالدُّرَّة الكَانَتْ ضَىْ دُورِنْ
فِى أمْنِ اللهُ ورِعَايَه وسِرُورَاً دَايِمْ لاَ نَهِايَه
وَتَعُودِى بَلَدْنَا يَا آيَة بَقِدُومِكْ نَحْنَ نَبْلُغْ غَايَه

[مها]

حُوشِك حُورْ
حَوَى حُورْ
مُفْتَاحُو جَبَل الطُّورْ
بَيتِك حَرَم مَكَّه الحَوَاهْ السُّورْ
جُورِى يا جَاهْلَه بَى
كَذا الدَّهر ما يجُورْ
عَلشَان الكَريم نَشَاكِى
خُمَش مِنْ نُورْ
إسْمِك سَيدَه
وسِتْ مَرَاتبَ الجِّيلْ لَيس لَها نِدَيدَه
رَبْعَةَ القَامَة هِىَّ هِى زُبَيدَه
تَجْرِى أحكَامَه عَلى كُلَّ حَىْ سَيْدَه
نَسِيمَه هَبْ مَصْرِى
مِنْ هَوَى العَصْرِ
تَسْلِيمِى غَير حَصْرِ
مَسْرَح هَوَى العَصْرِ
لُونْ جسْمِكْ البِنْىِ
رَخْرُوخَ ومِتَّنِّى
حَسْرَاتُه يَسْبَنِّى
قُبَّالْ يَنُوبَنِّى
مِيهَا زَعَّاجَه
النَّاعْسَه أدْعَاجَه
يَاقُوتَه فى مُوجَه
شَقَّ السَّمَا أبْرَاجَه
أبْكِى وألاهِى بَرَاى
لاَ لُوحْ ولا قَرَّاى
الحَكَّمُو القَلاَّى
مَا ضَاقْ عَذَاب مِلاَّى

[مها]

سيدة

خَمْسَة وخَمْسَتِينْ فِى خَمْسَه
أسْقِطْ خُمْسَهِنْ تَجِدْ البِضَوىِ الأمْسَى
خَنَسَنُ لَو البَنَاتْ بَى خَنَاصْرُه الخَمْسَه
يَبْكِى ويَرْتَعِشْ مِنْ لَمْسَة الخَمْسَه



السيدة

يَا مَنْ أُمْرِتَ ولَمْ تَحَصِلْ رَسْمُه
فِنْيَارْ الدُّغُشْ بَرَقْ المِهْضَلِمْ بَسْمُه
كَاسْ الزَمْهَرِيرْ شِّتَانْ مِنْ لُونْ جِسْمُه
خَمْسِينِينْ وخَمْسَه المَعْنَى هَاكَ حَصَدْ إسْمُه

[مها]

حورية

شُوفْ حُوْرِيَة فِى غُرَفْ الجَنَّة
فُوقْ للبَدْرِ تَاجْ ودُجَنَّة
نُورْ وجَنَاتَه ضََّى دُجَنَّا
نُورْ البَْمَة ضَوَّى العَتْمَة
عَنْ تَصْوِيرِى حُسْنَهَا أسْمَى
حَبَّة وحَبَّة نَغْماً صَبَّ
فِي أُذْنِي نَغَمْ الجَنَّة
يَا بَيْضَاوِى خَدَّكْ ضَاوِى
مِسْكَكْ تَاوِى مَابِتْقَاوِى
دَلَعْ ومَحَنَّة مِنْ أنْفَاسَكْ مِسْكَ الجَنَّة
أسْألْ رَبِّى يَأمِنْ خُوفِكْ
مِىَّ تَكُونِي بَارِدْ جُوفِكْ
مَلَكْ الرَّحْمَة دِيْمَة يَطُوفِكْ ويَسْألْ عَنَّا

[مها]

