جافيتوها..الرجالة..!!

[الشلواح]

جافيتوها..الرجالة..
زاهر بخيت الفكى

تمت الناقصة..
كملتوها ..
ما قصرتوا ..يا شِبان..
مجازاً..
نقول شِبان ..
وريتُونا..
شَوفتُونا..
ما خليتوا حاجة..للنسوان ..
جافيتـوها..الرجـالة..
خالفتوها..الفطرة ..
فى الإنسان..
كريمات للمسوح..
توب جل.من فرنسا..
ديانا ..من لبنان..
خلطات من هنا..
بيها اتغيرت ألوان..
الشعر المُسبسَب..
يتلاصَف من اللمعان..
حتى الكلام..لَين ..
فى أخر المطاف..
جيتونا ..
بالعجب العجيب..
والأمر الغريـب..
جِبتوهوا الطلِح..
ولعتوها ..
الحُفرة للدُخان..
خليتوا تانى شنوا..؟
الكعب العالى..
والفُستان..!!
الحِنَة والباروكة..
والسِتيان..!!
إسكيرتِ.. معاهوا بلوزة..
يطَقطِق معاها لُبان..!!
نِسيتوها القِيَم..
أعراف بنى السودان..
الدين الحنيــــف..
عِفتنا والإيمــان..
تابعتوا الهـــوى..
بايعتُم الشيـطان..
ضليتوا الطريق..
أدمنتُم التـوهـان..
إرادة المولى خالفتُوها..
يا صِبيان..
محســـوبيـن ذكــور..
ما حاسبِنكم نِسـوان..
شاركتوهن..عدييل..
فى كلِ شِئ..
لِغاية حُفرة الدُخــان..

[شذي زهر]

اصلا الذي ديل ماهم رجال ابدا
عشان نقول عليهم جافو الرجاله

ويستحيل.....و يستحيل

رجل سوي وسليم ومعافي
يستحيل يعمل شي يخص النسوان
ماتحرق قلبك ساكت(اخي الشلواح) وتتوجع علي شي مامنه رجاء وفائده من الاول

[الشلواح]

اصلا الذي ديل ماهم رجال ابدا
عشان نقول عليهم جافو الرجاله

ويستحيل.....و يستحيل

رجل سوي وسليم ومعافي
يستحيل يعمل شي يخص النسوان
ماتحرق قلبك ساكت(اخي الشلواح) وتتوجع علي شي مامنه رجاء وفائده من الاول

ٌ
لك التحية..
وهل تبقى لنا قلبٌ يُحرق أصلاُ ..ولذلك قد وصفتهم مجازاً بالشباب وهم ليسوا كذلك..