عمّا قريب..وطنا..الباسمك كتبنا ورطنا

يشمل القصائد الشعريه , الشعر الشعبى , الحلمنتيش , والدوبيت .

المشرف: بانه

أضف رد جديد
صورة العضو الرمزية
FAISAL
مشاركات: 155
اشترك في: الاثنين 2007.4.16 9:53 pm
مكان: السودان

عمّا قريب..وطنا..الباسمك كتبنا ورطنا

مشاركة بواسطة FAISAL »

:Sudan: [frame="2 80"]عمّا قريب..
الهمبريب
يفتح شبابيك الحبيب
والحال يطيب
يا محمد أحمد تستجِمْ
والبيت يتمْ
تتلم تلمْ
تفرح فرح
تحلم حِلِم
كم تطمئن
حقك يجيك لافيهو شك..
يمكن واظن
ويفوتو همْ
والعدل يعمْ
وتغني أمْ
كادت تجن
كبر الولد جُوّا السجن
فاقداهو هى
دا كلو كلو ينتهى
دا كلو كلو ينبهى
زولاً تريدو وتَشْتهِى
تلقاهو فى
لا فى السِّجِن..
لا مختفى
لا يقولو ليك ما تمشي لى
دا كلّو كلّو ينتهى
دا كلّو كلّو ينتهى
دا كلّو
وطنا..
الباسمك كتبنا ورطنا
أحبك
مكانك صميم الفؤاد
وباسمك اغنى..
وتغنى السواقى
خيوط الطواقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك..
محنك
عميق الدروس
مجيد المهابه ومديد القوام
شبابك..
تشابك
شديد الزحام
أراهم..
وراهم
غبار الحياه
مداين..
تعاين
كأمّ العروس
تهلل..
تكلل
جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق..
اللى ما بودى ليك
وأعاف الصديق
اللى ما بهم بيك
معاك انتظارى..
ولو بالكفاف
وعنك بعيداً
أبيت الرحيل
وبيك اعتزاز الصباح الجميل
جميع الأغانى اتكالن عليك
جميع الأغانى اتكالن عليك
كلّو ينتهى
[/frame]
صورة العضو الرمزية
النيل الازرق
مشاركات: 202
اشترك في: الأحد 2007.8.26 11:14 pm
مكان: المهدية ح4
اتصال:

رد: عمّا قريب..وطنا..الباسمك كتبنا ورطنا

مشاركة بواسطة النيل الازرق »

روعة والله كل تلك الكلمات التى نثرها قلمك هنا

حتى ولو كانت بدون الحانها

يسلمووووووووو اخى فيصل على النقل الجميل

صورة
صورة العضو الرمزية
FAISAL
مشاركات: 155
اشترك في: الاثنين 2007.4.16 9:53 pm
مكان: السودان

رد: عمّا قريب..وطنا..الباسمك كتبنا ورطنا

مشاركة بواسطة FAISAL »

مشكور اخي النيل الازرق على المرور وتسلم
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

[mark=FFFF00]فيصل حقيقي الكلمات بتدخل القلب ...

ويالنيل الازرق الكلمات لحنها جواك ...

وتسلم تسلم تسلم فيصل..
[/mark]
صورة العضو الرمزية
FAISAL
مشاركات: 155
اشترك في: الاثنين 2007.4.16 9:53 pm
مكان: السودان

رد: عمّا قريب..وطنا..الباسمك كتبنا ورطنا

مشاركة بواسطة FAISAL »

شكر ابن ام درمان لحظة غروب ويسلم السودان
صورة العضو الرمزية
استارو
مشاركات: 1280
اشترك في: الأحد 2007.3.4 8:27 pm
مكان: السعودية

رد: عمّا قريب..وطنا..الباسمك كتبنا ورطنا

مشاركة بواسطة استارو »

اخى فيصل
ماأروع مانثرته لنا اناملك هنا
جاءت كلماتك قمة فى الابداع والشفافية
فلاتحرمنا من ابداعك ونحن دائماً فى انتظارك
تقبل تحياتى القلبية من الرياض مقرونة بالمحبة والاخاء والسلام.
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