هلل السعد

هَلَّلَ السَّعْدُ لَينَا هَبَّ بنَا بنَا هَيَا يَا أحبَا
تَزَخْرَفْ الرَبْرَبْ المُخَبَّا وهَمَى السِّرُورْ سَحَّ سُحْبُه صَبَّ
هُنَا النِّفُوسْ مُزِجَتْ مَحَبَّه رَعَى الالَه إلْتِقَا الأحِبَّه
أهُو الرُّبَى وهَذِهِ الرَّبَابَه أهُو الصَّبَا وهَذِه الصَّبَابَه
أهِى الشِّبِيبَه الرَّبَتْ هَبَابَه حَبَابْ حَيَاةْ النِّفُوسْ حَبَابَه
تَرَمَّيَتْ وأسْفَرَتْ نَقَابَه سَبَتْ قِلُوبْنَا صَوَابْنَا غَابَ
عِيُونَّنَا فِى جَنَّةٍ رَقَابَه قِلُوبْنَا ويْلاَهَا مِنْ عِقَابَه
إذَا إنْبَرَتْ بَهْرَجْ الرِّحَابَا بَدَتْ لَنَا الشَّمْسُ مِنْ سِحَابَه
أرَى الكَوَاكِبْ مُوَشَّحَى بَه إيَّاكَ والهُّنَّدْ إنْسِحَابَه
تَتِلْ أسِيسَاً وَترْ رَبَابَه وتْشُرُّو فُوقْ قَامَتَه الحَبَابَه
جَمَالْ ورِقَّه وزَهَا ولُبَابَه قَوَامَه مَالْ قَالْ قَفَلْتَ بَابَه
يَعَطِّلْ البَارِزَاتْ إيَابَه كَمَانْ تَشَحْتِفْ عَرِيضْ ثِيَابَه
تَهِمْ بِسُرْعَة ورَدِيفَه يَابَا يَكِيلْ عِيُونْ الحَبِيب هِيَابَه
تَعَطِّرْ النَّاسِمْ إنْ دَبَى بَه وتَنْدِى عَنْبَرْ ونَدْ حُبَابَه
أرْقَى مِنْ مُتْعَةْ الشَّبَابَا وأشْهَى مِنْ جُرْعَة غَبَابَه
تَزْدَرِى البَانَة فِى إنْتِصَابَه لَصَفْ جَبِينَه الخَفَى العِصَابَه
لكَمْ بَديلاً وكَمْ مُصَابَا وكَمْ جَرِيحْ والهَرمْ تَصَابَى

[مها]

نجوى

طَولنَا مَا بَينَاتا نَجوى يَا حَبِيبِى عِيدَه لَىْ
كَى أشَاهِد الحُسْن كُلُّه كَى أسَامر العَبْقَرِية
أنْظُر الرُّقَى والرَّشَاقة والسَبَايب الجَّوهْرِية
المُدلاةِ عَلَى التَّرائب المُضِيئة كَالثُّرَيَّا
تَنْثُر الدُّر المُنَضِّدْ بَى نَغَمَ عَزف مَرِيَّة
لَثَّه زَى سِين المَصَاحِف تَتَلألأ... كالثُّريَّا
ومُحَاصُرَه التِّنْيَة تِنُيَة ومِقَابْلَة النَّيَّة نَيَّة
والخِدُود النُّضر تنَدْىِ بالنِّعُومة الوَرْدوِيَّة
إن عَلَيك أثْنَيتْ فِاسْمِح هَذَا كَان نَذَراً عَلَىَّ
ومَا يَكُون ثَنَاى لَيك نَسْبَة الثَّرَى للثُّرَيَا
ظنُّو إنِّى كُنْت ظَامِىء حبَوُّا يَطْلُبوا لَى مَيَّه
قُلْت لاَلاَ عَلَىَّ لَحُّوا قُتَّ بَشْرب بَى عَيَنىَّ
كَونِى فِى فِرْدُوسْ حَيَاتِى لاَ نَصَب لا ظَما بَىَّ
رُوحِى سَابحه فى بِحُورن فِى محَاسِن جَوْهَرِيَّه
مَنْ هُنَا والحِصَّة تَمَّت لَيتَها دامتْ شِوَيَّه
يَا نَسَايم الفَجر أسْرِى أحْمِلى مِنِّى التَّحِيَّة
علَّهم يتَرَقَّبُوهَا مِنِّى بَى أطْيَب تَحِيَّة

[مها]

