حكايتى مع السودان حكايه

[AWAD FADIL]

بسم الله الرحمن الرحيم

السودان الحبيب وأحواله الما بتسُر

اخوانا العزاز داير أحكى ليكم حكايتى فى أسطر ومعاناتى وياريت تكون بالمفيد المُختصر
وانا عارف كل السودانيين بيعانو ذْىِ ولو ما كلهم اكيد عددهم ما بالقليل واكيد كُثر
تعليمى ما كملته , لانه ابوى مات والبيت ما فيه قرش أحمر, مع انه كنت شاطر ومن غير مذاكره بجيب فى الامتحان أكبر نِمر, وأهلى الفَْقر راكبهم ومدلدل كِرعينوا وبجرجر
قلت اجرب واكمل تعليمى وانا بمارس العمل الحر
مع البنايين المونه شلت والتراب حفرته حفر, وبعداك أمشى مدرسه النصر الثانويه بعد العصر
ونجحت وجبت فوق متوسط النجاح بنمر,لكنه مابنفع اواصل الجامعه وانا شغال فى العمل الحر
بجاى وبجاى قدر ما حاولت ما نفع , وقنعت خلاص وما فى غير أسُك القرش الحر
سافرت بورسودان وهناك شفت البحر والبواخر الكبيره وكل من بيشتغل بالبحر
وجات الفرصه وطلعت على باخره يونانيه , وبسرعه اتعلمت شغل البحر
وبقيت زول بحار عنده شهادات خبره فى عمل البحر
ولفيت بلاد كتيره وشفت شعوب فيها العجب, بلاد الارض كلها ثلج , وبلاد حالتها كرب
وبلاد كتاحتها تلوى وترابها ذى السودان بالظبط , وبلاد الفايكنج المافيها زول فقير تب
وبلاد المهاجرين استراليا وكندا ولقيت فرصه ممكن اتجنس !! ولكن اخوكم فَقُر ومافى غير اكون سودانى حتى لو كبوا الدولارات فى جيوبى كب
وشفت بلد اليانكى والهنود الحمر و بلاد آسيا وعرفت عادات من شعوبها الأسود والأصفر
والحمد لله تزوجت من بنات بلدى ورزقت منها اولاد وبنات وهسع مقمين فى مصر
وكل سنه بمشى السودان فى عز الكتاحه والحر وبقعد يا شهرين يا شهر
ورغم ارتفاع الاسعار المستمر قدرت بنيت لى بيت أهو ممكن اقول عليه عندى جحر
ولقيت فايده من خلال عملى فى البحر وهى انه النجاح فى اى حاجه بيشتركوا فيها مجموعه من البشر ويكون هدفهم واحد لازم يكللوا بالنجاح وطول ما الهدف واحد النجاح بيكون مستمر
والمثال الحى السفينه فى البحر فيها طاقم مكون من عشرون فرد اواكثر
ورغم اختلاف الوانهم والسنتهم وجنسياتهم , الهدف واحد وهو الوصول بالسلامه الى البر
و بنادى عبد الواحد وكل من يحمل سلاح خليك من فرنسا ونسوانها الجميلات وعويناتهم الخضر
ومهما اختلفنا بيننا او مع النظام لازم نوحد هدفنا ومجهودنا علشان نبنى سودانا حر
وهدفى حاليا الرجوع الى السودان رغم اسعاره الذى النار واحواله المابتسر
وداير ولدى الصغير يلعب فى ترابه ويلعب مع الجهال فى الارض الواسعه لعبة ام الحفر
ياريت الاقى صحه وعمر وارجع ذى ما كنت فى الثمانيات اشيل مونه واحفر الحفر
وراجع ليك يا سودان لترابك وعجاجك واملى فى الله احوالك تتصلح وتبقى تسر ورايتك مرفوعه فوق وبترفرف وبتحمى كل زول لانك بلد الرآى فيها حر

[استارو]

الاخ الكريم..AWAD FADIL ..
قلم شدا بحب وصبر و سطر الآلم بروعة الحرف ..
إلى الله المشتكى يأيها القلب و مالك غير الصبر ..
إطلالة نزف قلم ساحر إجاد التعبير و نثر الكلمات بشفافية احساس و روعة همس ..