عازة

:Sudan: :Sudan:

خليل فرح

****


عازة في هواك عازا نحن الجبال
وللبخوض صفاك عازا نحن النبال
عازة ما بنوم الليل محــــال
وبحسب النجوم فوق الرحال
خلقة الزاد كمل وأنا حالي حال
متين أعود أشوف ظبياتنا الكحال
عازة ما سليت وطن الجمــال
ولا أبتغيت بديل غير الكمــال
***
وقلبي لي سواك ما شفتو مال
خذيني باليمين وانا راقد شمال
عازة ما نسيت جنــة بلال
وملعب الشباب تحت الظلال
ونحن كالزهور فوق التلال
نتشابي للنجوم وانا ضافر الهلال
عازة جسمي صار زي الخلال
وحظي في الركاب صابه الكلال
وقلبي لسه ما عرف الملال
أظنه ود قبيل وكريم الخلال
عازة ما أشتهيت نوم الحجال
ولا السوار بكي في يمينا جال
وعازة في الفريق لي ضيق مجال
قبيلة بت قبيل ملأ الكون رجال
***
عازة شفت كيف نهض العيال
جددوا القديم تركوا الخيال
روحك أم سماح سري كالسيال
شجوا الفؤاد حيوا محسور الليال
عازة في الفؤاد سحرك حلال
ونار هواك شفا وتيهك دلال
ودمعي في هواك حلو كالزلال
تزيدى كل يوم عظمة ازداد جلال
***
عازة في حذا الخرطوم قبال
وعازة من جنان شمبات حبال
وعازة لي ربوع ام در جبال
وعازة في الفؤاد دوا يشفي الوبال
صورة العضو الرمزية
Musaab
مشاركات: 13
اشترك في: الخميس 2007.5.24 8:52 pm
مكان: السودان الجميل
اتصال:

رد: عمّا قريب..وطنا..الباسمك كتبنا ورطنا

مشاركة بواسطة Musaab »

والله روعـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــة
الله يديك العافيه
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