نفيس الدر

نَفِيسْ الدُّر الفِى النَّهْرَ يِا الطُّهرِ المِنْ الطُّهْرِ
أسَامِر شَاخِصْ أتْصوَّرْ أقِيسْ مَحْياكَ بالبَدْرِ
أوَزِّعْ بَالأمل شَوقِى ومُحْتَضِنْ الهَوَى العُذْرِى
أصَوِّرْ تَارَة وأتْأمَّل أسَلِّى العُزْلَ بَالذِّكْرِ
أخَالَكْ نَصْبَ عَينَىَّ مُقَلَّدْ أنْجُماً زُهْرِ
أفَكِّرْ فِى صَفَا لُونَكْ ويَلْهِمْنِى الوَحِى الشِّعْرِى
إنْتَ جَوْهَرَة عَقَلِى وأنْتَ الفِكْرَ فِى فِكْرِى
أنْتَ الرُّوحَ لَى رُوحِى وأنْتَ السَّامِرْ السِّحْرِى
أصُونْ سِرَّكْ عَلِى نَّفْسِى وأقَابْل النِّكْر بَالشُّكْرِ
إذَا رُوحْ الصَّبَا دَبَّ يَفُوحْ مَخْمُورِك العِطْرِى
أتْخَيَّل عَلِى هِلاَلِكْ تَمَوَّجْ لامِعْ الشَّعْرِى
أنْتَ الجَّنَّةُ الفَيْحَاءَ وأنَا المُحْتَدْ عَلِى الجَّمْرِ
إنْ شَاء الله مسَايْرُه تَكْفِينِى وأعِيشْ فِى نَارِى طُولْ عُمْرِى

[مها]

تذكاره

تِذْكَارُه أوْرَثْنِى أسَاً وأعْضَاىَ بَالنَّارْ إنْكَسَنْ
هَطَلَنْ دِمُوعِى المَا حَسَنْ هَاجِنْ شِجُونِى ومَا رَسَنْ
كُلَّ اللَّيَالِى عَسْعَسَنْ وعَينَىْ أبَنْ ينْعَسَنْ
أَنْدُبْ حَيَاتِى عَلَىْ سَطَنْ أَيَّامَاً أَسْهُمْ مَاخَطَنْ
وَينْ الرَّزِينْ وَينْ الفِطَنْ وَينْ إنْتَ يَانُورْ الوَطَنْ
كُلَّمَا سِمِعْ لِى شَادِى طَنْ أُغْمَى وإذَا البُلْبُلْ رَطَنْ
يَا الفِى سِوِيداَئِى قَطَنْ رَحْمَاكْ دِمُوعِى تَسَاقَطَنْ
أَطْرَى الخِدُودْ البِسْطَعَنْ وأطْرَى السِّيُوفْ القَطَّعَنْ
أَتْقَلَّى والكُونْ لَىَّ زَنْ وعِيُونِى يَهْمَنْ كالمُزَنْ
كَمْ هَمْ وكَمْ دَاءَ فِىْ خَزَنْ وَينْ إنْتَ يازَايْلَ الحَزَنْ
نَامْ العِبَادْ واللَّيْلُ جَنْ وعِيُونِى يَاخلْ لَجْلَجَنْ
أَطْرَى الدَّلَعْ أَطْرَى العَجَنْ حَالاً دِمُوعْ عِينَىَّ جَنْ

[مها]

متى ذكرتم

مَتَى ذُكِرْتُم جَرَتْ دِمُوعِى يَذُوبَ قَلْبِى كَذَا الشِّمُوعِ
بَهْجَتْ العَصْرِ والجِّمُوعِ كَبْدِى شَوْقاً إلْيَها مُوعِى
أبكْىِ إنْ جُزْتَ بَالرِّبُوعِ دَمْعِى مُسْتَرْسِلاً يَنُوعِى
أقْضِى هَكَذا السِّبُوعِ خَسَّرْتِى يَامُقْلَتَىْ طِبُوعِى
لَحِبْت حُبَّكْ فِى حِينْ وِضُوعِى بِكُمْ ولَكُمْ عِزَّتِى وخِضُوعِى
يَابَاقَة الحُسْنِ لَىَّ ضُوعِى أمَثِّلْ الطَّيْرَ فِى الفِرُوعِ
أنَادِى بَالِحلمِ يَامِرُوعِى وعَلْقَمْ الصَبْرِ صَارْ جِرُوعِى
أنَا الذَّى نَارَكُمْ دِرُوعِى سَهَرْ مَنَامِى وضَجَرْ ضِجُوعِى
وَفَّتْت كِلْيَتِى وجُوعِى وسُوحَكُمْ رَوَاحَتِى ورِجُوعِى