قال لي متفاهمين قلت ليه خلاص ان شاء الله في اليوم التاني قالت لي انا برد ليك بكرة ولمن جات في الصباح قالت لي أنا ما بقدر أتزوج زميلنا ده وذكرت لي بعض الاسباب قلت ليها انا حا أقول ليه مخطوبة واتفقنا علي كده بعد داك جاني هو في المكتب جا وقف قدام التربيزة قال لي اها قلت ليه اقعد قال لي ما قاعد نجيب ليك شاي ؟ قال لي ما داير شاي قلت ليه طبعا زميلتنا دي امبارح اخدو الفرصة ومشو كلمو ود عمها الكان خاطبا ورفض وقال ما بخلي بت عمو دي مهما كانت الظروف وبنات حواء كتار وربنا يديك الابرك منها قال لي يعني ما حا تتزوجني؟؟؟
قلت ليه طبعا لانها مخطوبة وانت جيت متأخر يعني ما حا تعرسني؟؟
قلت ليه طبعا ماحا تعرسك.. ضرب التربيزة وشتت لي الورق وقال لي او شاء الله القيامة تقوم..
عشان الناس كلهم يتلخبطو في بعض المهم قالا بطريقة فيها نوع من الالم والحسرة
أنا داعبتهم الاثنين بالقصيدة
ان شاء الله القيامة تقوم
عشان ريدك معاي ما بدوم
ناس سهرانة طوالي وناس طول الليالي تنوم
أشوف انا كيف حسابك يطول علي الوعد الدوام ممطول
وانا الشايف كتير أحباب بعيشو الريدة عرض وطول
أنا الشايل دوام همك وأريدك ريدة زي أمك
وأغير من غيرتي زاتا عليك أخاف أنا يا الخفيف دمك
ان شاء الله القيامة تقوم
وكل زول يمشي في حالو عشان ما قلبي يرجع يقول
حبيب الدنيا في بالو..
كان ممكن الحكاية تنتهي عند هذا الحد لكن أخونا الدكتور أحمد فرح شادول قال لي.
ابداَ الحكاية ماحصلت لزميلك دي حاصلة ليك انت وقام عمل قصيدة هاجمني بيها هجوم الشاعر شادول لحسن الزبير
ان شاء الله الحسادة تطير وتمتد السعادة تدوم
والضاق العزاب في الريد بكرة يعيش ويشبع نوم
وتقول القيامة تقوم؟؟
عشان حظك شقي ومشئوم وفتحن ليك بنات حواء
وجافك ليلة واحدة النوم بتقول القيامة تقوم؟؟
أنحنا لا عرفنا الريد ولازيك عشقنا الغيد
وحبينا القريب وبعيد وراجعنا القديم وجديد
ولا ضمانا حضن الليل مع الوجه البهي وغريد
ولا لليلشكينا حبيب اذا حتي العشقنا عنيد
ولا نظمنا في الحلوات غنا ومـــــــــوال
درر وقصيد
ولا لينا بن عوف غنا لا الصابر ولا الباكي
خيالك عندي يوماتي
صباح خيري ومساء أفراحي اعد ميعادو باللحظات
وسهري معاه صباحي عيونك فوق عيوني تنوم
وفوق الامي ترتاحي وريدك من عواتي الريح
المو وأضم عليو جناحي ...
تقول القيامة تقوم؟؟
أنحنا مع السعادة نسير مواكب فرحة هادرة هدير
نحنا نحب نعيش ونغير ونعلن ثورة التغيير
نـــــــــــــــاكل حـــــــــــــــــــــــــــب
ونــــــــــــــــشرب حـــــــــــــــــــــــب
نلـــــــــــــــــبس حـــــــــــــــــــــــــب
ونفرح بالمحبة نطير نعيش الريدة عرض وطول
كبيرنا ملك صغيرنا أمير وتسمع صوت هتافنا يجيك
ان شاء الله الحادة تطير وتكبر وتنسي يا زغبير
رد : انشاء الله القيامة تقوم وعشمي في الله ما شوية
أدخل جنة المأوي وهناك يدوني حورية
أتكي في الارائك أنوووووووووووووووم
بكل حبور وحرية
وأرتاح من ده مافي وقوم وامشي جيبلي وجيب ليا
أفارق دنية المعدوم والقي مطالبي بالنية
ولو حنيت للحم الطير تجيني الطيرة مشوية
عشانك كية يا دكتور تكون حوريتي خمرية
تجرجر ديسا ده المردوم ولهجتا خالصة عربية
أخلي ليك بنات حواء تحاحي صباح وعصرية
وتبقي عواطلي يا دكتور هنال لا مرض ولا شكية
هناك لا أذن سمعت ولا بعيونا مرئية
هناك حتي الرحيق مختوم وولدان طائفة دورية
لا عشوائي في الخرطوم ولا صفقات تجارية
صفي النية يا مهجوم بلاش هجمات هبوبية
وان شاء الله القيامة تقوم وتنجح مية في المية