في الفؤاد ترعاه العناية



في الفؤاد ترعاه العناية



بين ضلوعي الوطن العزيز



لي عداه بسوي النكاية



وان هزمت بلملم قواي



غير سلامتك ما لي غاية



إن شاء الله تسلم وطني العزيز



ليه ما ارعي الوطن الرعاني



والدهاه اشيله واعاني



الشباب والشيب شجعاني



قالوا نفدي الوطن العزيز



بقاسمه حظه سواده وبياضه



وايه مرادي انا غير مراده



ارعي نيله اشجع بلاده



يشيلوا حمل الوطن العزيز



عندي وطني بقضيلي حاجة



كيف اسيبه واروح لي خواجه



يغني وطني ويحيجني حاجة



لي عدوك ياوطني العزيز



طبيعي اعشق صيده ورماله



وما ببيعه واقول مالي ماله



وما بكون آلة البي حباله



داير يكتف وطني العزيز



علمونا اهل الحضارة



كيف اضوق شان وطني المرارة



والمحن برضاي اصلي ناره



خوفي تحرق وطني العزيز



شفنا فيه جواب فيافي



والبطير وبسابق السوافي



ما مراده عفارم عوافي



بس يعظم وطني العزيز



نحن للقومية النبيلة



ما بندور عصبية القبيلة



تربي فينا ضغائن وبيلة



تزيد مصايب الوطن العزيز
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

شعبا تسامى/محجوب شريف

يا شعبا تسامي

ياهذا الهمام

تفج الدنيا ياما

وتطلع من زحاما

زي بدر التمام

تدي النخله طولها

والغابات طبولها

والايام فصولها

والبذره الغمام

قدرك عالي قدرك

ياسامي المقام

ياملهم رماحك

سناهاالصدام

ام در والطوابي

في صدرك وسام

ملامح كم

تسامح

تغضب لا تلام

همه وعبقريه

ذمه وفنجريه

ضد العنصريه

وتحلم بالسلام

فداك وفي حواك

يامدد الكلام عفوك

انت ورضاك

وبرنا ليك تام

وبحلم بهواك بي حسن الختام

دينك كم علينا

منك والدينا

واجمل مالدينا

من يوم السمايه

من قبل الفطام

منك كل حته

في الخاطر

صبابه

جنبك نبته نبته

نكبر نحن ياما

نسألك انت

وانت ورينا الاجابه

علمنا الرمايه

والحجا والقرايه

والمشي بي مهابه

في الضحي والظلام
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

أكتوبر الأخضر/محمد المكي ابراهيم




اسمك الظافر ينمو في ضمير الشعب ايمانا وبشرا

وعلى الغابة والصحراء يلتف وشاحا

وبأيدينا توهجت ضياء وسلاحا

فتسلحنا بأكتوبر لن نرجع شبرا

سندق الصخر ..

حتى يخرج الصخر لنا زرعا وخضرا

ونرود المجد..

حتى يحفظ الدهر لنا إسما وذكرا

بسمك الأخضر يا أكتوبر الأرض تغني

الحقول اشتعلت قمحا ووعدا وتمني

والكنوز انفتحت في باطن الأرض تنادي

بسمك الشعب انتصر ..

حائط السجن انكسر..

والقيود انسدلت جدلة عرس في الأيادي

كان أكتوبر في أمتنا منذ الأزل

كان خلف الصبر والأحزان أحيا..

صامدا منتظرا حتى إذا الصبح أطل

أشعل التاريخ نارا واشتعل

كان أكتوبر في نفضتنا الأولى

مع المك النمر

كان أسياف العشر

ومع الماظ البطل

وبجنب القرشي

حين دعاه القرشي حتى انتصر

بسمك الأخضر يا أكتوبر الأرض تغني

الحقول اشتعلت قمحا ووعدا وتمني

والكنوز انفتحت في باطن الأرض تنادي

بسمك الشعب انتصر ..

حائط السجن انكسر..

والقيود انسدلت جدلة عرس في الأيادي
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

[align=right]وأبو السيد عليه رحمة الله ...[/align][/u]
ـــــــــــــــــــــــــــــــــــ


يا وطني يا بلد أحبابي فى وجودي احبك وغيابي
............................................

يا الخرطوم يا العندى جمالك ....جنة رضوان

طوول عمري ما شفت مثالك

في أي مكاااان
............................................

أنا هنا شبيت يا وطني

زيك ما لقيت يا وطني

في وجودي احبك وغيابي

................................................

يحليلك ويحليل أيامك

على ليالي زمان

وقلبي عايش لي غرامك ما بعد غراام

.........................................

كانت أيام يا وطني

زى الأحلام يا وطني

........................................

بتذكر فيك عهد صبايا

على شاطئ النيل

حبيبي جالس حدايا

أسمر وجميل
.................................

أنا بفخر بيك يا وطني

بالروح افديك يا وطنى
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

[align=center]وطـــــــــن

عمر الطيب الدوش
[/align]