اخى نتمنا من العلى القدير بأن نرجع الى ديارنا سالمين غانمين ورجلاً مثلك قد تعلم مالم يتعلمه اصحاب الجامعات فهى بالنسبة لك رحلة توغلت بها فى جمع ارجاء العالم ،،ومنا الله سبحانه وتعال عليك بنعمة الاولاد وجب علينا بأن يمن الله علينا بالرجوع وكلنا نتمناه .
اشكرك على ماسرته لنا وتقبل خالص تحياتى

تم نقله الموضوع الى مكانه الطبيعى

[AWAD FADIL]

السلام عليكم ورحمة الله وبركاته
الاخ الكريم ........... استارو
شكرا ليك على هذا الاطراء ودعواتك ونصائحك , وامنيتى ان يجمعنا الوطن الحببيب
انا اسف جدا على هذا التآخير فى الرد وانا ما تابعت الموضوع لاسبا ب خارجه عن ارادتى ومره ثانيه شكرا ليك

[أبعاج]

والله يأ خوى أنت لقيت فرص رهيبه البجيبك للقفر تانى شنو !! السودان ملحوق !! يأخى ظبط حالك ولم ليك شويه قريشات عشان العيال وبعدين تعال للفقر والكتاحه
هوووى العيون الخدر ديل بالله بيتفاتو !

[AWAD FADIL]

بسم الله الرحمن الرحيم
اخونا الكريم ابعاج ...... مشكور على المشاركه , واحب اوضح انه السودان ما بلد فقر ؟؟؟ والزول مننا فى اى مكان فى العالم محتاج لسند مالى او دخل عالى علشان يقدر يعيش ؟؟؟ وجمع المال او كنزه اذا صح التعبير محتاج مواصفات معينه فى الانسان , وانا ماعندى منها اى شئ !! علشان كدى وديت اسرتى السودان من ثلاثه اشهر مضت .
وداير اقول ليك من خلال تجربتى الشخصيه ,مافى حد معين لوضع مادى علشان تقول خلاص انا ممكن اقدر امشى السودان واعيش فيه؟؟ لكن بتجى اللحظه المناسبه ومن غير ما تحدد بتلاقى نفسك فى السودان !! ذى ما حصل مع ناس كثيره جدا غيرى!! وملاحظتى انه كل الناس المرقوا من السودان فى اواخر السبعينيات واوائل الثمنينات رجعوا واغلبيتهم ما عندهم حتى الجحر المذكور فى حكايتى مع السودان , وطبعا ده لاسباب كثير منها الانقطاع عن زياره البلد والتقدم فى السن.
اما بخصوص الكتاحه والعجاج البلوى ؟؟ طبعا كل اهل السودان ساهموا فى ذيادته وده بتدمير كل الغابات الكانت موجوده ؟؟؟ وبادعوا الله انه يدمر كل صاج عواسه فى السودان لانه ده السبب الرئيسى فى تدمير الغطاء النباتى.
واحكى ليك حكايه ممكن تقول انها من الخيال :: انا اتولدت فى ريفى شمال امدرمان وفى طفولتى فى الستينات كنا نلعب الكوره الشراب فى حته فاضيه وراء الحله فى الخلاء النجيله فيها طولها حوالى ثلاثين سنتمتر ؟؟ وكان بجى علينا وقت ما بنلعب الا جوه الحله لانه الخلاء طول الحشائش فيها يكون اكثر من ستون سنتمتر .
وعلشان تشوف المفارقات من مده بقول لمحمد ولدى كنا بنلعب الكوره هنا تصور ما مصدقنى ؟؟؟ وقال لى كيف كنتوا بتلعبوا الكوره هنا ؟؟ وفعلا له حق !! لانه الفجه كلها بقت حجار وحصحاص مكشر يقلب الدبابه ام جنازير.
وللحديث بقيه ........................