****

حأسأل عن بلد رايح
وافتِّش عن بلد سايح
واسأل عن امانينا
الِّي ما بتدِّينا
صوت صايِح
وأسأل وين مخابينا
إذا جانا الزمن
لا فِح
واسأل عن بلد مجروح
وعارف الجارحو ليه جارِح
وابكى على بلد ممدوح
وعارف المادحو
ما مادِح
واحْلم بي حلم مسروق
لا هو الليَلهْ
لا امْبارِح
أعلِّق في جناح سَفَري
خطابات لي زمن فجْري
وادْخُل من درِب سرِّي
لِكُلِّ مضاجع الأحزان
واضفِّر من شجر بلد
بروقاً مارْقَهْ من صدري
حأسأل عن بلد غاطٍ
لحدِّ الليلهْ في الوجْعَهْ
أَنُط فوق سرْجي واتْحزَّم
أقوم من وقْعَةْ
لي وقعًهْ
أخُتْ ايدي البتوجِعْني
على السأم البِراجِعْني
واسأل..
يا وطن يا بيتنا
ليه شوقك مواجِهْني
ليه حُبّك مُجهْجِهني
وليه تاريخ زمن خسران
موكّر لسَّه في شجني؟
حأكْتب لي شجر مقطوع
مسادير
يمْكِن يتْحرك
خطابات لي طِفِل مجْدوع
يقُوم
يجرى
يَقَع
يبْرُك
رسالَهْ لكلِّ قُم
رسالَهْ لكلِّ قُمْريّه
إذا دم الشقا اتوزّع
على كل البيوت
ما تْرِك
واسأل
عن وطن رايِح
وادّيكم خبر جارح:
بأنّو جميع جُموع الناس
حيفْضَلوا لا كُراع
لا راس
ونشترى في الدكاكين يوم
مسابِح من دموع الناس
مساحيق من هموم الناس
زَهَج
يتْعَبّا في الأكياس
ونعْلن في المزاد علناً
وترْغي الجوقَهْ والأجراس:
"!نبيع الطِفلَهْ والكرّاس"
واصْرَخ
! ياوطن! يا بيتنا
ليه ما تبقى لينا الساس
قَدُر
قَدُر ما تجري فيك
أفكار
يزيدوا الحَبْس والحُرّاس
قَدُر ما تجري فيكْ الخيل
تَدُوس الهيبَهْ
والإحساس
واسأل
يا وطن رايح
اذا كل القبور دَخَلت
بيوت الناس
بلا اسئذان
بلا صلوات
بلا أكفان
جريمَهْ اسائل الدّفَان؟
حريمَهْ طَلَب تَمَن قبري
من البايع في أيِّ مكان؟
واقولكَ يا وطن
رايح
واقولك يا وطن
آمر
سلام النّفْسِ ما كافر
ولا كافر
ولا كافر


ضلمــــــــــت

أقـــول

والشمْسِ في عِزّ الامل

تُهْتَ ومشيتْ

أقول يا نحن يا انتو و

بكيتْ

يا مواعيد

يا صباح من غير وسِم

تُهْتَ ومشيت

ما ضَلّمَتْ

ما بْتَعْرِف الزول البِجِيك

ولا البِجيكَ

بيعْرِفَك

حتى الشبابيك

والزوايا الكان بِتَجْمَع

في حنايا الشكوك

ضلّمتْ

أغْشاكِ يا نفسي الغريبَهْ

من همومي اطلِّعِك

القاكِ واقْفَهْ على الطريق

أحزان بِتفْرح

وتشْتبِك

أفراح بِتحْزَن

وترْتَبِك

لمّنْ رحلتَ مع الغُنا

عِز الأماني و

ضلّمـــــت

مَدّيتْ على الأمل القريب

أشواق كتيرَه و

قَصّرَتْ

في زاويهْ من ضُل الشجون

جابتْ ظُنونا و

قيّلَتْ

كلّمتَ أشجار الخريف

عن شوق نَمَا

في الوحشَهْ والزمن الأسيف

دلّتني اْفتِّش

في المغارِب

والمشارِق

عَن علامات

أو رصيف

ترقُد الأزهار عليهو

يا بنفسج

كُحْلي غالي

وبُتقالي

امشوا انتو

أنا البقِيف

ما ضلّمَـــتْ[/font][/b][/size][/color]
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: عمّا قريب..وطنا..الباسمك كتبنا ورطنا

مشاركة بواسطة لحــ غروب ـظة »

نحن ابنائك في الفرح الجميل

نحن ابنائك في الحزن النبيل

ونغني لك ياوطني

مثلما غنى الخليل

مثلما صدحت مهيرا تلهب الفرسان جيلاً بعد جيل

ونغني لحريق المك في قلب الدخيل ..


للجسارة .. مثلما استشهد في مدفعة عبد الفضيل

نحن ابنائك في الفرح الجميل

نحن ابنائك في الحزن الانبيل
أضف رد جديد

العودة إلى ”همس القصيد“