[الواضح]

لقد اعجبنى كفاحك وربنا يوفقك واكثر شئ اعجبنى حبك للوطن وانا ايضا درست خارج السودان ولا احب اسمع اى اغانى غير سودانية ولا اتكلم الا بالسودانى وقد تعود من اتكلم معهم على الفاظى وهم ليس باحسن منا وحتى النكت لا احب الا النكة المكتوبة بالعامية السودانية هذه طبيعتى واتمنى ان يفخر كل سودانى بسودانيته وان سوف يعود له يوما ما وحتى اشتراكى فى هذا المنتدى لان اسمه سودانى انا لك التحية والتقدير

[AWAD FADIL]

بسم الله الرحمن الرحيم
اخونا الكريم الواضح ...........................
شكرا ليك اخونا الواضح على المرور و الاطراء , وصدقنى كل اهل السودان يحبوا بلدهم حتى المعارضين منهم ؟؟ ولكن ساعات التعبير بيخونهم ,, وسؤ الاحوال بتضعفهم ؟؟؟ ولكن دائما هنالك الاقوياء والخيرين.
وداير اقول ليك حاجه ممكن تكون محيره لكن ده الواقع ؟؟ انا لفيت العالم تقريبا كله , وده من خلال عملى كبحار
يعنى ما للنزهه والمتعه ؟؟؟ ولكن على القول ( مجبر اخاك لا بطل ) .
وكنت كل ما اشوف بلاد جميله كلها خضره ونظام وعمل و جمال , كلما يذيد حبى للسودان !! ويداخلنى شعور واحساس انه نحن شعب ما اقل منهم وامكانيات السودان اكثر منهم بكثير جدا جدا , وانا فى رآى الشخصى بينقصنا الوعى القومى واتقان الفرد لعمله !!؟؟؟ وانشاء الله السودان حيكون من الدول ذات الشأن فى القريب
وممكن زول يقول لى انت بتحلم ؟؟ واقول وماله ؟؟؟؟ لغايه ما اموت لن اتوقف عن الحلم الجميل.
ولك التحيه ولكل الموجودين

[AWAD FADIL]

بسم الله الرحمن الرحيم

تحياتى لك اخونا ابعاج وبقيه الاخوه والاخوات المتابعين...................
نرجع لموضوع تدمير كل اهل السودان للغطاء النباتى بسبب صاج العواسه المدمر الرئيسى للتصحر الحالى؟؟؟
وطبعا الى الان مازال صاج العواسه شغال رغم انه الناس استحدثت الصاج ابو غاز !!! ومع انتشار بعض الوعى الا انه مازال انتشاره ضعيف وما بتلاقيه غير فى المدن وحتى المدن ما موجود بالكثافة المطلوبه.
وطبعا الاسباب كثيره والعقبات اكثر ؟؟ منها عدم وجود الغاز فى كل ولايات السودان الواسعه , والوضع الاقتصادى ,وعدم وجود دخل من اصله لكثير من الناس , وعلى العموم ربك يعدلها من عنده.
على العموم داير انقل ليكم صوره ثانيه من الخير والغطاء النباتى الكان موجود فى كل اقاليم السودان , خاصه وانه كل من اتولد بعد الثمنينات لم يشاهد مناظر الخضره والجمال اللهم الا اذا كان اتولد فى منطقه السافنا الغنيه
وطبعا فى الماضى كان فى منطقه من وسط السودان وحتى منطقه ابوحمد كان بيطلق عليها السافنا الفقيره !! ورغم فقرها الا انها كانت كلها اشجار وحشائش ووديان خضراء وهذا الوصف ليس من قرن مضى وانما حتى منتصف السبعينات ؟؟؟ واليوم ماذا نرى صحراء جرداء لاعشب ولاماء اللهم الا شريط النيل الضيق وحتى الغابات الكانت موجوده حول النيل تم بترها عن اخرها ؟؟ وطبعا الاسباب كثيره ؟؟؟؟
وبمناسبه نقل الصوره !! كان فى شجر من ضمن هذه الاشجار اسمه ( الطنضب) وبيطرح ثمار جميله اسمها ( الحنبك) وطبعا كل اهل السودان بيعرفوها والكل شبع منها ويا لمنظرها الجميل ولونها الاصفر والاحمر والبنفسج ومذاقها الحلو وانا شخصيا بشبهها بالكريز الاوربى , مع فارق الاهتمام بالزراعه طبعا.
ولعلمكم ده النوع الوحيد صاج العواسه لم يشارك فى تدميره ؟؟؟ لانه حطبه فى النار ما كويس وما بيشتعل ذى الانواع الاخرى , ولان النار بتاعته هادئه وبارده ودخانه كثيف !! استخدمته المرآه فى الدخان ؟؟؟
وياريت تقولوا معاى ربنا يدمر كل حفرة دخان ............................... يا رب
وللحديث بقيه...........................

[اسامه خضر محمد على]

بسم الله الرحمن الرحيم

السودان الحبيب وأحواله الما بتسُر

اخوانا العزاز داير أحكى ليكم حكايتى فى أسطر ومعاناتى وياريت تكون بالمفيد المُختصر
وانا عارف كل السودانيين بيعانو ذْىِ ولو ما كلهم اكيد عددهم ما بالقليل واكيد كُثر
تعليمى ما كملته , لانه ابوى مات والبيت ما فيه قرش أحمر, مع انه كنت شاطر ومن غير مذاكره بجيب فى الامتحان أكبر نِمر, وأهلى الفَْقر راكبهم ومدلدل كِرعينوا وبجرجر
قلت اجرب واكمل تعليمى وانا بمارس العمل الحر
مع البنايين المونه شلت والتراب حفرته حفر, وبعداك أمشى مدرسه النصر الثانويه بعد العصر
ونجحت وجبت فوق متوسط النجاح بنمر,لكنه مابنفع اواصل الجامعه وانا شغال فى العمل الحر
بجاى وبجاى قدر ما حاولت ما نفع , وقنعت خلاص وما فى غير أسُك القرش الحر
سافرت بورسودان وهناك شفت البحر والبواخر الكبيره وكل من بيشتغل بالبحر
وجات الفرصه وطلعت على باخره يونانيه , وبسرعه اتعلمت شغل البحر
وبقيت زول بحار عنده شهادات خبره فى عمل البحر
ولفيت بلاد كتيره وشفت شعوب فيها العجب, بلاد الارض كلها ثلج , وبلاد حالتها كرب
وبلاد كتاحتها تلوى وترابها ذى السودان بالظبط , وبلاد الفايكنج المافيها زول فقير تب
وبلاد المهاجرين استراليا وكندا ولقيت فرصه ممكن اتجنس !! ولكن اخوكم فَقُر ومافى غير اكون سودانى حتى لو كبوا الدولارات فى جيوبى كب
وشفت بلد اليانكى والهنود الحمر و بلاد آسيا وعرفت عادات من شعوبها الأسود والأصفر
والحمد لله تزوجت من بنات بلدى ورزقت منها اولاد وبنات وهسع مقمين فى مصر
وكل سنه بمشى السودان فى عز الكتاحه والحر وبقعد يا شهرين يا شهر
ورغم ارتفاع الاسعار المستمر قدرت بنيت لى بيت أهو ممكن اقول عليه عندى جحر
ولقيت فايده من خلال عملى فى البحر وهى انه النجاح فى اى حاجه بيشتركوا فيها مجموعه من البشر ويكون هدفهم واحد لازم يكللوا بالنجاح وطول ما الهدف واحد النجاح بيكون مستمر
والمثال الحى السفينه فى البحر فيها طاقم مكون من عشرون فرد اواكثر
ورغم اختلاف الوانهم والسنتهم وجنسياتهم , الهدف واحد وهو الوصول بالسلامه الى البر
و بنادى عبد الواحد وكل من يحمل سلاح خليك من فرنسا ونسوانها الجميلات وعويناتهم الخضر
ومهما اختلفنا بيننا او مع النظام لازم نوحد هدفنا ومجهودنا علشان نبنى سودانا حر
وهدفى حاليا الرجوع الى السودان رغم اسعاره الذى النار واحواله المابتسر
وداير ولدى الصغير يلعب فى ترابه ويلعب مع الجهال فى الارض الواسعه لعبة ام الحفر
ياريت الاقى صحه وعمر وارجع ذى ما كنت فى الثمانيات اشيل مونه واحفر الحفر
وراجع ليك يا سودان لترابك وعجاجك واملى فى الله احوالك تتصلح وتبقى تسر ورايتك مرفوعه فوق وبترفرف وبتحمى كل زول لانك بلد الرآى فيها حر

الله يسمع منك لاننا بالجد ملينا الغربه البقت كربه بس الله يصلح البلد ويديك طول العمر وتحقق امنيتك ويلعب ولدك ام الحفر ودمته بخير وعافيه